Matius 10
10
Ap 12 ako lakbogogi wene
(Markus 3:13-19; Lukas 6:12-16)
1At Yesus en At ane welagwi menda eneyave 12 ako At adema warupwak yiluk, yanggup yugirigya lagagimu, wagu lagagwama, it yugirigya dugwit, madis agoda werek menda avakwa enendawima en nggigilogo wibugwis, eke, aup adem adik-adik menda inim, eneyave idup-mbidup agarwik menda inim, sek oginipwis, oginivit lapwak yiluk, At amunggat enovaga bugu lagagirik, At anye wogeragagi.
2It ap 12 menda lakbogogi ako ininis yiat:
ap endak inis andi, ap Simon inis ambi Peterus salek ako inim,
at aot Andereas inim,
ap Sevedius aburi Yakobus aot Yohanes inim,
3Pilipus inim,
Batolomeus inim,
Tomas inim,
Matius ap pemerintah enake yoparip wongganggu lagagi ako inim,
Alepeus abut Yakobus inim,
Tadeus inim,
4at Simon ap Selot#10:4: Ap Selot andi, it Yakuri menda ako Oroma menda enavema werekma, enanggon en enadik dogop ogagu lagagwa menda. menda inim,
Yudas Ikariot Yesus hivis warupwak yiluk, wogeragagi ako inim,
At Yesus en it ako lakbogogi.
It ap 12 menda ako nggarogo ogagu dogop yugeragagi wene
(Markus 6:7-13; Lukas 9:1-6)
5At Yesus en it ap 12 ako lakbisagiluk wene enovaga bagya dugwit, “It avakwa weram Yakuri dek menda agarwikmu sup andi vaga labuk, eke, it avakwa Samaria menda enamwa o kota-kota andoma ogo, nunggubuk. 6Ata, it avakwa Iserali menda wam ndomba yelemele yagagwa ovagak agarwikmu, akoma adigat enadema bigisalales. 7Bigisa lagu dogomundik, ‘At mbogot vaga menda avema bigigaup ako vage horok ari waga o,’ yiluk, yugurugu dogop. 8It aup idup agarwik halok, sek okbugwis, hambuguselok, iniluk erogo mondok okbugwis, enagap vaga amu idup menda hunik agarwik halok sek okbugwis, madis enendawima werek halok nggigilogo wibugwis, ogarit nagu dogop. Hit onggodek unat hedagagup atma, onggodek unat oginivit nagu dogop. 9-10It ap yavup okbiselagwi onggo andi, wogerelagwi atma, hit henangge yoparip mbusi emas inim, mbusi perak inim, mbusi tembaga inim, wolok labuk. Eke, yerek-terek wokhiruguselok yekhedaup menda yum inim, henasum pakian mberen inim, henaropato ambi yum yedogo inim, henowanggun inim, wolok labuk.”
11“Eke, hit o kota madukma, ombokma, nunggugu dogomundik, o andoma ap ambi andogon sek menda hugu dogomundik, hunogoma ao lagetek dugwit ap andi, hinim dukluk wilitalo. 12Ap enamwa andoma nungguluk, hai warogo henadenggen enovaga bugu dogop. 13It ap andoma enendawi sek en des erogo wokhinipuselok, henadenggen mondok enovaga-at dogosogon. Eke, wokhinipitek halok andi, adenggen enovaga bisamwi ako, enovaga asogonbuk sugulogo hit henovaga-at hedelok, wilitalo. 14Heneyave mondok wokhinipitek dugwit, henane enaruk hulup enanggon halok andi, enamwa andoma en wunggu dugwit, hinisok vaga mupwak horogo baluk, wilitalo. 15Hivis enowak dilup ako vaga it avakwa o Sodom inim, Nggomora inim, welagagwa ako horogat inirisogon ovara, it ap o kota andoma menda andi, eve iya erogo inirisogon, yiluk, avyarat yukheraliga o,” yugeragagi.
