Lukas 14
14
Pinaayad ni Hisus ti Tawu Magkarabaga kay Kamang ag Lulud
1Pagka sa Sirang Pamahari binan-awan si Hisus usa ka pinunu manga Parisiyu hampay mangaun. Pagka sinmaka siya sa balay kanda tiniidan. 2May nagluwang tag sa kan Hisus usa ka lalaki magkarabaga kay kamang hanggan kay lulud. 3Nagpaingana si Hisus sa manga manugtudlu Kasuguan hanggan sa manga Parisiyu magkun, “Angay aw sa Kasuguan aw ngatay unman nu magpaayad sa may manga sakit nu Sirang Pamahari?” 4Dapat sida udyi ngap inmingay. Nakan hiniyaptan ni Hisus ti may sakit ag pinaayad niya. Bag-u sinabi ni Hisus sa kanya, “Ta duy, pag-uli yi kawu.” 5Bag-u sinabi ni Hisus sa kanda, “Si unu nguna sa kanyu ti balaw mamawi sa kay anak lalaki una sa kay tudu baka nu abi nalagpak sa kali sa Sirang Pamahari?” 6Udyi nakasagut sida.
Mayad nu Matinanggapun ag Mapinakumbabaun
7May tinaban waya iba tunda pag Parisiyu tag sa kay balay hampay mangaun. Pagka nakitan ni Hisus kanda pagpiliun ti manga mayad pag tukawan, itinultul niya sa kanda ti usa ka pahalimbawa magkun, 8“Nu ban-awun kawu una hintay pag tawu atag sa pamasaruhan, danga kamu magtukaw sa mayad pag tukawan, barang may binan-awan waya siya lalu man mataas sa kanmu. 9Dumulud ti apu may pamasaruhan tag sa kanmu hanggan tag sa kanya bag-u sumabi siya sa kanmu magkun, ‘Pagtindug duy kawu hampay siya maan ti tumukaw sitay.’ Bag-u mangay-a yi lang kawu, miuli kawu sa basta basta pag tukawan. 10Nu kawu ban-awun tag sa karan-an, pag-ati yi kawu pagtukaw sa basta basta pag tukawan hampay nu rumas-ug sab ti nagban-aw sa kanmu, sumabi siya sa kanmu magkun, ‘Sitay duy kawu sa mayad pag tukawan.’ Nu katida may kadayawan yi kawu sa atubangan tanan manga kasaru nimu sa karan-an. 11Dahil ti kada magpalabaw-labaw ipaababa ag ti mapinakumbabaun ipaabwat.”
12Sinabi diman ni Hisus sa nagban-aw sa kanya pag Parisiyu magkun, “Nu kawu mag-alistu yabas ngatay yapun, danga ban-awun nimu tag sa karan-an kanmu manga kakilala, una kanmu manga patar-ari, una kanmu manga katawuhan, una kanmu kamalay manga mayaman. Barang kawu maan ti ban-awun nida ag balusan kawu karan-an. 13Dapat nu maghanda kawu karan-an, ban-awun nimu ti manga pugri, ti manga may pungkul, ti manga pilay hanggan ti manga buta. 14Kawu papaladan gid Diyus dahil unman sida may kang-ud ibalus sa kanmu. Balusan kawu aban Diyus sa katpung pagkabuhi uman manga magpasakup sa kanya.”
Ti Pahalimbawa sa Daka pag Karan-an
(Mat. 22:1-10)
15Pagka nadnugan inda usa ka kasaru ni Hisus sa karan-an, magkun siya sa kan Hisus, “Masulung ti manga kumaun sa karan-an sa kaharian Diyus.” 16Bag-u sinabi ni Hisus sa kanya magkun, “May usa ka tawu naghanda daka pagka karan-an. Mayamu kay binan-awan. 17Pagka katpung yi manyapun sinugu niya kay panawuhun hampay ban-awan ti manga pinaalaman magkun, ‘Kamu pagluwang yi, dahil manhayin yi.’ 18Dapat sida tanan bilang ga nagkaraminsan kanda naisipan naningyanan. Ti usa nagsabi sa panawuhun magkun, ‘May binili aku daga, kailangan aku umatag kang duawan. Patawada lang, unman aku makaasan.’ 19Magkun maan ti usa ka tawu, ‘May binili aku sampulu ka tudu baka, atabug dapu aku hampay samitan iaradu. Una aku balaw asan, bukun may daut.’ 20Magkun ti usa, ‘Bag-u waya aku nangasawa, nakan ngani balaw aku makaasan tag.’ 21Nuli maan ti panawuhun itinultul sa kay amu kanda manga singyanan.#14:21 singyanan: sa Tagalog, dahilan. Bag-u nagalit gid ti may puun balay, magkun sa kay panawuhun, ‘Pag-ati kawu kadali sa manga karsada hanggan sa manga dalan dariit sa banwa, tabana nimu sitay tag ti manga pugri, ti manga may pungkul, ti manga buta hanggan ti manga pilay.’ 22Pagka nuli maan ti panawuhun magkun siya, ‘Duy, binwat yi niku kanmu sinabi, dapat may imaw waya rugar.’ 23Magkun kay amu sa kay panawuhun, ‘Pag-atag kawu sa manga dalan hanggan sa manga sugkadan balay, pilita gid ti manga tawu pagsaka gid sida hampay mapnu kang balay. 24Dahil pagsabihun niku sa kanyu, ti tanan tawu kang pinaalaman sa kabag-u unman nagluwang, unman makasamit kang karan-an.’ ”
Isipa dapu bag-u Magsunud sa kan Hisus
(Mat. 10:37-38)
25Kinmuyug sa kan Hisus ti lalu mayamu pag tawu. Bag-u napasrangu siya atag sa kay manga kaibahan magkun, 26“Una si unu pag tawu ti pumakarani sa kangku dayu mahimu kang tuludluan nu ipalabi niya kay ina hanggan kay ama, kay asawa, kay manga anak hanggan kay manga patar-ari, una kay sadili. 27Nu ti tawu unman magpas-an kay sadili pag kurus ag kumuyug sa kangku, balaw mahimu tuludluan niku.
28“Nu ti usa sa kanyu may gustu magbuwat balay daka, tumukaw dapu siya isipun niya ngatay kumang-ud kay panggastus hanggan tugka sa mamhan kay balay. 29Barang nu inalistu niya ti patakinan tulduk bag-u unman mamhan ti balay, ti tanan nakakit maglibak yi sa kanya, 30magkun, ‘Nag-umpisa nagbuwat siya balay dapat unman nakakamhan siya, kurang yi sa gastus.’ 31Una hintay pag hari nu sumulang dumugma sa gira sa kaparihu hari, tumukaw dap bag-u kay karkulahun ngatay makaatubang siya may sampulu ka libu sundalu sa kalaban niya nu umaput may duwapulu ka libu. 32Nu unman siya pumanghas, pumasugu siya atag sa kalaban nu arayu waya hampay magkarasunduan lang sida. 33Katunda diman una si unu sa kanyu balaw mahimu kang tuludluan nu pagpahalgaan waya niya ti tanan sa kay buhi.”
Nu Tumab-ang ti Asin
(Mat. 5:13; Mk. 9:50)
34Magkun si Hisus, “Mayad ti asin, dapat nu tumuhay kay lasa, unman yi may ipapait, 35udyi may gana una sa daga una sa rayamtan yagting bulul-an abunu, nakan iyamut yi lang. Ti may tuli kailangan pagpatingi.”
Pilihan Saat Ini:
Lukas 14: HNN
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Copyright © 2023 by OMF International, Philippines
