ƗMbombo ɨzya Bhasontwa 11

ɄPeeteli ahubhabhʉʉzya zya zibhombɨɨshe hwa bha saga Bhayahuudi

1Abhasontwa na bhooziwa abhamwabho bha bhahakhalaga mu mukowa ʉgwɨ Yudeeya, bhahʉmvwɨzye huje, bha saga Bhayahuudi bhope bhɨtɨɨshe ɨNongwa ɨNyinza ɨzya Yeesu. 2Abhooziwa abhɨ Shiyahuudi bhahanzaga huje, bha saga Bhayahuudi bhatendwaje ɨngoola ɨzya hwitagaalila ɨzyɨ lume. ɄPeeteli lwa waweela hu Yelusaleemu, bhahanda hunʼtaake, 3bhahaga, “Weewe wahatʉʉhaga mu nyumba zya bhantu bha saga Bhayahuudi na‑asangaane alye ɨshalye peeka nabho!”

4Ɨpo ʉPeeteli ahanda hubhabhʉʉzye izwi limo limo zyonti sha zyahabhombɨɨshe, ahabhabhʉʉzya ahaga, 5“Isiku limo, nahali hwi‑ibooma ɨlyɨ Yaafa. Lwɨ‑ɨndi ahunʼnaabhe ʉNgʉlʉbhɨ, nahalola ɨndoleshelo. Mu ndoleshelo ɨyo, nahalola ahantu ha hahali nanshi igolole igoosi lya likhɨɨtwe ɨmbali zyakwe zinɨ. Hahiihaga afume hu mwanya, hahiishila panshɨnjɨ paliinɨ. 6Lwa naheenya muuhati yaakwe, nahalola muli nɨ hanu nɨ vyʉma ɨvinji. Mwahali nɨ hanu nɨ vyʉma ɨvyɨ manama ganɨ, vya vikwesushila, nɨ nyonyi.

7Ɨpo nahʉmvwa izwi liyiga, ‘Wee Peeteli, bhʉʉha! Ʉbhoole na‑alye!’ 8Nahaamula nahaga, ‘Ndaali, wee Mwɨnɨ! Enya, saga ɨndiiye nka lumo ahantu ha hali haavu!’ 9Leelo izwi ɨlyo afume hu mwanya lyahambʉʉzya nantele huje, ‘Ahantu hohonti ɨho ʉNgʉlʉbhɨ ahasangalusiizye, aawe ʉgandi aje haavu.’ 10Ɨzyo zyahabhombɨɨshe hataatu lwonti, ɨpo ɨvintu ɨvyo vyonti vyahaweela hu mwanya.

11Lwʉlwo abhantu bhataatu bha bhahasonteleziiwe afume hwi‑ibooma ɨlyɨ Kayisaliiya bhahali bhɨmɨlɨɨye pitagaalila pa nyumba ya nahakhalaga. 12ɄMʼpepo ʉMʼfinjile ahambʉʉzya huje, ɨmbale peeka nabho sinta asingaamwe. Ɨpo nahabhala peeka na bhamwetu ɨbha nʼtanda, tahatʉʉha mu nyumba ya Kolineeliyo. 13Ʉmwene ahatimamila ʉnʼtumi sha‑ahanʼnoleshɨɨye mu nyumba yaakwe ʉmwo. Ʉnʼtumi ʉyo ahamʼmʉzɨɨzye ahajile, ‘Ʉbhasonteelezye abhantu hu Yaafa huje, bhanʼkwizye ʉSiimoni wa bhayiga Peeteli. 14Ʉyo ahayihubhʉʉzya amazwi. Ashilile mu mazwi ɨgo wahayifyʉlwa aawe peeka na bhantu bhonti abha mu khaaya yaaho.’

15Lwɨ‑ɨhwanda ayanje na bhantu ɨbho, lubhilo ʉMʼpepo ʉMʼfinjile ahabhiishila nanshi sha‑ahatishiiye atɨ hu wandilo.#Bhaazya ɨMbombo ɨzya Bhasontwa 2:1-4. 16Nahiizuha izwi liila ʉMwɨnɨ ʉYeesu lya‑ahatibhʉzɨɨzye huje, ‘ɄYoohani ahabhozyaga abhantu na mɨnzɨ, leelo amwɨ mwahayoozewa hu Mʼpepo ʉMʼfinjile.’#Bhaazya ɨMbombo ɨzya Bhasontwa 1:5. 17Ɨsho shikʉnjɨlwa ʉNgʉlʉbhɨ sha‑ahatipiiye mu habhaazyo haala lwa tahamʼmwɨtɨɨshe ʉMwɨnɨ ʉYeesu ʉKilisiti, sha shɨɨsho bhope sha‑abhapiiye. Ɨshi! Anɨ nɨ naanu huje, ɨngajile ɨndwanje nʉ Ngʉlʉbhɨ?”

