Bemba 18
18
Pɔli bya Kɔlɛnti
1Onyate mɛnɛ, Pɔli amanya etafɛlɛ ya Atɛni alwa bya etafɛlɛ ya Kɔlɛnti. 2Ya ango atakana na Zufi wa jinɔ te Akilasi, ajibwɛsɛ o njɛnja mɔngɔ ya Pɔn: ayengasa bya Itali bango na mwaji eji, Pisili, bosina te kolodi wa nkani mwa inɛnɛ alomasa te ba-Zufi bahajɛ bamanyace Lɔmi. Pɔli te alwa ikumɛcɛ bango 3bosina te, babekakasa ehaji mɛnɛ yɛkɔ, ya ilongaka membembe, ajakasa bya bango baji na ijazaka bango ango.
4Minyan Saba mahajɛ, Pɔli akwa iyɔkɔ o elongwɛ ya Zambe na ahakakasa te ba-Zufi na ba-Ngɛlɛki bahimɛce mayɔkɔ mɛ obwɛji. 5Usya Silasi na Timɔte bamanyasa njɛnja mɔngɔ ya Masedoni ilwaka bya etafɛlɛ ya Kɔlɛnti, Pɔli ajasa kanganga o iyɔkɔ ja Zambe, atandakasa o boho bwa ba-Zufi te Zɛzi aje Kilisitɛ. 6Nde ba-Zufi bajasa kanganga na neji na ilowaka ango, ya ango akukwɛ ihululu ja mekanda myeji na isɔhɔkɔ na bango te: «Maza ma bihi matuwake ukwa molo mwa bihi majetɛ Pu. Osatɛ, melwaka bya baji teka ja ba-Zufi baji.» 7Ya ango amanya usɛ na ilwaka bya moto wa jinɔ te Tityusi Zutusi, ayebakasa tuma ya Zambe wa elongwɛ eji ya ajasa okuna na elongwɛ ya membɔndu. 8Kilipusi, wa nɛni mwa elongwɛ ya membɔndu, ahimɛ Ku, bango na yaleji yahajɛ. Bato buce ba kolɛnti, bayokakasa Pɔli, babukwɛ na ilubaka bango o nso.
9Na epundu, Pɔli ayɛnɛ yɛni ya Ku asɔhɔ neji te: «Teka lɔngɔ, nde kangamaka na isɔhɔkɔ, teka kanga, 10bosina te majetɛ na nɔbɛ. Teka moto enyɛni beka ɔbɛ bobe, bosina te maje na lupu ja buce o etafɛlɛ etɛ.»
11Pɔli abekasa usɛ nkola mɔkɔ na eduku, ihɛlɛcɛ bango iyɔkɔ ja Zambe.
Pɔli o boho bwa Ngalyɔn
12O sondi ya Ngalyɔn ajasa nɛni mwa Lɔmi o njɛnja ya Akayi, ba-Zufi bakota ebumba na bosina bwa Pɔli. Ya bango balwa neji o mbaza ya bapaba mambo 13na itandaka te: «Moto otɛ asomɛ bato ibɔndɔkɔ Zambe na imwate njanga habe nda nceko.» 14Pɔli ayongasa akwa iyɔkɔ, usya Ngalyɔn asɔhɔsɔ na ba-Zufi te: «Ijakasa te ibome ice iyete emba ya ibebe, mamuyonga beka mwa elɔmɔ iyokaka bihi, bihi ba-Zufi. 15Nde ya yango yaji macɛcɛ ma bekana, na minɔ, na nceko mwa bihi mɛnɛ, yɛ yate bihi mɛnɛ. Mabene ijaka moto epabaka mambo janga mwɛ!» 16Ya ango apojɛ bango o mbaza ya bapaba mambo. 17Okate ya bango batuwa ukwa Sositɛni wa inɛni mwa elongwɛ ya membɔndu, ya bango bapazɛ ango o boho bwa mbaza ya bapaba mambo. Nde Ngalyɔn mutemangakasa byɛ byahajɛ.
Pɔli ahuwana bya Atyɔsi
18Pɔli ahimwasa buce bya kɔlɛti. Onyate mɛnɛ amanya te na bana nyangwɛ na bakaji na ilwaka bya etafɛlɛ ya Sili bango na Pisili na Akilasi. Boho, ajasa ecɛnjɛ molo bya Sankɛli, bosina te ajasa esinjɛ mapanga. 19Usya Pɔli apundasa bya Efɛzi ya ango ajika Pisili na Akilasi. Ya ango alwa bya elongwɛ ya membɔndu, na ibandaka icɛcɛ na ba-Zufi. 20Ya bango bahimwasa ango te abekace minyan bango ango, ya ango abenasa. 21Ya ango amanya na bango na isɔhɔkɔ te: «Mehunwanaka boyaka bya bihi baji, wɛnɛ Zambe anɔnɔ.» Ya ango manya Efɛzi ukwa embongo. 22Ya ango apunda bya etafɛlɛ ya Sezali, ya ango beta boho bya Zɛluzalɛmi isosaka buka bwa babukwɛ, na ihukwanaka bya etafɛlɛ ya Atyɔsi.
23Usya ango ahijɛsɛ ibekaka bana minyan usɛ, ya ango amanya usɛ na iyekaka o njɛnja mɔngɔ ya Ngalati na njɛnja mɔngɔ ya Filizi. Alwa kanjɛ ibukwe ja bayokwɛ.
Apɔlɔsi ahɛlɛ maheya bya etafɛlɛ ya Efɛzi na bya kolɛnti
24Usɛ Zufi wa jinɔ te Apɔlɔsi, moto wa Alɛkisandi, ajasa eya bya Efɛzi. Ajasa moto atandakasa iyɔkɔ ja mbɛ, ayebakasa mangwɛli obwɛji. 25Bajasa behɛlɛ ango obwɛji pɛyi ya Ku, ajasa na bongonga bwa itandakasa na ihelɛcɛ obwɛji mambo ma Zɛzi. Nde bayebakasa ka, nso mwa Za alubakasa. 26Asohɔkɔsɔ na tuma o elongwɛ ya membɔndu. Usya bahijɛsɛ iyokaka ango, Pisili na Akilasi bakwa ango itandaka ango obweji pɛyi ya Zambe. 27Usɛ, Apolosi ahakakasa ilwaka bya Akayi. Na bana nyangwɛ bakanjɛ ango te alwace, na ikwɛlɛcɛ makana bya bayokwɛ ba njɛnja mɔngɔ te, bakɔlɔce ango obwɛji. Usiya ango apundasa akanjɛsɛ bakalasa bayokwɛ na ngamo ya Zambe. 28Okate, acɛcɛkɛsɛ obwɛji uyɛhɛhɛ ba-Zufi: na ahɛlɛsɛ bango o mangwɛli te Zɛzi be Kilisitɛ.
Pilihan Saat Ini:
Bemba 18: KOQ
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
