Matɨyo 6
6
Gɨle gɨ ojɨ cay hɨnga ga ni aye bɨn̰ ka-n̰age
1«Hɨnga ga kɨŋ kɨya lɔɔ tumɔ pa dɨm ma, ɗe gɨl gɨ kɨŋ naa kalaŋ ga dan̰ durɔ ɗɨngar tumoy Kumu na, ɗɔɔgɨŋ ba looge cɨn̰ kalaŋ. Hɨn̰ gɨ kɨŋ na laa hɨnga kɨya cɨn̰ kalaŋ na, Baygɨŋ gɨ woy a daa nii kɨya bɨgɨŋ cay kobɨgɨŋ naŋ. 2Hɨn̰ gɨ ji na bɨn̰ ungo gɨ ba-n̰age hɨnga na, ji ɗɔɔ ba dɔgɛ-bɨla cay nee, hɨn̰ kalaŋ ga ka-yɔɔ-kɔl-kɨbɨge-sɔɔ-sɔɔ wo̰ naŋ. Kan na, kan bɨdɨn̰ge ka-n̰age hɨnga na a duroy ƴaa-daye-di-da-Jubɨn̰əŋ gaŋ bɨ, a te gɨyəŋ ga woli gaŋ bɨ, ɗe kalaŋ na hɨramgege. Aŋ yəgɨŋ daa waŋ na cɨndi: Kan wayge hɨnga kage ga ni cay kobɨge koge ɨni. 3Ama ji-bandi na, kɨɗɨn̰ ga ji na gey bɨn̰ ba-n̰age hɨnga na, ji ɗɔɔ mɨgan̰ gɨ som durdin̰ pḛḛ sɔlɛ kardɨge naŋ, 4ɗe gɨ hɨnga ga ji ba bii le woy kɨɗɨn̰ wɔsɛdɨge gaŋ pḛḛ. Ɨni na, Banɨ gɨ ba-sɔlɛ hɨnga ga woy kɨɗɨn̰ wɔsɛdɨge gaŋ pḛḛ le, kɨya bɨn̰ cay kobɨn̰.
Gɨle gɨ ojɨ cay kɔl gɨ da ɔlɛ
5«Kɨŋ-gandi na, kɨɗɨn̰ ga kɨŋ na kɨya ɔlɛ Kumu na, wɔyɛgɨŋ hɨn̰ kalaŋ ga ka-yɔɔ-kɔl-kɨbɨge-sɔɔ-sɔɔ wo̰ naŋ. Ga mooge ɨre dan̰ tɨbayige daa duroy ƴaa-daye-di-da-Jubɨn̰əŋ gaŋ bɨ, tɨbɨn̰ gɨyəŋn̰əŋ gaŋ bɨ, kɨya olɨn̰ Kumu ɗe kalaŋ na solge le naŋ. Aŋ yəgɨŋ daa waŋ na cɨndi: Kan wayge hɨnga kage ga ni cay kobɨge koge ɨni. 6Ama kɨɗɨn̰ ga ji na gey ɔlɛ Kumu na, andaŋ duroy ƴaadɨn̰ gɨŋ bɨ, lɨgɨ kɨbɨ-ƴaa can̰ pa dɨm ma mɨn̰ olɨn̰ Ban̰ gɨ woy kɨɗɨn̰ wɔsɛdi gɨŋ pḛḛ le ƴee. Ɨni na, Ban̰ gɨ ba-sɔlɛ hɨnga ga woy kɨɗɨn̰ wɔsɛdɨge pḛḛ gaŋ le, ba kɨya bɨn̰ cay kobɨn̰. 7Kɨɗɨn̰ ga kɨŋ na kɨya ɔlɛ Kumu na, kɨŋ ɗɔɔ ba ɗɔŋsɨdɛ kɔl kondɨwa hɨn̰ kalaŋ ga toyge na Jubɨ naŋ wo̰ naŋ. Kan ɨrɨmge hɨn̰ gɨ ke na ɗɨngɨsɨda kɔl kunda na, ban na kɨya jɔɔ ɔlɛ koge. 8Naa hɨn̰ wo̰ na, gɨlɨn̰agɨŋ danage naŋ, kɨya gɨ hɨnga ga kɨŋ or n̰agedɨge le, Baygɨŋ sol tumɔ pa hayi dɨm ma magɨŋ olii ƴee. 9Hɨn̰ gɨ kɨŋ na gey ɔlɛ Kumu na, ulayigɨŋ na hɨn̰ wo̰:
Bayni gɨ a daa nii,
Laa gɨ ɗe gusondɨn̰ woy dan̰ cɨndi,
10Laa gɨ ɗe dɔɔ-ƴaa ton̰ ɨrga bɨ,
Laa gɨ ɗe kalaŋ leege hɨnga ga kuduron̰ gey a cay gɨsəŋ gaŋ kɛ
Hɨn̰ gɨ kan ba leen̰ge a daa nii wo̰ bɨ.
