मात्ति 5
5
झोन्झोबाङिना उपादेस
(लुका ६:२०-२३)
1ठिक् लेम्बा येसुङा याप्मिचिगा खिमेयाङ्मे उन्लेङ् ओआबागा निसुचिउङ् उन् झोन्झोबाङि खाडाउङ् युङे॥#५:१ हिट्ना बेला, कोइङा याप्मिचि उहिसिक्टुचिनाँ उयुङाउङ् रिङ्पान् ओचोगागा डागा॥ हिट्नुङ् ओचेलाचि चा उन् याम्बा-नायाम्बा उछुमे, 2हिट्नुङ् उन्ङा नाड्डे पिक्सा हिसिक्मा ठालाँ चोगुचे–
3“हाङ्साङि पाक्चा उलिनिगा हिट्नुङ् उन् चाहाब् उलिगा लाउङ्सा माङ्हाङ्ङा डोक् आसिक् पिडुचिचि,
पोङ्भोने टोनालोग्ङिना मुलुक् हिट्नागाँगा डोक् ए॥
4ना बेला सानिङ्ग्वा ओलोगा लोङ्सा माङ्हाङ्ङा आसिक् पिडुचिचि,
पोङ्भोने उन्ङा हिट्नागाँगा उन्चि निङ्ग्वाङि हाङ्हाङ् चोगुचिचि॥#यासैया ६१:२
5मेयोक् उलिगा लोङ्सा माङ्हाङ्ङा आसिक् पिडुचिचि,
पोङ्भोने उन्ङा हिट्नागा ना नारा हिट्नुङ् नेहिगा ख्वाप्पा थोक्चि पिडुचिचि॥#छाम्लोमा छाप्ला ३७:११
6माङ्हाङ्ङाना ओनाभाक्ङि पाक् नुना हिट्ना रिङ्ङि एडोक् निङ्ग्वा कापिबा लोङ्सा माङ्हाङ्ङा आसिक् पिडुचिचि,
पोङ्भोने उन्ङा हिट्नागालोङ्सा उन्चि निङ्ग्वा इप्लोक् पिडुचिचि॥#यासैया ५५:१-२
7आरु लुक्मा काटुक्बाचि लोङ्सा माङ्हाङ्ङा आसिक् पिडुचिचि,
पोङ्भोने उन्ङा हिट्नागा लुक्मा टुक्टुचिचि॥
8चोखो निङ्ग्वा उलिसागा लोङ्सा माङ्हाङ्ङा आसिक् पिडुचिचि,
पोङ्भोने हिट्नागाँ माङ्हाङ् उनिसुटु॥#छाम्लोमा छाप्ला २४:३-४
9याप्मिचि काटोङ्बाचि लोङ्सा माङ्हाङ्ङा आसिक् पिडुचिचि,
पोङ्भोने हिट्नागा माङ्हाङ् ओछालेट्चि उलियुक्॥
10माङ्हाङ् ओनाभाक्ङि पाक् नुना हिट्ना रिङ्ङि निङ्ग्वा उपिडुङ् याङ्ओछाडागा लोङ्सा माङ्हाङ्ङा आसिक् पिडुचिचि,
पोङ्भोने टोनालोग्ङिना मुलुक्उम्टे हिट्नागाँगा डोक्॥#१ पाटरुस ३:१४
11“आङि बिस्वास आचोगुम्नाँ याप्मिचिङा चिम्मा माफुट्टिटि, हिट्नुङ् ओचाफेन्लोक् मामेट्टिटि, हिट्नुङ् माङ्जो ओचेक्युउङ् खानि बिरुद्दाङि सोब्बे पारिक्गा ओचाफेन्गा रिङ् मालोडिटि, टब माङ्हाङ्ङा खानि आसिक् मापिडिटि॥#१ पाटरुस ४:१४ 12हिट्नुङ् हिट्नापाका खानि हारका लोक् आनान्दा चोगानि, पोङ्भोने टोनालोग्ङि खानिलोङ्सा ठेना इनाम् युङ्ग्वा॥ हिट्नुङ् मिट्टानुम्, हिट्नाड्डे डोक् याप्मिचिङा खानि नुङ्ना पाइलेगा माङ्काटाचि ओचाफेन्लोक् चाट्ला ओमेट्टुचे॥#२ इतिहास ३६:१६; मुलिचेला टोॽवा ७:५२
