Matius 13
13
Ap awi angge lisilit lagagi wene
(Markus 4:1-9; Lukas 8:4-8)
1O andi hudi At Yesus umwa en wulu wagya lagagirik, inamut yanggadek omban vaga akoma hora yagagi. 2Akoma werekma, yi avakwa ndi avakwa wisane erogo At adema homari wagu lagagwama, hobo iri lagagimu, mburis vaga inggya lagagirik horaik dugwit, it avakwa wonggalek wisane ako is embet vaga andenam mendek inigik, 3At Yesus en yi wene ndi wene wisane-at wakhegek vaga yugeragagi.
Yugirigya dugwit, “Ap ambi awiangge lisilisiga menda en awiangge lisiligiluk lagya lagagirik, 4lisilit lagya hegek nin andi suvaga wombalit lagagi. Suvaga wombagagi ako andi, swa wagu dugwit, ovok nenggek lagagwa. 5Nin andi wen helep iri vaga wombalit lagagi. Wombalit lagya lagagirik, helep iri vaga wombagagi ako andi, wen ambukumat halok, avuduk inggigi ovara, 6helep iri vaga atma, omanggen sek erogo yago dekma, mo en dis iri dugwit, mbuk agagi. 7Eke, nin yoangga hedangga aik werek anggelekma wombagagi. Yoangga hedangga aik werekma wombagagi ako andi, avuduk inggigi ovara, adok-adok angge ako inggya dugwit, mbalogo wombanggigi. 8Eke, nin wen mudis vaga wombalit lagagi. Wombalit lagagi ako eyave-at inggya lagagirik, enggen ombogat yugu dugwit, adem nin enggen 30 yugu, nin enggen 60 yugu, nin enggen 100 yugu, ogarit lagagi.” 9Yugirigya lagagirik, “Henaruk werek halok andi, des erogoat hunggu dogones o,” yiluk, yugeragagi.
Nggarogo yiluk Yesus wene wakhegek vaga yugeragagi wene
(Markus 4:10-12; Lukas 8:9-10)
10Yugirigya lagagimu, it Yesus ane welagwi menda ako wagu lagagwarik, At yugugu dugwit, “Hat nggarogo yiluk avakwa wene wakhegek vaga yugeraliga?”
11Yugugu lagagwama At Yesus en, “Hit ap yi, mbogot vaga menda avema bigigaup wene At Ala agose endawima hwilago welagagi ako, hinilup arovovok yiluk, Aren hudilogo yukheraup imbitigi ovara, it ap andi At hudilogo yugeraup embetetek. 12Saen ambi agarik halok, ambi inim ovaga hondalogo wogeramindikmu, wisane-at arisogon o. Eke, saen ambi dek halok, ambukumat agarik akoat haurogo hidigya hagup.
13‘It avakwa andi inil helagwi ovara, yedok hegetek,
eke, enaruk hulisagwi ovara des erogo dibagetek,’
atma, An wene wakhegek vaga yugeraliga.”
14-15 #
Yesaya 6:9, 10 yokhanes. “At Ala en yugugu hegek yugeraliga menda navi Yesaya en iri dugwit:
‘It avakwa yi inil hugwi, enaruk hunggwis,
enendawi dibetaluk nadema wagwi,
ogaguselok,
Anen sek oginipu neyaoen,
iren “Nenendawi anye helep ovagak agwi, ninaruk nggulup agwi, ninil huvulagwi, ogarusogom o,” yiluk, mikhedagagwarikmu,
enaruk hunggik adigat ogarusogom ovara, dibasogombuk,
eke, inil hegek adigat ogarusogom ovara, yedok hasogombuk,’
yiluk, yugeragagi ako atma des yupwak yiluk, wene wakhegek vaga yugeraliga.”
16“Ovara, hit andi, hinil hugwi, henaruk hunggwis, ogasagwi atma, henendawi adenggenat umbutu dogones. 17Andi, hit hinil helagwi ako, it navi-navi o muk welagagwa inim, it ap enendawi eve sek dugwit welagagwa inim, it wisane en, ‘Ninil helao ale,’ umbutu lagagwa ovara, ao atma, hegetek-at welagagwa. Eke, hit henaruk hulisagwi ako, it ogo, ‘Nenaruk hulup hogop ale,’ umbutu lagagwa ovara, hunggitek-at welagagwa, yiluk, yukheraliga o,” yugeragagi.