18Abhooziwa abhɨ Shiyahuudi bhaala lwa bhʉmvwa ɨzyo, bhahaleha hunʼtaake ʉPeeteli. Bhahamʼmwamiha ʉNgʉlʉbhɨ bhahaga, “Fwandi, ʉNgʉlʉbhɨ abhapiiye bhope abhantu bha saga Bhayahuudi idala ɨlya‑alaate hu mbiibhi zyabho, bhawaaje ʉwʉʉmi ʉwa wiila na wiila!”

Ɨshibhanza ɨsha hu Antiyokiya shisayiwa

19ɄSiteefano lwa waagogwa, abhooziwa bhahanyampaana hu nongwa yɨ malabha.#Bhaazya ɨMbombo ɨzya Bhasontwa 8:1. Abhooziwa bhamo bhahabhala hu mukowa ʉgwɨ Foyiniike, mu nsi yɨ‑ɨli paahati yɨ nsʉmbi ya bhayiga ɨKiipulo, bhamo mwi‑ibooma ɨlyɨ Antiyokiya ɨya hu mukowa ʉgwɨ Siiliya. Ʉhwo hwonti, bhahalʉmbɨlɨlaga ɨNongwa ɨNyinza ɨzya Mwɨnɨ ʉYeesu hwa Bhayahuudi bheene. 20Leelo pa Antiyokiya, bhamo mwɨ‑ɨbho bhahɨnzɨle afume hu nsi ɨyɨ Kiipulo na hwi‑ibooma ɨlyɨ Kileene. Abheene bhahanda alʉmbɨɨlɨle ɨNongwa ɨNyinza ɨzya Mwɨnɨ ʉYeesu na hwa bha saga Bhayahuudi. 21Ikhone lya Mwɨnɨ ʉNgʉlʉbhɨ lyahali peeka nabho. Abhantu abhinji tee bhahɨɨtɨha na humʼmɨnjɨɨlɨle ʉMwɨnɨ ʉYeesu.

22Abhantu abha hu shibhanza ɨsha hu Yelusaleemu lwa bhʉmvwa ɨzyo zya zibhombɨɨshe hwa bhantu ɨbho abha hwi‑ibooma ɨlyɨ Antiyokiya, bhahanʼsonteelezya ʉBalinaaba ʉhwo. 23Lwa waafiha ʉhwo, ahanʼnola ʉNgʉlʉbhɨ sha‑abhasayile abhantu ɨbho. Ahaseshela haani, ahabhakhajiilizya bhonti huje, bhajendelelaje abhe bhasundwe hwa Mwɨnɨ hu mwoyo gwonti. 24ɄBalinaaba ahali muntu mwinza, ʉMʼpepo ʉMʼfinjile ahanʼnongolaga, nantele ahali nʉ lwɨtɨho haani. Ɨpo abhantu bha Mwɨnɨ bhahonjeelela abhe bhinji haani.

25Pamandɨ ʉBalinaaba ahabhala hwi‑ibooma ɨlyɨ Taaso humʼmwanze ʉSauli. 26Lwa wamʼmwaga, ahanʼneeta hu Antiyokiya. Bhahakhala ʉhwo ʉmwaha gwonti, bhahabhʉngaanaga peeka na bhantu abha hu shibhanza, bhahabhamanyizyaga abhantu abhinji tee ɨnongwa ɨzya Yeesu. Pɨnɨɨpo pi‑ibooma ɨlyɨ Antiyokiya abhantu bhahandile hubhakwizye abhooziwa huje Bhakilisiti.

27Ɨnsiku ɨzyo pa Antiyokiya bhahɨnza abhakuwi bhamo abha Ngʉlʉbhɨ afume hwi‑ibooma ɨlyɨ Yelusaleemu. 28Ʉmo mwɨ‑ɨbho itaawa lyakwe ahali yʉ Agaabo. Ʉyo ahɨmɨɨlɨla, ahayanga ʉkuwi ashilile hu Mʼpepo ʉMʼfinjile huje, ɨnzala ɨngoosi yahayigwa mu nsi zyonti. Ɨnzala ɨyo yahafumiiye ʉKayisali ʉKilawudiyo ʉmwɨnɨ ʉnʼgoosi lwa‑ahalongozyaga. 29Afumilane nɨ‑ɨzyo, abhooziwa bhahɨtɨɨhana huje, shila muntu afumyaje ɨvintu alɨngaane na viila vya‑ali navyo huje, vibhavwaje abhooziwa abhamwabho abha hu mukowa ʉgwɨ Yudeeya. 30Bhahavibhʉngaanya, bhahamʼpeela ʉBalinaaba nʉ Sauli huje, bhavitwale hwa bhagoosi abhɨ shibhanza hu Yelusaleemu.

Pilihan Saat Ini:

ƗMbombo ɨzya Bhasontwa 11: SBK

Sorotan

Salin