युम् हिट्नुङ् व्हाङ्ङाना बारे
(मारकुस ९:५०; लुका १४:३४-३५)
13“खानिउम्टे नाराङिगा याप्मिचिलाउङ्सा युम् गाड्डेगा डोक् ए॥ टरो युम्ङाना ओसाम् खाडे भोने, हिट्ना फेरि नुम्नुम् लोलोक् खोड्डेउङ् चोग्माना टे? हिट्नाउम्टे चालाँ चोक्मा डोक् लिनिना लियुङ् भारा लेप्टुम्टुम् हिट्नुङ् याप्मिचिङा ओयेप्टुडिसुटु॥#मारकुस ९:५०
14“खानिउम्टे नाराङिगा व्हाङ् ए॥ झोन्झोबाङिना खालाङ्गा साङा चा टेप्मा उहिडुन्ना॥#युहान्ना ८:१२; ९:५ 15साङा चा कुपि ओहाट्टुङ् पाटि डालिङा ओटेप्टुन्ना, टरो पाङ् भिट्रा ओआप्गालोङ्सा व्हाङ् उलियाक् नुङ् चोट्चोट्नाङि उयुङ्सुटु॥#मारकुस ४:२१; लुका ८:१६; ११:३३ 16हिड्डे डोक् कुपिङाना व्हाङ् गाड्डे डोक् खानि व्हाङ् चा याप्मिचि सोरि ओओम्याक्, हिट्डेउङ् हिट्नागाँ खानिङा आचोगुम्ना नुना टोॽवा उनिसुटुटु हिट्नुङ् टोनालोग्ङिना माङ्हाङ् पाबाङाना माहिमा ओचोगुटु॥
धारमाबिधिङाना बारेङि हिसिक्मा
(लुका १६:१७)
17“मोसाङा छेप्टुना धारमाबिधि हिट्नुङ् माङ्काटाचिङा ओछेप्टुगा छाप्लाचि जाखाम् चोक्ङा आङा टायाङ्ना नुङ् मिट्नेनिन्॥ आङाउम्टे हिट्नागा जाखाम् चोक्ङा माखाक्, टरो हिट्नागा पुरो चोक्मा लोङ्सा टायाङ्ना॥ 18छेम्बा डोक्, आङा खानि लोनाँनि, टाङ्साङ् लोक् नारा जाखाम् मिलिए सोम्मा, धारमाबिधिङिना सोब्बे रिङ् पुरो मिले सोम्मा हिट्नि लिसाना खाट्टिउना नुङ्ना खाट्टियुना रिङ् चा जाखाम् लियुङ् खाट्निना॥#लुका १६:१७ 19हिड्डेउङ् जुन्ङा धारमाबिधिङिगा नागा खाट्टिउगा नुङ्ना चा खाट्टिउगा आग्याँचि पालान् चोगुन्ना हिट्नुङ् हिट्डेडोक् चोक्मा आरु चा हिसिक्टुचिचि भोने, टोनालोग्ङिना मुलुक्ङि हिट्ना ख्वाप्पा नुङ्ना खाट्टिउना लियुक्॥ टरो जुन्ङा हिट्नागा रिङ्चि पालान् चोगुटु हिट्नुङ् हिट्डेडोक् चोक्मा हिसिक्टुचिचि हिट्ना टोनालोग्ङिना मुलुक्ङि ठेना लियुक्॥ 20नाड्डेउङ् आङा खानि लोनाँनि, खानिङा धारमाबिधि काहिसिक्बा हिट्नुङ् फारिसि याप्मिचि नुङ्ना चा ओचेट्नुलोक् माङ्हाङ्ङाना निङ्ग्वा पालान् आचोक्न्याँट्निम् भोने, खानि टोनालोग्ङिना मुलुक्ङि लिक्मा आटोक्निम्ना॥
याग्लेप्मा बारेङि हिसिक्मा