11Bɨni hɨnga kani ga ni dɔɔ ga dan̰ wɔlɛ pɨna pɨna le labɨde.
12Ɗa kuduron̰ jala cay gɨye-lɔɔdini gɨ ɨra dan̰ durɔ naŋ gɨ ni lee danan̰,
Hɨn̰ gɨ ni-gandi kalɨn̰ ma ni ba ɗen̰ kuduroyni jal a cay ka-looni ɨsɨna wo̰ bɨ.
13Ji ɗɔɔ ba ɗoni ɔrɛ kɨbɨ hɨnga ga ni gɨybe gaŋ naŋ,
Ama dɨrani kɨbɨ hɨnga ga ɨsɨni ga sayga gusi Haban̰.
[Kɨya wa dɔɔ-ƴaa bɨ, dɔnɔ bɨ, gusoŋ-tɔgɛ bɨ, na hɨnga kan̰ ɨlge dan̰ ɨlge. Ɗa-ɗe-woy-hɨn̰-wo̰!]
14Hɨnga ga dan̰ gɨyəŋdɨge naŋ ga kamdɨgɨŋ ba lee danagɨŋ le, hɨn̰ gɨ kɨŋ na ɗa kuduroygɨŋ jala cay nee koldɨge na, Baygɨŋ gɨ som a daa nii le kalɨn̰ ma, kɨya ɗɔɔ kuduroy jalɨwa caygɨŋ bɨ. 15Ama hɨn̰ gɨ hɨnga ga dan̰ gɨyəŋdɨge naŋ ga kamdɨgɨŋ ba lee danagɨŋ le, kɨŋ na ɗa kuduroygɨŋ jala cay nee koldɨge naŋ na, hɨnga ga dan̰ gɨyəŋdɨge naŋ ga kɨŋ ba lee le kalɨn̰ ma, Baygɨŋ kɨya ɗɔɔ kuduroy jalɨwa caygɨŋ naŋ bɨ.
Gɨle gɨ ojɨ cay kɔl gɨ da haye-kɨbɨ
16«Kɨŋ-gandi, kɨɗɨn̰ ga kɨŋ na gey haye kɨbɨgɨŋ na, kɨŋ ɗɔɔ ba lɔɔ cɨndɨgɨŋ lɔɔ cɨn̰-n̰age, hɨn̰ kalaŋ ka-yɔɔ-kɔl-kɨbɨge-sɔɔ-sɔɔ ba leen̰ge wo̰ naŋ. Kan leege cɨndɨge leen̰ cɨn̰-n̰age tɔgɨ, ɗe kalaŋ na solge gɨ ke na hay kɨbɨge. Aŋ yəgɨŋ daa waŋ na cɨndi: Kan wayge hɨnga kage ga ni cay kobɨge koge ɨni. 17Ama ji-bandi, kɨɗɨn̰ ga ji na haya kɨbɨn̰ na, ji laa ɨdɨr can̰ bɨ, ji pɨl cɨndɨn̰ coŋ bɨ, 18ɗe kalaŋ solge hɨn̰ gɨ ji na haya kɨbɨn̰ naŋ. Na Ban̰ gɨ som a kɨɗɨn̰ wɔsɛdi gɨŋ pḛḛ le ba kɨya sɔlɛ. Kɨɗɨn̰ ga nee le, Ban̰ gɨ ba-sɔlɛ hɨnga ga woy a kɨɗɨn̰ wɔsɛdɨge gaŋ pḛḛ le, ba kɨya bɨn̰ cay kobɨn̰.
