Lukas 22

Paggayakun yi si Hisus

(Mat. 26:1-5; Mk. 14:1-2; Hu. 11:45-53)

1Arani yi ti Kapistahan sa manga Tinapay unman may Pamadaka, kay ngaran Kapistahan sa Pag-alaala sa Karibrihan. 2Pag-isipan yi manga pangulu manughandug hanggan manga manugtudlu Kasuguan nu kabitay kanda maipapatay si Hisus. Dahil magkadala sida sa manga tawu.

Nagkasundu si Hudas sa kay manga Kalaban ni Hisus

(Mat. 26:14-16; Mk. 14:10-11)

3Bag-u sinuldan ni Satanas si Hudas kay palayaw Iskariyuti, kabilang sa sampulu may duwa ka tuludluan. 4Nag-ati siya naghampang sa manga pangulu manughandug hanggan sa manga kapitan pulis nu kabitay pag maawatan niya sida hampay madakup nida si Hisus. 5Nakabaya sida pinagkausahan pakan-an kuwarta si Hudas. 6Nagpasnu si Hudas. Siyun ginan naghanap siya paraan hampay itudlu niya si Hisus sa kalaban, ilihim sa kayamuan tawu.

Sida ni Hisus Namwat Yapun bilang Pag-alaala sa Karibrihan

(Mat. 26:17-30; Mk. 14:12-26; Hu. 13:21-30; 1 Kur. 11:23-25)

7Pagka sa Kapistahan manga Tinapay unman may Pamadaka, nagras-ug ti taning sirang kanda pag-iyawun ti anak karanidu sa Pag-alaala sa Karibrihan. 8Sinugu ni Hisus sida ni Pidru ni Huwan, sinabi niya sa kanda magkun, “Paglakaw yi duy kamu, paghanda yi kamu kanta yapun tungkul sa Pag-alaala sa Karibrihan hampay kita mangaun.”

9Nagpaingana sida sa kan Hisus, “Naan duy kanmu gustu pag ialistu nimi kanta yapun?” 10Magkun siya sa kanda, “Pagpatingi kamu. Nu kamu magsulud sab sa banwa may masulang kamu usa ka lalaki may sungguy usa ka banga danum. Kuyuga niyu siya hanggan tugka sa kay sakahan pag balay. 11Sabiha niyu sa may puun balay, ‘Magkun ti Maisturu sa kanmu, naan duy pag sulud-sulud ti mahimu mahayinan nimi yapun para sa Pag-alaala sa Karibrihan, kasaru niku kang manga tuludluan?’ 12Bag-u itudlu niya sa kanyu ti daka pag sulud-sulud sa ikadwa pag ugpu salug, alistu yi kay gamit. Ati kamu paghiwat kanta karan-an.” 13Nag-ati sida. Nakitan nida ga kay diman sinabi ni Hisus. Ag kanda yi hiniwat kanda yapun tungkul sa Pag-alaala sa Karibrihan.

14Pagka udas mangaun, tinmukaw si Hisus hanggan kay manga tuludluan. 15Sinabi niya sa kanda, “Dugay yi aku naggagad magkaun yapun tungkul sa Pag-alaala sa Karibrihan kasaru kamu niku bag-u malakawan niku ti kakurian. 16Dahil kang pagsabihun sa kanyu, udyi umuman aku kumaun inda hanggan sa udwaya matupad inda sa kaharian Diyus.”

17Bag-u binitbit ni Hisus ti ungut, nagpasalamat siya sa Diyus bag-u kay sinabi magkun, “Tanggapun niyu inda, ayaw-ayaw kamu pag-inum. 18Dahil pagsabihun niku sa kanyu, dayi manginum aku kainda ginan pin-ga ubas hanggan sa udwaya rumas-ug sitay ti paghari Diyus.”

19Nagpunpun siya tinapay, kanya dap ipinasalamat sa Diyus bag-u pinikapika bag-u ipinakaun sa kanda. Kay sinabi, “Inda kang bilug pag-ipakaun sa kanyu. Buwata niyu inda sa pag-alaala sa kangku.”

20Pagka nakayapun yi sida, itinunghul niya ti ungut sa kanda bag-u kay sinabi, “Inda pag ungut kay kahulugan imaw ti bag-u taratu Diyus. Kang dugu ti ibuhus dahil sa kanyu, imaw ti itinalaghut Diyus sa taratu.

21“Dapat malu, kasaru diman niku kainda sa karan-an tigpakampi sa kang kalaban hampay aku kay itudlu. 22Dahil ti Anak Tawu mamatay gid ngani angay sa kay gayak Diyus, dapat anung kaawaawa tunda pag tawu ti nagpakampi sa kay kalaban hampay siya kay itudlu.” 23Bag-u nagparaingan-an kay manga tuludluan nu hintay nguna sa kanda tigpakampi sa kalaban ni Hisus.

