मट्टि 13
13
चारिक् टुप्खुबामि काठा
(मारकुस ४:१-१२,२५; लुका ८:४-१०; १०:२३-२४)
1हाङ् म डिनाॽन येसु आक्क खिम्बाङ् आम्पकाहाङ् टोम्पलिॽवा कॆक्पि पेना। 2हाङ् आक्कुबि ओइर याॽमिचि खोम् गॆअङ्मॆअङ् खोम्टि खारामि, मसॆ येसु एक्क सिङ्खङ्पि ठाङाहाङ् पेना। हाङ् याॽमिचि टोम्पलिॽवामि किनाराब्न येप्टिखारामि। 3खोसॆ आक्खा याॽमिचि काठाबि डिरिक् खानावाँ गरहाङ् लोसुचि, “एक्क याॽमि रोपाबि चारिक् टुप्सि खारा। 4हाङ् टुप्मार कोइ चारिक् लाम्फुबि सिट्टा, हाङ् सवाँचि टाआमिहाङ् कोप्चाइखॆटुचि। 5कोइ चारिक् लुङ्कॽवा नुङ्मा बाखाबि सिट्टा। आक्कुबि डिरिक् बाखा माचुमिम्पासॆ कॆप्पमा ग सॆॽलन कॆप्पका। 6टर काम्नुःर साम् माटेमिम्पासॆ नाम् ङिमार सोप्खॆॽसे सिखारा। 7होइढा चारिक् चिचिङ् नुङमा याॽवासिवाँबि सिट्टा, म चिचिङ् पुसे खारा हाङ् आक्कसॆ केप्पक्मिम्पा चारिक् टोप्सिटु। 8टर ऎॽवा चारिक् काम्नुऎ बाखाबि सिट्टा हाङ् कोइऎ एक्क, कोइऎ ठुपङ् हाङ् कोइऎ सुपङ् उम्चा सिसु। 9आसाम् नाबाक् चु आक्कसॆ खेमुर।”
10हाङ् टिङ्खुबाचि टाआमि हाङ् खो सिमुचि, “मान्ठा आना याॽमिचि चिन्मार काठाबिटे यामुक्नॆ?” 11खोसॆ आक्खाचि खानावाँ एम्पिसे लोसुचि, “आन्ना ग पारुबिऎ हाङ्डाम् चुम्मिम्पा खानावाँ वाप्मॆ निवाँ पिडानि टर आक्खाचि चाइ म निवाँ मापिट्टिमि। 12मान्ठाभनॆ आसॆ चाइ काम् खानावाँ खेमुकु, खोसॆ खेम्मिम्पाबाङ्स डिरिक् निवाँ टक्चाकु हाङ् खो निवाँटाङ्पा लि। टर आसॆ चाइ काम् खानावाँ खेमुनि, खोनुङ् चुहा सङ्क ङाप्लाहाङ्। 13मसॆ का खोचिनुङ् काठाबि यामुङा। मान्ठाभनॆ खोचिऎ खाङुकुचि हाङ्सङ्क आखाङ्टकुचिर हाङ् खेम्कुचि हाङ्सङ् ऎवाबुचिर। 14यासाइया लोमॆ निवाँहाङ्मि खानावाँ लोखुबाऎ गरहाङ् लोमिम्पा खानावाँ खोचिबि गरहाङ् टङा,
‘आन्नॆ खेम्मा ग खेम्काम्नि टर हानाम्स वाबाम्निनि,
हाङ् खाङ्मा ग खाङ्काम्नि टर हानाम्स लेसाम्निनि।
15मान्ठाभनॆ इघा याॽमिचिम् निवाँ ऎवाप्खुबा लिडा।
उम्चि नाबाक् डॆक्टिखॆडा।
हाङ् आक्खाचिम् उम्चि मिक् सुप्खॆडु।
हॆॽनॆ हाङ्ग खोचिऎ उम्चि मिगॆ खाङ्खुबा लॆटुचि हाङ् नाबाक्ऎ खेम्खुबा लॆटुचि,
हाङ् निवाँऎ वाब्खुबा लॆटुचि। हाङ् काबि ऎन्टाखुबा लॆटामि
हाङ् कॆ आक्खाचि नुबक्मिक्खुबा लॆटुङ्चि।’#यासाइया ६:९-१०
