Matius 15
15
Enombawi ogagu lagagwa yugadek wene
(Markus 7:1-13)
1Andien, ap Varisi menda nin inim, it Ala wene vagago welagagwa menda nin inim, o Yerusalem en Yesus adema wagu lagagwarik, yugugu dugwit, 2“Hat hane welagwi menda yi, nggarogo yiluk adat nenombawi ogagu dogop yugadek ogasagwi ako hekbaluk, ininggis adat vaga horekdek ugunat erom nelagwi?”
3Yugugu lagagwama, Yesus en, “Eke, hit ogo, nggarogo yiluk, endak Ala en, ‘Yerogo ogarup, nderogo ogarup,’ yagagi wene ako weyak erogo hekbaluk, adat henombawi ogagu lagagwa yugadek ako ogasagwi? 4At Ala en iri dugwit, ‘Hinisa-henasin enagayuk wutu dugwit, enane des erogo hunggu dogones.’ Eke, ‘Hit henane vaga hinisa-henasin mbidarogo bisamwi halok, hirat hambusogom o,’ yiluk, yagagi ovara, 5hiren yugu dugwit, ap ambien isa a, asin a, yugugu dugwit, “An nangge wokhirup imbiti ovara, vage Ala ake bitigigirikmu,” yiluk, yugurugu dogopwak yiluk, yugerelagwi. 6Anderogo yugerelagwi vaga, ap ako angge asin isa wogeregetek dugwit, enagayuk wutitek ovara hiren, ‘Andi segat ogagen o,’ yagalagwi. Andi vaga Ala en, ‘Yerogo ogarup, nderogo ogarup,’ yagagi wene ako, hekbaluk, hit henombawi ogagu lagagwa yugadek ako siyabagu hinisaliga. 7Hit henagavoval yagalagwi humwis yi! At navi Yesaya en hit anderogo ogagu hiniselok, avyarat yagagi. Aren iri dugwit:
8‘It avakwa yi, enane vaga An ninis adup ogasagwi ovara,
enendawi andi, An ninim adumu erogo agarwik o.
9 #
Yesaya 29:13 yokhanes. It yugareralagwi andi, avakwa enane yerogo ogagu dogop yagalagwi ako adigat yugareralagwi atma,
enam warogo An ninis siyabanilagwi o,’
yiluk yagagi ako andi, hit yi ogagu hiniselok, at yagagi higi o,” yugeragagi.
Nano vaga nenendawi weyak okninivisiga wene
(Markus 7:14-23)
10Yugirigya lagagirik, Yesus en avakwa wonggalek wisane ako yanggup yugeragagi wagu lagagwama, yugirigya dugwit, “Henaruk hobaluk dibagu dogones. 11Henelagapma nelagwi menda andi vaga weyak okhinivisigadek. Ata, weyak menda wenggelogo baluk henelagapma en wulu wandiga ako vaga adigat weyak okhinivisiga.”
12Yugirigya lagagimu, At ane welagwi menda ako wagu lagagwarik, At yugugu dugwit, “Wene yukneregen ako andi, it ap Varisi menda enaruk hunggu lagarwik, enanggon humbutu sigin a, dek a?”
13Yugugu lagagwama, At Yesus en yugirigya dugwit, “Yi menda ndi menda An Nasin mbogot vaga menda en yagatek halok andi, omanggen inimat mondok hinisogon. 14It ap inil mbupuk ininggis vapak laguselok andi, iperen at wen bavulikmu nggedek wambusogom atma, it andi, inil mbuk dugwit avakwa woginiviluk lendagwi menda atma, hekbisines.”
15Yugirigya lagagimu, at Peterus en, “Wene wakhegek atok hwilagago ovagak yegen ako andi, adem des erogo yukneran.”
16Yugugu lagagimu, At Yesus en, “Hit ogo ao dibagetek dugwit, yuknisagwi? 17Yi menda ndi menda enelagapma nelok, enagaum elola wambigya lagarik, beyak helendagwi ako hit hinunggut yi? 18Eke, henendawima en wenggelogo baluk, henelagapma en wulu wandiga ako vaga weyagat okhinivisiga. 19Henendawima en weyak ogarup ombasagwi inim, ap watwis inim, ap ogwa werek hwa agun werek hegek ogasagwi inim, wanggis welagwi inim, enonggop welagwi inim, huluk wene enovaga biselagwi inim, mbidarogo biselagwi inim, ako andi, henendawima enat wilisiga atma, 20henendawima en wilisiga ako vaga hit weyak okhinivisiga. Hininggis adat vaga horekdek dugwit, erom nelagwi andi vaga en weyak okhinivisigadek,” yiluk, yugeragagi.
