Matiusu 4
4
O Ibilihi ma haeke iwitaili o Yesusika
Maruku 1:12-13; Lukasa 4:1-13
1De o Yesusu wiohiki ipahaino de ahao Ma Jou o Womaha wihihira-hira o tonaka ma kakaahaika abe genangoka ko iwa o nyawa. De Una wiao genangika la ka idadi o Ibilihi ma haeke iwitaili Unangika. 2Ho o Yesusu ai dekana ai futu moruatino abe womanoa o tonaka ma kakaahaka, de gea Una duru ko wolo-olomua ngaro o wange eko o futu. De ai futu moruata ibooto genangoka ho duru iwihafinoka. 3De ahao o Ibilihi ma haeke abe yatobataili o nyawaika, ena gea iboaino o Yesusino de itemo ato, “Nako ngona igou-goungu Ma Jou ai Ngofaka, abeika o hakaruino naa ngona nomadiai ani roti la idadi ani inomo, la ani datorino gea de nomahitaana abe ngona to Una ai Ngofaka.”
4Masara o Yesusu wopaluhu enangika wato, “Koua! Angamoi naga moi ai Demo-demoka ihitulihukuoka ato,
‘O nyawa manga wowango gea ka o rotinoua dika,
masara gea ihititioo Ma Jou o Yawe ai demo mata-mataika,
ho to Una ai demo enangoo o nyawa yoperelu la yomahitoofo genangino.’” # 4:4
Higalioli 8:3
5De ahao o Ibilihi ma haeke iwiaoli o Yesusu o Yerusaleeme ma kotaika, abe ma kota gea duru itebini Ma Jou ai himangoka ma titi womadingakoka. De o Yerusaleemoka de iwikelenga o Yesusu Ma Jou ai Tau ma deturoka abe ma ngi gea duru ikurutiye ho nako o nyawa yaotaka genangoka de yauku gea ka idadi yohonenge. 6De genangoka o Ibilihi ma haeke iwitemo o Yesusika ato, “Nako ngona nagou-goungu Ma Jou ai Ngofaka, abeika nomangumo genangoka de nauku dau ma tonakuku. Angamoi naga o demo moi abe ma dihiraino ihitulihukuoka ma titi Ma Jou ai Ngofaka abe gea itemo ato,
‘Ma Jou wahuloko ai momalaekata la ona iniduhunu Ngonaika,
ho gea inilegono de manga giama la ato ufa nogila-gila ma tonakuku
de idadi abe ani badanga ma odiri.
Ho ai momalaekata gea inigoana Ngona
la ngaro ani lou yodigi o hakaruku ma ko ihigunoaua la gea idadi.’” # 4:6
Higiriiri 91:11,12
7De o Yesusu wopaluhu enangika wato, “Masara Ngohi ko idadiua tohingounu ani demoika gea angamoi nagali ihitulihukuoka Ma Jou ai Demo-demoka o hitiari naa abe itemo ato,
‘Ngini duru ko idadiua niwitaili nia Jou o Yaweika.’” # 4:7
Higalioli 6:16
8De o Yerusaleeme ma kotaka de yosobo de o Ibilihi ma haeke iwiaoli o loku moi ma tubuiye abe duru kohagurutiye. De ma tubuoka gea iwihimatoko o Yesusika o tonaka homoi-homoiika o dunia ma amokika abe de ma kokuahaka. De ihidaere Unangika ma titi o kota amomoi ma rupa ma hohailoa la ato iwihihafini o Yesusika la gea wohafini o kota-kota gea ma kuahaika. 9De gea iwihimatoko Unangika de iwitemo ato, “Naa ma hohailoa mata-mataika ka idadi tonihidotodoaka ngonaika la ahao idadi to ngona ani kuahaka, iti ngona natilabukuku ahi himangoka de nomahuba ngohino!”