21“खानिङा आखेम्सुएसुम्मे, आच्छो बेलागा याप्मिचि नाड्डे ओलोडुएसुचिगा डागा, ‘खान्ङा याप्मि सेप्मा लिनिना, जुन्ङा याप्मि सेप्माना टोॽवा चोगुटु हिट्नाँ साजाए टोगुटु॥’#पारस्थान २०:१३; धारमाबिधि ५:१७ 22टरो आङा खानि लोनाँनि, खोना चा आरु याप्मिलोक् ओयाक्लेड्युक् भोने हिट्नाङा चा साजाए टोगुटु, जुन्ङा आरु ‘ठोनाबा’ लोडुटु हिट्ना माङ्हाङ्ङा ओचाफेन्लोक् साजाए पिडुटु॥#५:२२ “नाहि काचारि कुन्डालङिना रिङ् छेप्टेसे, नाउम्बाक् याहुदिचिगा न्याए चोक्माना ठेना आदालात ए॥ टरो नाहिङाना उटुप्बाक् जुन् याप्मि ओरेक् काट्युक् हिट्ना माङ्हाङ्ङाना न्याए चोक्माना आदालातङि खाट्युक् हिट्नि माङ्हाङ् आप्पेङा न्याए चोगुटु॥” जुन्ङा आरु याप्मि साराप याङुटु हिट्ना झान् योनालोग्ङिना मिङि ठायुक्॥
23“हिड्डेउङ् खान्ङा माङ्हाङ्लोङ्सा ठानाङि भेटि ठाङ्मा आकोलुलाबुनाँ इक्किनाँ आरु याप्मिलोक् कायाग्लेडाना रिङ् आमिट्टुए भोने, 24खान्ङाना भेटि हिट्ना ठाना सोरि डोक् पोक्टुढोङ् पाइला हिट्नालोक् टोङा, हिट्नुङ् आबाउङ् काभेटि ठाङ्सु॥
25“खान् फाट्टुर कालाप्बाङा न्याए काचोक्बाङि खाप्मा नुङ्ना पाइला डोक् हिट्नालोक् टोङाएट्टाचि॥ नाड्डे आचोक्न्याँट्नि भोने हिट्नाङा खान्ङाना बिरोधङि न्याए काचोक्बाङि नालिस् माठेन्युक् हिट्नुङ् न्याए काचोक्बाङा टिलिङ्गाचिगा उन्चि मुक्ङि जिम्मा मापियुक् हिट्नुङ् खान् खाम्बाङ्ङि माठेन्युक्॥ 26छेम्बा डोक् आङा खानि लोनाँनि, खानिङा सोब्बे जारिमाना मिहुङ्ङे सोम्मा खानि हिट्नालाम्मा होम्मा आहिडिन्गा॥
इम्मेप्माजामा बारेङि हिसिक्मा
27“खानिङा ‘इम्मेप्माजामा टोॽवा चोक्मा लिनिना’#पारस्थान २०:१४; धारमाबिधि ५:१८ नुङ् माप्बालाक् रिङ् आखेम्सुएसुम्मे॥ 28टरो आङा खानि लोनाँनि, खोनाङा चा मेन्झेमा ओचाफेन्ना निङ्ग्वाङा पुयुटु भोने हिट्नाङा हाले डोक् उनिङ्ग्वाङि इम्मेप्माजामा टोॽवा चोगुएट्टुटु॥ 29छुप्टाङ् कामिक्ङा खान् पाप चोक्मा मामेट्युक् भोने हिट्ना होट्टुङ् लेप्टुडिसु, पोङ्भोने ख्वाप्पा कायेम् योनालोग्ङि ठामा नुङ्ना टे खान्ङाना कायेम्ङिना ठिक् आङ्गा मिलिमा डोक् खान् लोङ्सा ओचेट्नुयुक्॥#मात्ति १८:९; मारकुस ९:४७ 30हिड्डेउङ् छुप्टाङ् कामुक्ङा खान् पाप चोक्मा मामेट्युक् भोने हिट्ना चा चेप्टुङ् लेप्टुडिसु, पोङ्भोने ख्वाप्पा कायेम् योनालोग्ङि ठामा नुङ्ना टे खान्ङाना कायेम्ङिना ठिक् आङ्गा मिलिमा डोक् खान् लोङ्सा ओचेट्नुयुक्॥#मात्ति १८:८; मारकुस ९:४३
