Lukas 21
21
Kay Pakaun Babayi Buranday
(Mk. 12:41-44)
1Nagbantay si Hisus sa kay libut. Bag-u nakitan niya ti manga tawu mayaman magsukad kanda kuwarta sa sukadan kuwarta Balay Diyus. 2Nakitan diman niya ti usa ka babayi buranday pugri magsukad ati duwa ka dariit pag kuwarta. 3Sinabi ni Hisus, “Ungud kang pagsabihun sa kanyu, tunda pag babayi buranday pugri naghulug siya subra man sa kanda tanan pag pakaun. 4Dahil sida ati tanan naghulug kuwarta kanda wadi sawad nagbilyan. Dapat ti buranday unman nag-isip sa kay kagipitan. Itinabu ipinakaun kay pamili.”
Tungkul sa Pagguba Balay Diyus sa Hirusalim
(Mat. 24:1-2; Mk. 13:1-2)
5Ti iba tuludluan niya magharampangan tungkul sa Balay Diyus, pagkararinu pag lingub batu hanggan kay manga pamarinu ti ipinakaun manga tawu. 6Sinabi ni Hisus magkun, “Nu rumas-ug ti kaudasan, unman may masawad sitay una lang usa ka bilug batu sa kaparihu babaw batu, tanan-tanan magkarapugdak, madi taynguna kanyu pagbayaun sa kanyu magbantay.”
Manga Kakurian, manga Pag-unuunu Aban
(Mat. 24:3-14; Mk. 13:3-13)
7Nagpaingana sida sa kan Hisus, “Maisturu, kapira waya pag mangyari tunda? Hintay nguna duy kay tanda nu arani yi mangyari tunda tanan?”
8Bag-u nagsabi si Hisus magkun, “Pag-aman gid kamu sa unman gid kamu patalangun dahil mayamu ti sumitay mag-apu kang ngaran magkun, ‘Aku yi ngani. Inda yi ti kaudasan’ Danga kamu magsunud sa kanda. 9Una kamu makadnug manga barita sa gira manga kaguluhan danga kamu magkakulbaan. Dahil kailangan mangyari gid dapu tunda, dapat udwaya kadaka mangyari ti katapusan.”
10Bag-u sinabi waya niya sa kanda, “Manlalabanan aban ti parihu nasyun. Manlalabanan aban ti parihu kaharian. 11May manga linug mabisug aban ag una naan pag rugar aban may manga lun-us, manga sarut sakit. Ati katpung aban makitan ti karadalaun, dayawun aban manga tawu ti makadululaw pag manga tanda ginan sa langit.
12“Dapat bag-u mangyari tunda, dakpun kamu ag unu-unuhun bistahun kamu sa simbahan manga Hudiyu bag-u pirisuhun. Daran-un kamu sa atubangan manga hari, manga gubirnadur dahil sa kanyu pakiusa sa kangku. 13Bag-u mahimu yi kamu magtultul Mayad pag Barita sa kanda.
14“Pagkarig-un kanyu naisipan, danga magkaaburidu nu kabitay kanyu isagut. 15Dahil pakan-an niku kamu bagaw pananagut hanggan kadunungan hampay udyi makalaban udyi waydi tumanggi kanyu tanan manga kalaban. 16Dapat una kanyu manga gurang, una manga patar-ari, una manga katawuhan, una manga mayad pag kakilala pumakampi ngap sa kalaban bag-u kamu kanda itudlu. Ti iba sa kanyu ipamatay nida. 17Kamu kagalitan tanan tawu dahil sa kanyu pakiusa sa kangku. 18Dapat unman midamhak una di usa ka buhuk sa kanyu ulu. 19Nu kamu magpakarig-un, makatanggap kamu buhi unman may katapusan.”
Wasakun ti Banwa Hirusalim
(Mat. 24:15-21; Mk. 13:14-19)
20Magkun waya si Hisus, “Nu makitan niyu aban ti Hirusalim linibut yi kayamuan sundalu, pagkilala gid kamu arani yi wasakun ti Hirusalim. 21Nu katunda pagpalagiw yi ti manga tawu sa Hudiya tabug sa kabantudan. Ti manga tawu sa sulud banwa pagpalagiw yi. Ti manga sa luwas banwa danga yi magsulud sa banwa. 22Dahil tunda yi ti kaudasan kaparusahan hampay matupad ti tanan manga bagay isinurat sa Banal Kasuratan. 23Kaawaawa ti manga magbuduy hanggan ti may anak diing-diing ati katpung. Mangyari ti daka gid pag kakurian sa inda pag daga dahil pagkagalitan Diyus inda pag manga tawu. 24Matyun sida manga sundalu may armas baladaw, kay iba bihagun darahun tag sa una naan pag nasyun. Tatatataan manga balaw Hudiyu ti Hirusalim hanggan sa udwaya lumawuy ti kaudasan kapangyarihan manga balaw Hudiyu.”
Sa Pagsitay Aban Anak Tawu
(Mat. 24:29-31; Mk. 13:24-27)
25Sinabi diman ni Hisus, “May manga tanda aban sa init, sa bulan hanggan sa manga pamgasan. Sa babaw daga magkadiklahan ti manga nasyun, magkadala gid sida sa paywas dagat hanggan sa dagmuk taub. 26Manlubay yi lang gid aban ti manga tawu sa dala sa manga mangyari waya sa bilug kalibutan. Ti manga bagay#21:26 manga bagay: sa litiral, manga kapangyarihan. sa panungaan langit daga matandug ag magkalabalyuhan. 27Ati katpung aban makitan nida ti Anak Tawu rumas-ug padara sa rurum, may kamaskihan hanggan daka pag kadayawan. 28Dapat nu mag-umpisa mangyari inda pag manga bagay, ipaatngaw gid kanyu manga ulu pagbantay kamu dahil arani yi kamu iribri.”
Pahalimbawa sa Puun Igus
(Mat. 24:32-35; Mk. 13:28-31)
29Itinultul ni Hisus sa kanda ti usa ka pahalimbawa magkun, “Bantayan niyu ti puun igus ag ti manga iba puun kayu. 30Pagka makitan niyu ti manga puun kayu nanlangba yi, maalaman niyu arani yi ti abagat. 31Katunda diman pagka makitan niyu mangyari tunda pag manga bagay, maalaman niyu arani yi kay paghari Diyus. 32Ungud duy kang pagsabihun sa kanyu, dayu mamatay inda pag sinulput tawu hanggan sa ud matupad inda pag manga bagaw. 33Ti langit hanggan ti daga may katapusan di, dapat kang bagaw balaw pumalya hanggan aban.
Pag-aman Kamu
34“Dapat pag-aman kamu barang magumun kamu sa kasulungan hanggan sa maglangu ngatay sa subra pag irisipun tungkul sa kanyu kahamtangan sitay sa babaw daga. Barang bigla rumas-ug sa kanyu tunda pag kaudasan ga suduk kamu unman alistu. 35Dahil rumas-ug tunda pag kaudasan sa tanan mag-uli sitay sa babaw daga. 36Pagmaimatahan gid kamu. Pagdarangin pirmi hampay una kamu lumakaw sa tunda pag kakurian, lumapus di kamu ag makatindug sa atubangan niku, sa Anak Tawu.”
37Sirang-sirang magtudlu si Hisus sa Balay Diyus. Yabi yabi mag-ati siya mag-igya sa bantud Ulibu. 38Kada masurip ti buu banwa nag-ati sa Balay Diyus namatingi sa kanya.
Pilihan Saat Ini:
Lukas 21: HNN
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Copyright © 2023 by OMF International, Philippines