Tigpirirdihan nu hintay ti Mataas

24Pagka dugay magpirirdihan yi kay manga tuludluan sa kanda harampangan, nu hintay sa kanda ti pag-isipun mataas man sa tanan. 25Nakan kay sinabi ni Hisus sa kanda magkun, “Ti manga hari sitay sa babaw daga may kapangyarihan sa kay manga nasakupan. Kanda manga pinunu pag-ingarnan manga manugpakaun kahusayan. 26Dapat nu sa kanyu balaw katida. Bagkus ngap ti lalu mataas sa kanyu kailangan lalu magpakumbaba. Ti pinunu kailangan parihu sa manugsirbi. 27Dahil si unu ti lalu mataas ngatay ti matukawan sa puun lamak, aw ngatay ti manugtindug? Unman aw ti matukawan sa puun lamak? Dapat aku sa kanyu karaw-an parihu sa manugtindug.

28“Kamu ti balaw nagpablag sa kangku madi mayamu ti linakawan niku pagsubuk. 29Nakan kamu kang pakan-an karampatan hampay maghari aban parihu sa ipinakaun Ama sa kangku karampatan hampay maghari. 30Nu maghari yi aban aku kamu kumaun sa kang lamak ag uminum. Kamu aban tumukaw sa manga tukawan hari, bistahun niyu ti sampulu may duwa ka linahi ni Israil.”

Ipinurupita ni Hisus kan Pidru Pagtanggi sa Kanya

(Mat. 26:31-35; Mk. 14:27-31; Hu. 13:36-38)

31Sinabi ni Hisus, “Malu duy Simun, hinagad kamu ni Satanas sa Diyus hampay subukan niya kamu taphun ga paray ipayag kay upa. 32Dapat Simun, kawu kan idinarangin sa unman lumumuy kanmu pagsarig. Nu umimbung maan aban kanmu pagsarig, parig-una yi nimu kanmu manga patar-ari.”

33Sinabi ni Pidru sa kanya, “Panginuun, handa aku kumuyug sa kanmu sa pirisuhan una sa kamatayan.” 34Magkun si Hisus, “Kang pagsabihun sa kanmu, Pidru, taynguna yi gid pag yabi inda udwaya tumarauk ti manuk, itanggi nimu kanmu magkilala sa kangku katlu ginan.”

Sukadan Kuwarta, Sukadan Karan-unun hanggan Baladaw

35Sinabi ni Hisus sa kanda, “Pagka sinugu niku kamu kaybi balaw may dara sukadan kuwarta, una sukadan karan-unun, una lapak, kinurang aw kamu una hintay?” Kanda sagut, “Unman duy, unman kinurang.” 36Sinabi niya sa kanda, “Dapat taynguna nu may sukadan kuwarta suribayan di niyu hanggan kanyu sukadan karan-unun. Nu unman kamu may baladaw, pabilyan kanyu rutay hampay may ibili sa baladaw. 37Dahil pagsabihun niku sa kanyu kailangan matupad tungkul sa kangku inda pag sinabi sa Kasuratan magkun, ‘Imininsan siya sa bilang sa manga makasalanan pag tawu.’ Dahil ti isinurat tungkul sa kangku pihu mangyari aban.” #22:37 Bantayi diman ti Isa. 53:12. 38Sinabi nida, “Panginuun, inda duy ti duwa ka baladaw.” Sinabi niya, “Igu yi duy.”

Kay Darangin ni Hisus

(Mat. 26:36-46; Mk. 14:32-42)

39Naglakaw yi si Hisus tabug sa bantud Ulibu ga kay diman ugali. Nagkuyug kay manga tuludluan. 40Pagka siya nagras-ug ati sa bantud, sinabi niya sa kanda, “Pagdarangin kamu sa unman madara kamu sa tuksu.” 41Nagpablag siya sa kanda ga bintukan lang batu kay karayu. Pagka ati siya nagluhud nagdarangin, 42magkun, “Amang, nu gustu nimu ipakarayu nimu ginan sa kangku inda pag ungut may kakurian. Dapat una katida, danga kangku pag kagustuhan ti masunud, nu unman kanmu di gid ti masunud.”

43Napakakit sa kanya ti usa ka anghil ginan sa langit, nagpabisug sa kanya. 44Pagka udyi makapaunuunu kay isip, nagdarangin siya lalu mabisug. Kay hulas nagbaliw ga tiktik dugu kay bulus tag sa daga. 45Pagkatapus kay darangin nagtindug siya nagpakarani siya sa kay manga tuludluan. Naras-ugan sida turug dahil sa karukuan. 46Sinabi ni Hisus sa kanda, “Hayga kamu turug? Pagbangun yi kamu, pagdarangin hampay unman madara kamu sa tuksu.”

