Matius 11
11
Yesus hemekhapwak yiluk, Ima Wombabisaliga menda Yohanes en aori lakbogogi wene
(Lukas 7:18-35)
1At Yesus en it At ane welagwi menda 12 ako, “Yerogo ogagu dogones o,” yugerelok, o andoma en avakwa enamwa kota-kota akoma wene mamulirigya, avakwa Sek Wene yugirigya, ogarit lagagi.
2At Ima Wombabisaliga menda Yohanes ako lembaga akoma dugwit, Keretus ogarit lagya ako aruk hunggu lagagirik, at ane welagwi menda en Yesus hemekhapwak yiluk, adema lakbogogi. 3Lagu lagagwarik, yugugu dugwit, “At Ala en lakba warup yagagi ako, Harat wagen a, ata hivis ap adik ambi warisogon yiluk, abyam dogok a?”
4Yugugu lagagwama, Yesus en “Yagan nelagwi henaruk hulisagwi yi inim, hinil helagwi yi inim, heneyami vaga Yohanes yugirilales. 5Inil mbuk menda inil hugwi, inisok weyak menda sup sek lagwi, amu hunik menda sek agwi, enaruk nggulup menda enaruk hunggwis, hombagao menda iniluk erogo mondok okbugu, eke, ininggidek ako Sek Wene yugirigya, ogagya neyagep ako, yugirilales. 6Eke, hit henanggon nembetetek hiniselok andi, henendawi adenggen wisane-at dogogup o,” yiluk, yugeragagi.
7Yugirigya lagagimu, it ako eneyami vaga lagusigik, Yesus en Yohanes avok avakwa yugirigya dugwit, “Hit nano menda haguluk, o harumu avakwa dekma lagep? Don angga havut en wolok lagek-wagek yagaliga hak, ap endawi ndaik anderogo haguluk, lagep? 8Nano menda haguluk lagep? Ap ambi asum mondok sek adigat yirik haguluk, lagep? Avyak! It enasum mondok sek adigat yikhedelagwi andi, ap ininis ombok enamwa andoma-at yirik agarwik. 9Nano haguluk, lagep? Ap navi Ala en yugirigya hegek yugeraliga menda ambi haguluk, lagep? Avyak! Hit hegep ako andi, at navi ovara, it navi nin andi, un sovalek inigik, at ako andi, mondok eve iya-at hegep, yiluk, yukheraliga. 10#Maleakhi 3:1 yokhanes. At Ala en iri dugwit:
‘Hat laup sup yarogo bagapwak yiluk, Anen nayonggo endak ambi lakbagya neyayogon o,’
yiluk, yagagi dirup warek ako andi, at Yohanes yiluk, yagagi o.”
11“Avakwa ovok erogo inisa en endaginivit wagagwa menda andi, ininis sovalek inigik, at Yohanes ima wombabisaliga menda adigat inis werek. Anderogo ovara, At mbogot vaga menda avema dugwit ininis sovalek agarwik andi, Yohanes horogat sovalek hegek, it mondok ombok ininis weregat dogosogom. 12At Ima Wombabisaliga menda Yohanes akoen wene yukhirigya lagagi andi vaga mbikit, yogak yi hudi, At mbogot vaga menda avema bisaligama ako ap inidup enanye werek menda en andok okhedasogom yiluk wal okhugwi, sovalogo bagwi, ogasagwi. 13At Yohanes eyave ao wagatek hegek, Wene Musa en dirup watigi ako vaga inim, it navi Ala ane yugurugu lagagwa menda ako vaga inim, hivis oklarisogon andi menda sigam erogo yugurugu lagagwa ako, 14henendawima des erogo waup ombasagwi halok, at Elia warisogon, yiluk, yagagwa ako, eyave Yohanes-at wagagi. 15Henaruk werek halok andi, des erogoat hunggu dogones o.”
16“Eke, it avakwa o yogak agarwik yi, nano vaga wal okhaik? Dek o! Avyak maridugi avakwa pasar ogasagwima hora yiluk, wene onggo-onggo yugu dugwit:
17‘Nit ndawi viyanggup ovara, hit eyave yegetek.
Eke, dewene yigyo ovara, hit yup yagatek,’
yiluk, yagalagwi andi hak, hit anderogoat ogagu hinigis.”
