Yoane 16
16
1“Ma soŋ a məzen a mbó bən lá taŋ á abeməntəm azən a tɛm ntɨŋə tsɛʼ tənə. 2Bɨ mɨ kɨŋ awən a mu ndáŋwi bə Yuda, nkfu ghɨ kɨ yen za ŋwɔn tsum wa a mɨ zhwitɨ awən a mɨ kwaʼtɨ ngə́ zɨə faʼə lá a mbó Ŋwi ə. 3Ɨbɛn ghɨ ghɨ ɨnu tsen a nye bən mbɨ́ʼ ngə́ ka bo zhi awa a Tarɨ kə aghə. 4Lá ma soŋnə ɨnu tsen a mbó bən lá, taŋ nyom a ghɨ nkuʼ a mbó bo a ngɨ ɨnu tsen, nɨ waʼtɨ ngə́ ma sóŋ ɨnu mətsen a mbó bɨŋ ə.”
Afaʼ za Azhwi zə Fɛmnɨ a Faʼnə ghe
“Ma sá ɨnu tsen fɨʼtɨ a mbó bən a mbiʼnə lá, mbɨ́ʼ ngə́ ma tsí bɨgɨnə ghe. 5Lá, tɨtsɔŋnɨ ma ghěn a mbó ŋwɔn wa a tságɨ́nɨ́ aghan, lá ŋwɔn nɨ bən wu tse a keʼ bitɨ adiʼ za ma ghɛnə ɨwu ə. 6Tɨtsɔŋnɨ wa ma soŋnə a mbó bən lá, mɨntəm ɨmɨŋ tiʼ ndon nɨ adzə́ŋnɨ ə. 7Lá ma soŋnə lá nkənu a mbó bən ngə́: a bɔŋ a mbó bən ngə́ á ma ghɛn, mbɨ́ʼ ngə́ be ma tú ghɛn, Nkwatɨ wa a mɨ keʼ a mbó bən yiŋə. Lá be ma ghɛn, ma mɨ tiʼ tsagɨ ayi a mbó bɨŋ ə. 8A ghɨ ntíʼ ngyén, a mɨ diʼ á lán a mbó ɨbɛn bɨ atuəshe ngə́ ɨwiʼtɨ ɨtsa mbɨ́ʼ ɨbvu, mbɨ́ʼ nchinə abɔʼnɨ nɨsáʼ nɨ Ŋwi, ka tsɨ kuʼnɨ ayi ɛ. 9Za bo kwaʼtɨnɨ ngə́ a nɨ ɨbvu ka a kuʼnɨ ayi mbɨ́ʼ ngə́ bo se mɨntəm ɨma a ɨnye me nɨŋə; 10za bo kwaʼtɨnɨ ngə́ a nɨ anu zə chinɨnɨ ka a kuʼnɨ ayi mbɨ́ʼ ngə́ ma ghěn a mbó Tarɨ á nɨ keʼ aghan kwiʼ ndzɛn; 11za bo kwaʼtɨnɨ mbɨ́ʼ nɨsáʼ nɨ Ŋwi ka a kuʼnɨ ayi mbɨ́ʼ ngə́ bɨ kwɛnə sáʼ a nsaʼlaʼ atuəshe wen nchɛrɨ ɨsáʼ ɨyi ngə́ a vwo ɨsáʼ ə.