10De o Yesusu wopaluhu enangika wato, “Ngona o Ibilihi, ka nohinoaka dika! Angamoi Ma Jou ai Demo-demoka naga moi itemo ato,
‘Ngini kiani nimahuba nia Jou o Yaweika dika,
de ko idadiua utuika ngini nioleleani.’” # 4:10
Higalioli 6:13
11De gea ahao o Ibilihi ma haeke iwinoaika ho isoboka. De naga Ma Jou ai momalaekata yoboa Unangino la iwiduhunu o Yesusu ma ngioka gea.
O Yesusu womulaenge wahingahu-ngahu Ma Jou ai hininga o Galilea ma tonakoka
Maruku 1:14-15; Lukasa 4:14-15
12De ipahaino de naga o popareta ma nyawa ko iwisanangiua o Yohanesika abe watobaohi-ohiki o nyawa, ho iwitaoko de iwibuioka. Ho ka de o Yesusu woihenino abe ma titi o Yohanese iwitaokoka ho Una wanoaika o Yudea ma tonakoka gea de wolio ai kapongo o Nasaretika abe ena gea o Galilea ma tonakoka imanoa.
13De ipahainoli o Nasarete ma kapongo wanoaikali de woiki la womanoali o Kapenaumu ma kapongoka gea. De o Kapenaumu ma kapongo enangoo gea imanoa o Galilea ma tonakoka, abe duru o Galilea ma akere ma ngooto ma ngigorino. De ma tonaka gea abe ma dodihiraino de idadi nanga tofora o Yakubu ai ngofaka o Sebulono de o Nafatali to ona yahinooto manga totoforauku manga tonaka. 14De abe ma oraha o Yesusu woiki to ona gea manga tonakika de Una wohingodumu Ma Jou ai Demo-demo moi abe ma dodihiraino o Yesaya wohitulihukuoka. De gea o Yesaya wotulihi wato,
15-16 “De naa moi tinihingahu abe ma titi o Galilea ma nyawa abe ona yogogere o Yorodani ma akere ma honongaka de abe manga ngi itigino de o ngekomo abe o nyawa yatobaniiki nako yoiki o Galilea ma akere ma ngooto ma ngigorino. De o Galilea ma nyawa manga tonaka gea ena abe ma dodihiraino de idadioka to Sebulono de to Nafatali manga totoforauku manga tonaka genangoka. De genangoka nagali abe ko o Yahudi ma nyawaua ona duru ko manga ngoe yomanoa ma tonakoka gea. De hokonaa tinihingahu. De ahao o Galilea ma nyawa gea iwimake Womatengo abe Una duru wahitararono onangika ma titi Ma Jou ai hininga. Abe ngaro ma dihiraino de to ona manga hininga duru ihidofufutuoka ho ko itararonua onangika abe ma titi Ma Jou, masara ahao ka idadi yataoko ai hininga de duru itararono. De ona genangoka ma dihiraino yotobamodongo o hone-honengika, masara ahao ka idadi ihioriki itararono ma titi Ma Jou ai duduhunu onangika.
Ho gea ngohi tahiketero onangika tato ona o Galilea ma nyawa yomaketero abe hoka o nyawa ka ihikaika yogogere o fufutu ma goronaka de ahao o dararono moi abe duru kohadararono ona ahao yamake. De onangoka ma dihiraino de o hone-honenge hoka yatamunoka ma fofongo onanguku, masara ipahaino de itawangeoka onangoka.” #4:15-16 Yesaya 9:1-2
De hokogea o Yesaya ai demo ma dihiraino abe to ena ma dumutu o Yesusika, angamoi Una gea wodadioka hoka o Dararono ma amoko o Galilea ma nyawaika.
17De o Kapenaumu ma kapongoka gea de o Yesusu womulaenge wahingahu-ngahu o nyawaika wato, “Ngini kiani nitoba de nioporetoka nia howo-howono gea la nianiikoli Ma Jou ai hiningaika dika. Angamoi ma oraha itigioka abe Ma Jou wahikoano ai nyawa o duniaka naa.” Ho hokogea o Yesusu ai demo wahingahu-ngahu onangika.