16“टर आन्नामि मिक् नुङ् नाबाक् चाइ आसिका टक्चामिम्पान रेम मान्ठाभनॆ आक्कसॆ खाङ्कु हाङ् खेम्कु। 17चाइबान कॆ आन्ना लोकानि, मान्ठाभनॆ आन्नॆ खाङ्मिम्पा हाङ् खेम्मिम्पा खानावाँ निवाँहाङ्मि खानावाँ लोखुबाचिऎ हाङ् निवाँनॆन् याॽमिचिऎ उम्चि निवाँबाङ्न खाङ्मा हाङ् खेम्मा मिॽमिम्पा लॆटुचि, टर मान्टक्कुचि।
काठाऎ लोमा यकुवॆ खानावाँ
(मारकुस ४:१३-२०; लुका ८:११-१५)
18“ह चारिक् टुप्खुबामि काठाऎ लोमा यकुवॆ खानावाँ खेमाम्नॆ। 19लाम्फुबि सिॽमिम्पा चारिक् चाइ आक्कन यो, खोसॆ निवाँहाङ्मि हाङ्डाम्मि खानावाँ खेम्कु, टर म खानावाँ वाबुनि। हाङ् साइटान टाहाङ् उम् निवाँबि टुप्मिम्पा खानावाँ ङाप्फॆकु। 20हाङ् लुङ्कॽवा नुङ्मा बाखाबि सिॽमिम्पा चारिक् चाइ आक्क याॽमि यो, खोसॆ निवाँहाङ्मि खानावाँ खेम्मा अक्सि चेन्चासे निवाँयुङ् लॆकु। 21टर म खानावाँबि खोम् साम् मर माठुङ्मिम्पासॆ उम् निवाँयुङ् ऎच्छॽम टे लिबिकु। मान्ठाभनॆ म खानावाँऎ डुखा हाङ् कास्टा टामा अक्सि खोसॆ निवाँयुङ् लॆःॽमा याइकु। 22हाङ् चिचिङ् हङ्सि सिॽमिम्पा चारिक् चाइ आक्क याॽमिन यो, खोसॆ निवाँहाङ्मि खानावाँ खेम्कु, टर ग बाखाटेम्पिऎ हिङ्खामा हाङ् चासुम्पि निवाँ टिमिम्पासॆ फोःप्सिकु हाङ् उम्चा सिमिटुनि। 23टर नुऎ बाखाबि टुप्मिम्पा चारिक् चाइ आक्क याॽमिन यो, खोसॆ खानावाँ खेम्कु हाङ् वाबुकु उम्चा सिमिकु। खोबि टुप्मिम्पा चारिक्बाङ् एकक्, ठुपङ् हाङ् सुपङ् उम्चा सिकु।”
सामामि काठा
24हाङ् येसुऎ आक्खाचि होइक काठा लोसुचि, “पारुबिऎ हाङ्डाम् एक्क याॽमिऎ उम् रोपाबि काम्नुऎ चारिक् टुप्मिम्पा रक्मा रेम। 25टर चोब्न याॽमिचि इम्टिखॆॽमार रोपामि टुङ्घङ्पा सिच्चाखुबा याॽमि टाआहाङ् म काम्नुहा चारिक्मि लुम्लुम्पि सामा टुप्डउहाङ् खाइटा। 26हाङ् आक्खा काम्नुहा चारिक् कॆप्पका हाङ् उम्चा टेपकु। आक्रल आक्कुबि सामा सङ्क खाङ्मुसा।
27“हाङ् टुङ्घङ्पामि योम्पक् मुखुबाचि टाआमिहाङ् खो लोसुचि, ‘टुङ्घङ्पो, आनॆ बारिबि काम्नुहा चारिक् टुप्मिम्पा हॆॽनॆ? हॆॽनि आक्कुबि सामा हाम्पा टाऎ?’ 28टुङ्घङ्पॆ आक्खाचि लोसुचि, ‘कानि सिच्चाखुबॆ ग लॆॽमिम्पा रेम।’ हाङ् योम्पक् मुखुबाचिऎ खो सिमुचि, ‘आक्रहाङ्ग काङ्का खॆॽमिर हाङ् डेल्लाङ्सुचिर मिन्नॆ?’