“Anggin-mbanggin okhinipu dogosogom” yugeragagi wene
(Markus 13:9-13; Lukas 21:12-17)
16Wene ambi inim yugirigya dugwit, “Hit ndomba ovagak yi, it avakwa yangge do ovagak agarwikmu enadema lakbigigaliga o. Lakbigigamindikmu enanggelekma dugwit, mbas il anggeket okbaluk agarik hak, hit henovavut anderogo dugwit ogagwi, swa suwa ovavut sagain agarik hak, hit henovavut anderogo dugwit ogagwi, ogagu dogones. 17Avakwa en it wene owak dilisagwima vakhiniviluk lagwi, Yakuri samban ogasagwima en nabirok vaga henatwis, okhinivusogom atma, avakwa enendawima dibisiluk, henova hwalogo dogones. 18Hiren adem An nane wagagup vaga, it ap ombok-ombok inim, ap ininis werek inim, enadema wokhenombolok lasogom. Wokhenombolok laguselok, it inim, it ap weram Yakuri dek menda inim, hiren ‘Yugeraup nanonggal aga o,’ yiluk, An ogagya neyagep ako sigam vagalogo yugeraup. 19Eke, wokhenombolok laguselok, hiren, ‘Wene ngga yuk,’ ata, ‘Wene nggarogo yugeraup,’ yiluk, henendawi anggin habuk. Wene yugeraup ako, o andi vaga Henasin Ala en ‘Wene yiva eres,’ yiluk, yukherayogon. 20Wene yugeraup andi hit henane menda dek. Ata, Henasin Ala Averiniki en wene henendawima yukhirigya hegek, yugurugu dogosogom.”
21“Aswe en aswe-at warupwak yiluk, vagago wogirigya, asin en abut warupwak yiluk vagago wogirigya, eke enaburi en enasin-inisa inim ogot baluk inirupwak yiluk, wogurugwi, ogarusogom. 22Avakwa ovok erogo adem An nane wagagup vaga enanggon adigat henombarusogom ovara, o hivis atok vaga henendawi wadokdek dogomwi halok, henagap wendakhinivugwi. 23O kota ambima en anggin-mbanggin okhinipuselok, hoda sak yagan o kota adik ambima nunggwilalo. Hoda sak yagan ap Iserali enamwa kota-kota nin aoat lagetek hinigik, An Ap-At Endaklagagis ako warisogon, yiluk, avyarat yukheraliga.”
24“At wene mamuleraliga ako sovalek hegek, at ane welagwi menda ako siyalek agarikbuk. Eke asin sovalek hegek, ayeloman siyalek agarik anderogo ogo mondok dek ovara, 25at wene welagwi menda ambien at wene mamulisiga ako iperen wane-wane agya halok andi sek. Eke, ayeloman akoen asin ako iperen wane-wane agya halok andi ogo, sek aro. It avakwa enasin o andok menda andi weyak yiluk, ‘At andi Sile inis Mbelesebul o,’ yuguselok andi, it at aburi ambekma agarwik menda andi, anderogoat ininis evenuk weyagat yugu dogosogom.”
Ala nenalon umbutu dogop wene
(Lukas 12:2-7)
26Wene ambi inim yugirigya dugwit, “Yi wene ndi wene enendawima sovalek agarik halok andi, sigam agya, eke yi ogagwi ndi ogagwi hwilago agarik halok andi, vagalagya, ogarisogon atma, it ap andi menda henalon habuk. 27Anen wene o hup hwilagago yukheraliga ako andi, hit ombokma o awiya vaga yugurugwi, eke, wene madingguruk vaga yukheraliga ako, o virimu en hum-naik vaga vagalogo yugurugwi, ogagu dogop. 28It avakwa en heneyave andi hinitu dugwit, henendawi inim hinirusogombuk atma, heneyave adigat hinisagwi ako andi henalon enombarubuk. Ata, heneyave inim henendawi inim, hali abya wuluk-herek yagaligama degerogo lakbigigaup andok Ala akoat, henalon umbutu dogones. 29Yoparip maduk ambiat ako vaga swa wudue mberen onggo huninivisagwi akora? Onggo maduk anderogo vaga huninivisagwi ovara, Henasin ‘E o,’ embetetek hegek, ambi wen vaga mondok wambisogonbuk. 30Hit andi, hiniris ogo ovok erogo At Ala inggis dinggilik agarik. 31Anderogo atma, swa maridugi wisane eneyave dambulogo At endawi hunik horogat agarik ovara, hit ako andi, At endawi hunik ombok erogo henombasiga atma, henalon umbutu dogobuk,” yiluk, yugeragagi.
