मति 2
2
पुरवेसे याइल ज्योतिसिसभ
1जब हेरोद रजवाक जुनवामा यहुदिया छेतरक बेथलेहेम गउँवामा येसुजिक जनम भेलइ, तब पुरवेक देसवासे ज्योतिसियाह यरुसलेम सहरवामा यलइ। 2हुनुका मन्सावानिके पुछलइ, “यहुदियानिक राजा जाकर जनम भेल बडइ, हुने कहवाँ बडसि? केहकेकि हुनेक जनम भेल थाह देलाहर तरगन हमरा पुरवेवरि देखलहुँ, उहेसे हुनेके आराधना करे याइल बडहुँ।”
3जब हेरोद इअ बतवा सुनलिय, उअ हसे वकरसाङे यरुसलेमक जम्मे मन्सावाह फेनि अकमकेलइ। 4वकरपाछा हेरोद मुख्य पुजेरियाह हसे व्यवस्थाक-गुरुसभके बलाके, “ख्रिस्टक जनम कहवाँ हतइ कहके पुछलिय?” 5तब हुनुका कहलइ, “यहुदियाक बेथलेहेम गउँवामा, केहकेकि धरमसास्तरवामा अगमवक्तावा यसके लिखले बडिय:
6‘अरे यहुदिया छेतरक बेथलेहेम,
तुइ यहुदियामा भेलि गउँवासभक कुनहुँ सासकसभसे कम हइने बडहि।
केहकेकि तोरसे एगुडा सासक निकडके यबिय,
जुने इस्राएलक मोर मन्सावानिक भेडहार नहिँया देखभाल करबिय’।”#मिका ५:२
7इअ सुनके हेरोद ज्योतिसियानिके चुपे-चुपे बलाके पुछभाख करलिय हसे तरगनवा देखा परलि ठिक जुनवा हुनुकरसे पाता लगोलिय। 8वकरपाछा उअ हुनुकाके यसके कहके बेथलेहेममा पठोलिय, “तोहरा जाके उअ बचवाक बारेमा डउलसे पाता लगोइह। जब तोहरा वकरेके पाता लगोबह मोरके फेनि खबर दिह, ताकि मुइ फेनि जाके वकरेके आराधना करबहिँ।”
9तब हेरोदक बतवा सुनके, ज्योतिसियाह यापन पइडा लगलइ। जुन तरगनवा हुनुका पुरवेमा देखले रहलइ, उहे तरगनवा हुनुकर यागा-यागा गेलिय हसे बचवा भेलि ठउरियामा ठप्पे रोकेलिय। 10उअ तरगनवा देखके हुनुका खाँ खुसि भेलइ।
11हुनुका उअ घरवा भितरा पेसलेपर बचवाके यापन दाओ मरियमसाङे देखलइ। तब हुनुका घोप्टे परके हुनेक आराधना करलइ। वकरपाछा यापन-यापन सन्दुखवा खोलके सोन, धुप हसे बहुत महङ बसान तेल हुनेके भेटि चढोलइ।
12वकरपाछा सपनामा हेरोद लघिना झिन जइह कहके चेतवनि पाके हुनुका दोसरे पइडामाहे यापन देस फिरलइ।
योसेफ भागके मिस्र देसवामा गेलिय
13उअ ज्योतिसियाह गेलेपर, परमप्रभुक एगुडा स्वरगदुत सपनामा योसेफ लघिना देखा परके यसके कहलिय, “उठहि, बचवा हसे वकर दाओके लेके मिस्र देसवामा जइबे करहि। मुइ नाहिँ कहइलइ तुइ वहवाँहिँ रहसि, केहकेकि हेरोद रजवा बचवाके मारेके तहिँया खोजइ बडिय।”
14उहे राति योसेफ निनवासे उठके बचवा हसे वकर दाओके लेके मिस्र देसवामा गेलिय, 15हसे हेरोद रजवा हइने मरइलइ हुनुका वहवाँहिँ रहलइ। यसने परमप्रभु अगमवक्तावासे फदकलि इअ वचनवा पुरा हखलइ, “मुइ यापन बेटवाके मिस्र देसवासे बाहरा बलोलहिँ।”#होसे ११:१
हेरोद रजवा छोकनियानिके मारे लगोलिय
16जब हेरोद रजवा ज्योतिसियाह वकरेके झुकोलइ कहके थाह पउलिय, उअ खाँ खिसेलिय। उहेसे हेरोद रजवा ज्योतिसियाहसे थाह पउलि समय यनुसार बेथलेहेम हसे वकर यासपास छेतरक दु बरस हसे दु बरससे तरक जम्मे छोकनियानिके मारे लगोलिय। 17यसनेकरके यरमिया अगमवक्तावाक फदकलि वचनवा पुरा भेलइ:
18“रामा गउँवामा एगुडा सबद सुनार बडइ,
डोढा-डोढाके कनइकि हसे विलापक जबड स्वर।
राहेल यापन बचवानिक तहिँया कनइ बडिय।
वकरेके कुनहुँ फेनि सान्त्वना देवे हइने सकलइ।
केहकेकि वकर बचवाह मरलइ।”#यरमिया ३१:१५
19हेरोद रजवा मरलेपर परमप्रभुक एगुडा स्वरगदुत मिस्र देसवामा योसेफ लघिना देखा परके 20यसके कहलिय, “उठहि, याबे बचवा हसे वकर दाओके लेले इस्राएल देसवामा जाहि, केहकेकि बचवाके मारे खोजलहरा मरसकल बडिय।” 21उहेसे योसेफ उठके बचवा हसे वकर दाओके लेले इस्राएल देसवामा फिरलिय।
22बाकि हेरोदक बेटवा अरखिलाउस यहुदिया छेतरमा राज करइ रहलिय कहके योसेफ थाह पउलेपर, उअ वहवाँ जायके डेरेलिय। बाकि स्वरदुतवासे सपनामा चेतवनि पउलेपर उअ गालिल छेतरमा गेलिय, 23हसे नासरत गउँवामा रहलिय। ताकि अगमवक्तावाह “हुनेके नासरि कहेतइ”#२:२३ इअ कुन अगमवक्ता कहलिय कहके हइने थाह बडइ। कहलि वचनवा पुरा भेलइ।#मरकुस १:२४; लुका २:३९; युहन्ना १:४५
Pilihan Saat Ini:
मति 2: CTHR
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023, Wycliffe Bible Translators, Inc. and Nepal Bible Society
