Gẹnẹsis 10
10
Uniẹn Avbe Ivbi E Noa
(I Krọnikol 1:5-23)
1Uniẹn avbe ivbi e Noa ọre ena khin (Siẹm, Ham kevbe Jafẹt), ne a miẹn wẹ iyeke uromwẹ amẹ ọre a na biẹlẹ ivbi iran. 2Ivbie Jafẹt kegha re Goma, Magọ, Madai, Javan, Tiubal, Mẹsẹk kevbe Tiras, iran ọrọre erha odede emwa ne a hẹ ẹre eni gie iran. 3Ivbie Goma kegha re Askẹnaz, Rifat kevbe Togama. 4Ivbie Javan kegha re ivbi Elisia, Spen, Saiprọs kevbe Rodẹs. 5Iran ọre erha odede ọghe iran ni yin eghute kevbe otọ ne amẹ lẹga vbe okun. Iran na ọrọre uniẹn Jafẹt ni vbe rre dọmwadẹ ogbẹ iran kevbe ẹvbo iran, ne dọmwadẹ ọghọe na vbe zẹ ẹvbo iran.
6Ivbie Ham kegha re Kus, Igipt, Libya kevbe Kenan, iran ọrọre erha odede avbe iran ne a he ẹre eni gie iran. 7Ivbie Kus kegha re Sẹba, Havila, Sabta, Raama kevbe Sabtẹka. Ivbie Raama kegha re ivbi e Sẹba kevbe Dedan. 8E Kus kegha mwẹ ọmọ okpia ne a tie ẹnrẹn Nimrọd ne ọ do gha re ọmwa ne ọ ka gha re ọkaokuo nọkhua vbe agbọn. 9Vbekpa iyobọ e Nọyaẹnmwa, ọ vbe gha re ohuẹ ne ọ sẹre vbe agbọn, ọna ọ siẹe ne emwa na yae kpitan wẹẹ, “Te Nọyaẹnmwa gha guẹ gha re ohuẹ nọkhua ne ọ ye vbe Nimrọd.” 10Usun ẹvbo ne ọ kagha khaemwisẹ yan kegha re Babilọn, Frẹk kevbe Akad, iran eheha kegha rre otọe Sina. 11Otọe nii ọre ọ ke kpao ya bu avbe ẹvbo Ninevi, Rehobọt-Iri, Kala, 12kevbe Resẹn ne ọ rre ẹkpo Ninevi kevbe Kala ne okpẹvbo.
13Igipt keghi gha re erha emwa Lidia, Anam, Lehab, Naftu, 14Patrus, Kaslu kevbe Kret ne ọ ghi do gha re emwa Filistin.
15Kenan kegha re erha Saidọn ne ovbi ẹre nokpia nọdiọn, Hẹt ọrọre erha odede iran ne a hẹ ẹre eni gie iran. 16Ke Jebus, Amọri kevbe Gegasa, 17Hiva, Aka, Saina. 18Avbe Avad, Zemara kevbe Hamat, vbe iyeke ọna, emwa ughughan kegha vẹ yọ gba ehe hia, yasẹ uwu ọghe Kenan, kevbe yasẹ Saidọn. 19Odẹ Gera ya sẹ Gaza gha rrie odẹ Sọdom, Gomorra, Adma kevbe Zẹboim yasẹ Lasa. 20Ena kegha re uniẹn ọghe Han, emwa ni rre dọmwadẹ ẹwae iran kevbe ẹvbo iran, dọmwadẹ ọghọe kevbe zẹ ẹvbo obọ ẹre. 21E Siẹm ne ọtẹn Jafẹt nọdiọn, ọre ọ vbe gha re erha odede avbe ivbi e Hibru hia. 22Ivbi e Siẹm ighẹ Ẹlam, Asiọ, Apaksiad, e Lud kevbe Aram, ọre ọ vbe gha re erha odede avbe emwa na a he ẹre eni ginna iran vberriọ. 23Ivbi uniẹn Aram kegha re ivbi avbe ẹvbo ne a tie ẹre Uz, e Hul, e Gẹta kevbe Mẹsiẹk. 24Apaksiad ọ re ọ gha re erha e Siẹla ne ọ biẹ Ebẹl. 25Ebẹl kegha mwẹ emọ ikpia eva, a kegha tie ọkpa vbọ e Pẹlẹg, rhunmwuda, te agbọn wannọ egbe vbe ẹghẹ ọre, a keghi gha tie nọkpa e Joktan. 26Ivbi uniẹn e Joktan keghi gha re ivbi ẹvbo ne a tie ẹnrẹn Almọdad, e Siẹlẹf, Elazamavet, e Jeva. 27E Hadoram, Uzal, e Dikla, 28Obal, Adimeẹl, e Siẹba, 29Ọfẹẹ, e Havila, kevbe Jobab. Ivbi uniẹn e Joktan ọ re iran hia gha khin. 30Ẹvbo ne iran yinrin keghi ke Mesia yasẹ Sefa ne ẹvbo ni rre odẹ ahọ ne uhunmwu oke. 31Ena keghi gha re ivbi uniẹn e Siẹm, iran keghi vbe gha rre dọmwadẹ ẹwae kevbe ẹvbo obọ iran. Iran na vbe gha zẹ ẹvbo obọ edọmwadẹ ọghọe. 32Iran na hia keghi gha re ivbi uniẹn e Noa, iran keghi vbe gha re dọmwadẹ ẹvbo, zẹ vbe obọ ne igiogbẹ edọmwadẹ ọghọe laghe. Ẹghẹ ne amẹ ya ro gue agbọn ghi gberra nẹ, ivbi uniẹn ivbi e Noa ọre emwa ni rre agbọn hia ghi gha khin.
Pilihan Saat Ini:
Gẹnẹsis 10: EDO96
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
@ The Bible Society of Nigeria, 1996