Matayɔ 6
6
Yeso unzo ʉpanʉ ekoo ʉ salɨa ɓombi ɓʉ ɓanangyɨa
1« Kanganieni kanganɨaa, nɔɔkyɨakɔmʉ moni kɔɔ ngbingbii apɛɛ ʉ ɓombi aka ekoo ʉ panana. Jʉ nʉkyɨeni ɓwanɨ, nambʉkʉnyɨa nʉ ʉkʉa kʉʉngwa ɔɔ Atɔ ʉndɛnʉ ngia a ekoo ʉ ɓisi.
2Ya ngbanga kʉndʉ, winyeni kʉsalɨa mombi ʉ ɓanangyɨa, wɔɔɓɛndakɔmʉ iɓoɓo ɓɔ jʉ ɓombi ɓʉnana. Iinanɨ ya ɨkyananakɨa yɨ ɓafili, iya ɓaakyɨa amati ʉ lɨkáa lʉ nɨta ngila lʉ Ɓayuda, kʉndʉ nʉ mɨngyɛndʉ ɓʉ ngila, ambʉ ɓombi ɓuɓio naɓɔ kʉbɨba. Tʉkʉ kingono maninu kusigio ɓɔ ɛɓɔ ɓombi ngiɓʉnanɨ, ʉkʉa nga wʉndaɓʉ tii tʉkʉ uʉnanɨ.
3Ɨkyɛmɨngana ɔwɛ, ati ngia waɓio‑ɔɔ kʉsalɨa mombi ʉ ɓanangyɨa, kyɨa angu ɓɔ ɨkɔndɔ ngiisɔɔ yɨ moiɔngɔ, yɔɔmbɨakɔmʉ ɨkyɛmɛ ngia ɨkɔndɔ yɨ guɔngɔ yakʉkyɨa. 4Kyɨa moni ngikʉnanɨ tʉkʉ akʉ ɓaɗi. Kʉ ɓwanɨ, Atɔ Asʉɓɨɨ ngia aana moni kʉ muɓomu ngika kaakyɨanɨa akʉ ɓaɗi, a꞊natuisio ʉkʉa wɔngɔ tuisioni. »
Yeso akʉpanɨa ɓɔ yɨkwanana kʉta tanɨ
(Luk 11:2-4)
5« Ati ngia naɓio‑ɔɔ kʉta Asʉɓɨɨ, nɔɔɓiokɔmʉ ndʉ ɓafili. Jʉ ɛɓɔ ɓaakʉnda nɨta Asʉɓɨɨ ɓʉmaɨ ɓʉ gba, amati ʉ lɨkáa lʉ nɨta ngila lʉ Ɓayuda, nʉ akʉ ɓambamba ɓʉ lɨngbaa, ambʉɓuɓio naɓɔ kʉna. Tʉkʉ kingono, maninu kusigio ɓɔ, kʉkyɨa ɓwanɨ, ʉkʉa nga wʉndaɓʉ ɓʉ꞉nyɨa nawɔ ʉwɔ tii tʉkʉ ʉʉnanɨ.
6Ɨkyɛmɨngana, ati ngia ɔwɛ waɓio‑ɔɔ kʉta Asʉɓɨɨ, kumunio ambɛnɨ ʉ pɛɛ. Wambukuto umongu ɓʉ gbu, wambufaniso nɨta Atɔ ngia akʉ izi yɨ ɓaɗi. Kʉ ɓwanɨ, Atɔ ngia aana moni ngika kaakyɨanɨa akʉ ɓaɗi, tiga kʉ ɛyɔ a꞊nanzo ʉkʉa wɔngɔ.
7Nʉ ɓata, amati ʉ nɨta Asʉɓɨɨ, nɔɔɓiokɔmʉ kito moni mata, ngbanga ndʉ ɓombi ngiɓa ɓambakambɨa Asʉɓɨɨ ɓaakyɨa. Jʉ kʉkyɨa ɓwanɨ, ɛɓɔ ɓaayo ɓɔ, Asʉɓɨɨ akwanana nɨkɔ nɨta ngiindaɓʉ jʉ ɓakʉyaka moni maja. 8Inu nɔɔɓiokɔmʉ ngbanga ndʉ ɛɓɔ. Jʉ pɛɛ ngia naata‑ɔɔ ɨkyɛmɛ, Atɔ ʉndɛnʉ aakyɨa ɓɔ ʉmbɨɛni tananɨa ngiindɛnʉ mbɨanɨ. 9Nʉkwanana kʉta Asʉɓɨɨ ɓɔ:
‹ Tidoo ngiʉndɛsʉ a ekoo ʉ ɓisi!
Ino yɛɛ Tu ngiisɔɔ yɨ bɨbanɨa bɨbanɨaa.
10Ɓʉngama ngiɓʉsɔɔ ɓʉka.
