IMAMAT 3
3
Persembahen persadan
1Adi lit kalak mpersembahken lembuna jadi persembahen persadan, lembu si ipersembahken e, subuk jenggina tah beruna, la banci lit sitik pe man pandangen. 2Kalak si maba persembahen e arus namaken tanna i babo takal lembu e, jenari igelehna i lebe pintun Kemah Perjumpan. Darehna arus icurcurken imam-imam kesusuren Harun ku empatna dingding batar-batar e. 3Kenca bage ipersembahkenna lah man TUHAN bagin-bagin si tersena enda jadi persembahen pangan, e me: kerina tabeh-tabeh si maluti tukana, 4piahna ras tabeh-tabeh si leket i je ras bagin atena si mejilena. 5Imam-imam arus nutung kerina si e i babo batar-batar radu ras persembahen tutungen e. Bau persembahen tutungen e merim iakap TUHAN.
6Adi persembahen e biri-biri tah kambing, banci beruna tah pe bajarna, tapi sitik pe la lit man pandangen. 7Adi kalak mpersembahken biri-biri, 8arus itamakenna tanna i babo takal asuh-asuhen e, jenari igelehna i lebe-lebe Kemah Perjumpan. Darehna icurcurken imam ku empatna dingding batar-batar e. 9Kenca bage ipersembahkenna bagin-bagin asuh-asuhen si tersena enda jadi persembahen pangan man TUHAN e me: tabeh-tabehna, tabeh-tabeh ikur si ikeret tingtang tulan ikur, kerina tabeh-tabeh si maluti tukana, ramramenna, 10piahna ras tabeh-tabehna si leket i je, ras bagin atena si mejilena. 11Imam si ngelakoken dahin e arus nutung kerina si enda i babo batar-batar persembahen jadi persembahen pangan man TUHAN.
12Adi kalak mpersembahken kambing, 13itamakenna lah tanna i babo takal kambing e, jenari igelehna i lebe-lebe Kemah Perjumpan. Darehna icurcurken imam-imam ku empatna dingding batar-batar persembahen. 14Kenca bage ipersembahkenna bagin si tersena enda jadi persembahen pangan man TUHAN, e me: kerina tabeh-tabeh si maluti tukana, isi beltekna, 15piahna ras tabeh-tabehna, ras bagin atena si mejilena. 16Imam ndai nutung si enda kerina i babo batar-batar jadi persembahen pangan si erbanca meriah ukur TUHAN. Kerina tabeh-tabehna TUHAN empuna. 17Sada pe la banci kalak Israel man tabeh-tabeh tah pe dareh. Aturen enda arus ipatuhi bangsa Israel kerina asa lalap i japa pe ia ringan.
Pilihan Saat Ini:
IMAMAT 3: BTX
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Batak Karo Bible © Indonesian Bible Society, 2003.