Matayo 9

Yesu ugumuforya munya ighandi

(Mrk 2:1-12; Luk 5:17-26)

1Yesu aganatëa masua, aganankëa irambo na agafika umuji wakwe. 2Faafo antu vëgamwetea muntu umwe naa mwëërë ukure ighandi, ureechiwe gunto a gëtanda. Yesu nënaa wawoona uhuvëi wawe, agamwëëra muntu wasuu nënaa ukure ighandi, “Khomya nkhoo mwananë! Warekewaa mahutuye ako.” 3Mukhatë a aandëki va seria vëgaandya usëghanëya, “Muntu uyuu ugumujuma Muungu!” 4Yesu agamanya masëgho awe, agahanya, “Gusokokë mughema në mabë munkhoo yanyu? 5Uu rëëfe në ryoro nanguu uhanya, ‘Warekewa mahutye ako,’ namba uhanya, ‘Imëka, weendeende?’ 6Uvii, ngufenja mumanye mwino Mwaamuntu ukweti udaho wa uvarekea antu mahutye mu urëmi.” Faafo agamwëëra muntu wasuu nënaa ukure ighandi, “Wuka, hora gëtanda gako, wende ukhaako.” 7Muntu wasuu nënaa ukure ighandi agawuka, agenda ukhaakwe. 8Antu voong'e mu wirundo wasuu nënaa voona asaa vëgataka na ghooghofa, vëgamukürya Muungu nëwaafee antu udaho në mwino wasuu.

Matayo ugutaanwa

(Mrk 2:13-17; Luk 5:27-32)

9Yesu agahegha faafo, na nënaa ugutunguya agamwoona muntu umwe ugutaanwaa Matayo wikhee mu nyumba a ukhomboisya kooti. Uvii, Yesu agamukhanëa, “Ng'onga.” Matayo noo agavuka, agamuhonga.

10Yesu nënaa wëëmunyumba wikhee ugula malëwa anya ukhomboisya kooti vingë naanyamahutye vëgaja vëgikhaa itambëëmwe na mweeso nanë asëywi vakwe. 11Afarisayo nënaa voona asaa, vëgavëëra asëywi vakwe, “Asikë musëyi wanyu ugula itambëëmwe na anya ukhomboisya kooti nanë anya mahutye?” 12Yesu nënaa wategheeya agahanya, “Nëvëumufenja mughanga uu në vasaa në vërue ti në afanga. 13Uvii, mwisëye riana ra nkhani iyii: ‘Inoneye goonewa uvavi, na ti makumbëko?’ Ntinajaa uvataana antu nëaja, ëgweeso anya mahutye.”

Ihanyo ra ufunga

(Mrk 2:18-22; Luk 5:33-39)

14Asëywi vamwa Yohana Mubadisi vëgamwendea Yesu, vëuhanya, “See na Afarisayo nguufungaa mëhënjo mingë, asikë asëywi vako vëtiufungaa?” 15Yesu agavasucha, “Wurë, nëvëreekiwe guuvire vëudaha uhongeeya itungo në mukumwëëma wëë itambëëmwe inaaawena? Ti uvii! Ëgweeso itungo rëufika në mukumwëëma ujie uheywa kunë veeso, itungo rasëë faafo uuvëjieufunga. 16Antu vëtiutendeaa ntaho a isaa nëifya mu isaa nërakhee. Gusoko ntaho asëë ëuhafuanga isaa rasëë në rakhee, na faafo fana naa guhafukie guuhafukëëra. 17Na mbesa antu vëtiuvëkaa divai nëmpya muvihongoo në vyakhee. Nëvatenda uvii, vihongoo viutamüka na divai ëguhunuka, vihongoo noo viuruvëka. Ti uvii, ëgweeso, antu vëuvëkaa divai nëmpya muvihongoo në vifya, na vyong'e vivëë, vihongoo nanë divai viughondanëëywa vija.”

