मरकुस 3

शुखो हथ बाड़ा मेह्‍णु ठीक करुण

मत्ती 12:9-14; लूका 6:6-11

1यीशु फिर अराधनालय अन्तर गा। तठि यक मेह्‍णु थिआ, जेसे हथ शुख गो थिउ। 2त कुछ मेह्‍णु तेस पुठ दोष लाण जे हेरी बिशो थिए कि यीशु भक्ति करणे रोज तेस मेह्‍णु ठीक कता कि न कता। 3तेन शुखो हतेउ बाड़े मेह्‍णु जे बोलु, “तु इठि बुच खड़ भो”। 4तोउं, तेन सम्हाई जे बोलु, “भक्ति करणे रोज भलु करुण खरु असु या बुरु करुण, केसे जीवन बचाण या मुकाण?” पर से सोब चुप बिशे। 5तेन्के नकठर मन हेर कइ से उदास भोई गा, त लेहरी कइ तेन्हि सम्हाई कें धे हेरते हेरते, तेस मेह्‍णु जे बोलु, “अपु हथ अगर कर”। तेन अपु हथ अगर किउ, त तसे हतेउ यकदम ठीक भोई गोउ।

6तिखेईंए फरीसी बाहर घेई गे। से झट हेरोदेस राजे मेह्‍णु जोई मी कइ यीशु खिलाफ अपफ बुछ मेझर करण लगे कि ए कीं कइ खतम करण।

सुआ मेह्‍णु यीशु पतोती घेण

7पता, यीशु अपु चेली जोई तथे कना जे घेई गा। त गलील राज्य त यहूदिया राज्य केआं सुआ हुसुड़ा तसे पता पता एई गा। 8ईं शुण कइ कि से कीं बोडे बोडे चमत्कारे कम कता, यहूदिया, यरुशलेम, इदुमिया इलाके, यरदन दरेउ पार केआं, त सूर होर सैदा इलाके केईआं बि बोडा हुसुड़ा तस केईं आ। 9तेन अपु चेली जे बोलु, “इठि मेह्‍णु के सुआ हुसुड़ा असा। तुस यक कम करे, मोउं जे यक मठड़ी नाव तेयार कइ रखे, ताकि अउं चिसियेल नउ”।#मरकुस 4:1; लूका 5:1-3 10किस कि तपल तकर तेन सुआ जेईं ठीक किओ थिए, त जतु बि बीमार मेह्‍णु थिए से तस छूण जे तेस पुठ डूलतेथ। 11त दुष्ट आत्मा बि तेस हेर कइ तसे अगर खुरी पुठ उटेऊ बिश घेन्तीथ, त लियारी दी कइ बोतीथ, “तु परमेश्वरे कुआ भो।” 12पर तेन तसे बारे केसे जे बि ना बोलुणे तेन्हि जे सक्त निआंग दिती।

यीशु अपु बाराह प्रतिनिधि चुणुण

मत्ती 10:1-4; लूका 6:12-16

13पता, से फाट पुठ चढ़ गा, त जेन्हि से चहन्ताथ से सोब तेन अपु भेएड़ जे भिए। त से सोब तसे भेएड़ एई गे। 14तोउं तेन बाराह मेह्‍णु चुणे कि से तसे जोई साते साते बिशे, ताकि से तेन्हि इएर-ओवर लंघाल कि से परमेश्वरे खुश खबरी प्रचार करियेल; 15त तेन्के धे दुष्ट आत्मा नशाणे शक्ति दियेल। 16तेन्के नओं ई ई असु:

शमौन, जेस नओं तेन “पतरस” रखु,

17होर जबदी कुआ याकूब

त यूहन्ना, जेन्के नओं तेन “बुअनरगिस” रखु, जेसे मतलब “गड़कुणे कुआ” भो।

18त अन्द्रियास,

फिलिप्पुस,

बरतुलमेई,

मत्ती,

थोमा,

हलफई कुआ याकूब,

तद्देइ,

शमौन कनानी,

19त यहूदा इस्कारियती, जेन पता से धोखा दी कइ टोवाई छड़ा।

यीशु अपु ताकती बारे मेह्‍णु समझाण

मत्ती 12:22-32; लूका 11:14-23; 12:10

20तोउं यीशु त तसे चेले गी वापिस एई गे। त तठि ईं हुसुड़ा किठा भुआ कि तेन त तसे चेले रौठि बि खाई न बटी। 21जिखेईं तसे गीहे बाड़ी ई शुणु, त से तस नेण जे निथे; किस कि से बोतेथ “तसे मन ठिकाणे नेईं।” 22यरुशलेम शेहर केआं अओ धर्मशास्त्री बि ईं बोतेथ कि तेस अन्तर “बालजेबुल”#3:22 “बालजेबुल” शैताने होरु नओं असु। असा, त से दुष्ट आत्माई के राजे मदती बेलि दुष्ट आत्मा बाहर किढ़ता।#मत्ती 9:34; 10:25 23त से तेन्हि अपु भेएड़ भिआई कइ तेन्हि जे मशाल दी कइ बोलु, “शैतान की शैतान बाहर किढ़ सकता ना? 24अगर केसे राज्य अन्तर बगावत भोल, त से राज्य कीं कइ टिग सकता? 25अगर केसे गी अन्तर झगड़ा भोल, त से गी कीं कइ टिग सकता? 26तीं अगर शैतान अपफ अपु विरोध कता त बखी घेन्ता, त तसे की बणतु? से त खतम भोई घेन्ता। 27पर आं! अगर कोई मेह्‍णु केसे बोडे बलवाने गी लुटुण चहन्ता त तस पेहले से बलवान बन्हणे जरूरी असा। तोउं से तसे गी लूट सकता।”

28“अउं तुसी जे बोता कि मेह्‍णु के सम्हाई पाप त परमेश्वरे बुराई जे से कते, माफ भोई सकते। 29पर जे कोउं शुची आत्माई बुराई कता, तसे पाप कदी माफ न भुन्ते, त परमेश्वर तस हमेशा लिए पापी मानता।” 30यीशु ई तोउं बोलु, किस कि से बोतेथ कि एस अन्तर दुष्ट आत्मा असी।

यीशु सक्के रिश्तेदार

31तिखेईं तकर तसे ई त भाई तठि पूज गे। से हुसुड़े बाहरी बिश कइ कोउं तेस भिआण जे लंघा। 32हुसुड़ा तसे बियेर बइ बिशो थिआ, त तेन्हि तेस जे बोलु, “हेरे गुरुजी! तें ई त भाई बाहर तोउ भाड़ बिशो असे”। 33तेन तेन्हि जे जवाब दिता, “कोउं में सच्चे ई त भाई भिन्थ?” 34तोउं अपु बियेर बइ मेह्‍णु कें धे हेर कइ बोलु, “हेरे! में सच्चे ई त भाई ई भिन्थ। 35किस कि जे कोउं परमेश्वरे इच्छा मान कइ जीन्ता, सेईंए में सच्चे भाई, भेण त ई भो।”

Pilihan Saat Ini:

मरकुस 3: pgg

Sorotan

Berbagi

Salin