Jâ 11

Maré go Lasar koi

1Hoamya lei kema go pena go ké ba tei Lasar, ddi joma Bétani a gulong go Maram kang temdo Marta kogé. 2(Maram, na tama do ba bei Bagulong suang go ddowa tuna gondi, to gurdégé kederem ga ca, toa Lasar go hoamya ba lei lé temdi.) 3Karmei ga kandu ga sua lé gi kema gusu Jésu ca yoi wa: Bagulong, bajandin go kederein ba ’yei lé na, hoamya wa loi. 4Kiddin ga Jésu ba jé kual lé na, ddi yé wa: Hoamya do Lasar toi na, na do deddei ’eno, to leia ca gelé hormo do Kumu toi ca dda Kumu Kurondi kau wa hormo bu’.

5Jésu kederei ’yé Marta kang temdo dang Lasar bu’. 6Kiddin ga ddi ba jé Lasar na hoamya na, ddi lé wolé sua com a kiddin ga kema lé ba waii kené. 7Kardené ddi yégé anjama gai wa: Na jogogeng a Judé. 8Anjama gai jogu yei wa: Bagulong, ga Juib dar ca worinyein dang keddang ca deddein tebadega dang cakcak kua ma, ji yé wa: Na jogogeng ni kua com ga? 9Jésu yégé wa: Duro wolé pena na kiddin moac ca sua ’eno ga? Kema nia ’yé kiddin dang teba na, tebai go dogoi ’eno, cawa ddi wa solé kiddin dang arinwa do delinya toa. 10Ama kema nia ’yé kiddin dang soindo na, tebai da ddei, cawa arinwa wo ’eno gusi. 11Kiddin ga Jésu ba yégé kual lé kain na, ddi jogu yégé wa: Bajandena Lasar woi kung, ama ’enung oré lebei dang. 12Anjama gai jogu yei wa: Bagulong, ddi nia woia kung na, ddia wai labia. 13Jésu yégé kual la ca maré go Lasar koi, ama anjama gai ’erem ca kondia ya ca Lasar woia kung ga gelalé. 14Kardené Jésu yégé waldong wang, Lasar ma. 15Gusung mowung caigeng ca keng sela henga ga ba lé ani kua ’eno, ca keng bu cindi cang. Ama dda na oregeng gusi. 16Kardené Tomas (na ddi go ké ba tei Mugena) yégé anjama kané wa: Dda na oregeng ca marang Bagulong bu’.

Jésu na belé go kalang ga maré kogé goang cindegé

17Kiddin ga Jésu ba ’erga na, ké ’embé Lasar tumoi lé wolé poddin ’enda. 18Bétani na ’yoabang Jorsalem bbal oré bbedeg. 19Ga Juib combu ’erga gusu Marta kang Maram ca cobegé ca maré go kermigé koi.

20Kiddin ga Marta ba jé na Jesua caga na, to sai ’yé ca yalei, ama Maram wo gulong dé. 21Marta yei Jésu wa: Bagulong, ji ni wia kené na, kermeng ni go maré ’eno. 22Ama cakcak kua kau, ’enung sol ca ji nia ula Kumu na, ddia bin henga mam ga ji ba olgé. 23Jésu ya wa: Kermé da belang cindi a duro ga maré. 24Marta jogu yei wa: ’Enung sol ca ddia belang cindi a duro ga maré, a kiddin ga belé go kalang ga maré kogé goang cindigé a duro wolé toi do karé.

25Jésu ya wa: ’Enunga go belé kalang ga maré dang cindegé bua, ’enunga goang cindeng bu’, kema goa bu cindi cang na, ddi nia mara kau ddianga cindi. 26Kema goang cindi, ddi nia bu cindi cang na, ddi go maré ’eno bering, mé bu cindi ca kual lé ga? 27To jogu yei wa: ’I Bagulong, ’enung bu cindi jia Krist Kumu Kurondi go ba ’erga duro delinya.

Jésu ’elé

28Kiddin ga Marta ba yé kual lé na, to ’yé togé temdo Marem, to ya kual wasuai jang: Bagulong caga, ddi wa togé, mé ’era ni. 29Kiddin ga Maram ba jé kual lé kain na, to sai suadu ’yé gusu Jésu. 30(Jésu andang gulong ’eno dé, ama to ’yé waieia kiddin ga Marta ba waii kené lé jang.) 31Kiddin ga Juib ga ba jom gusu Maram gulong ca coaba ba soala ca to sai andong dang suadé na, ké sai kuaba kardo, ké ’erem ca tondia ’ya ’elé ca kemgané.

