Mʉkpanganɨa 11
11
Ɨkáá yɛta ikongo ngɨyɔ Babɛlɨ
1Ya꞉ɓio jɛnɛ nɔ ngbinga mʉngana, ɨya ɓombi ɓaɓomu akɔ dɔdɔ, ɓa꞉ɓɨyaka-ɔɔ ta ʉɗaɗa mʉngana. 2Ɨyɛ ndʉ ɓa꞉ngwɨa kyɛnda anɨsa mesu aki ɨpá yachwʉchwaka-ɛɛ, ɓɔ꞉tɔgbʉka ʉmʉa mʉngana wɔta gbata gbata ɓɔ, amati ɔ ɨkʉmbʉ yɔ Sɨnalɨ, aki ɓɔ꞉tɔwolo-ɛɛ ɨkʉmbʉ. 3Ɓɔ꞉pʉnga yakanaka ati eɓo ɓɔ: «Tɨɓɛndeni biliki, nɔ, tɔmʉya muɗo ɓɔ ngbele.» Kʉdɔ, biliki a꞉tɨɓʉsalɨa tɨa ndʉ makopi, nɔ ɓʉtɔɓɛ ndʉ sɛmɛtɨ. 4Ga ɨɓɔ ɓata ɓɔ: «Tituɓonekeni gʉlʉ ata mʉja, nɔ ɨkáá mɛngana yɛta ikongo, mʉtʉ wɔngɔ wɔɓɔya ɓɔyanɨ ta akʉʉ ɔ ɓisi, ambɔ awɨa ngɨyeso ɨkyɛnda kyɛndanɨ. Iɗo ambɔ ta꞊tɨpanjaenimʉ amati ɔ dɔdɔ muɓomu.»
5Kʉdɔ, MAKWƆƁƗƗ ɔ꞉jo anɨna gʉlʉ, nɔ ɨkáá yɛta ikongo ngɨyɛ ɓombi ɓɔ dɔdɔ ɓa꞉ɓio akɔtuɓoko. 6Ga MAKWƆƁƗƗ ɓɔ: «Ɨna! Ɨɓɔ ʉɓa, ɓa tɨta ɨfananja mɛngana, nɔ ɓa tɨa kʉ ʉɗaɗa mʉngana. Dɔ ɨɓɔ ʉɓa, ɓɔpʉngɔ tɨa ɓɔ, tɨa ɨmanɨ yaɓʉnengyo ɓata akɨa yaka ngɨyɛ ɓɔkwaisio kɨa? 7Ndʉ ya gɔ ɓanɨ, tujeni inani aɨsɨ, nɔ, tɔbunjo ʉɗaɗa ngʉweɓo, ambɔ ɓatɨɓiomʉ ɓata anʉkana ati eɓo pɔ bele.» 8Kʉdɔ, MAKWƆƁƗƗ ɔ꞉ɓʉnanjaniso ga ngbii akɔ dɔdɔ muɓomu. Kʉdɔ, tɛa nga yɔ tuɓoko gʉlʉ yɛ꞉maa ɨyɔ, tɨa kʉndʉ ananɨ. 9Yaka ngɨyɛ ɓa꞉sʉa-ɔɔ ɨkʉmbʉ ngɨyɛnɛnɨ, ino ɓɔ Babɛlɨ#11:9 Babɛlɨ: pɔ ɓɔ nɔ Ebelenia yanʉkanɨa tinetine ndʉ «bunjo», ya꞉kwa ɓanɨ. Dɔ ɨda ngɨyɛ MAKWƆƁƗƗ a꞉bunjo-ɔɔ ʉɗaɗa ingainga, ɨyɛnɛnɨ. Nɔ ɨda ngɨyɛ MAKWƆƁƗƗ a꞉nanjaniso-ɔɔ ɓombi ingainga akɔ dɔdɔ muɓomu, ɨyɔ kʉ ɨyɛnɛnɨ.
Ɓanɔnɔ ɓɔ Nɔa anɨngwa akɔ Sɛmʉ akɔɓɔya akɔ Abalama
10Uduɓa ngʉwɔ Sɛmʉ wa ɓɔ: Mago kapɨnɨ ambise ɔ mipo kʉta maja, Sɛmʉ nɔ mago tɨa mɨa mʉngana, ɔ꞉tɔnɔta tɨa Alɨpakɨsadɨ.
11Ambise angɔ akɔnɔta Alɨpakɨsadɨ, Sɛmʉ a꞉kwaa ɓata-sɨ ta mago mɨa ɓɔkʉ. Nɔ, ɔ꞉nɔta ɓata kʉɔ ɓana ngaɓɔmɔ ɓegue nɔ ɓeɓoi.
12Ɨyɛ ndʉ Alɨpakɨsadɨ a꞉ɓio tɨa nɔ mago ɓatɛkɛɓɛ ɓaatʉ nɔ ɓɔkʉ, ɔ꞉tɔnɔta tɨa Sɛla. 13Ambise angɔ akɔnɔta Sɛla, Alɨpakɨsadɨ a꞉kwaa ɓata-sɨ ta mago mɨa ɓɔgɨna nɔ ɓeetu. Nɔ, ɔ꞉nɔta ɓata kʉɔ ɓana ngaɓɔmɔ ɓegue nɔ ɓeɓoi.
14Ɨyɛ ndʉ Sɛla a꞉ɓio tɨa nɔ mago ɓatɛkɛɓɛ ɓaatʉ, ɔ꞉tɔnɔta Ɛbɛlɨ. 15Ambise angɔ akɔnɔta Ɛbɛlɨ, Sɛla a꞉kwaa ɓata-sɨ ta mago mɨa ɓɔgɨna nɔ ɓeetu. Nɔ, ɔ꞉nɔta ɓata kʉɔ ɓana ngaɓɔmɔ ɓegue nɔ ɓeɓoi.
