Marcos 6
6
Roo Nazaré room ba sium Nai Jesus
(Mateus 13:53-58; Lucas 4:16-30)
1Faklau telo, Jesus nor ni eskolanti room suli siil la nii Ura ni aldeia Nazaré. 2Natoon nii leolbaan sabdu, roo Judeu room ni leolbaan oid arohan, Jesus meit tafae la nii uum kreda lala oid noir. Leolbaan idura, artuub rini fee laa arohan. Arfiil room fliik Ura ni noir, room kauk ulu oid dega, “Artuub uri matenek didi. Ois bae fee Ura eot kbiit idura oid fun milagre seirgaa? 3Roo ura badae ai iid, iit taad Ura ni ina Maria, nor ni kau seirgaa, room fee: Tiago, José, Judas nor Simão. Iit taad ni tofoo seir. Iit haigaa hela meit nii aldeia uri!” Des manura fee room sinti lolo, raat room boi fliik des Ura.
4I Jesus nee sai, dega, “Doloo didi! Roo respeitu faklau Nai Maromak ni gugu nor lama nii rae selu. Mahee nii ura ni aldeia rasik nor ni familia tema ba respeitu ura.”#João 4:44
5-6aJesus hleeh nor kauk ulu deslaa room seirgaa ulu hatu sio, raat boi fiar la Ura. Des manura Ura ba leob fun milagre nii aldeia la-ura. Mahee Jesus tuul Ni lima la artuub moras seir lea oid fun kode room.
Nai Jesus ruu ni apostlu ubu saguul-resi-ruu
(Mateus 10:5-15; Lucas 9:1-6)
6bMeit telo, Jesus laa tafae-sai aldeia-aldeia bae fee fedeis, oid noir artuub enlaa Nai Maromak ni Novidadi Kode. 7Jesus haah ni apostlu ubu saguul-resi-ruu oid ruu room ubu ru-ruu laa nii hati-hati, i Jesus meit nee kbiit la room oid toeh sai espiritu klao. 8-9Ura nee orde la room dega, “Iim ba leob oid naam iid nii saal, deislaa Nai Maromak hii perpara naam hailagaa. Ba leob oid belhaet, oos nor pasta. Mahee fois lea sinelus nii oe nor hena iid nii eta lolo, nor fael ai tonka iid. 10Se nei artuub seir sium iim nii room uma, iim tenki hela manhati nii uum idura raat iim sai laa hati selu. 11Mahee se iim raat nii hati kiid, i roo boi sium iim, i room boi fliik iim, iim tenki sai enene ois hati kidura i dae rae afo ois iim oe. Idura dega, ‘Iim boi fliik aem, iim rasik fee hii oid meded ura.’ ”#6:11:Biblia Gregu hlai dega, “dae rae afo ois room oe”. Nii Israel nii tempu kidura, roo adada dae rae afo ois room oe, man sinaal iid dega, roo bae fee boi fliik, room fee oid rasik mededa. Fei meit nii Lukas 10:4-11; Jesus ni Gugu nor Lama room Istori 13:51.
12Toom maa, apostlu room laa nee sai Nai Maromak ni Novidadi Kode too, i room noir roo dega, “Iim hailagaa tenki fois soub iim sala, i suli siil oid mori toom Nai Maromak ni akar.” 13I room meit toeh sai espiritu klao ois roo rini. Room meit fois mina la artuub moras room ulu, oid fun orasaun, i artuub moras room meit kode.#Tiago 5:14
Roo teis telo João Saraen Ubu ni tegeu
(Mateus 14:1-12; Lucas 9:7-9)
14Nii tempu kidura, roo nii hati-hati taad soub enlaa Jesus. I daot Erodes meit fliik enlaa Jesus ni kbiit. Artuub seir dega, “Jesus ura fee João Saraen Ubu bae fee maet i mori siil soub nii Jesus ni eta lolo. Des manura fee Jesus fun milagre rini.”
15Mahee artuub seir dega, “Ba loos! Jesus uri man Nai Maromak ni gugu nor lama Elias fee mori siil soub.” Nei roo seir loi, dega, “Jesus idura, Nai Maromak ni gugu nor lama iid, man Nai Maromak ni gugu nor lama room muna.”#Mateus 16:14; Marcos 8:28; Lucas 9:19
16Arfiil daot Erodes fliik room kase enlaa Jesus manura, ura ataan dega, “Doloo didi! Jesus fee João Saraen Ubu, iid bae fee muna au ruu teis telo ni tegeu. Agora ura mori siil soub!”