29“टर खोसॆ आक्खाचि लोसुचि, ‘आक्र आलॆटानॆ, मान्ठाभनॆ सामा डेन्मार मनुङ्सोरि सिचाम सङ्क डेनुकाम्नि। 30मसॆ चारावा खोम्मॆ ल मेसाप्लढारि हिच्चिन पुमिटाम्नॆ। हाङ् चारावा खोम्मॆ लःबि काम् योम्पक् मुखुबाचि याॽल सामा डेनाम्नॆ हाङ् मिःबि टिमाम् लागि मुट्ठा ठुबाम्नॆ, हाङ् सिचाम खोमाम्नॆहाङ् काम् बॆङ्टावाँबि युक्साम्ने लोकुङ्चि’।”
रायो नुङ् खाबॆक्मि काठा
(मारकुस ४:३०-३४; लुका १३:१८-२१)
31येसुऎ आक्खाचि होइक एक्क काठा लोसुचि, “निवाँहाङ्मि हाङ्डाम् एक्क रायोमि उम्चा रक्मान। एक्क याॽमिऎ लाखॆकुहाङ् उम् बारिबि टुबुकु। 32ग चाइ चारिक् हङ्सिबि चोब्बाङ् मिछुॽमा लि। हाङ्स कॆप्प हाङ् पुबक् हाङ् आक्क बारिबि लिःॽमिम्पा बोटाबाङ् चोब्बाङ् ढ्या लिहाङ् सिङ्न लि। मसॆ सवाँचि टाःक्मिहाङ् आक्कमि हाँगाबि हाब्बाङ् हेबुक्मि।”
33येसुऎ आक्खाचि होइक सङ्क एक्क काठा लोसुचि, “निवाँहाङ्मि हाङ्डाम् खाबॆक् रक्मान। एक्क मेॽनुङ्माऎ चःक्मिम्पा डिरिक् खाॽमिक्पि म ठुटिकु हाङ् आक्क चोब्न खाॽमिक्पि मासिॽलढारि युङ्कु।”
34येसुऎ आक्खा याॽमिचि चोब्न खानावाँ काठाब्न लोसुचि। खो आक्खाचिनुङ् काठाबि टेःॽन यामुसा। 35हाङ् निवाँहाङ्मि खानावाँ लोखुबाऎ गरहाङ् लोमिम्पा ग खानावाँ टङा,
“का काठाबि यामुॽङा
हाङ् बाखाटेम्मि सिरिस्टिबाङ् चुम्मिम्पा खानावाँ कॆ इकुङ।”#खोम्मिम्पासाम् ७८:२
सामामि काठाऎ लोमा यकुवॆ खानावाँ
36हाङ् येसुऎ याॽमिचि याइडाउचि हाङ् खिम्हाङ्सि भॆना हाङ् खोम् टिङ्खुबाचि टाआमि हाङ् खो लोसुचि, “बारिबिऎ सामामि काठाऎ लोमा यकुवॆ खानावाँ काङ्का इबिचिमॆ।” 37खोसॆ आक्खाचि लोसुचि, “काम्नुहा चारिक् टुप्खुबा चाइ याॽमिमि पासा रेम। 38बारि चाइ ग बाखाटेम यो। हाङ् चारिक् चाइ निवाँहाङ्मि हाङ्डाम्मि पासाचि रेम हाङ् सामा चाइ साइटानमि पासाचि रेम। 39सामामि चारिक् टुप्खुबा चाइ साइटान रेम हाङ् सिचाम् खोम्मॆ लः लोमिम्पा चाइ बाखाटेम् लुक्खॆमॆ लः यो। हाङ् चारावा खोम्खुबाचि चाइ निवाँखाटॆखुबाचि यो। 40मान्टहाङ् सामा डेन्से मिःबि टि बाखाटेम् लुक्खॆॽमॆ लःबि सङ्क आक्रक्न लि। 41हाङ् आक्क डिना याॽमिम् पासाऎ टाङ्पाम निवाँखाटॆखुबाचि पाहाङ्कुचि। खोचिऎ खोम् हाङ्डाम्पि हिङ्वा लॆखुबाचि हाङ् लॆःॽमिखुबाचि चोब्न खोमुकुचि। 42हाङ् हानाम्स आसिखॆखुबा मिःबि कक्डाङ्कुचि। आक्कबि आक्खाचि हाःबुक्मि हाङ् कॆङ् यिगुक्मि। 43हाङ् निवाँनॆन याॽमिचि चाइ उम्चि आपामि हाङ्डाम्पि नाम्र हाःक्मि। आसाम् नाबाक् चु आक्कसॆ खेमुर।
चुम्मिम्पा चासुम्मि काठा