Awi angge lisinggigi ako adem des erogo yugeragagi wene
(Markus 4:13-20; Lukas 8:11-15)
18Yugirigya lagagirik At Yesus en, “Ap awi angge lisilit lagagi wene wakhegek vaga yukhirigi ako, adem des erogo yukheraliga atma, henaruk hunggu dogones. 19Awi suvaga wombagagi ako andi, it avakwa Ala avema bisaup wene enaruk hobaluk, dibagetek iniselok, at mondok weyak adigat ogasiga Sile akoen wagya lagarik, wene sek menda enendawima yago ako haurogo wolok wilisiga. 20Eke, awi wen helep iri vaga wombagagi ako andi, it Ala wene enaruk hobaluk, enendawi adenggen vaga mbikit welagwi ovara, 21wene ako enendawima omanggen segerogo yagetekma, ndugwis ambiat welagarwik, wene wagao ako vaga anggin-mbanggin okbugwis, idup-mbidup okbugwis, oginipuselok, ‘Wene yi nenanggon o,’ yiluk, hekbisiluk wilisagwi akoat. 22Eke, awi yoangga hedangga aik werek anggelekma wombagagi ako andi, it wene enaruk hulisagwi ovara, enendawi anggin dugwit wen vaga menda adigat wenggelit nagwis, enangge dek arup menda hegek, enendawi hunik okhedegek nagwis, ogasagwi ako vaga Ala wene wagagwa ako sovalogo hekbagarwikmu, eyave enggen yiklagetek-at agaruk. 23Eke awi wen mudis vaga wombagagi ako andi, it wene enaruk hunggu lagarwik, dibaluk ogasagwi vaga enggen yugu dugwit, adem ambi 30 yugu, ambi 60 yugu, ambi 100 yugu, ogasiga ako aro,” yiluk, yugeragagi.
Gandum awi sek inim weyak inim avuduk inggigi wene
24Yugirigya lagagirik, Yesus en wene ambi wakhegek vaga yugirigya dugwit, “At mbogot vaga menda avema bisaup ako andi, ap ambi awi sek menda eyavumu yagagi ako wane-wane. 25Yatya lagagimu it avakwa ugun nogo yugusigik, at ap eyavup andok inim ndup adigat agarik akoen wagya lagagirik, gandum awi sek yago anggelekma akoma awi weyak menda lisilogo baluk winggigi. 26Lisilogo baluk wunggu lagagimu, gandum awi yago ako avuduk inggya lagagirik, enggen yugu hegek, awi weyak menda anggelekma lisinggigi ako sigam agagi.”
27“Sigam agya lagagimu, ap eyavup andok ayelomani ako, at adema wagu lagagwarik, yugugu dugwit, ‘Nenasin wai. Gandum eyave awi sek menda adigat heyavumu yagagin ako? Awi weyak menda anggelekma winggas andi nggenam en wuk yagas?’
28“Yugugu lagagwama, ap akoen, ‘Dek o. At ninim ndup adigat agurik akoen at awi weyak menda lisinggas higi o.’
“Yugirigya lagagimu, ayelomani akoma en ‘Nit lagu dogomundik, awi weyak menda anggelekma avuduk winggas andi, henogo wibaup ndak a, dek a?’
29“Yugugu lagagwama, ‘Dek o. Awi weyak menda hinggu dugwit, gandum inim henlarugwi en, hekbaup. 30Enggen mbalup andi ao atma, iperen inggya dogopwak yiluk, hekbas. Eke, enggen mbalup amor ari wagya halok andi, anen it enggen mbalisagwi menda ako yugirigya dugwit, “Awi weyak menda andi, hali napwak en endak henogo heda matwis, eke, gandum halok wonggalogo an baligama andoma bagwi,” ogarupwak yiluk yugerayogon,’ ap eyavup andok akoen yugeragagi,” yiluk, Yesus en yugeragagi.