17-18Daot Erodes dega manuri, deslaa muna ura nei problema tuu nor João. Nii fuu manuri: daot Erodes haah hiin iid gala Erodias. Muna Erodias ura kaben nor Filipi, daot Erodes ni bou. Des manura fee João kritika bak-bako, dega, “Daot, iit ba leob kaben nor iit bou ni hina deslaa idura kontra soub lei Judeu ni.” Fedu João dega manura, mahee Erodes manhati mori futu nor hiin too. Des idura fee daot ruu artuub laa fael João ataam la kadeia.#Lucas 3:19-20
19I João kritika bak-bako room, fun Erodias raat odi João, i nae saal naha loet ura. Mahee Erodias ba leob loet João, 20deslaa daot Erodes respeito nor kuidaud la João. Daot Erodes taad dega, João ura roo bae fee mori fun tuir Nai Maromak ni akar i ura meit entrega ni mori oid serbii Nai Maromak. Daot Erodes akar fliik João ni kase. Nornamo João ni kase fun Erodes ni hua-lala ba seneda, mahee ura akar fliik manhati João ni kase.
21Raat nii leolbaan iid, Erodias eot tempu kode kiid oid seul meit ni hua-lala sae too. Leolbaan idura, daot Erodes ni tona. Erodes nee festa tuu kiid i konvida roo tuu room maa nii festa too: seir maa ois funsionariu estadu ni, seir komandanti ois tropas ni, nor roo ulu tuu seir ois Galileia. 22Hii festa bael, senhora Erodias ni ana hina tafae la dansa. I ura dansa kode tustus, fun kontenti daot Erodes nor ni bainaka room. Toom maa, daot Erodes haah aan hina too, oid promete la ura, “O akar tuuk sabiid ma au, tuuk lea! Au hii nee. 23Fedu o tuuk au reun ba seri meit, au nee. Au jura!”
24I aan hina too laa tuuk nii ura ni ina, dega, “Au ina anoin sabiid fee kode faklau au tuuk la daot?”
Ura ni ina ataan, “Manuri. O laa tuuk lea fee João ni ulu hatu.”
25I aan hina too laa hurhuur Erodes oid tuuk, “Au akar tuuk fee João Saraen Ubu ni ulu hatu, fois nii bandeja kiid oid ma au. Agora enene!”
26Arfiil daot Erodes fliik manura, ura ni hua-lala tristi tustus. Mahee Ura tenki fun toom lea, deslaa ura jura telo soub, i roo rini meit fliik. 27Toom maa, Erodes nee orde la soldadu kiid laa kadeia lala, teis João ni tegeu i oid ura ni ulu-hatu maa. Manura, soldadu too laa teis telo João ni tegeu 28i fois João ni ulu-hatu nii bandeja kiid, oid laa nee la aan hina too. Aan hina ura meit sium telo bandeja too, ura oid laa nee la ni ina.
29Arfiil João ni eskolanti room fliik dega, room oid telo João ni tegeu soub, João ni eskolanti room meit maa huu ura ni maet isi oid laa taan.
João ni mate manura.
Nai Jesus nee namaa la artuub rihun-liim resi
(Mateus 14:13-21; Lucas 9:10-17; João 6:1-14)
30Nii leolbaan iid, Jesus ni apostlu room bae fee Jesus ruu laa too, room suli siil maa futu nor Jesus. Room nee sai naam bae fee room fun soub, nor naam bae fee room noir soub la roo. 31Mahee leolbaan idura, roo rini tustus tafae-sai laa-maa nae Jesus, raat Ura nor Ni apostlu room ba nei tempu oid aa. Jesus tafaar la Ni apostlu room dega, “Maa iit laa nae hati bae fee seneda, oid free kaet-keen.”
32I Jesus nor Ni apostlu room hailagaa sae bero oid laa nae hati kiid seneda roo ois aldeia. 33Mahee roo rini fei Jesus room bero faklau ois taes gugu. Deslaa roo rini seirgaa taad Jesus room, manura room sai ois aldeia-aldeia i flaer faklau ois taes gugu. Room raat nii la-ura molok Jesus room raat. 34Arfiil Jesus duu ois bero, Jesus fei artuub rini gnaan bael Ura. Manura, fun Jesus ni hua kiid lako i doim tustus room, deslaa room haigaa ba taad naha fun sabiid, man biub mlae bae fee ba nei ata. I Jesus noir naam rini la room.#Numeru room 27:17; Daot room 1 22:17; Kronika room 2 18:16; Ezequiel 34:5; Zacarias 10:2; Mateus 9:36 35-36Arfiil leol naha seri soub, Jesus ni eskolanti room tafaar la Ura dega, “Mestri! Keer koed Iit Tuu ruu roo sergia la aal namaa nii aldeia seir fedesi nii uri. Deslaa leol seri soub, i ba nei namaa nii rae hui kiduri.”