44“पारुबिऎ हाङ्डाम् चाइ एक्क रोपाबि हुम्भुङ्मिम्पा चासुम रक्मान। एक्क याॽमिऎ म यक्टकुहाङ् फेरि चुम्भुङ्कु हाङ् खो चेन्चासे खॆ हाङ् टाङ्पानुङ् चुहा चोब्न चासुम् इन्चाकु हाङ् आक्क रोपा इनुकु।
45“फेरि निवाँहाङ्मि हाङ्डाम् काम्नुऎ मोटि इन्मा यक्खुबा एक्क याॽमि रक्मान। 46खोसॆ म डिरिक् याङ् सिक्खुबा मोटि यक्टक्कु हाङ् खाराहाङ् खोनुङ् चुःहा चोब्न चासुम् इन्चाइखॆटुहाङ् आक्क मोटि इनु।
ङा लाप्मॆ जालामि काठा
47“फेरि पारुमि हाङ्डाम् टोम्पलिॽवाबि वेन्मिम्पा एक्क जाला रक्मान, हाङ् आक्कसॆ चोब्न खालाहा ङा लाबुकु। 48हाङ् ङाऎ जाला चेप्खॆकु हाङ् ङा लाप्खुबाचिऎ जाला टोम्पलिॽवा कॆक्पि लाबक्कुचि हाङ् पेनुक्मिहाङ् काम्नुहा चाइ कक्नाम्पि युङ्कुचि, टर काइसा चाइ बाहिरा कहाङ्कुचि।#१३:४८ याहुडि जाटिचिऎ यायेॽमाऎ चामा फॆन्नि लोमिम्पा चामा ठका मॆचोयुक्सुचि। 49ग बाखाटेम् लुक्खॆॽमॆ लःबि सङ्क आक्रक्न लि। निवाँखाटॆखुबाचि टाक्मिहाङ निवाँनेन् याॽमिचि हिङ्वाचिबाङ् फागुकुचिमि। 50हाङ् हिङ्वाचि हानाम्स सिखॆॽनॆ मिःबि कक्ढाङ्कुचि। आक्कुबि खोचि हाःबुक्मि हाङ् कॆङ् यिःगुक्मि।”
51येसुऎ टिङ्खुबाचि लोसुचि, “माल् आन्नॆ इघा चोब्न खानावाँ वाबाम्निहॆ?” खोचिऎ लोसुचि, “वाबुङ्का।” 52हाङ् येसुऎ आक्खाचि लोसुचि, “मसॆ यायेॽमा लेक्खुबा पारुमि हाङ्डाम्मि बारेबि खानावाँ चिन्मिम्पा याॽमिचि चाइ एक्क खिम्पिऎ टुङ्घङ्पा रक्मान। खोसॆ टाङ्पामि खिम्पि खोम्भुङ्मिम्पाबाङ् उम्चङ् हाङ् आरेॽहा खानावाँ लाबकु।”
नासाराटबि येसु सिच्चामिम्पा
(मारकुस ६:१-६; लुका ४:१६-३०)
53येसुऎ आक्खा काठा इसिटुहाङ येसु आक्क ठालबाङ् खाइटा। 54हाङ् टाङ्पा पुमिम्पा हाटा नासराटबि टाआहाङ खोसॆ उम्चि याहुडिचि खोम्ठाम् खिम्पि चिन्पकुचि। खोम् खानावाँ खेमुचिहाङ् आक्खॆसे गर कासामि, “गसॆ गरक्मा निवाँ हाङ् आक्खॆॽमालुऎ योम्पक् यिक्मॆ चॆक्मावा हाम्पा टक्चाउयॆ? 55माल् ग सिङ्मि योम्पक मुखुबा याॽमिमि पासा हॆॽनॆ? हाङ् गमि उम्मामि निङ् मारियम हाङ् नुसाचि याकुब, योसेफ, सिमोन्नुङ् याहुडा हॆॽनॆ? 56माल् खोम् चोब्न मेॽनुङ्मा नुसाचि कानिनुङ्न चुःक्मि हॆॽनॆ? हाङ् खोसॆ गरहा चोब्न खानावाँ हाम्पा टक्चाउवॆ?” 57आक्र कामानुङ् खोचि खोनुङ् सोम् खेरामि। टर येसुऎ आक्खा याॽमिचि लोसुचि, “निवाँहाङ्मि खानावाँ लोखुबा खोम् ठाल हाङ् खिम्पिहा याॽमिचिऎ बाहेका होइढा चोब्न ठालबि ङेबुकुचि।” 58हाङ् आक्खाचिऎ निवाँयुङ् मालॆमिम्पासॆ येसुऎ आक्क ठालबि डिरिक् चॆक्मावामि योम्पक् मायिगु।
Pilihan Saat Ini:
मट्टि 13: LBR
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023, Wycliffe Bible Translators, Inc. and Nepal Bible Society