Muncha wamwa müküü umwe nanë mukhema umwe vëuforiwa

(Mrk 5:21-43; Luk 8:40-56)

18Yesu nënaa ugurëghëtya asaa müküü umwe Muyahudi agafika agamwinamëa na uhanya, “Munchaanë wakuyaa itungwee rëërë. Gweeso, nguguromba njuu umutendeye mukhono wako mweesonoo ugutenda mufanga.” 19Yesu agatunguya itambëëmwe na asëywi vakwe, agamuhonga. 20Mukhema umwe murue ugukëngaa saghami gwa mëakha ikumi na ëvëë agamuhonga Yesu unyuma, agatenia ëfëndo ra isaa rakwe.

21Agatenda uvii, gusoko agasëghanëya munkhoo: “Nënatenia gutufu isaa rakwe, ngufora.” 22Uvii, Yesu agikengeeya agamwoona, agamwëëra, “Muncha, khomya nkhoo! Uhuvëi wako waguforyaa.” Mukhema wasuu agafora itungo ërëëro ërëëro. 23Faafo Yesu agingëa ukhaya amwa müküü wasuu. Na nënaa wavoona akhuva filimbë mwirundo na wina yaghagha, 24agahanya, “Heghi afaa! Mung'inya agëkhema uyuu inakuya, uree gutufu.” Veesonoo vëgamuheka. 25Uvii, misanga a antu nënaa aheywa, Yesu agingea ukhatë, agamukwata muncha wasuu mukhono mweesonoo agimëka. 26Sayu ësëë ëgamanyika ino mung'e ësëë oong'e.

Afoku vavë vëuforiwa

27Yesu agahegha faafo na nënaa utungwiiye afoku vavëë vëgamuhonga vëkuriye mukindo, “Mwana amwa Daudi, goonëe uvavi!” 28Yesu nënaa wingëa ukhaya afoku vavëë vasaa vëgamuhanga, mweesonoo agavawëëya, “Wurë, muhuvëe mwino ngudaha utenda intu rësëëna?” Veesonoo vëgamusucha, “Nhaa, Müküü.” 29Faafo Yesu agatenia miho awe, agahanya, “Na ëtendeke uvii kunë nyee mwino muhuvëe.” 30Miho awe ëgarangua. Yesu noo agavëëra gwa ukharë: “Mutamukhanëe muntu mbanduvë intu ërëë.” 31Ëgweeso veeso vëgatunguya vëgatanantya sayu wamwa Yesu mung'ë ësëë oong'e.

Yesu ugumuforya munya gëmumu

32Antu nënaa vëtungwiye kunë vinjë, vangëja vëgamweetea Yesu muntu umwe nënaa munyagëmumu wa gënyonyinyonyi. 33Muu gënyafaafo gutufu nënaa gënyonyinyonyi gasëë gadëëywa muntu wasuu nënaa wina gëmumu agandya urëghëtya kangë. Antu vëgataka go na uhanya, “Intu në mwino ërëë rinadwëëraa mbanduvë mu Isiraeli!” 34Ëgweeso Afarisayo vëgahanya, “Uguviduya vinyonyinyonyi gwa nguu ya müküü wa vinyonyinyonyi në vibë.”

Yesu uguvoonea antu uvavi

35Yesu agafika u miji oong'e na vijiji, agasëya mumasinagogi awe ugutanantya Sayu Njija a Utemi wa Muungu na uforya marue oong'e na muugëlegheka hiya hiya. 36Uvii, nënaa wavoona antu, mirundo gwa mirundo, agavoonea uvavi gusoko naa vakhataa na naa vabughe vatendeka mwino nkhoo në itina mudëmi. 37Faafo agavëëra asëywi vakwe, “Mbëësya nyingë, ëgweeso anya utënanga akeevuu. 38Uvii, murombi Munya muunda atumë anya utënanga mu muunda wakwe.”

Pilihan Saat Ini:

Matayo 9: RIMRC

Sorotan

Berbagi

Salin