Matayo 7
7
Uvaramwëya vangëja
(Luk 6:37-38, 41-42)
1“Mutavaramwëyee vangëja mutajee uramwëywa nyeenoo. 2Gusoko mwino muuvaramwëya vangëja uu uvii nyee mujie uramwëywa, na ngeero ëyëëyo ëyëëyo nëmuuvagheera vangëja ësëë unë Muungu ujie umugheera nyeeno. 3Sokokë nëugugoona gafaara nëgëë muriho ra muunako, na muufafo utirëgune ifaja nërë muuriho rako? 4Ugudaha wurë umwëëra muunako, ‘Mbuyanë, ika nëguhegheye ifaara muriho rako,’ muufafo veve mughonjo ukweti ifaja muriho rako? 5Munyalakuno vee! Heya tanju ifaja nërëë muriho rako na faafo ugudaha goona vija na udaha ugaheya gafaara nëgë muriho ra muunako. 6Mutayifee mbwa mantu në meru itajee gifëëntukëya na umuhafuanga nyee, kangënoo mutayighumëee nguuma lulu yanyu itajee uyifanangëa.”
Romba, fenja, fëndua
(Luk 11:9-13)
7“Rombi, nyeenoo muufewa, fenji, nyeenoo muuhanga, fëndui, nyeenoo muughenyifwa. 8Nëugurombaa ugufewaa, nëugufenjaa uguhangaa, na nëugufëndua ugughenyifwaa. 9Wurë, urëfo mukhaatë anyuna në mwanaakwe wamuromba mukate ugumufa ëgwe? 10Wurë, nëwamuromba somba ugumufa njokhana? 11Nësa uvii, mbesa nyee në mweavëë mumanyie uvafa vana vanyu mantu nëmaja, tutë tuutë Tata wanyu wa girunde ugutenda nanguu; uguvafa nëmaja vasaa nëvëumurombaa. 12Vatendei vangëja asaa nëmuuyafenja veeso vëmutendëe nyee. Ërëë unë riana ra seria amwa Musa na masëyo aa anyagëdaghu.
Gënyamwango nëgënyuughu
(Luk 13:24)
13“Ingëi gwa ukëëra gënyamwaango nëgëfinye. Gusoko njëa nëinjë guuyaghao unë ngarë, na gënyamwaango gagingëërëa kuuko unë gëgharë, nëvëukëërëe munjia ësëë unë vingë. 14Ëgweeso njëa nëëgwëndaa guufanga unë mënye, na gënyamwaango gagingëërëa kuuko unë gëfinye antu akeevuu nëvëudaha umëmanya njëa ësëë.
Mutë ugumanyëkaa gwa nkhari yakwe
(Luk 6:43-44)
15“Ighoji na anyagëdaghu va weegheeghe. Vasaa vëujaa kunë nyee vërye masaa ankhoo gwa gunji, gweesogwayo gwa ukhatë unë mbughi nënkharë. 16Muuvamanya gwa ntendo yawe. Wurë, antu vëukhaa sabibu mu mëtë a maghuyana, namba tini mu mbëghëëna? Tiuvuu! 17Uvii, mutë në uja uguduyaa nkhari në njija na mutë në ubë uguduyaa nkhari mbë. 18Mutë në uja utiudaha uduya nkhari në mbë na ëgweeso gwayo mutë në ubë utiudaha uduya nkhari në njija. 19Mu mutë nëutiuduyaa ukhari në njija ugutemwa na ughumëwa mumoto. 20Uvii, muuvamanya gwa ntendo yawe.
Ntimumanyie nyee
(Luk 13:25-27)
21“Ti muu muntu nëugumbwëëraa, ‘Müküü, Müküü,’ ugingëa mu Utemi wa girunde, ëgweeso wasuu gutufu nëuguyatendaa mafenji amwa Tata wanë në wëë girunde. 22Vingë vëjieumbwëëra itiku rasëë ra iramuëywa: ‘Müküü, Müküü! Gwa rina rako gugatanantya ukhani wako, na gwa rina rako gugaviduya vinyonyinyonyi na utenda matako mingë.’ 23Faafo nene nëjeumwëëra: ‘Naa ntimumanye nyee mbanduvë, heghi usonge anë nyee anyautenda në mabë.’
Anyaujenga Vamakhako Avëë
(Luk 6:47-49)
24“Uvii, muu muntu nëuguyitegheeya nkhani yanë na uyikwatëëra, ugikhoriwa na muntu nëwina mahaa, nëagajenga nyumba akwe gunto a italaghwe. 25Mbura ëgakhuva, mayongo ëgijua guunto. Mpefo ëgakunkaa gwa nguu na umëkunkëa nyumba ësëë, inagwaa gusoko naa ëjëngiwe gunto a italaghwe. 26Na muu muntu nëuguyitegheeya nkhani iyii na udëa uyikwatëëra, ugikhoriwa na muntu mufütu nëagajenga nyumba akwe gunto a mahangahanga. 27Mbura ëgakhuva, mayongo ëgijua ukyëanëya mpefo anguu ëgakunka na umëkhuva nyumba ësëë, nyeesonoo ëgagwa, kangënoo gwa khuu nënkuu.”
Udaho wamwa Yesu
28Yesu nënaa wadaha urëghëtya nkhani yasëë, mwirundo wa antu ugatachwa na masëyo akwe. 29Naa ti mwino asëyi vawe va Seria, ëgweeso agasëya gwa udaho.
Pilihan Saat Ini:
Matayo 7: RIMRC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Kirimi New Testament © Bible Society of Tanzania, 2008.