नामाना बारेङि हिसिक्मा
(मात्ति १९:९; मारकुस १०:११-१२; लुका १६:१८)
31“नाड्डेना रिङ् चा खानिङा आखेम्सुएसुम्मे ‘खोनाङा ओटालिमाङ् नाडुटुना, हिट्नाङा नाडुङे नुङ् छुटानाम् कागाता ओछेप्टुवाक्॥’#धारमाबिधि २४:१-४; मात्ति १९:७; मारकुस १०:४ 32टरो आङा खानि लोनाँनि, जुन्ङा ओटालिमाङ् आरुलोक् इम्साजाना माले आरु रिङ्ङि नाडुटु भोने, हिट्नाङा इम्मेप्माजामा टोॽवा चोक्मा मेट्टुटु, हिट्नुङ् जुन्ङा ओनाडुना मेन्झेमा भ्या चोगुटु हिट्नाङा चा इम्मेप्माजामा टोॽवा चोगुटु॥#मात्ति १९:९; मारकुस १०:११-१२; १ कोरिन्थि ७:१०-११
चामारसिङा बारेङि हिसिक्मा
33“फेरि खानिङा आनि टुबाठेबाचि नाड्डे ओलोडुचिगा आखेम्सुएसुम्मे, ‘खान्ङा माङ्जोना चामारसिङा चोन्, टरो टाङ्बा लोङ्सा चोक्बालाक् चामारसिङा खान्ङा युडु॥’#लेबि १९:१२; गान्ति ३०:२; धारमाबिधि २३:२१ 34टरो आङा खानि लोनाँनि, खोना रिङ्ङि चा चामारसिङा चामा चानेनुम्॥ टोनालोग् उनिङ्ङि चा चामारसिङा चोक्नेनिन्, पोङ्भोने हिट्नाउम्टे माङ्हाङ्ङाना सिङासान् ए॥#याकुब ५:१२; यासैया ६६:१; मात्ति २३:२२ 35हिट्नुङ् नाराङाना उनिङ्ङि चा चामारसिङा चोक्नेनिन्, पोङ्भोने हिट्नाम् टे ओलाङ्घेप्पाङा येप्टुना डेन् ए॥ हिड्डे डोक् यरुसलेम उनिङ्ङि चा चामारसिङा चोक्नेनिन्, पोङ्भोने हिट्नाम् टे माङ्ठेना हाङ्बाङाना खालाङ्गा ए॥#यासैया ६६:१; छाम्लोमा छाप्ला ४८:२ 36हिट्नुङ् खान्ङा आप्पे काटेहेक् खोट्टुङ् चामारसिङा चोन्, पोङ्भोने खान्ङा काटेहेक्ङिना ठिक् फ्याक् चा फुट्ना लोक् माक्ना चोग्मा आहिडुन्ना॥ 37खानिङाउम्बाक् नाट्टेप्मा एरोक् माट्टानुम्, ‘आए, चोगुङ्टुङ्’ ‘माखाक्, चोक्निङ्ना’॥ ना नुङ्ना याप्मा रिङ् माप्माम्बाक् सैतानलाम्मा टायुक्॥
बादला नोक्मा लिनिना बारेङि हिसिक्मा
(लुका ६:२९-३०)