16Ɨyɛ ndʉ Ɛbɛlɨ a꞉ɓio tɨa nɔ mago ɓatɛkɛɓɛ ɓaatʉ nɔ ɓɔgɨna, ɔ꞉nɔta Pɛlɛgɨ. 17Ambise angɔ akɔnɔta Pɛlɛgɨ, Ɛbɛlɨ a꞉kwaa ɓata-sɨ ta mago mɨa ɓɔgɨna nɔ ɓatɛkɛɓɛ ɓaatʉ. Nɔ, ɔ꞉nɔta ɓata kʉɔ ɓana ngaɓɔmɔ ɓegue nɔ ɓeɓoi.
18Ɨyɛ ndʉ Pɛlɛgɨ a꞉ɓio tɨa nɔ mago ɓatɛkɛɓɛ ɓaatʉ, ɔ꞉nɔta Lɛʉ. 19Ambise angɔ akɔnɔta Lɛʉ, Pɛlɛgɨ a꞉kwaa ɓata-sɨ ta mago mɨa ɓepini nɔ ɨsaɓɔkʉ. Nɔ, ɔ꞉nɔta ɓata kʉɔ ɓana ngaɓɔmɔ ɓegue nɔ ɓeɓoi.
20Ɨyɛ ndʉ Lɛʉ a꞉ɓio tɨa nɔ mago ɓatɛkɛɓɛ ɓaatʉ nɔ kapɨnɨ, ɔ꞉nɔta Selugi. 21Ambise angɔ akɔnɔta Selugi, Lɛʉ a꞉kwaa ɓata-sɨ ta mago mɨa ɓepini nɔ mɛɗɨanɛka. Nɔ, ɔ꞉nɔta ɓata kʉɔ ɓana ngaɓɔmɔ ɓegue nɔ ɓeɓoi.
22Ɨyɛ ndʉ Selugi a꞉ɓio tɨa nɔ mago ɓatɛkɛɓɛ ɓaatʉ, ɔ꞉nɔta Naholi. 23Ambise angɔ akɔnɔta Naholi, Selugi a꞉kwaa ɓata-sɨ ta mago mɨa ɓepini. Nɔ, ɔ꞉nɔta ɓata kʉɔ ɓana ngaɓɔmɔ ɓegue nɔ ɓeɓoi.
24Ɨyɛ ndʉ Naholi a꞉ɓio tɨa nɔ mago ɓatɛkɛɓɛ ɓapɨnɨ nɔ ɨsaɓɔkʉ, ɔ꞉nɔta Tɛla. 25Ambise angɔ akɔnɔta Tɛla, Naholi a꞉kwaa ɓata-sɨ ta mago mɨa mʉngana nɔ tɛkɛɓɛ nɔ ɨsaɓɔkʉ. Nɔ, ɔ꞉nɔta ɓata kʉɔ ɓana ngaɓɔmɔ ɓegue nɔ ɓeɓoi.
26Ɨyɛ ndʉ Tɛla a꞉ɓio tɨa nɔ mago ɓatɛkɛɓɛ mɛɗɨanɛka, ɔ꞉nɔta Abalama, Naholi nɔ Halanɨ.
27Uduɓa ngʉwɔ ɨfananja nga yɔ Tɛla wa ɓɔ: Tɛla a꞉nɔta ɨyɔ Abalama, Naholi nɔ Halanɨ. Ɨyɔ, Halanɨ ɔ꞉tɔnɔta tɨa Lɔtɨ. 28Halanɨ a꞉nɔtanɨa aki anɔ Ʉlɨ amati ɔ ɨkʉmbʉ yɔ Mɛsɔpɔtamɨa. Ɨyɔ, Halanɨ ɔ꞉tɔwo ɓata kʉ inani akɔ ɨkʉmbʉ ngɨyɛ anɔ Kaladɛa, ɨsɛ Tɛla sɨ ta kʉɔ. 29Kʉdɔ, atɨ Abalama nɔ Naholi ɓa꞉sɨka ɓoi. Ɨya ɔ Abalama, a꞉ɓio ino ɓɔ Salaɨ. Yakamɛngana, ɨya ɔ Naholi, a꞉ɓio ɨyɔ ino ɓɔ Milika. Milika a꞉ɓio nɔ manye ata moi ino ɓɔ Ɨsɨka, ɨɓɔ ɓana ɓɔ Halanɨ#11:29 Halanɨ: pɔ ɓɔ Halanɨ ngɨa a kʉ manye ɔ Naholi. 30Salaɨ a꞉ɓiomʉ yangɔ nɔ mwana, dɔ a꞉ɓio isude.
31Kʉdɔ, Tɛla a꞉sɨka mwana angɔ Abalama, ɨho nɔ munenu wangɔ Salaɨ, nɔ mwana ɔ mwana angɔ Lɔtɨ, ɨya mwana angɔ Halanɨ a꞉mʉnɔta. Kʉdɔ ɨɓɔ ɓaɓomu, ɓɔ꞉ngwɨa kyɛnda anɔ Ʉlɨ ɨkʉmbʉ yɔ Kaladɛa, anɨsa anɔ Kanana. Yakamɛngana, ɨyɛ ndʉ ɓa꞉ɓɔya anɔ Halanɨ, ɓɔ꞉tɔwolo ɨkʉmbʉ tɨa ananɨ. 32Tɛla a꞉wo tɨta ananɨ anɔ Halanɨ, ɔɓieni tɨa nɔ mago maɓomu mɨa ɓepini nɔ ɓɔkʉ.
Pilihan Saat Ini:
Mʉkpanganɨa 11: buuN
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2021, Wycliffe Bible Translators, Inc.