Ɓʉkʉnda ngiɓʉsɔɔ, ɓʉkyɨanɨa,
akʉ ɨtaka, kʉndʉ ekoo ʉ ɓisi. 11Tinzo idyo ngiindɛsʉ ɓʉɓʉnɨ, kʉndʉ waatinzo makwaa kʉ muɓomu
12Tɨpɨa ɓʉɓɨɓɨ ngiɓʉndɛsʉ,
kʉndʉ isu kaapɨa ɓiga ngiɓa ɓaatɨkyɨa ɓʉɓɨɓɨ.
13Wɔɔtɨsɨakɔmʉ kukumunio amati ʉ kanyo,
Ɨkyɛmɨngana, tiɓwanakiso akʉ lɨkɔndɔ lʉ Makwa.
[Jʉ ɓʉngama, angu nʉ ɨbɨba ya yɨsɔɔ,
akʉ mɨtʉ yɨ ɨpá nʉ mɨtʉ yɨ ɨpá!
Ya ɓwanɨ!] ›
14Ndʉ napɨa ɓangɛ ɓʉɓɨɓɨ ngiɓʉndaɓʉ, Atɔ ʉndɛnʉ ngia a ekoo ʉ ɓisi, a꞊nɨpɨa inu kʉ pɨaa. 15Ɨkyɛmɨngana, ndʉ inu nambʉkʉpɨa ɓangɛ, Atɔ ʉndɛnʉ ngia a ekoo ʉ ɓisi ambʉkʉnɨpɨa inu ɓʉɓɨɓɨ ngiɓʉndɛnʉ kʉ ɓwanɨ. »
Yeso unzo ʉpanʉ ekoo ʉ táa idyo akʉ wati
16« Ati ngia naɓio‑ɔɔ kʉtáa idyo akʉ wati, nɔɔɓiokɔmʉ mesu mʉfɛ, ngbanga ndʉ ɓafili. Jʉ ɛɓɔ ɓaafa mesu ngikʉndaɓʉ, kupananiso ɓɔ ɓa akʉ wati wʉ táa idyo. Tʉkʉ kingono, maninu kusigio ɓɔ ʉkʉa nga wʉndaɓʉ tii tʉkʉ ʉʉnanɨ.
17Ɨkyɛmɨngana, ati ngia waɓio‑ɔɔ kʉtáa idyo, wʉkwanana kʉjaɓana mesu nʉ kutiono umbundo akʉ 'ʉtʉ. 18Ambʉ ɓombi ɓɔɔmbɨakɔmʉ ɓɔ wa akʉ wati wʉ táa idyo. Ɨkyɛmɨngana, tʉkʉ Atɔ ʉndɛnʉ ngia akʉ izi yɨ ɓaɗi ʉmbɨa kʉ nangana. Kʉ ɓwanɨ, ɛyɔ Atɔ ngia aana moni ngika kaakyɨanɨa akʉ ɓaɗi a꞊ninzo ʉkʉa wɔngɔ nzoni. »
Yeso akunzo ʉpanʉ ekoo ʉ ɓoso kumbo
(Luk 12:33-34; 11:34-36; 16:13)
19« Nɔɔwukɔmʉ angu kʉnzɨanakiso ɨjangɨa ɓʉ kyɔ kyɔ kyɔ akʉ ɨtaka aka. Jʉ ya꞊kwa nzʉngʉma, nʉ ɓutetu ɓa꞊itambiso tambisoo. Kija ɓombi ɓʉ ndiɓo, ɓaɓundo umongu kuɓo engo. 20Ɨkyɛmɨngana, nʉkwanana kʉnzɨanakiso ɨjangɨa ngiindɛnʉ ekoo ʉ ɓisi. Nani, nzʉngʉma yambʉkɔmʉ‑ɛɛ, kʉndʉ ɓutetu ngiɓa ɓakwanana kutambiso engo ɓambʉkɔmʉ‑ɛɛ kʉ ɓwanɨ. Nʉ nani, mombi ʉ ndiɓo ambʉkɔmʉ‑ɛɛ kʉ ɓwanɨ ikanzi ngia akwanana kuɓundo umongu nʉ kuɓo engo. 21Jʉ akʉ ɨjangɨa ngiisɔɔ ya‑ɛɛ, 'ʉtʉma nguʉsɔɔ waɓio kʉ nani. »
Yeso akunzo ʉpanʉ ekoo wanga
(Luk 11:34-36)
22« Mesu ka wanga wʉ ndʉtʉ. Kʉ ɓwanɨ, mesu ngikʉsɔɔ kinyeni muɗo, ndʉtʉ ngiisɔɔ kʉ iɓomu yaɓio tʉkʉ amati ʉ wanga. 23Ɨkyɛmɨngana, ndʉ mesu ngikʉsɔɔ kadʉana, ndʉtʉ ngiisɔɔ kʉ iɓomu ya꞊kumunio tʉkʉ amati ʉ umomo. Ndʉ wanga ngua wa amati asɔɔ waimunio, umomo wɔngɔ wa꞊ɓaana tii tʉkʉ ɓʉ chɨla chɨla! »
Yeso unzo ʉpanʉ ekoo kumbo ʉ ɨtaka
(Luk 12:22-31)
24« Mombi ʉ kuu gʉkʉ mʉngana ambʉkʉkwanana kʉkyananakɨa ɓangama ɓapɨnɨ. Jʉ chʉkɔmʉ ɓwanɨ, a꞊yaa mʉngana, ambʉkʉnda iya kɔmɔ. Yɛmɔ ɓɔ, abaya kyananakɨa ngama mʉngana, ambuɓio kʉna gwa ngia kɔmɔ tʉkʉ ɨsʉkʉɓwanɨ. Nambʉkʉkwanana kʉkyananakɨa Asʉɓɨɨ, nʉ kʉkyananakɨa falanga akʉ wati mungono!
