Luka 3
3
Yohana ondo eza o batisma wa babara orona
1Ashili a bekaa ngmǝ ka Yohana kena ka Zakariya o wake a were aka Ogomo Buntus Bilatus waya togomo ba nyimi makeke ma Yahudiya. A Ogomo Hiridus waya togomo ba Galili. Orone o wai ka lebangi lene leyende tazane Pilibus waya togomo ba Ituriya ka Tarakunitas. A Lisaniyas waya togomo ba Abilenes. 2A were aka na Hanana ka Kayapa neya agomo magame ma Ashili, a were name Ogomo ogong o Roma Kaisar Tibariya waya ogomo ogong o pate makeke mame ka Roma, a waya nyimi lenai le betuuru ka esu le togomo te wai. 3Na Yohana ale kuruwǝ a makeke ma ting obeno Urdung, a wa zoole a wa beya na, aromo ne arnang ka madinǝ mane a eze ne o batisma adorana a kwizǝ madinǝ mane. 4Nangka a wele angmǝ Ishaya ondo o beya a ngmǝ ka mawo ma Ashili o bena:
“Ondo ya beya angmǝ a jǝng o wake,
‘Babarana Ashili orona,
nayina kai marona mame.
5A yo panzaza pate mapati,
a pose cale amea a ya orona pate ka a'owa
Ara a ka orona me wa gendarono a yo nayii wai,
araaka orona me wa burǝ,
a yo babara wai ka wa rere.
6A pate aromo neyo laka o boza Ashili.’ ”
7Nangka aromo a cake ne deya a Yohana ka ye ne o batisma na wa bekaana, “Ying o kurkǝnǝng ewa ee buru. Mana wa zoola ying na e arnang ka epa e buru emea Ashili ya deya ne aying? 8Ezana epa eka eyo wore o bekaana e arnang ka madinǝ ma ying e kurǝ a Ashili. Kanza ‘Tane beya tokpwe toying na Ibraheng waya ate arone.’ Eyang beelo ying, Ashili ama o nya Ibraheng ayana nyimi acale na. 9Betemo beya ting uti, pate uti omea wata ngwengza ayana a rere ne, a yo genda wai ka kare a nyimi ola.”
10Na aromo me pirkǝ na, “Eya teyo ya nanname?”
11Na Yohana kabare na wa bekaana, “Ondo oka waya ka madibi ma leere, a wa nya ondooka wata ka mai ne oyende, ondooka waya ka epaolya, a wai ma wa nyapa andaaka neta ka e ne.”
12Ana o eesa emate makeke ne ma nane de adorana a eze ne o batisma. Nane pirkǝ kai o bena “Ondo baala, eya gbara te ye?”
13Nawa bekaane na, “Tane embe emate makeke ka e kale epa eka a bekaa ying na e embe ne.”
14Na ana o tesa geza moole pirkǝ wai na, “Aaro kanza eya teya yame?” Nawa bekaa ne na, “Tane ote aromo kane nya ying emate ka legoone ne, kanza tane anane majakari ne, zanta na ka epa eka a arseze ying.”
15Aromo me neya aza o enda ondo boza, nane bore madoola anyong obena Yohana oromo omea Ashili a bekaana aya tonga ne na? 16Na Yohana bekaa pate one na, “Mi ang eze ying o batisma ka manyi, ondooka waya deya a malo ong, wa kalang o gongnga, anta bare ang dinggi sejǝng se tokakau to wai ne. Wai wayo eza o batisma o wai ka obere o Ashili kanza ka ola. 17Epa o saka epaolya ya taara te wai, wayo zeera elya e wai, kanza wayo eke elya a lebengga le wai, a wa ese masuni mame ka ola ome awata lambuzu ne.”
18Ka angmǝ a cak abelo anna, Yohana zoole aromo a wa baale ne angmǝ lebo Ashili.
19Na Yohana me kanza wa zoole Ogomo Hiridus, aza epa eka wa eza, wa ana Hirudiya ondaye orone wai Pilibus na wa itǝ ondaye wai, kanza a wa eze magogoro ma buru. 20O maare ekeeya, Ogomo Hiridus wa wale eza epa eburu, wa ote na moke Yohana na pate wai akwilǝ ana o ezeza epa eburu.
Nangka a eze Yeso o batisma
21Malo oka Yohana wa eze aromo o batisma a pate na wa kang eza Yeso, a were e ka kaya beya ngmǝ ka Ashili, na za a shili me pǝrnu, 22na o bere orere o Ashili wa japi aza kai naa kagoma. Nane kone lengmelo ale suri aza shili na le bekaana, “Boa kena kang ang yemo, ang kone o leba o ba cak.”
Beting bo ngmenga Yeso
23A were aka Yeso ka bore ogole kai, kaye ka shenai tuuru taaro ko ngmenga. Aromo ne jeke o bekaana kai kena ka Yusupu kaye,
Yusupu kena ka Heli. 24Heli kena ka Matat,
a Matat kena ka Lawi. Lawi kena ka Malki,
a Malki kena ka Yana. Yana kena ka Yusupu,
25a Yusupu kena ka Matatiya. Matatiya kena ka Amos,
a Amos kena ka Nahum. Nahum kena ka Asele,
a Asele kena ka Najaya. 26Najaya kena ka Ma'ata,
Ma'ata kena ka Matatiya. Matatiya kena ka Shimeya,
Shimeya kena ka Yosek. Yosek kena ka Yoda,
27a Yoda kena ka Yowanan. Yowanan kena ka Reesa,
a Reesa kena ka Zerubabel. Zerubabel kena ka Sheyaltiyel,
a Sheyaltiyel kena ka Niri. 28Niri kena ka Malki, Malki kena ka Adi. Adi kena ka Kosama,
a Kosama kena ka Elmadama. Elmadama kena ka Er,
29a Er kena ka Yoshuwa. Yoshuwa kena ka Eliyeza,
Eliyeza kena ka Yorim. Yorim kena ka Matat,
Matat kena ka Lawi. 30Lawi kena ka Siman,
a Siman kena ka Yahuda. Yahuda kena ka Yusupu,
Yusupu kena ka Yonam. Yonam kena ka Eliyakim,
31Eliyakim kena ka Meleeya. Meleeya kena ka Menna,
Menna kena ka Matata. Matata kena ka Natan,
a Natan kena ka Daoda, 32a Daoda kena ka Yese,
Yese kena ka Obed, a Obed kena ka Bowaza,
Bowaza kena ka Salmon. Salmon kena ka Nashon,
33a Nashon kena ka Aminadab. Aminadab kena ka Aram,
Aram kena ka Hezron. Hezron kena ka Perez,
a Perez kena ka Yahuda, 34a Yahuda kena ka Yakub,
Yakub kena ka Ishaku. Ishaku kena ka Ibraheng,
Ibraheng kena ka Tera. Tera kena ka Nahor,
35a Nahor kena ka Serug. Serug kena ka Reyu,
a Reyu kena ka Peleg, Peleg kena ka Eber,
Eber kena ka Shela, 36a Shela kena ka Kenan,
Kenan kena ka Arpakshad. Arpakshad kena ka Shem,
a Shem kena ka Nuhu. Nuhu kena ka Lamek,
37Lamek kena ka Metusela. Metusela kena ka Enok,
a Enok kena ka Yared. Yared kena ka Mahalalel,
Mahalalel kena ka Kenan, 38a Kenan kena ka Enosh,
Enosh kena ka Set. Set kena ka Adamu,
a Adamu kena ka Ashili.
Pilihan Saat Ini:
Luka 3: XSN
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
©️2022 Luke Initiative for Scripture Translation