18“At Yohanes akoen erom inim, anggur agas inim, nenggetek welagagirikmu, hiren ‘Madis endawima nonggagas o,’ yiluk, yagalagwi. 19Eke, An Ap-At Endaklagagis yi erom inim, anggur agas inim, ugun nenggek nagu neyalok, avakwa en yugu dugwit, ‘Erom inim, is anggur agas inim, ovadek en nenggek nagu dugwit, it ap pemerintah enake yoparip wonggalisagwi menda inim, ap weyak ogasagwi menda inim, it inim hunik oginivit landiga yi, hinil hanes o,’ yiluk, yagalagwi. Anderogo yagalagwi ovara, Ala endawi werek en ombasiga ako andi, it ogasagwi ovok erogo ogagwi vaga, segat hugu dogosogom o,” yiluk, yugeragagi.
Yi awi ndi awi avyarat embetetek iniselok yugeragagi wene
(Lukas 10:13-15)
20Yugirigya lagagirik, avakwa o yi awi ndi awi Yesus en nggarogo ogarubuk menda wisane erogo ogagya lagagirikmu, it avakwa weyak ogasagwi akoma enasam hegetek atma, Yesus en ane anye vaga enanggadi watya dugwit, 21“Hit avakwa Korasim menda andi, anggin henovaga arugup! Eke hit avakwa Mbesaida menda ogo, anggin henovaga arugup! Nggarogo ogarubuk menda henamwa ogagya neyagagup ako, An o Tirus Sidon andoma ogagetek ovara, andoma ogagya duklimu en, it avakwa andoma menda en o muk erogo it weyak ogasagwi ako enasam helap. Enasam hugu dugwit, enasum weyak yikhidugwi, isaben enagap vaga wakhidugwi, ogaklip. 22Anderogo atma, hivis enowak dilup amot ari wagyaim, avakwa Tirus Sidon menda andi, horogat inirisogon ovara, hit Korasim Mbesaida menda ako andi, mondok anggin ombok erogo hinirisogon o, yiluk, yukheraliga.”
23“Eke, hit avakwa Kapernaum menda yi, ‘Nit ap ombok atma, mbogot vaga siyabininayogon,’ yiluk, yagalagwi yi? Mondok dek. Nggarogo ogarubuk menda hit henamwa ogagya hegep ako, o Sodom andoma ogagya duklipmu en, o kota ako dek okbagetek, o yogak ogo aoat duklip ovara, ogagya inil hegetek atma, enasam hegetek halok, Ala en degerogo bogogi ako wane-wane, hit ogo degerogo bigigayogonbuk yiluk yagalagwi? Dek o. It hambuluk lendagwima o yagamu erogo mbo wombabigigayogon, umbutu dogones. 24Anderogo atma, hivis enowak dilup amot ari wagyaim, avakwa Sodom menda andi, horogat inirisogon ovara, hit Kapernaum menda ako, mondok anggin ombok erogo hinirisogon, yiluk, yukheraliga o,” yugeragagi.
Enendawi seyabisaup yugeragagi wene
25O andi hudi Yesus en At Asin Ala yugugu dugwit, “Wen-mbogot andok Hat Nasin wa yukhisiga. Hat ogarup yi ako, it ap enendawi werek inim, enendawi anggat inim, inilup agu saoen, hwilakbaluk, avyak maridugi swi endago ovagak sigam erogo yugeragagin atma wa. 26Anderogo ogarup hendawi sek imbita dugwit ogagagin atma, ‘Nasin wa,’ yukhisiga o.”
27Yugugu lagagirik, ambi inim avakwa yugirigya dugwit, “An Nasin en yi menda ndi menda ovok erogo An nandok dogopwak yiluk, woknogogi. At Ala Abut andi, it avakwa inunggut Nasin adigat ilup agarik. Eke, An Nasin andi, At Abut An nadigat nilup agirik. Eke, Abut Anen it avakwa Nasin inilup arupwak yiluk, sigam vagalogo yugeraup imbita neyalok, it ogo, inilup asagwi.”
28“Hit henendawima anggin okhinipu dugwit, henanyedek asiga yi, Anen henendawi seyabigigagiluk, An nadema omanes. 29-30An nasum yidik henabla danggubigigya, eke, durik-marek erogo henovaga bugugu, ogasiga andi, anggin dek seyo atma, An nasum yidik henabla hedelok, neyave sagain nendawi sovalek dugwit, ogasiga ako mamulhedomanes. Anggin hegek mamulhidugu hiniselok, ogarit lagu dugwit ‘Nendawi seyo yagas,’ yiluk, yugu dogogup o,” yugeragagi.
Pilihan Saat Ini:
Matius 11: nbq2013
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
