maṯa 4

asa 4

ḏɩdeijo ḏeḏi yeau kiḏɩwer

mks. 1:12-13, lk. 4:1-13

1na yecu gwuloḏəṯɩni kiḏɩwer gwuɽɩwə gwe naṯi iblis iḏeije. 2gwune numəṯo əbuṯo ŋwamon ḏuɽi kwoɽo anyine na gigili na jaŋu e, 3na gwiji wila lugwun gwe ḏɩḏeijo nueicɩno, ḏa ŋamaro ŋaɽe ŋeḏi elo, eico nyɩdolia nyeno no almɩdini gia. 4nuwɩrlijo ŋuɽuna nueicɩno, ŋulinu, gia gədu getɩdo gaṯɩmiḏi gwiji no, namɩni ŋuɽun wei ŋun ŋaṯɩduḏo gi linyu leḏi elo.

5na iblis gwuloḏa kamɩrɩgen yun yɩpiḏo pɽul. nuḏuḏɩneji ga gi lɽa elo leḏi dunu gweḏi elo gwun gwubuḏo, 6nueicɩno, ḏa ŋamaro ŋaɽe ŋeḏi elo, ŋidinɩjo aŋɩna yuŋa ganu kwɩnyəm; gi gwune ŋulinu:

ŋu gwəḏəḏə liji luŋun leḏi kanyin ŋuɽuna ŋan ŋa

na luŋa laŋape di de dagin

kani ate ŋaŋa gɩdol obe lara no.

7na yecu eicɩno, ŋulinu mɩna, aṯaŋiḏeijo gwelɩnya gwun gwiro elo gwuŋa no.

8na iblis gwuloḏa mɩna gi lɩrgwom elo lun lolelo gworki, nuəŋijo ŋelɩnya wei ŋeḏi gɩḏilio na ḏɩbona ḏagin; 9nueicɩno, nyi gwaŋəḏəḏə ŋɩdio ŋeno wei ḏa ŋəmɩculɩjo ga ŋwurko ŋwe ŋwiorṯeḏa. 10na yecu eicɩno, abɩro lugwi, seiṯan; gi gwune ŋulinu, ŋa gworṯeḏa gwelɩnya gwun gwiro elo gwuŋa, na ŋəpɩjo ŋɩru gwetɩdo. 11nan iblis walane, na liji leḏi kanyin wila naləpijo ŋɩru.

yecu gwijiga kabranaum kamɩrigen yeḏi jalil

12gwune na yecu diŋɩni yuwana malgwuloḏa kɩrkon nuwele jalil. 13nuwalane nasɩra nuwila nujiga kabranaum gwun gwijo gɩṯo gi ḏɩrawe gi diɽil deḏi sabalun na nabaṯalim, 14kani nalṯɩmi ŋuɽuna ŋun ŋarɩŋe isaia gwun gwiro nebi, 15ŋarno,

na amɩrɩgen yeḏi sabalun na amɩrɩgen yeḏi nabaṯalim

gi ṯaṯ ḏe ḏɩrawe, gi ḏuɽo ganu ḏeḏi ḏɩrawe ḏun ḏan urdun,

jalil gweḏi liji leḏi jɩmɩrɩgen wei,

16na lijo lun liji kirɩm

nalaŋu bure gwubuḏo

na lun lijo kamɩrɩgen na gɩḏiḏɩŋil ge ḏaiya

na bure oɽe ga lagin.

yecu madiɽo ŋɩru ŋeḏi uməḏɩjo liji ŋuɽuna ŋeḏi elo

mks. 1:14-15, lk. 4:14-15

17na uro kaja kono na yecu uməḏɩjo liji nuleicɩno, wɩrlal galo ŋuɽun ŋalo ŋun ŋɩki na ŋele ŋeḏi kanyin ŋo gɩṯo.

ŋu gwəmɩḏo calɩmis juŋun jun jeḏi gwerre

mks. 1:16-20, lk. 5:1-11

18na kaja gun giwiḏige yecu kɩməmu geḏi ḏɩrawe ḏeḏi jalil nuaŋu lɩmegin lɩttən, simian gwun gwan buṯrus na anḏarawus gwun gwiro megin, ligelo car jeḏi ŋwumi ŋau ganu na ŋɩru ŋagin ŋiro ŋe ḏuma ŋwumi. 19nuleicɩno, wilal nyilgwujane, namɩni nyi gwajiduji liji lun laṯumə liji. 20nalwalane gi car nalgwujane. 21gwune nuwele ŋɩnəwei nuaŋu lɩmegin liro kaja lɩttən, yagub gwun gwiro ŋaɽe ŋeḏi jebəḏi na yuwana gwun gwiro megin, lijo kwu murkab ganu luŋa jebəḏiŋale gwun gwiro baba gwagin lukɩɽo car jagin jeḏi ŋwumi, nuləmɩḏe 22nalwalane kwu murkab na baba gwagin nalgwujane.

ŋu gwapo ŋɩru nuŋbabɩje gala jalil

lk. 6:17-19

23na yecu gwaṯɩwewele jalil wei nualɩmiḏe gi lɩdunu leḏi elo lagin, naṯuluməḏɩjo ŋuɽuna ŋun ŋiŋir ŋeḏi ŋele ŋeḏi elo, naṯulgele wei muma lun leḏeḏo nanu ŋɩɽainy ŋun ŋiro kajakaja. 24na ŋuɽun wɩreḏelo coucou ŋan ŋu gi jɩmɩrɩgen wei jeḏi suriya, nal liji gwuluḏɩjo liji wei lun ləṯi ŋɩɽainy ŋiro kajakaja, na lun ləṯi ḏiŋeroma na lun liro jɩɽilo na lun limɩde ganu mɩḏeḏ, nulgele muma. 25na liji lutu nalgwujane leḏi jalil, na leḏi kalo gun gaṯileico jɩmɩrɩgen jun jiro di, na leḏi urucəlim, na leḏi yauḏia na lun laṯɩje gi ḏuɽo ganu ḏeḏi ḏɩrawe ḏun ḏan urdun.

Pilihan Saat Ini:

maṯa 4: OTR1966

Sorotan

Berbagi

Salin