Svun Mateo 7
7
Ja' li' yaloj ti mu me ja'uc no'ox batem ta co'ontic sq'uelbel smul li jchi'iltique
(Lc 6.37-38,41-42)
1»Mu me xaq'uelbe smul achi'il yo' ti mu xayalbe o ti Rioxe ti oy amule. 2Ti c'u x'elan chaq'uelbe smul la chi'ile ja' no'ox yech sq'uelojbot amul uc ti Rioxe. Ti c'u yepal chap'isbe la chi'ile ja' no'ox yech chap'isbat yu'un ti Riox uque. 3¿C'u yu'un ti chaq'uelbe yic'ubal sat la chi'ile, li vo'ote ja' mu xavac' cuenta ti jp'ej ta ts'amte' tey xc'atet ta asate? 4¿C'u ono'ox xi chavalbe la chi'ile: “Jloq'uestic li yic'ubal asate ti xavute, ti jp'ej ta ts'amte' yic'ubal asat li vo'ote”? 5¡Jlo'lovanej mu xava'iaba! Loq'ueso ba'yuc li ts'amte' tey ta asate, yo' xa vilbe o lec c'u x'elan chaloq'uesbe yic'ubal sat la chi'ile.
6»Mu xavac'beic ts'i'etic li c'usitic ja' yu'un ti Rioxe, naca me joyp'ijuc ta acrontaic, yu'un xu' cha svoch'ilanic comel ta ti'el. Ja' no'ox yech noxtoc mu xa vac'beic chitometic li perla ti toyol stojole, naca me yech'uc no'ox spats'ulan ta teq'uel.
Ja' li' yaloj mi oy c'usi ta jc'anbetic ti Rioxe, chiyac'botic
(Lc 11.9-13; 6.31)
7»C'anic, chayac'beic ti Rioxe; sa'ic, chataic; c'opojanic ta ti' na, chajambatic. 8Ti much'u ta sc'ane ta x'ac'bat; ti much'u ta sa'e ta sta; ti much'u ta xc'opoj ta ti'nae ta xjambat.
9»Li vo'oxuque, ti c'alal cha sc'anbeic pan lach'amalique, ¿Mi ton chavac'beic? 10Ti c'alal cha sc'anbeic choye, ¿Mi chon chavac'beic? 11Li vo'oxuque chopol ajolic pero xana'ic c'usi lec chavac'beic lach'amalique. Ti Jtotic Riox ta vinajele, ¡más to lec c'usitic chac'be ti much'utic ta sc'anique!
12»Ti mi chac'an ti lec c'usi cha spasbe li crixchanoetique, ja' tsc'an ti lec c'usi chapasbe uque. Yu'un ja' yech smelol li smantaltac Riox sts'ibaoj ti Moisese xchi'uc li yantic yaj'alc'optaque.
Ja' li' yaloj ti ja' más biq'uit sbelel li vinajele
(Lc 13.24)
13»Ochanic ech'el ta biq'uit be. Yu'un li sti'il xchi'uc sbelel li ch'ayele, ja' más jamal, mu vocoluc ta tamel ech'el. Ep ti much'utic tey ch-ochic ech'ele. 14Pero li sti'il xchi'uc sbelel li cuxlejale ja' más chucul, vocol chijelavotic; jayvo' no'ox ti much'utic ta staique―x'utatic yu'un ti Jesuse.
Ja' li' yaloj ti ta sat ch-cojtiquintic li jtec' te'e
(Lc 6.43-44)
15»Q'uelo me abaic mu me xa ch'unic lo'loel yu'un ti much'utic chalic yilel li sc'op Rioxe. Yu'un co'ol c'u cha'al chijetic yilel ti c'alal chtalic ta atojolique, pero li yut yo'onique ja' chac c'u cha'al li jti'vanej oq'uiletique. 16Li vo'oxuque ja' chavojtiquinic o li c'usitic tspasique. Ana'ojic ti mu xataic uva ta jtec' ch'ixe, ti mu xataic ic'ux ta saquil ch'ixe. 17Scotol li te'etic ti bu onox leque, lec li sate. Ti bu onox chopole, chopol li sate. 18Li lequil te'e mu xac' chopol sat, mi ja'uc li chopol te'e mu xac' lequic sat. 19Scotol li te'etic ti bu chopol chac' sate chich' bojel, chich' tiq'uel ta c'oc'. 20Yech'o un li vo'oxuque ta stalel no'ox chavojtiquinic.
Ja' li' yaloj ti mu scotoluc crixchano ch-ochic ta vinajele
(Lc 13.25-27)
21»Mu scotoluc ti much'utic “Cajval, Cajval”, xiyutique, ti ch-ochic yo' bu tspas mantal ti Rioxe. Ja' no'ox ch-ochic ti much'utic tspasic c'usitic tsc'an ti Jtot ta vinajele. 22Ti c'alal sta yorae, ep ti much'utic ja' yech chiyalbeique: “Cajval, Cajval, li vo'oticotique ta abi icalticotic ac'op, ta abi ijloq'uesticotic pucujetic, ta abi ep ta ech'el icac'ticotic iluc alequilal ayu'elal.” —Chiyutic. 23Pero li vo'one ta jtac'beic: “Mu c'usi ora la cojtiquinic; ¡loc'anic ta jtojol jpasmuliletic!” —Ta xcutic.
Ja' lo'il scuenta cha'vo' viniquetic ti ismeltsan snaic ya'ele
(Lc 6.46-49)
24»Ti much'u cha'i li c'usi chcale, mi ta xch'une, co'ol xchi'uc jun vinic ti p'ije, ismeltsan sna ta ba ton. 25Ital tsots vo'. Inoj ta vo' li spat xocon snae. Tsots i'ech' ic' yo' bu li snae, pero muc' xlom yu'un ta ba ton smeltsanoj. 26Ti much'u cha'i li c'usi chcale, mi mu xch'une, co'ol xchi'uc sonso vinic ti ta ba yi' smeltsanoj snae. 27Ital tsots vo'. Inoj ta vo' li spat xocon snae. Tsots i'ech' ic', ilom li snae. ¡Mu xa c'u stu icom!» ―X'utatic yu'un ti Jesuse.
28C'alal laj lo'ilajuc ti Jesuse, scotol li crixchanoetique xch'ayet xa yo'onic ti x'elan ichanubtasvane, 29yu'un ja' yech ichanubtasvan chac c'u cha'al ti much'u tsots yabtele. Ma'uc yech ichanubtasvan chac c'u cha'al li jchanubtasvanejetic ta smantaltac Rioxe.
Pilihan Saat Ini:
Svun Mateo 7: LeqAC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Sociedad Biblica de Mexico AC