Kandi-wɔɔ ga a daa nii
(Lug 12:33-34)
19«Kɨŋ ɗɔɔ ba mɨrəŋde kandi-wɔɔ ga cay gɨsəŋ gaŋ naŋ. Kɨya gɨ a cay gɨsəŋ gaŋ kɛ, yulmu kɨya tale bɨ, yɨlwa kɨya ƴɔmɛ bɨ, ka-hase kɨya kɨbege bɨrɨm gɨ ni hasɨn̰ bɨ. 20Ama mɨrəŋdegɨŋ kandi-wɔɔ kagɨŋ ga a cay gɨsəŋ gaŋ kɛ le a daa nii. Kɨya wa a daa nii le, yulmu kɨya tale naŋ bɨ, kɨya ƴɔmɛ-yɨlwa naŋ bɨ, ka-hase kɨya kɨbege kɨɗɨn̰ hasɨn̰ge naŋ bɨ. 21Kɨya wa kɨɗɨn̰ ga kandi-wɔɔ kan̰ woy a nee le, na kɨɗɨn̰ ga nee le ma ɗugon̰ woy a cay nee pɛɗɛɗɛ bɨ.
Lamba di asɨn̰ kuyoŋdi-gusɨn̰
(Lug 11:34-36)
22«Tii na lamba da kuyoŋdi-gusɨn̰: Kɨɗɨn̰ ga tɨdɨn̰ na wɨya kuɗa na, kuyoŋdi-gusɨn̰ nɔm kɨya sɔmɛ na duroy asɨn̰a gɨŋ. 23Ama tɨdɨn̰ na wɨya hɔmɨn̰ɛ na, kuyoŋdi-gusɨn̰ nɔm som na duroy dɨlɨm dɨŋ. Hɨn̰ gɨ asɨn̰a gɨ woy a gusɨn̰ na bɨl dɨlɨm na, ji som na duroy dɨlɨm di ɨndi tɨlɨm dɨŋ yɔd.
Kumu naŋ le gursu bɨ
(Lug 16:13)
24«Ungo pɨna nɛŋ kɨya ɓale daye ka-gulondi sɔɔ lɔɔ gɨye bɨge naŋ. Naŋ le kɨya ƴɔmɛ gɨ pɨna dan̰ kuduroy bɨ, kɨya geye gɨ ɗaŋ bɨ. Naŋ le kɨya saɗe gusi dan̰ gɨ pɨna bɨ, sɔlɛ gɨ ɗaŋ leen̰ hɨnga naŋ bɨ. Kɨŋ-gandi kalɨn̰ ma kɨŋ kɨya ɓale bɨləŋ gɔyɔŋ ga da Kumu bɨ, ga da gursu bɨ sɔɔɗɨmɔŋ naŋ.