Hwa Kanaan menda avyarat imbitigi wene
(Markus 7:24-30)
21At Yesus o andoma hekbaluk, o Tirus Sidon lagagi. 22Lagya lagagimu, hwa Kanaan menda ambi o andoma en wulu wagya lagagirik, ane ombok vaga At Yesus yugugu dugwit, “Ai, Nasin, Daut ombao wai! An neyak hwavyak madis endawima nunggwigya lagagirik, eyave mondok warek agarik atma, nabwa hanen o.”
23Yugogogi ovara, At Yesus ane onggo ambi yugigitek mbuverek welagagi. Mbuverek werekma, At ane welagwi menda akoen wagu lagagwarik, At yugugu dugwit, “Hwa yi, ane nggengges yagan nenamusek wandiga yi, haithanen!”
24Yugugu lagagwama, Yesus akoen, “It ap Iserali menda ndomba yelemele yagagwa ovagak agarwik ako adigat bigisa lapwak o, yiluk, At Ala en lakbani wagagi,” yagagi.
25Iri lagagimu, hwa ako wagya lagagirik, avema seve yiluk inis siyabagya dugwit, “Ai, Nasin. Sek okbanin o.”
26Yugugu lagagimu, Yesus en, “It avyak-mariduk enagarom ininggimu en, haurogo yangge napwak yiluk wogerelagwidek.”
27Yugugu lagagimu, hwa akoen, “Anderogo ovara Nasin o. At eyangge werek akoen mbanggu ndalek vaga erom ninggya hegek, enggen lisilogo avema wambisiga andi, it yangge-at nelagwi o,” yiluk, yugogogi.
28Yugugu lagagimu, Yesus en, “Hwa yi wai. Hat avyarat nembeten ako andi, mondok iya adigat atma, hat hendawi hogop embeten ako wane-wane-at okbagaliga,” ao yugugu hegek, at eyak idup ako mondok segat agagi.
Avakwa wisane sek okbogogi wene
29At Yesus ako o andoma hekbaluk, sup o Galilea inamut yanggadek omban vaga wagya lagagirik, ndom vaga inggya lagagirik andoma hora yagagi. 30Hora yiluk, werekma, it avakwa wisane en inisok weyak inim, inil mbuk inim, ininggis-inisok nggedok-hobok erek inim, enanedek inim, ap nin wisane inim, woginiviluk, Yesus adema bisa wagu lagagwama, sek okbogogi. 31Okbugu lagagimu, enanedek menda enane yugwi, ininggis-inisok nggedok-hobok erek menda sek agwi, inisok weyak menda sup lagwi, inil mbuk menda inil hugwi, ogagwi ako it avakwa wonggalek welagagwa akoen inil inigu lagagwarik, “Iya,” yiluk, vok yugu dugwit, ap Iserali Enasin Ala ako inis adup ogagagwa.
Ap eneyave 4.000 erom ugurogo wogeragagi wene
(Markus 8:1-10)
32Anderogo ogagu lagagwarik, Yesus en At ane welagwi menda ako yanggup yugeragagi wagu lagagwama, yugirigya dugwit, “It avakwa wisane yi, ninim nogo henggam yugu dugwit, enagarom ovok dek agarikmu, enabwa o. Erom nenggetek suvaga lagu dugwit, inivuput bisaup atma, erom uvup hegek, Anen enamwa lakbisaup nanggon.”
33Yugirigya lagagimu, At Yesus ane welagwi menda akoen, “O harumu yoma avakwa enawi valek ambi mondok dek atma, it avakwa wisane wonggalek agarwik yi, enagarom ndatak napwak yiluk, erom nggoma belali lamwi?”
34Yugugu lagagwama, Yesus en, “Hit erom roti maren vagago agipik?”
Yugirigya lagagimu, iren yugugu dugwit, “Nit un erom roti 7, eke, ikan mariduk ambukum yenamat inim vagago agurik.”
35Yugugu lagagwama, avakwa wisane wonggalek ako wen vaga hora yupwak yiluk, yugeragagi. 36Yugirigya lagagirik, erom roti 7 inim, ikan inim, inggimu wigya lagagirik, “Ala wa!” yiluk, ugurogo At ane welagwi menda ako wogirigya lagagimu, iren avakwa wisane inim welagagwa ako menageragagwa. 37Menageragagwa ako nunggu lagagwarik, enagaum agya lagagimu, roti inim, ikan inim, nin higitlagagi ako andi, mburiyum 7-at elagapaga erogo yedogo bagagwa. 38Eke, it erom nunggugwa ako, akwa inim, avyak mariduk inim, eneyave ininggis dinggilinipitek ovara, ap eneyave adigat andi, 4.000-at wogeragagwa.
39Eke, At Yesus en it avakwa wisane wonggalek welagagwa ako enamwa lakbugu lagagirik, mburis vaga nunggwigya lagagirik, o Magadan ari wagagi.
Pilihan Saat Ini:
Matius 15: nbq2013
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
