УблапӀэ 9
9
Ябгъонэрэ шъхьэр
1Зиусхьаным Нухьэрэ ыкъохэмрэ ынэшӀу къащифи, къариӀуагъ: «Зыхэжъугъахъу, зыжъугъэбагъу, чӀыгум тиз шъухъу. 2Къышъущэрэщынэх, орэкӀэзэзых зэкӀэ чӀыгум тет хьэкӀэ къуакӀэхэри, зэкӀэ ошъогу бзыухэри, зэкӀэ чӀыгум щыцохъорэ щыпшыхэри, хы пцэжъыехэри; ахэр шъо Ӏэрылъхьэ къышъуфэсшӀыгъэх. 3ЗэкӀэ псэушъхьэхэр гъомлапхъэу къышъосэты, уц шхъуантӀэр нахьыпэкӀэ къызэрэшъостыгъагъэу.
4Ау псэр – лъыр – джыри зыхэлъ лыр шъумышхы#9:4 Джуртхэм зэралъытэрэмкӀэ, псэр лъыр ары зэпхыгъэр..
5Шъо шъупсэу хахыгъэм пае а лъыр зыгъачъэрэр, хьэкӀэ къуакӀэми, цӀыфми, ыкъош ищыӀэныгъэ Ӏызыхыгъэр шъыпкъэ дэдэмкӀэ згъэпщынэщт.
6ЦӀыфым ылъ зыгорэм ыгъачъэмэ,
укӀакӀом ылъ нэмыкӀым ерэгъачъ.
Сыда пӀомэ Тхьэм Ежь итеплъэу цӀыфыр къыгъэшӀыгъ.
7Шъо зыхэжъугъахъу, зыжъугъэбагъу, чӀым тиз шъухъу!»
8Тхьэм Нухьэрэ ащ ыкъохэмрэ ариӀуагъ: 9-10«Мары Сэ шъори, шъо къышъукӀэлъыкӀощт лӀэужхэми, псэ зыпытэу псыпхъонтэрым къикӀыжьыгъэ пстэуми: бзыухэм, былымхэм, хьэкӀэ къуакӀэхэм, зэкӀэ чӀыгум тет псэушъхьэхэм Ӏуагъэ адэсэшӀы. 11Сэ Ӏуагъэ Сэррэ шъоррэ тазыфагу дэсэлъхьэ: псыкъиушхом тапэкӀэ зэкӀэ псэ зыпытыр ыгъэкӀодыжьыщтэп. Ащ нахьыбэрэ чӀыгур псыкъиушхом ыхъункӀэжьыщтэп».
12-13ЕтӀанэ Тхьэм ыӀуагъ: «Сэ шъоррэ псэ зыхэлъ пстэоу шъо шъукӀыгъухэмрэ зэзэгъыныгъэ къыжъудэсэшӀы: Сэррэ чӀыгум щыпсэухэрэмрэ тазыфагу Ӏуагъэу дэлъым инэшанэ хъунэу, Сэ сищабзэ лэгъупкъопс пщэмэ ахэсэгъэуцо. 14Сэ чӀыгум ошъуапщэхэр къызышъхьарызгъахьэхэкӀэ, лэгъупкъопсыр ошъуапщэмэ къащылъэгъощт. 15Джащыгъум Сэррэ шъоррэ, зэкӀэ псэ зыпытхэми тазыфагу дэлъ Ӏуагъэм Сегупшысэщт, ащ нахьыбэри зэкӀэ псэ зыпытыр зыгъэкӀодырэ псыкъиушхори щыӀэжьыщтэп. 16Лэгъупкъопсыр пщэмэ ахэтмэ, Сэ ар къэслъэгъунышъ, Сегупшысэщт мыкӀодыжьын Ӏуагъэу Сэррэ чӀым тет пстэухэмрэ тазыфагу дэлъым». 17Тхьэм Нухьэ къыриӀуагъ: «Джары Сэррэ чӀым щыпсэурэ пстэухэмрэ тазыфагу Ӏуагъэу дэлъым инэшанэр».
Нухьэрэ ыкъохэмрэ
18Нухьэ ыкъохэу псыпхъонтэрым къикӀыгъэхэр: Щэм, Хъам, Ефэт. Хъам КъэнаӀан ятагъ. 19А нэбгырищыр Нухьэ ыкъуагъэх, чӀыгум тет цӀыф лъэпкъхэр зэкӀэ ахэмэ къатекӀыгъэх.
20Нухьэ чӀыгур ылэжьыщтыгъэ, ары апэрэу сэнашъхьэр зыгъэтӀысхьагъэр. 21Санэ ешъуи, Нухьэ утэшъуагъэ хъугъэу ищэтырэ пцӀанэу чӀэлъыгъ. 22КъэнаӀан ятэу Хъамэ ар зэрэпцӀанэр зелъэгъум, къикӀыжьи, ылъэгъугъэр ышитӀу къафиӀотагъ. 23Щэмырэ Ефэтрэ щыгъынхэр атамэмэ атырадзыхи, кӀыбкӀэ зэкӀакӀохэзэ, ятэ дэжь чӀахьэхи, ятэ ипцӀэнагъэ агъэбылъыгъ. Анэгухэр фагъэзагъэхэпти, ятэ ипцӀэнагъэ ахэмэ алъэгъугъэп.
24Нухьэ зэшъогъэ санэр кӀэкӀыжьыгъэу къэущыжьыгъ, ыкъо нахьыкӀэ къыришӀагъэр зешӀэм, 25къыӀуагъ:
«КъэнаӀан нэлатыр терэф.
Ар ышыхэм япщылӀхэм япщылӀыжьэу хъущт».
26ЕтӀани къыӀуагъ:
«Зиусхьанэу Щэм и Тхьэ щытхъушхор ий!
КъэнаӀан ежь ыкъошмэ пщылӀы афэхъущт.
27Ефэт ыӀэ илъмэ Тхьэм ахерэгъахъу!
Щэм ищатырмэ Ефэт ащэрэпсэу!
Ежь КъэнаӀан Щэмы пщылӀы фэхъущт».
28Псыкъиушхом ыуж Нухьэ джыри илъэс шъищырэ шъэныкъорэ къыгъэшӀэжьыгъ. 29Илъэс шъибгъурэ шъэныкъорэ къыгъашӀи, Нухьэ лӀагъэ.
Pilihan Saat Ini:
УблапӀэ 9: АдыТГ
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Институт перевода Библии, 2002-2023