Kɔl gɨ ojɨ cay aye kudurɔ
(Lug 12:22-31)
25«Sɨlagɨŋ na kɨya cay kɔl gɨ nee le ma maŋ yəgɨŋ hɨn̰: Sɔlɛgɨŋ kɨya cay hɨnga ga ni dɔɔ poɗɨn̰ bɨ, sɔ poɗɨn̰ bɨ, badɨge ga ni tɔbɛ tolɨn̰ gusɨgɨŋ bɨ naŋ. Habe gɨ kɨŋ somɨn̰-bɨra le, ɗɨn̰ hɨnga ga ni dɔɔ bɨ, kuyoŋdi-gusɨgɨŋ kalɨn̰ ma, ɗɨn̰ badɨge bɨ naŋ ga? 26Sɨlagɨŋ cɨɗəŋ: Kan gɨsɨge gasa naŋ bɨ, walage gasa naŋ bɨ, kan dayage gasa boy tugulu dɨŋ naŋ bɨ, ama Baygɨŋ gɨ som a daa nii le abɨge. Kɛ kɨŋ-gandi le, kɨledɨgɨŋ kunda tɔgɨ ɗɨn̰ ga da cɨɗəŋ naŋ ga? 27Na waŋ duroy gɨŋ ba kɨya ɓale dan̰ sɔlɛ koyi, sɨye wɔlɛdi gɨ ban kɨya somɨn̰ a cay gɨsəŋ gaŋ, tumɔ dḛ ga?
28«Na kɨya wa ma magɨŋ sol kɨya cay badɨge ga? Ɗagɨŋ cɨndɨgɨŋ dɨŋdɨn̰gɨŋ bɨn̰e hɛɗɨmɛ ga malgɨ duroy yage gɨŋ: Kan laage gɨye naŋ bɨ, cɨngɨɗage badɨge naŋ bɨ. 29Ama aŋ yəgɨŋ: Kɨlma Salomo dan̰ sɔmɛ duroy ɗarwa toy dɨŋ kalɨn̰ ma, tɨba badɨge ga ɗari ɗɨn̰ bɨn̰e hɛɗɨmɛ naŋ. 30Kɨŋ ga aye kudurɔ kogɨŋ ɓala hɨnga naŋ: Hɨn̰ gɨ Kumu na tɨban̰ hɛɗɨmɛ badɨge ga ɗari, hɛɗɨmɛ ga wan̰do kan kɨya bɔgɛge duroy tɨwa dɨŋ ulege coŋ na, kɛ gɨ lɔɔ na mɨna ma ban kɨya bɨgɨŋ badɨge ga ni dɔbɛ naŋ ga? 31Naa hɨn̰ wo̰ na, kɨŋ ɗɔɔ ba sɔlɛ yɔ hɨn̰: “Kɛ ni gɨ dɔɔ na wa ga bɨ? Sɔ na wa ga bɨ? Dɔbɛ na badɨge di wa ga bɨ naŋ?” 32Hɨnga ga nee le nɔm, na kalaŋ ga toyge na Jubɨ naŋ, ma na ka-male kardɨge dɨle dorɨn̰ gɨlale. Ama Baygɨŋ gɨ som a daa nii le, sol gɨ tabɨlaŋdi hɨnga ga nee le nɔm na leegɨŋ. 33Hɨnga ga ojɨ gɨ ni se cɨndɨgɨŋ kardi nee cay wase male le, na dɔɔ-ƴaa di da Kumu bɨ, gɨye-lɔɔ gɨ dan̰ durɔ ɗɨngar gɨ ban gey le bɨ. Kardi nee na, Kumu kɨya bɨgɨŋ hɨnga toyge ga baa le nɔm cay nee coŋ. 34Hɨn̰ wo̰ na, kɨŋ ɗɔɔ ba sɔlɛ kɨya cay wɔlɛ gɨ wan̰do: Wɔlɛ gɨ wan̰do le kɨya sɔlɛ cay gusi koyi gɨŋ. Tabe gɨ ojɨ cay wɔlɛ gɨ labɨde le, ɓal cay wɔlɛ gɨ labɨde.
Pilihan Saat Ini:
Matɨyo 6: gab
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Association pour la Promotion de la Langue Gabri Darbé-Dormon (APLGD) en coopération avec
© 2023, Wycliffe Bible Translators, Inc.