Vudok enggen vaga wakhegek yugeragagi wene
(Markus 4:30-32; Lukas 13:18-19)
31Yugirigya lagagirik, wene wakhegek ambi inim yugirigya dugwit, “At mbogot vaga menda avema bisaup ako andi, ap ambien yo vudok enggen#13:31: O Israel andoma yo vudok ako adik, yo vudok yoma ako ndatak dek. O Israel andoma yo vudok andi enggen maduk, eke yo eyave andi dua ata tiga meter-at agarik. Eke, vudok enggen ako vaga it bumbu inim, minyak inim ogasagwi atma it yavumu yarisagwi. wogogo eyavumu yagagi ako wane-wane. 32Yi yigyo ndi yigyo enggen andi ombok hegek, vudok enggen andi eve madugat agarik. Enggen madugat ovara, avuduk inggya dugwit, yi menda ndi menda yavup yagoma dagasiga ako eyave horok madugat hegek, yo vudok ako ombogat inggya lagarik, inggis elabwak wiganggarikmu, yirwa-ndirwa wagu lagarwik, inggis elabwak vaga enawi valheda nunggwisagwi o,” yugeragagi.
Roti virisiga menda vaga wakhegek yugeragagi wene
(Lukas 13:20-21)
33Yugirigya lagagirik, wene ambi wakhegek vaga yugirigya dugwit, “At mbogot vaga avema bisaup ako andi, ragi roti virisiga menda ovagak. Andi, hwa ambien ragi roti virisiga menda ako horok madugat tepung wisane 25 kilogram inim hudilogo wombabaluk, ragi roti virisiga ako menda inim mudinggu halok, ovok erogo virisiga o,” yiluk, yugeragagi.
Adem anderogo yiluk, wakhegek vaga yugeragagi wene
(Markus 4:33-34)
34At Yesus en it avakwa adema wonggali waguselok, wene yugirigya lagagi ako ovok erogo wene sigam erogo ambi yugirigya lagetek. Ata wakhegek adigat yugirigya lagagi. 35#Mazmur 28:2 yokhanes. At yugirigya lagagi ako andi, At Ala en navi ambi yugugu hegek yugirigya dugwit:
“An wene yukhirigya dugwit, wakhegek adigat yukhirigya,
eke, o wen-mbogot yi ogagagi hudi vaga en wene hwilago adigat welagagi akoat yukhirigya,
ogagya dogosogon o,”
yiluk, yagagi ako, atma des yupwak yiluk, At Yesus en avakwa wakhegek vaga yugirigya lagagi.
Awi weyak menda lisinggigi adem yugeragagi wene
36Andoma en, it avakwa wonggalek welagagwa ako hekbisiluk, umwa nunggwigya lagagirik, werekma, At ane welagwi menda ako Yesus adema wagu lagagwarik, At yugugu dugwit, “Awi weyak menda yavumu lisinggigi wene wakhegek yukneregen ako adem mbilinogo yukneran.”
37Yugugu lagagwama, Yesus en, “Ap awi sek menda lisinggigi ako andi, An Ap-At Endaklagagis yi aro. 38Eke, yavup ogasagwima ako, yi awi ndi awi o wen vaga yoma ovok erogo andi. Awi sek menda ako andi, it avakwa Ala inim hunik dugwit At avema agarwik akoat. Eke, awi weyak menda ako andi, at mondok weyak menda aburi akoat. 39At ap eyavup andok inim ndup dugwit, awi weyak menda lisinggigi ako, Sile-at. Enggen mbalup amor ari wagyaim andi, o hivis oklarugwi akoat. Eke, it enggen mbalisagwi menda ako andi, it Ala yonggo lakbisa wandiga menda malaikat ako. 40It avakwa en awi weyak menda halok, wonggalogo hali hunisagwi ako ovagak, andi o hivis oklarugwi akoat.”
41“An Ap-At Endaklagagis akoen, it malaikat ako lakbisa wagya neyalok wagu dogogupik, it Ala avema bisaligama dugwit, avakwa weyak ogarupwak yiluk, enendawima weyak okbigik nelagwi menda eneyave inim, yi ap ndi ap weyak adigat ogasagwi menda eneyave inim, wonggalogo, 42hali hunikmu mabisagurikmu andoma dugwit, yup yagwi, idup en wakhidugwi, ogagu dogogup. 43Eke, it enendawi mondok sek adigat agarwik ako andi, Enasin Ala avema dugwit, eneyave mo il abya ovagak enabinak adigat dogogup. Henaruk werek halok andi, des erogoat hunggu dogones o,” yiluk, yugeragagi.
