IMAMAT 27
27
Undang-undang mere kempak TUHAN
1Ibereken TUHAN man Musa 2peraturen-peraturen enda man bangsa Israel. Sekalak si ibereken man TUHAN alu make sumpah khusus, banci itebusi 3-7alu erga-erga bagi si tersena enda sue ras erga resmi:
– Dilaki si enggo dewasa umur dua puluh seh enem puluh tahun: lima puluh duit pirak.
– Diberu si enggo dewasa: telu puluh duit pirak.
– Anak dilaki umur lima seh dua puluh tahun: dua puluh duit pirak.
– Anak diberu singuda-nguda: sepuluh duit pirak.
– Anak dilaki ope umur lima tahun: lima duit pirak.
– Anak diberu: telu duit pirak.
– Dilaki umur erbabo enem puluh tahun: sepuluh lima duit pirak.
– Diberu umur erbabo enem puluh tahun: sepuluh duit pirak.
8Tapi adi kalak si ersumpah khusus e la ngasup nggalari asa si tersena ndai, baba ia ku adep-adepen imam maka ikurangina ergana asa ngasupna. 9Adi ia ersumpah mereken asuh-asuhen si la pantangen man TUHAN, maka tep-tep pemere e badia nge. 10E maka kalak si ersumpah e la banci nukarkenca alu asuh-asuhen si deban. Adi itukarkenna, duana asuh-asuhen ndai enggo jadi sikerajangen TUHAN. 11Adi sumpahna e mereken rubia-rubia si pantangen si la banci ipersembahken man TUHAN, ibabana lah rubia-rubia e ku adep-adepen imam, 12gelah itetapken imam ergana rikutken ulina ntah genjengna asuh-asuhen e. Asa kai nina imam, ase me ergana. 13Adi itebusina atena mulihi, arus maka igalarina rikutken si enggo itetapken ndai itambahi ka seperlimana nari.
14Adi kalak ngendesken rumahna man TUHAN, imam si nentuken ergana rikutken ulina ntah genjengna rumah e. Erga si itentuken imam e la banci iobah. 15Adi itebusina ka atena e mulihken arus maka igalarina rikutken erga si enggo itetapken ndai itambahi seperlima nari.
16Adi kalak ngendesken sada bagin tanehna man TUHAN, ergana itentuken rikutken buena benih si ipake guna ngerdangisa, e me sepuluh duit pirak tep-tep dua puluh kilo benih. 17Adi taneh e iendeskenna minter kenca Tahun Penangtangen, erga si itetapken arus dem. 18Tapi adi iendesken kenca piga-piga tahun, ergana ikira imam rikutken piga tahun nari maka seh ku Tahun Penangtangen si rehna, jenari itetapken ergana kenca ikurangi. 19Adi kalak si enggo ngendesken taneh e, nebusisa atena mulihken arus maka igalarina rikutken ergana itambahi ka seperlimana nari. 20Adi idayakenna taneh e man kalak si deban ope denga itebusina i bas TUHAN nari, e lanai lit hakna nebusi taneh e. 21I bas tahun Penangtangen si rehna, taneh e jadi sikerajangen TUHAN seh rasa lalap; e jadi sikerajangen imam-imam.
22Adi kalak ngendesken man TUHAN taneh si enggo itukurna, 23imam netapken ergana rikutken buena tahun ngayak seh Tahun Penangtangen si rehna, janah arus maka i bas wari e kang igalarina. Duit e jadi sikerajangen TUHAN. 24I bas Tahun Penangtangen arus maka taneh e iulihken man empuna ndube ntah pe man sinursurna.
25Kerina erga arus rikutken erga resmi.
26Tep-tep anak si pemena asuh-asuhen e enggo kap jadi sikerajangen TUHAN; e maka ise pe la banci ngendeskenca man TUHAN jadi persembahen ukur meriah. Anak lembu, anak biri-biri, anak kambing, sikerajangen TUHAN kap. 27Tapi anak si pemena i bas rubia-rubia pantangen banci itebusi alu erga si enggo itetapken itambahi seperlimana nari. Adi la itebusi banci idayaken man kalak si deban alu erga si enggo itetapken.
28Ise pe la banci ndayaken ntah nebusi kai si enggo iendeskenna jadi hak TUHAN guna ikernepken, subuk e manusia, asuh-asuhen, ntah taneh erkiteken enggo jadi hak TUHAN e rasa lalap. #Bil 18:14 29Sedangken manusia pe adi enggo iendesken man TUHAN guna ikernepken lanai banci itebusi, tapi arus ibunuh.
30Sepersepuluh i bas ulih tanehndu nari, subuk page, subuk buah kayu, e jadi sikerajangen TUHAN. #Bil 18:21; Ul 14:22-29 31Adi apai gia i bas si sepersepuluh e itebusi kalak atena, arus maka itebusina rikutken erga si enggo itetapken, itambahi seperlimana nari. 32Sada tep-tep sepuluh asuh-asuhen TUHAN empuna. Adi asuh-asuhen e ikira, maka tep-tep si pesepuluhken, e jadi sikerajangen TUHAN. 33La banci iaturken empuna asuh-asuhen e, maka si la mehulina saja si terpilih, janah la banci itukari. Adi itukarkenna, duana jadi sikerajangen TUHAN, janah lanai banci itebusi mulihi.
34Enda me kerina perentah-perentah si ibereken TUHAN man Musa i datas Deleng Sinai guna iikutken bangsa Israel.
Pilihan Saat Ini:
IMAMAT 27: BTX
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Batak Karo Bible © Indonesian Bible Society, 2003.