“Yesus andi Nenowa aro,” yiluk, sigam erogo yugu dogop wene
(Lukas 12:8-9)
32“Hiren avakwa inivaga, ‘Yesus andi, Nenowa aro,’ yiluk, sigam erogo yugu hiniselok, An ogo Nasin mbogot vaga menda ivaga en, ‘It ap yi, An naori aro,’ yiluk, sigam erogo yisogon ovara, 33hiren avakwa inivaga, ‘Yesus andi, nit ninunggut,’ yugu hiniselok andi, An ogo Nasin mbogot vaga menda ivaga en ‘It avakwa yi An ninggurat,’ yisogon o,” yiluk yugeragagi.
Adik-adik okbigigagiluk wagagis wene
(Lukas 12:51-53; 14:26-27)
34-35Wene ambi inim yugirigya dugwit, “O wen vaga yoma avakwa enendawi ugun adenggen dambulik dogopwak yiluk, wagagis, nombarubuk. Anen dambup bisagiluk wagetek. Ata,
‘Ap asin inim, hwa isa inim, hwa agun isa inim, adik-adik okbugu neyalok,’
ndup ogarupwak yiluk, An wagagis o.
36 #
Mikha 7:6 yokhanes. ‘It enowa-enasin ambekma agarwik menda en irirat ndup ogagu sagup o.’
37An henanggon ovagak numbutu dugwit, hinisa a, henasin a, henendawi hunik ogagu hiniselok andi, An ninim dogop meyan. Eke, An henanggon ovagak numbutu dugwit, henabut avyak a, hwavyak a, henendawi hunik okhidugu hiniselok andi ogo, ninim dogop meyanat. 38Hit henagyo winik hedelok An ninim warup embetetek hiniselok andi, An ninim nagu dogop meyan. 39Hit heneyave hinidi okhedasogom halok, heneyave yelemele-at yusogom. Eke, An ninis ombok arupwak yiluk, heneyave ididek okbetamwi halok, hinidi ogarek dogosogom o,” yiluk, yugeragagi.
Onggo hedaup yugeragagi wene
(Markus 9:41)
40“It avakwa en hit wokhinipuselok andi, Anat woknitwis, eke, An woknituselok andi, At lakbani wagagi akoat wugwi, ogasagwi. 41Ap saen, ‘Ap yi, Ala en yugugu hegek yukneraliga menda navi atma,’ yiluk, ap andi wugu hiniselok, it ap Ala en yugugu hegek, yugeraliga menda navi onggo hedasogom ako wane-wane-at hedasogom. Eke, ‘Ap yi Ala endawi ombasiga menda ogasiga atma,’ yiluk, ap andi wugu hiniselok andi, it enendawi mondok sek adigat agarwik onggo hedasogom ako wane-wane-at hedasogom. 42Eke, hiren, ‘Yesus ane welagwi menda atma,’ yiluk, avyak mariduk yi menda ambi, is hol nodogo wogugu hiniselok andi, onggo hedasogombuk andi dek. Hedasogom-at, yiluk, avyarat yukheraliga o,” yugeragagi.
Pilihan Saat Ini:
Matius 10: nbq2013
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