12Ma bvurɨ nɨ ɨnu tsɨ ghaʼnɨ a sóŋə́ a mbó bɨŋ ə, lá tɨtsɔŋnɨ, tsɨ mɨ ghaʼ tɨ́sə́n a mbó bən a ndzúʼə ɨ kɨ zhyɛ. 13Lá a nkfu za Azhwi a ghɨnɨ yen, zɨ wa a kyɛʼnɨ nkənu mbɨ́ʼ a Ŋwi, a mɨ tsagɨnɨ awən a mu nkənu tsum ə. A ghɨ keʼ sóŋə́ lá a za a funɨ a mu akwaʼtɨ azhi, lá a ghɨ ghamnə ɨnu tsa zɨə zuʼnɨ, ɨ kɨ tiʼ soŋ awən nɨ ɨnu tsa tsɨ ghɨnɨ yiŋə. 14A ghɨ ghá nɨfáŋ a mbó me, mbɨ́ʼ ngə́ a ghɨ lɔgɨ ɨnu tsa ma soŋnɨ, ɨ tiʼ soŋ a mbó bɨŋ ə. 15Atsum atsum za Ta ɨghan a tsinɨ nɨ zɛrə a nɨ azə; lá nɨ anu za ma soŋnɨ ngə́ Azhwi a ghɨ kwárɨ́ azúm za ma ghanɨ nɨ zɨ ɨ tiʼ soŋ a mbó bən lá.”
Adzə́ŋnɨ bo Nɨdorɨ ə
16Yeso a kwíʼtɨ́ ngə́, “A nye məkum a nkfu nɨ mɨ keʼ aghan bə ndzɛn, akum a nkfu zə mɔʼɔ a bə ndzɔŋtɨ, nɨ zɛn aghə.”
17Bɨyɛʼ ɨbyi ba bə mɔʼɔ bítɨ́ a tɨtərɨ bo nɨbo ngə́, “Məzen a diʼ lá ngə́ ke le? A soŋ a mbó bɨgɨnə ngə́ a nye məkum a nkfu bɨgɨnə mɨ keʼ ayi bə ndzɛn, akum a nkfu zə mɔʼɔ a bə ndzɔŋtɨ, bɨgɨnə zɛn ayi ɛ; a kɨ nkwiʼ soŋ ngə́, ‹A nɨ mbɨ́ʼ ngə́ ma ghěn a mbó Tarɨ ə.› 18‹Məkum a nkfu› wen a diʼ lá ngə́ ke le? Ka bɨgɨnə zhi awɨgɨnə anu za a ghamnə mbɨ́ʼ a zɛrə ghe!”
19Yeso a zhí ngə́ bo kə́ ndǒ mbitɨ zɨ nɨ abítɨ, ma lan, ntiʼ soŋ a mbó bo ngə́, “Ma lo soŋ ngə́, ‹A nye məkum a nkfu nɨ mɨ keʼ aghan bə ndzɛn, akum a nkfu zə mɔʼɔ a bə ndzɔŋtɨ, nɨ bə nkɨ ndzɛn aghə.› Nə nɨ anu za nɨ bítɨ́nɨ́ ɨtumbəm ɨtsən ɨwu bən nɨ bən ngə́, a diʼ lá ngə́ ke, lá le? 20Tsɛʼ a nkənu ma soŋə awɨŋ ə: nɨ ghɨ zɛʼ ɨ kɨ bugɨ, lá á ɨbɛn bɨ atuəshe ndorɨkə awa ghe; nɨ ghɨ dzə́ŋnɨ́nə ghe, lá á adzə́ŋnɨ azən a bə mbənkɨ a nye nɨdorɨ ə. 21Mangye a chiʼ lá, a dzə́ŋnɨnə mbɨ́ʼ ngə́ nkfu ndzuʼ ndzaŋə ɨzhi ɨ kuʼ ə; lá a jwi, a lɨgɨnɨ ndzaŋə za, mbɨ́ʼ ngə́ a dórə́ ngə́ mɔn ɨyi a yen a mu mbyi ɛ. 22Nə nɨ adzaŋ za a benɨ a mbó bɨŋ ə: tɨtsɔŋnɨ nɨ dzə́ŋnə́ ghe, lá ma mɨ bə nkwiʼ zɛn awən, mɨntəm ɨmɨŋ mɨ lon nɨ nɨdorɨ, nɨdorɨ mənen mɨ be abə́ŋ za be ŋwɔn a keʼ a mbó bən kwarə.
