मरकुस 2

यीशु अदरंगे बीमार मेह्‍णु ठीक करण

मत्ती 9:1-8; लूका 5:17-26

1कुछ रोजे पता यीशु फिर कफरनहुम शेहर आ, त मेह्‍णु शुणु कि से गी अओ असा। 2त तठि यकदम ईं अत मेह्‍णु किठे भुए कि दुआर केईं बि जगाह न रेही। होर से तेन्हि परमेश्वरे बोक शुणाण लगो थिआ। 3तपल, कुछ मेह्‍णु चोउर मेह्‍णु के मदते बेलि यक अदरंगे बीमार मेह्‍णु डानी पुठ कर कइ तसे भेएड़ अण्हण लगो थिए। 4पर सुआ हुसुड़े बेलि से तसे भेएड़ पूज न बटे। तोउं तेन्हि से लहाड़ पुठि छड़ा, जेस पड्डे से थिआ; त से बीमार मेह्‍णु डानी समेत तेन खोपरे बइ उन्निया छड़ा। 5यीशु तेन्के विश्वास हेर कइ तेस अदरंगे बीमार मेह्‍णु जे बोलु, “मेह्‍णुआ! तें पाप माफ भोई गे”।

6तपल कुछ धर्मशास्त्री जे तठि बिशो थिए, से अपु अपु मन अन्तर सोचुण लगे कि, 7“ए मेह्‍णु किस ईं बोता? ए त परमेश्वरे बेज्जती करण लगो असा! किस कि परमेश्वर छड़ दी कइ कि होर कोउं पाप माफ कइ सकता ना?” 8पर एस बोकी बारे यीशु अपु मन अन्तर समझी गा त तेन तेन्हि जे बोलु, “तुस इसे बारे अपु अपु मन अन्तर किस सोचुण लगो असे? 9सुख्तु की असु? की इस अदरंगे बीमार मेह्‍णु जे बोलुण कि तें पाप माफ भोई गे, या ईं बोलुण कि खड़ भो! अपु डानी टा त हंटिण-फिरिण दे? 10पर अब अउं तुसी ई हरालण चहन्ता कि अउं जे मनखे कुआ भो, मोउं केईं धरती पुठ पाप माफ करणे अधिकार असा।” त तेन तेस अदरंगे बीमार मेह्‍णु जे बोलु, 11“अउं तोउ जे बोता, खड़ भो! अपु डानी टाइ कइ अपु गी जे घेई गा।” 12तिखेईंए से खड़ भुआ त सोबी के सामणि अपु डानी टाइ कइ बाहर घेई गा। ई हेर कइ सोब जेईं हैरान भोई गे, त परमेश्वरे महिमा कते कते बोलुण लगे, “ईं असी कदी काओ न थिउ”।

यीशु लेवी भिआण

मत्ती 9:9-13; लूका 5:27-32

13तठिआ निस कइ दुबारी यीशु गलीले तथे भेएड़ जे गा, त पूरा हुसुड़ा तसे पता पता एई गा, त से तेन्हि शिचालण लगा। 14घेन्त घेन्त तेन हलफई कुआ लेवी अपु मामला नेण बाड़ी जगाई पुठ बिशो का, त तेस जे बोलु, “में पता आई”। त से खड़ भोई कइ तसे पता पता घेई गा।

15जिखेईं यीशु लेवी गी रौठि खाण जे बिशा, तिखेईं सुआ मामला नेणे बाड़े त पापी, यीशु त तसे चेली जोई रौठि खाण जे बिश गे, किस कि से सुआ थिए, त तसे पतोती अओ थिए। 16ईं हेर कइ कि यीशु पापी त मामला नेणे बाड़ी जोई रौठि खाण जे बिशो असा, कुछ धर्मशास्त्री जे फरीसी थिए#2:16 फरीसी: ए यहूदी मेह्‍णु के तेस पलियारे मेह्‍णु थिए जे नियम अन्तर पण्डित थिए त तेन्हि मनुण जे सुआ जोर देन्तेथ। तसे चेली केआं पुछु, “ए किस पापी त मामला नेणे बाड़ी जोई खांता पीन्ता?” 17ईं शुण कइ यीशु तेन्हि जे बोलु, “जिहांणि चंगे भले वैदी के जरूरत न भुन्ति, पर बीमारी भुन्ति: तिहांणि जे अपफ धर्मी समझते तेन्हि ना, बल्कि अउं पापी मेह्‍णु भिआण जे अओ असा”।

ब्रत रखणे बारे सवाल

मत्ती 9:14-17; लूका 5:33-39

18किस कि चुसुणे बाड़े यूहन्ने चेले त फरीसी ब्रत रखतेथ, त कुछ मेह्‍णु एई कइ यीशु केईआं पुछु, “किस यूहन्ने त फरीसी चेले ब्रत रखते, पर तें चेले न रखते?” 19तेन तेन्हि जे बोलु, “जपल तकर नोउआं लाड़ा म्हाराई जोई असा, से कि ब्रत रख सकते न? त जपल तकर नोउआं लाड़ा तेन्हि जोई साते असा, तपल तकर से ब्रत न रख सकते। 20पर से रोज बि एण असा, जपल नोउआं लाड़े तेन्हि केआं केहरी छते; तेस टेम से बि ब्रत रखते।”#2:20 इठि यीशु मसीह अपफ जे दुल्हा ई बताण लगो असा। जपल मेह्‍णु यीशु मारते त तसे चेले बि ब्रत रख कइ प्रार्थना कते।

21“नोउएं झिणि के टलि पुराणे झिणि पुठ कोई न लान्ता; न त, से टलि तेस अन्तरा किछ थुस छती, मतलब नोई टलि, पुराणा झिणि छिछड़ेरि छती त से पेहले केआं ज्यादा चीरी घेन्ता। 22तिहांणि कोई बि नोउआं सरा पुराणे खलोठु अन्तर न रखते#2:22 तेस टेम यहूदी मेह्‍णु खलोठु अन्तर सरा रखतेथ।, न त सरा खलोठु चीर छता त से सरा त खलोठु दुहे खतम भोई घेन्ते; पर नोउआं सरा नोउएं खलोठु अन्तर भरीन्‍ता”।

यीशु भक्ति करणे रोजे प्रभु

23यक भक्ति करणे रोज भु ईं कि यीशु त तसे चेले बगे बीच बइ घेण लगो थिए, त तसे चेले हंटते हंटते गिहुंए सियुड़ टोड़ुण लगे। 24त फरीसी तसे केईआं पुछु, “हेर; भक्ति करणे रोज जे करुण ठीक नेईं, तेस कम ए किस कते?” 25तेन तेन्हि जे बोलु, “कि तुसी ई कदी नेईं ना पढ़ो कि जपल राजा दाऊद जरूरत पड़ी, होर जिखेईं से त तसे साथी ढुके थिए, तिखेईं तेन की किओ थिउ? 26जपल अबियातार बोडा पुजारा थिआ, त दाऊद राजे कीं परमेश्वरे गी गा त से चढ़ो रौठि खेई, जेस पुजारा छड़ दी कइ होरा कोई बि ना खाई बटताथ। तेन ना कि सद अपफ खेई, पर अपु साथी कें धे बि दिती।” 27तोउं तेन तेन्हि जे बोलु, “भक्ति करणे रोज मेह्‍णु जे बणाओ असा, न की मेह्‍णु भक्ति करणे रोज जे। 28तोउं त अउं मनखे कुआ भक्ति करणे रोजे बि मालिक भो”।

Pilihan Saat Ini:

मरकुस 2: pgg

Sorotan

Berbagi

Salin