Ap ambien onggo ombok menda hwilago werekma havekhedagagi wene
44Yugirigya lagagirik, ambi yugirigya dugwit, “At mbogot vaga menda avema bisaup ako andi, yerogo: Onggo ombok sek menda ambi yavup ogarekma andoma hwilago welagagi. Ap ambi higya lagagirik, avoloma wen sabaluk, endawi adenggen en at angge-angge ovok erogo onggo hunggu lagagirik, yoparip onggo hunggigi ako vaga yavup ogarek akoat onggo hunhedagagi o,” yiluk, yugeragagi.
Helep mudu mutiara havekhedagagi wene
45Yugirigya lagagirik, ambi yugirigya dugwit, “At mbogot vaga menda avema bisaup ako andi, yerogo: Ap yi menda ndi menda onggo hunhedaliga menda ambien, helep mudu elose sek onggo ombok menda mutiara ako haoen yiluk, belalit lagya dugwit, 46helep mudu elose sek onggo ombok menda mutiara ambi havetigi. Havedogo baluk, lagya lagagirik, angge-angge ovok erogo onggo hunbaluk, andien yoparip at onggo hunggigi ako vaga, helep mudu mutiara mondok sek ako onggo hunheda wagagi ako wane-wane-at,” yiluk, yugeragagi.
Yum ikan wasagwi menda wene
47Yugirigya lagagirik, ambi yugirigya dugwit, “At mbogot vaga avema bisaup ako andi, yerogo: Ikan waruguluk yum yarin inamut yanggadekma wombabagu lagagwama, yi ikan ndi ikan yek lagagwa ako wane-wane. 48Ikan ako yum yarin elola yek laguselok, ap ikan welagwi menda en lirogo wolok is omban vaga bawunggu lagagwarik, hora yiluk, ikan sek halok sogolowak elola yekhidugwi, eke, weyak halok mbo hugwi, ogagagwa. 49O hivis oklarugwi ako anderogoat ogarugwi o. It malaikat ako, wulu wagu dogogupik, it avakwa eve sek adigat ogasagwi menda enanggelekma en, it avakwa weyak ogasagwi menda enogo 50hali hunikmu mabisagurikmu andoma dugwit, yup yagwi, idup en wakhidugwi, ogagu dogogup o,” yiluk, yugeragagi.
Ap awi werek angge swi menda inim, endak menda inim, wogera wilisiga wene
51Yugirigya lagagirik, Yesus en, “Wene wakhegek yukhirigi ako, ovok erogo dibagep?”
Yugirigya lagagimu, iren “Yu, nit ovok dibagyo.”
52Yugugu lagagwama, At Yesus en, “Andi halok, it Ala wene vagago agarwik menda ovok erogo At mbogot vaga avema bisaup wene ako welagwi halok andi, ap o andok ambien angge-angge endawi hunik swi menda inim, endak menda inim, baligama en wogera wilisiga ako wane-wane aro,” yiluk, yugeragagi.
It Nasaret menda en Yesus enanggon umbutugwa wene
(Markus 6:1-6; Lukas 4:16-30)
53At Yesus wene wakhegek ako ovok erogo yugirigya lagagirik, o andoma hekbaluk, 54At awi adem vaga akoma wagya lagagirik, it Yakuri samban ogasagwima akoma dugwit, wene mamulirigya lagagimu, it avakwa wene hunggugwa akoen, “Wi,” yiluk, vok yugu dugwit, “Wene nggoma en wigya lagarik, endawi werek dugwit iris, nggarogo ogarubuk menda ogagya, ogasiga ombasagwi? 55At yi, o valisiga menda abut ako a? At isa inis Maria ako a? Eke, At aori andi, Yakobus inim, Yusup inim, Simon inim, Yudas inim, ako a? 56At aori hwavyak ogo, ovok nit ninim agurik ako a? Ninim dugwit ovara, yi wene ndi wene nggomanggan en wigya lagarik, yagaliga ombasagwi?” 57Yugu dugwit, At Yesus ako enanggon umbutugwa.
Enanggon umbutu lagagwama, At Yesus en it yugirigya dugwit, “It ap Ala ane yugeralagwi menda navi ako, yi awi ndi awi wene yugeregek nagusim, wogobiselagwi ovara, enowa-enasin enanggelekma enawi adem vaga dugwit, yuguruguselok andi, enagayuk wurogo enane sek erogo welagwidek o,” yiluk, yugeragagi.
58Eke, it ap Nasaret menda en Yesus avyarat embetetek welagagwama, o andoma nggarogo ogarubuk menda ambitap-at ogagya lagagi.
Pilihan Saat Ini:
Matius 13: nbq2013
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