23Njwi məza ghɨ ngyén muŋ nɨ mɨ keʼ aghan nɨ azúm zə tsɛrə bitə. Tsɛʼ a nkənu ma soŋə awɨŋ ə: Tarɨ a ghɨ ghá awən nɨ azúm atsum za nɨ bitɨnɨ wəmbo nɨ ɨkum ɨghə. 24Ɨ kɔʼ kuʼ tɨtsɔŋnɨ ka nɨ bitɨnə awən azúm zə tsɛrə nɨ ɨkum ɨghə; bitɨnə, nɨ mɨ tiʼ kwarɨ, taŋ á nɨdorɨ ɨnɨŋ chi kɔʼ luŋə.”
Adzaŋ za Yeso a Ghaʼnɨ Atuəshe
25“Ma lɔgɨ mɨgham mə nanɨ a fɨʼtɨ ɨnu tsen a mbó bɨŋ ə. Lá nkfu ghɨ kuʼ á ma kaʼ nɨgham nə nanɨ bən ná, lá ɨ gham asaŋəsaŋ a mbó bən mbɨ́ʼ a Tarɨ ə. 26Njwi məza ghɨ ngyén, nɨ mɨ bitɨ ayi nɨ ɨkum ɨghan; ka ma soŋə aghan lá ngə́ ma mɨ bitɨ ayi a nkfu bən, 27mbɨ́ʼ ngə́ Tarɨ zɨmboŋ a kɔŋ awɨŋ ə. A kɔŋ awən mbɨ́ʼ ngə́ nɨ kɔŋ aghan, nɨ kɨnə nkɨ nɨŋ mɨntəm ɨmən ɨwu ngə́ ma lo a mbó Tarɨ ə. 28Ma ló lá a mbó Tarɨ, ntiʼ ngyen a mu mbyi ɛ. Tɨtsɔŋnɨ, ma nyɛʼtə atuəshe ngěn a mbó Tarɨ ə.”
29Bɨyɛʼ ɨbyi tíʼ sóŋ wəmbo ngə́, “Tɨtsɔŋnɨ o ghamə asaŋəsaŋ, tə́ ná nɨgham ə. 30Tɨtsɔŋnɨ bɨgɨ zhi ngə́ o zhi ɨnu ɨtsum; ka a ndǒ ayi ngə́ á ŋwɔn tse a bitɨ agho nɨ ɨbítɨ ə. Məzen a ghɨ bɨgɨ nɨŋ mɨntəm ɨmɨgɨ ɨwu ngə́ o ló lá a mbó Ŋwi ə.”
31Yeso a chwɨ́gɨ́ a mbó bo ngə́, “Nɨ nɨŋnə mɨntəm ɨmən a nye me tɨtsɔŋnɨ le? 32Nkfu ɨ yiŋə, ɨ kwɛnə nkɨ ngyiŋə, mbáʼ bɨ mɨ dzagɨ awən bɨtsum á ŋwɔn tsum ɨ mɔ́ʼɔ́ mɔ́ʼɔ́ a bə nkwɛn ngɛn a njwuʼ zɨ, á ma tiʼ ngɔŋ me me ghe. Lá ma lanɨ nkaʼ me me chyɛ, mbɨ́ʼ ngə́ Tarɨ a tsi bɨgɨ zɨə. 33Ma soŋ a məzen a mbó bən lá taŋ á nɨ tsi nɨ mbɔnɨ a ntsǎ a ndzum adzaŋ za nɨ tsinɨ a mbúm bɨgɨnə ghe. Atuəshe mɨ diʼ ngɨ́ʼ a mbó bɨŋ ə. Lá nɨ kotɨ mbáŋnɨ́ ɨtsɨŋ ə! Awa ma ghaʼnə atuəshe!”
Pilihan Saat Ini:
Yoane 16: MNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023, CABTAL