38“नाड्डे माप्बालाक् खानिङा आखेम्सुएसुम्मे, ‘मिक्ङाना ओसाट्टोङि मिक्, हिट्नुङ् केङ्ङाना ओसाट्टोङि केङ्॥’#पारस्थान २१:२४; लेबि २४:२०; धारमाबिधि १९:२१ 39टरो आङा खानि लोनाँनि, खानि ओचाफेन्लोक् मामेट्टिगा लाउङ्सा ओचाफेन्लोक् चोग्नेनुम्चिम्॥ हिट्नुङ् कोइङा खान्ङाना छुप्टाङ्लेङ्ना काकालाङि मालेम्से भोने, फेङ्साङ्ना काकाला चा टाक्टुबिडु॥ 40कोइ याप्मिङा मुद्दाङि माठेन्युङ् कालोट्लिङ् खाप्मा कोलुटु भोने, हिट्ना काटाखुम्बि चा पिडुडिसु॥ 41कोइङा ठिक् किलो मिटार टेप्मा खाप्मा उन्ङा मामेट्युक् भोने, हिट्नालोक् इप्पोक् किलो मिटार डोक् खाडा॥#५:४१ हिट्ना बेला रोमि टिलिङ्गाचिङा उन्चि थोक्चि जोसुके चा जाबारजास्ति खुमा ओमेट्टुचिगा डागा॥ 42हिट्नुङ् कोइङा खान् पालोवालो मानाक्युक् भोने हिट्ना पिडु, हिट्नुङ् खान्लोक् नाॽवा मानाक्युक् भोने हिट्ना नाॽवा पिडु॥
साट्टुरचि चा माया चोक्माचि कोन्युक्
(लुका ६:२७-२८,३२-३६)
43“खानिङा नाड्डे चा माप्बालाक् आखेम्सुएसुम्मे, ‘काटाक्लुङ्चि माया चोगुचि’#लेबि १९:१८ हिट्नुङ् कासाट्टुर चिम्मा फुट्टु॥#५:४३ पुरानो नियामङि साट्टुर चिम्मा फुट्टु नुङ् आग्याँ वानेट्निना, टरो धारमिक् रिङ् काहिसिक्बाचि याहुदिचिङा ना रिङ् उहिसिक्टुचिगा डागा॥ 44टरो आङा खानि लोनाँनि, खानि साट्टुरचि माया चोगानुम्चिम्, हिट्नुङ् खानि निङ्ग्वा टुक्मेप्मा मामेट्टिगा लोङ्सा बिन्टि चोगाबिडानुम्चिम्॥ 45हिड्नाड्डे आचोगिए भोने खानि टोनालोग्ङि युङ्ना माङ्हाङ् पाबाङाना ओछालेट्चि आलिसिटि॥ पोङ्भोने उन्ङा ओभेन्गा हिट्नुङ् नुगालोङ्सा डोक् नाम् छेमा पिडुचिचि, हिट्नुङ् धारमोति याप्मि हिट्नुङ् कायाङ्छाबा याप्मि इप्पाङ्लोङ्सा डोक् व्हेट् ठेन्डुबिडुचिचि॥ 46खानिलाउङ्सा माया काचोक्चि एडोक् माया आचोगुम्चिम्चिम् भोने, खानिङा पाक् पुरास्कार आटोगुम्टुम्ना टे? पाक् तिरो काफोक्बाचि चा हिट्डेडोक् ओचोक्निगै टे? 47खानिङा आप्पे खानि याप्मिचि एडोक् ओचेट्नुलोक् आमेट्टुम्चिम्गा भोने, खानिङा आरु नुङ्ना पाक् ठेना टोॽवा आचोगुम्मेना टे? पाक् पानिछोङ्बाचि चा हिट्डेडोक् ओचोक्निगै टे? 48हिट्डेउङ् टोनालोग्ङि युङ्ना खानि माङ्हाङ् पाबाङा सोरोक् पाक् नुना हिट्ना चोगु गाड्डे डोक् खानिङा चा सोरोक् पाक् नुना हिट्ना डोक् चोगानुम्॥”#लेबि १९:२; धारमाबिधि १८:१३
Pilihan Saat Ini:
मात्ति 5: APH
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023, Wycliffe Bible Translators, Inc. and Nepal Bible Society