37Mahee Jesus ataan dega, “Balikan! Iim lea fee nee namaa la room.”
Mahee room tuuk siil, “Se iit nee namaa la roo rini manuri, iit tenki asai oos rini tustus, man badae kiid sium oos nii toon iid ni lala.#6:37:Dokumentu tero Gregu orijinal ni hlai, “os buti denari atus ruu”. Nii tempu muna, denari iid man badae iid sium ni osa nii leolban iid ni. Iit leob eot oos rini uri nii bae?!”
38Jesus ataan, “Iim laa fei kook! Iim nei paun hua fiil?”
Entaun room laa nae taad, toom maa room suli siil maa tafaar dega, “nei paun hua liim, nor ikan ruu lea.” 39Entaun Jesus ruu artuub seirgaa medei toom grupu-grupu nii guur lau. 40I room laa medei toom grupu-grupu. Grupu seir ubu atus iid, i seir loi ubu saguul-haet-liim.
41Meit telo, Jesus meit huu paun hua liim nor ikan ruu too. Ura tloo mata la leol lau oid nee obrigadu la Nai Maromak. Toom maa Ura heul paun seirgaa fun seri-seri i nee la Ni eskolanti room oid laa hae la artuub rini ura. I room meit oid ikan ruu too laa hae. 42I room haigaa aa raat besu. 43Room aa telo meit, Jesus ni eskolante room laa teut fuut paun nor ikan restu seirgaa, fois nii boet saguul-resi-ruu raat benu.
44Roo seir bae fee aa nii leolbaan la-ura nei maen rihun liim mangaa. Idura suur lea fee maen.
Nai Jesus lolai nii eer lau
(Mateus 14:22-33; João 6:16-21)
45Faklau telo, Jesus ruu Ni eskolanti room laa sae bero oid laa muun nii aldeia Betsaida, nii taes seri la. Mahee Ura hii hela nii hati kidura, oid ruu roo rini too suli la room uma. 46Arfiil roo seirgaa suli telo meit soub, Jesus sae la ni rae lau kiid oid fun orasaun la Nai Maromak.
47-50Rae hoda soub, Jesus mesa duu siil maa ois rae lau too. Ura eot Ni eskolanti room nor bero heer telo taes fusu soub. Room akaas lolo hean bero too, deslaa room asour geul tuu nii room ahe. Naha fedeis namaer, Jesus toom room laa, lolai lea ni eer lau. Arfiil Ura naha lolai faklau bero too, room meit fei Ura. Room hleeh nor matau naha mate. Room anoin Ura maet samaga kiid i room kirai makaas.
Mahee Jesus haah la room dega, “Balikan matau! Au uri Jesus!”
51Arfiil Jesus sae la bero, geul meit seneda enene. Ura ni eskolanti room kauk ulu tustus. 52Fedu room hina eot Jesus uza ni kbiit oid nee namaa la roo rihun liim nor resi, mahee room ba taad hei enlaa Ura ni forsa nor kbiit, deslaa room hua-lala sio.
Nai Jesus fun kode artuub moras room nii Jenezaree
(Mateus 14:34-36)
53Arfiil room raat nii taes seri, room free nii taes gugu nii sidadi kiid gala Jenezaree. 54Room hina duu ois bero, roo rini fei room soub. Room baklaal dega, “Jesus maa soub!” 55-56Room flaer la tafaar leom-leom la roo haigaa, i artuub haigaa meit oid roo moras la Jesus.
Jesus lolai ois hati la hati. Arfiil room fliik dega Jesus nii hati kiid, room seo roo moras la haat nii rae mamu kiid fedeis merkadu. Room tuuk la Jesus dega, “Favoor iid! Sala nee roo moras seirgaa een kois lea Iit Tuu ni hena, room leob kode.” Doloo didi. Seen fee een lea Ura ni hena, kode enene.
Pilihan Saat Ini:
Marcos 6: BMGM
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023 Wycliffe Bible Translators Inc
