Matəw 4
4
Debere kwaʼara Yeso
1 #
Hib 2.18; 4.15 Amaʼazənə igəg wu si inayn maray, Azugə zayn zayn aghəy kwi Yeso ŋuw ungɨŋ imbayn zomo da Debere kwaʼara uŋwen. 2Yeso chomo awu injəy ingom nə afəb uney ighumi kyugə. Amaʼazənə uney wu si chigə, injəy ti ni zaŋa uŋwən. 3Anigə Debere ŋu ghayn abú uŋwən kwi, “Ngwə bə mə Ŋwə̂ Nwiye, ghayn atəy zəŋ beŋe akə ingəŋ.”
4Yeso ywiri abú uŋwən kwi, “A yə ungɨŋ Aŋwaʼanayn Nwiye kwi, cha wa mə chomo ma ikay aba da ingəŋ. U yə chomo ikay da inayn ujum tənə Nwiye mə ghayn.”
5Amaʼazənə yə ghayn nigə, Debere wu num uŋwən u ŋu asin zayn zayn#4.5 Asin zayn zayn wu mə Yerusanem. Yə́ pey awu ghəy ukoʼ itəm idəm imbəŋ Nwiye. 6Anigə ighayn abú uŋwən kwi, “Ngwə bə mə Ŋwə̂ Nwiye, təm ndwen asey damugə ayi ungɨŋ Aŋwaʼanayn Nwiye kwi, Nwiye yi ghayn abú mbə́ angəd ma kwi u biya ayə. Umbi yimi ayə nə ubugə ma kwi kaba injə aghəw cha ami bira ma itəy.”
7Yeso ywiri abú uŋwen kwi, “ayə nibə ungɨŋ Aŋwaʼanayn Nwiye kwi, izweʼe ayə ungwə Asɨyisəg Nwiye.”
8Debere wu agha num uŋwən ukoʼ ŋu igun ugum asá moʼ. Yə́ pey yi tey ubey ujum mbənə umə ungɨŋ isəg abú uŋwən nibi itey imbon ujum zənə imə ungɨŋ ubey wu. 9Amaʼazənə yə́ tey nigə yə ghayn abú uŋwən kwi, “Ayi naʼ ughəy mbəŋ ujum inigə ighara ngwə bə guni ayə asey wumine aŋu.”
10Yeso wyiri abú uŋwən kwi, “Noʼo ayə inyi iyad, Satan. Ayə ungɨŋ Aŋwaʼanayn Nwiye kwi, wumini Asɨyisəg ungwə Nwiye sə faʼa aba abú uŋwən.”
11Amaʼazənə yə ghayn nigə, Debere wu sayn uŋwən, mbə angəd ŋú were uŋwən.
Yeso ti afaʼa ma á Galeli
12 #
Mat 14.3; Mak 6.17; Luk 3.19, 20 Amaʼazənə Yeso zəw kwi mbə́ si ibiya Jon ŋu zi andəŋ, yə́ noʼ iŋú á Galeli. 13#Jon 2.12Cha yə́ di pey yi chomo ma Nazared, yə chigə ŋú chomo Kapenahum iyad animini Galeli ungɨŋ aba abey Zebulun foro Naftali. 14Yə ŋú chomo awu boʼo anó zənə wa ukən Nwiye Azaya ghayn a duw akə asiʼ kwi,
15“Aba mbayn Zebulun nə aba ambayn Naftali
Nu amə anji zənə umə ŋuw ungɨŋ iba anjin ugwi Jodan,
Galeli mə asin zənə ba mbənə akaʼa ma ba Jû mə chomo awu,
16Ba mbənə umə chomo asin imbiri
Umbi zən uzayn zayn kyayn.
Uzayn zayn yi bigə igun ba mbənə umə chomo ungɨŋ usin mbənə u mə ŋu
Ku awu nu cha u kyay uma Nwiye.”
17 #
Mat 3.2
Inoʼ akə maʼa wu, Yeso ti ni ghayn inayn Nwiye kwi, “Mbən beŋe fiŋ iwaʼ unó iboŋ damugə anó ufon azobo si tinə.”
Yeso tiya mbə məŋə-anó imbey ma
18Umugə Yeso mə yeŋ iyad animini Galeli, yə zən unya anóm ubigə nu u mə ibiya su. Mbə́ mə́ maʼa umbujaŋ ungɨŋ animini wu. Ukum u feyn mə Sayimon nu mbə́ mə́ nibə tiya akə Pita. Ukum unya anóm ma mə Andrew. 19Amaʼazənə Yeso zən úŋwən nigə, yə ghayn abú úŋwən kwi, “Mbən zaʼa aboʼo inyi. Ayi aghəy mbən sə aghəy kwi ba zaʼa aboʼo inyi.” 20Aba ighara wu, mbə́ noʼ isayn umbujaŋ uma iŋu aboʼo Yeso.
21Yeso yeŋ ŋú imbey kere, pey yi zən anóm u chini ubigə. Amə́ Jems ŋwə̂ Zebedi nə Jon unya anóm ma. Mbə́ mə́ ungɨŋ abaŋ ugwi nə mbaʼ uma Zebedi sə tana umbujaŋ uma. Yeso nibi tiya úŋwən. 22Aba ighara wu, mbə́ noʼ sayn abaŋ ugwi wu nibi sayn mbaʼ uma iŋuw aboʼo Yeso.
Yeso mə itey unó, ghayn inayn Nwiye nibə aghəy ba boro
23 #
Mat 9.35; Mak 1.39 Yeso mə yeŋ ungɨŋ Galeli ujum. Yə́ mə́ yeŋ yə tey unó ungɨŋ na bumi ba Jû tənə tə́ mə́ ungɨŋ asin wu. Yə́ mə́ nibi yeŋ yə́ ghayn ukən uchuŋ da anó ufon azobo. Yə́ mə́ yeŋ nibə yə zwey ba akə ikudi inyo ujum foro ikudi isɨgə ujum. 24Umugə yə́ mə́ aghəy nigə, Ukən da uŋwən saŋa ungɨŋ Siriya ujum. Anigə ba num ba isɨgə ujum ŋú abú uŋwən. Ba isɨgə awu amə u mbənə, mbənə uzugə iboŋ ma ungɨŋ inyo ma, u mbənə umə gow afiri foro mbənə mbə́ aba inyo ma feyn si ku. Anigə yə́ zwey úŋwən uma ujum. 25Yə ghəy kwi akama ba noʼo Galeli, noʼo Dekapolis noʼo Yerusanem, noʼo Judeya nibi noʼo ungɨŋ usin mbənə umə anjin ugwi Jodan ŋu aboʼo uŋwən.
Pilihan Saat Ini:
Matəw 4: NGI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023 CABTAL
