KELUAREN 31
31
Tukang si erbahan Kemah si Badia
(Kel 35:30–36:1)
1Nina TUHAN man Musa, 2“Enggo Kupilih Besalel, anak Uri kempu Hur, i bas suku Juda nari, 3janah enggo Kudemi ia alu kesahKu. Enggo Kubereken man bana pengertin, kebeluhen ras kengasupen erbahan barang-barang si mejile: 4ngerencanaken ras erbahan potongen si mejile i bas emas pirak ras tembaga nari; 5nggarut permata ras namakenca i bas bingkena; erbahan ukir-ukiren kayu ras erbage-bage dahin erbahan barang-barang si deban si mejile. 6Bage pe enggo Kupilih Oholiap anak Ahisamah, i bas suku Dan nari guna nampati Besalel. Man tukang-tukang si deban pe enggo Kubereken kengasupen si mbelin, gelah banci ibahanna kerina si enggo Kuperentahken e me: 7Kemah Perjumpan, Peti Perpadanen ras tutupna, kerina perabot-perabot Kemah e, 8meja ras alat-alatna, nahe lampu i bas emas murni nari ras kerina alat-alatna, batar-batar ingan nutungi si merim-merim, 9batar-batar guna persembahen tutungen ras kerina alat-alatna, baskom ras tapakna ingan lau pemurihi tan ras nahe, 10paken imam si lanai kal lang-lang jilena si man paken Harun ras anak-anakna tupung ndahiken dahin imam, 11minak penangkuhen, ras barang tutungen si merim guna ingan si badia. I bas erbahan barang-barang si enda kerina, la banci sitik pe nimpang i bas kai si enggo Kupedahken man bandu.”
Sabat, wari pekesahken
12-13Isuruh TUHAN gelah ikataken Musa man bangsa Israel, nina, “Inget wari Sabat, wari si enggo Kutetapken jadi wari pengadi-ngadin, sabap e me sada tanda si encidahken i bas kerina paksa-paksa si reh maka Aku, TUHANndu, enggo erbahan kam jadi bangsangKu. 14Arus ingetndu wari pengadi-ngadin e, sabap badia e. Ise si la ngingetsa, si erdahin i bas wari e, la banci la ibunuh. #Kel 20:8-11; 23:12; 34:21; 35:2; Im 23:3; Ul 5:12-14 15Enem wari ibereken man bandu guna ndahiken dahindu, tapi wari si pepituken, e me wari pengadi-ngadin si badia si ikhususken man bangKu. Ise si erdahin i bas wari e la banci la ibunuh. 16Bangsa Israel la banci la tetap nginget wari enda jadi sada tanda perpadanenKu ras bangsa e. 17Wari Sabat, e me sada peringet-ingeten si tetap i bas bangsa Israel ras Aku, sabap Aku, TUHAN enggo erbahan langit ras doni i bas enem wari, janah i bas wari si pepituken ngadi Aku erdahin guna pekesahken.” #Kel 20:11
18Kenca enggo dung Dibata ngerana man Musa i das Deleng Sinai, iberekenNa man bana papan batu si dua e, i je Dibata jine enggo nuratken pedah-pedah e.
Pilihan Saat Ini:
KELUAREN 31: BTX
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Batak Karo Bible © Indonesian Bible Society, 2003.