32Kiddin ga Maram ba ’erga a kiddin ga Jésu ba wo kené lé na, to aserong tumoi, to yei wa: Bagulong, ji ni wia kené na, kermeng ni go maré ’eno. 33Kiddin ga Jésu ba soala to wa ’elé, ga Juib ga ba ’erga dang na, ké wa ’elé bu’ na, kederei homi, nyagé lei bu’. 34Ddi ’engergé wa: Keng ’embei wa andi ga? Ké jogu yei wa: Bagulong ’erang ca sela. 35Jésu sai ’elé. 36Ga Juib sai yé wa: Ga selageng, kederei ba ’yei ddai. 37Ama kalang ga pena a duroigé yé wa: Na ddi go hangé kalang ga bibé cindegé lé, ddi bbal ca lo henga ga naré Lasar maré bu’ ’eno ga?

Lasar belang cindi a duro ga maré

38Jésu kederei jogu homi ddang com, ddi ’yé ca kemgané, na umbung go ké ba lebu kebeiang keddang. 39Jésu sai yégé wa: Ga hanga keddang lé cong. Marta do ddi go maré lé temdi yei wa: Bagulong, ddi osin belé isin, cawa ddi lé wolé poddin duro umbung ’enda. 40Jésu jogu ya wa: ’Enung yé wa: Mé nia bu cindi na, ma sol hormo do Kumu toi ’eno ga? 41Ké ai keddang lé cong, Jésu ai cindi dang, ddi yé wa: Ba, ’enung lein désé cawa ji jo kual guang. 42’Enung sol ca ji wa jo kual guang waindi waindo, ama ’enung yé main kainya ca kalang ga ’eré gusung lé kua, ké bu cindi ca jia giangang. 43Kiddin ga ddi ba yé kual lé kain na, ddi sai teiang nô do osi pong: Lasar andong dong. 44Go maré lé sai andong dong, gondi kang kalndi, dang cindi dang temdé dang badigé dé, Jésu yégé wa: Ga purai, ddai ddi ’era.

Ké nyan kual ca Jésu

(Matié 26:1–5; Mark 14:1–2; Luk 22:1–2)

45Ga Juib combu a duro ké ga ba sol henga ga Jésu ba légé Maram na, ké bu cindi cai. 46Ama ga pena a duroigé na, ké ’yé gusu ga Parisié, ké yégé henga ga Jésu ba légé. 47Ga Parisié kang gemdong ga tibé Kumu, ké yau kalang ga gemdong ga bedang, ké yégé wa: Na da legenga mena ga? Cawa kema lé na, ddi lé gié go dono go kagelokemo combu. 48Na nia ddai na, kalang mam da bu cindi cai, kardené ga Rom ga ddo ca da ’erga toin kulu guana go yaué bua, ka basu kalang gana bu’. 49Pena a duroigé go ké ba tei Kaip, ddia gumu gogé go tibé Kumu a duro ddegelé lé, ddi yégé wa: Keng sela henga pena ’eno. 50Keng sela ca kema pena nia ma ca kalang na, na golgo, ddi go kalang mam nia basong ’eno ga? 51(Ddi yé kual langa ’eremé goi bang ’eno, ama ca ddia gumu gogé go tibé Kumu a duro ddegelé lé na, ddi cogelé kebu go Kumu koi go ca Jésu da ma ca kalang ga Juib. 52Na ca kalang ga Juib mera ’eno, ama na ca yaué karang ga Kumu kai mam ga ba ddasindé, ca ké mam ja gusu pena.) 53A duro wolé lé na, gemdong ga Juib gagé nyan kual ca deddé Jésu. 54Na ca ma Jésu ’era duro ga Juib ga combi ’eno, ddi ’yé ca gesong ga ’yoabang gada, ddi jom duro gulong go ké ba tei Epram kang anjama gai.

55Soré go kederé cindi go Juib kogé ji ’yoab. Kalang ga ca gesong combu ’yé Jorsalem tumu soré go kederé cindi lé, ca yaué go belé gusugé carara. 56Ké dar Jésu, kardené ké wai gusugé duro kulu go yaué go Kumu koi, ké ’enger gusugé wa: Keng ’erama mena ga? Ddia ’erga duro soré lé laba, ddi go orang ’eno ga? 57Gemdong ga tibé Kumu dang ga Parisié yégé kalang wa: Kema nia sol kiddin ga Jésu wo kené na, na gad kandia yagé ca ka ’yomoi.

Pilihan Saat Ini:

Jâ 11: TNG1978

Sorotan

Berbagi

Salin