Kay Nagdakup sa kan Hisus

(Mat. 26:47-56; Mk. 14:43-50; Hu. 18:3-11)

47Magbagaw di waya si Hisus, inda yi ti kadamlan tawu. Ti usa sa sampulu may duwa ka tuludluan, si Hudas ngani ti nag-iba sa kanda. Nagpakarani si Hudas sa kan Hisus hampay kay arkan. 48Sinabi ni Hisus sa kanya, “Hudas, inda kanmu mag-aruk pag-itudlu yi aw nimu ti Anak Tawu sa kalaban?” 49Pagka nasalman manga tuludluan kaibahan ni Hisus nu hintay ti mangyari sab, sinabi nida, “Panginuun, manigbas yi aw kami baladaw?” 50Ti usa ka tuludluan nagtigbas ngap sa panawuhun Pangulu Manug-asiwa Balay Diyus napungus kay tuli baliwa sa sikun. 51Dapat sinabi ni Hisus magkun, “Tuman yi duy.” Hinikap niya ti tuli panawuhun, pinaayad yi maan.

52Ti manga pangulu manughandug, ti manga kapitan pulis Balay Diyus hanggan ti manga paggurangunun manga Hudiyu nagrinas-ug mandakup sa kanya. Sinabi ni Hisus sa kanda, “Nagluwang aw kamu bilang ga manlaban sa tulisan, may dara manga baladaw, manga pamakul? 53Pagka aku kaibahan waya niyu sa Balay Diyus sirang-sirang, hayga unman aku kanyu dinakup? Dapat taynguna kamu hanggan ti kapangyarihan kadudulman pinakan-an yi rugar hampay magdakup sa kangku.”

Ipinaulam ni Pidru si Hisus

(Mat. 26:57-58,69-75; Mk. 14:53-54,66-72; Hu. 18:12-27)

54Pagka kanda yi ngani dinakup si Hisus, kanda dinara ipinaslud sa balay Pangulu Manug-asiwa Balay Diyus. Nag-usig si Pidru napatayak-tayak. 55Namagba sida apuy sa karaw-an sugkadan. Pagka tinmukaw sida, nagdulud si Pidru. 56Nakitan babayi suruguun si Pidru matukawan sa magkad-agan apuy. Pagka hinimaladan niya si Pidru bag-u sinabi niya magkun, “Hanggan inda pag tawu kaibahan waydi niya.” 57Dapat nagpaulam si Pidru magkun, “Duy, unman kilala niku tunda pag tawu.”

58Pagka lagat-lagat, nakitan maan siya usa ka lalaki sinabi sa kanya, “Kawu hanggan kaibahan maaw nida.” Dapat magkun si Pidru, “Unman gid duy aku.”

59Pagka lawuy usa ka tamaan ginatung pag-ipalugus waya usa magkun, “Ungud gid inda pag tawu kaibahan diman niya, dahil taga Galiliya waydi siya.” 60Dapat sinabi ni Pidru, “Unman gid duy ungud niku alam kanmu pagsabihun.” Nagbagaw waya si Pidru kadaka tinmarauk ti manuk. 61Bag-u nag-aliwliw ti Panginuun, tinurun niya si Pidru. Bag-u naisipan ni Pidru kay bagaw Panginuun nu kabitay kay sinabi sa kanya magkun, “Udwaya tumarauk ti manuk itanggi yi nimu aku katlu ginan.” 62Napalwas si Pidru, namurus gid sa lumi siya.

Inunu-unu si Hisus

(Mat. 26:67,68; Mk. 14:65)

63Hinangalhangal si Hisus manga bantay, kanda sinaktan. 64Tinakluban nida kay mata bag-u pinaingana nida siya, “Pintua nimu hintay ti nagbakul sa kanmu?” 65Mayamu waya ti sinabi nida pag lapastangan sa kanya ag minuransa waya nida.

Si Hisus sa Atubangan Katipunan manga Pinunu

(Mat. 26:59-66; Mk. 14:55-64; Hu. 18:19-24)

66Pagka nasirang yi nagtiripun ti manga paggurangunun manga Hudiyu hanggan ti manga pangulu manughandug hanggan ti manga manugtudlu Kasuguan. Bag-u apinaatubang nida si Hisus ati sa kanda Katipunan. 67Magsabi sida sa kan Hisus, “Nu kawu yi ti Pinili Diyus Manugribri pag Hari, sabiha nimu sa kanmi.” Dapat sinabi niya sa kanda, “Nu sabihun niku sa kanyu ti katutuuhanan, unman waydi niyu paniwalaan. 68Ag nu kamu kang paingan-un unman diman waydi kamu magsagut. 69Dapat sa taynguna ginan matukawan yi ti Anak Tawu baliwa sa kay sikun Diyus minsan sa karampatan Diyus makapangyarihan.”

70Bag-u sinabi nida tanan, “Nu katunda kawu aw ti Anak Diyus?” Bag-u sinabi niya sa kanda, “Kamu yi waydi ti magsabi kuntay aku ngani.” 71Bag-u sinabi nida, “Hintay waya pag manga kastigus kanyu paghanapun? Dahil kita duy nakadnug yi waydi sa kay binagaw.”

Pilihan Saat Ini:

Lukas 22: HNN

Sorotan

Berbagi

Salin