25Ya aka ekoo ʉ moni ngikʉnanɨ iya ɛmɛ ma‑ɔɔ ninu kusigio ɓɔ Nɔɔwununikiokɔmʉ moni kʉ ʉɓɨɨ nguʉndɛnʉ, ɓɔ na꞊dya ɨmanɨ, ɓɔ na꞊mwa ɨmanɨ, gʉ ɓɔ napɨnya ɨmanɨ. Jʉ ʉɓɨɨ nguwʉ mombi wanʉ ɨjangɨa kʉɓaa idyo. Nʉ ndʉtʉ ngia yɨ mombi yanʉ ɨjangɨa kʉɓaa lɨpʉkʉ.
26Kangeni‑zʉ ɓunoi! Ɛɓɔ ɓambakahʉnanaka. Nʉ ɓambakabʉa masɔɔ kʉ ɓwanɨ. Nʉ ɓata, ɛɓɔ ɓambakaɓoso ɨkyɛmɛ akʉ ɨkáa yɨ masɔɔ kʉ ɓwanɨ. Abana ɓwanɨ kititi, Atɔ ʉndɛnʉ ngia ekoo ʉ ɓisi, aakyɨa naɓɔ tʉkʉ kʉdyakakiso. Ajʉ Inu nambʉkɔmʉ‑zʉ nʉ ɨjangɨa kʉɓaa ɓunoi ngiɓʉnanɨ ɓiɛ? 27Anɨ‑zʉ ati ʉndɛnʉ iya, a ikanzi ngia asɨnganiso ɓʉta ɓʉ ʉɓɨɨ nguangɔ mwana ɔngɔ ʉta ɗɛkɛkɛ, aka ekoo ʉ ɓatanga ngiɓa a naɓɔ?
28Jʉtanɨ nakʉdya ɓatanga akʉ moni kʉ lɨpʉkʉ? Kangeni‑zʉ ɓɔ maʉa ngika kʉ watɨnɨ kaanaa tanɨ. Wambʉkanganɨa kʉ ɓɔ maʉa kaambakakyɨa kuu, nʉ kambakafioko lɨpʉkʉ kʉ ɓwanɨ. 29Ɨkyɛmɨngana, maninu kusigio ɓɔ, abana tʉkʉ ngama Sɔlɔmɔnɔ amati ʉ ɨbɨba ngiangɔ kʉ iɓomu, a꞉pɨnyakɔmʉ lɨpʉkʉ lɔɔ manzanza ngbanga ndʉ ɨwʉa mɨngana ati ʉ mawʉa ngikʉnanɨ. 30Ndʉ Asʉɓɨɨ aɓio‑zʉ kupinyiso mawʉa kʉ 'ututu ɓwanɨ, ika ɓʉɓʉnɨ ka‑zʉ kʉ ɓioni, ɨkyɛmɨngana saa kʉɓa ɓa꞊kugiso akʉ dyaa, anɨ a꞊na tiga aka anipinyiso‑ɔɔ inu? Huu, ambʉ ɓombi ɓanʉ baya yɛɛ ɗɛkɛkɛ kʉ ɓɔ!
31Kʉ ɓwanɨ, Nɔɔwununikiokɔmʉ ɓɔ nadya ɨmanɨ, gʉ ɓɔ namwa ɨmanɨ, gʉ ɓɔ napɨnya ɨmanɨ. 32Iinanɨ kʉ iɓomu, tʉkʉ ɓombi ngiɓa ɓambakambɨa Asʉɓɨɨ ɓaahatanaka ɓwanɨ. Jʉ Atɔ ʉndɛnʉ ngia a ekoo ʉ ɓisi, akʉmbɨa ɓɔ nanʉ taa yɨ ɓamoni ngiɓʉnanɨ.
33Hateni‑zʉ pɛɛ Ɓʉngama ngiɓa ɓʉ Asʉɓɨɨ, nʉ kyɨa ɓʉngbingbii ngiɓangɔ. Kija moni nga kɔmɔ kʉ muɓomu, a꞊nɨmatɨa ɛkɔ tiga kʉ na ekoo ɔngɔ.
34Kʉ ɓwanɨ, nɔɔdyakɔmʉ ɓatanga ɓɔ ɓisi kakyɨa tanɨ. Jʉ moni ngika kʉ ɓisi kaɓio kʉ di. Jʉ ɓisi nʉ ɓisi ɓanʉ ɓʉka‑ɓʉkaɨ nga ɓangɔ. »
Pilihan Saat Ini:
Matayɔ 6: BudKoya
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2021, Wycliffe Bible Translators, Inc.