O Yesusu wahoko yaruata yotobahoma-homa o nawoko la iwinii-niiki Unangoli
Maruku 1:16-20; Lukasa 5:1-11
18De ma moiuku o Yesusu wotagi-tagi o Galilea ma akere ma ngooto ma ngigorino de genangoka naga Una wamakeika yahinooto o ria-dodoto. Abe ma riaka gea ai romanga hinooto, abe moi iwihiromanga o Simono, de ai romanga moioli o Peturusu. De ai dodoto ai romanga o Andareasa. De ona yahinooto yomatobalingi-lingiri o nawoko la genangoka yomamake o tiwi, de abe ma oraha o Yesusu wamake de ona manga gogiriaka manga homa yodotumo o akeruku. 19De o Yesusu wahoko onangika wato, “Niaino nihiniiki Ngohi la tinihidadi nitobahoma-homa o nyawa.” 20Ho ka de wahoko ibooto de manga homa gea yanoaika de o Yesusu iwiniikoka.
21De o Yesusu wogila-gilali de abe ona yahinooto iwinii-niiki, ma ko yokurutikauahi de yamakeoli naga o ria-dodoto yahinooto, de ona gea manga romanga o Yakobusu de o Yohanese, to Sebedeusu ai ngofa-ngofaka. De gea ona yahinooto yogogerukuoka manga ngotiri ma amo-amoko ma goronaka de manga baba, abe ona mata-mata manga homa ihidodiai genangoka. De onangoo wahoko onangika la onangoo ka idadi iwiniiki o Yesusu. 22Ho ka de Una wahoko onangika de manga ngotiri yanoaika de manga babaoo ka iwidogunoaika la o Yesusoli iwiniiki.
O Yesusu wahingahu-ngahu de wahitogumu o nyawa manga popanyakeino
23De o Yesusu wotagi-tagi o Galilea ma tonaka ma amokika abe waloo-loliti de wotulu ma kapongo homoi-homoiika de wadotoko genangoka abe o Yahudi ma nyawa manga dodotoko ma tau-tauoka. De Una wahingahu onangika o Abari ma Rorahai abe ma titi Ma Jou woboaino la wahikoano o nyawa o duniaka naa. De ma oraha gea de o nyawa abe de manga panyakeoka ma rupa o kia dika naga, masara Una wahikokitogumu manga popanyakeino gea.
24De o abari abe ma titi to Yesusu gea o nyawa yomaketeade-ade o Galilea ma tonaka ma amokika de ka hiadono o Siria ma tonakokaoo yomaketeade-ade ma titi o Yesusu, abe o Siria ma tonaka gea igogere o Galilea ma tonaka ma datekoka. Ho ko yotedekanuahi de o nyawa yopopanyake duru ko manga ngoe yao manga gurutoka de yaino o Yesusino la ato Una wahitogumu ona gea. Abe ngaro manga kangela o kia dika naga manga badangoka masara Una wahikokitogumu ona mata-mataika. De ona abe naga de manga popanyakeoka irupa-rupa, abe naga utu manga badanga ma modorou, de utuoli o ibilihi yabare-barene, de utuoli yohone-honenge, de nagali utu abe manga badanga ma kiahonanga ma hononga ihonengoka. Ho ngaro manga badanga ma kangela o kia dika naga, masara Una ka idadi wahikokitogumu ona mata-mataika. 25De ma titi to Una ai kuaha gea hiadono Una ngaro o kiaika dika woiki masara o nyawa duru ko manga ngoe iwihideefotino Una. Abe naga utu o Galileaino ma nyawa, de naga utuoli o Kapongo Ngimoi ma tonakino yoboa, de utuoli o Yerusaleeme ma kotaino yoboa, de nagali o Yudea ma tonakino, de naga utuoli abe o Yorodani ma akere ma honongaka de yaino yoboa la iwinii-niiki o Yesusika.
Pilihan Saat Ini:
Matiusu 4: MJDD
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Gereja Firman Allah, Yayasan Misi Masyarakat di Pedalaman
