Jon 2
2
Yeso beŋe une akə unoʼ
1amaʼazənə uney ubigə chigə, mbə kaʼa inama moʼ Kana aba abey Galeli ingo Yeso mə́ awu. 2Mbə́ nibi kaʼa Yeso ni mbə́ mbəŋə anó ma akə inama wu. 3Amaʼazənə unoʼ mey ingo mbi Yeso ghayn abú uŋwən kwi, “Unoʼ si mey.”
4Yeso ghayn abú uŋwən kwi, “Ayey, á sí mə iney aŋu akə ngiya? Cha inyi amaʼ ighəy anó moʼ di si kəʼə ma.”
5Amaʼazənə yə́ ghayn nigə, ingo ma ghayn abú ba mbənə mbə́ mə́ cha inama wu kwi, “Mbən aghəy anó zənə Yeso mi ghayn. Inen.”
6Ba Jû mə ni unoʼo i səw inyo ni u aghəy ighari umə kaba iwumini Nwiye akə inji zənə i kəʼərə. Da anó zəŋ, akyɨŋ ifəw moʼ mə awu á təmə nu mbə tana akə atey. Ikɨŋ feyn mə kwey akə inji zənə amə aghəy u zi une awu ungɨŋ iti akə ighumi ifeyn ŋu pey akə ukɨ lita. 7Yeso ghayn abú ba wu kwi, “Mbən swey akyɨŋ zəŋ akə une.” Mbə́ swey une u koʼ pey uchəw. 8Amaʼazənə mbə aghəy nigə, yə́ ghayn abú uŋwən kwi, “Mbən komo umoʼ ŋu naʼ abú wa kyayn ŋunə umə cha inama zəŋ.” Mbə kom ŋu naʼ. 9Amaʼazənə yə zweʼe une wu nu usi beŋe akə unoʼ, cha yə kyay ma asin zənə unoʼ mbəŋ noʼo akuŋ. (Aba ba faʼa mbənə mbə komo une wu mbə kyay). Anigə yə tiya unom ugən, 10ighayn abú uŋwən kwi, “Ba jum mbə dey cha unoʼ chuŋ abú ba. Amaʼazənə ba si nugə ikod, u si naʼa u mbənə cha umə tana iboŋo. Ngwə si num unoʼ chuŋ sə naʼa amə akinine?”
11Yeso aghəy ayere anó imbey zəŋ a Kana aba abey Galeli. Yə tey iwumini zənə imə abú uŋwən. Anigə mbə məŋə-anó ma beni kwi uŋwən mə wa ŋunə Nwiye zoʼo. 12#Mat 4.13Amaʼazənə anó zəŋ si chigə, Yeso, ingo ma, unya anóm ma nə mbə məŋə-anó ma swiʼi ŋuw Kapenahom pey yi chomo awu akə unəy moʼ.
Yeso fuw ba iyuŋ ungɨŋ imbəŋ Nwiye
(Mat 21.12-13; Mak 11.15-17; Luk 19.45-46)
13Amaʼ mə sə ŋu koʼ nu ba Jû mi jəg ufere izaʼara chigə igun. Anigə Yeso koʼ iŋu a Yerusanem. 14Yə pey asama imbəŋ Nwiye yi zən ba nu umə fənə ipoŋ uma, fənə injəg, nibə fənə ubuŋ. Yə nibi zən ba nu umə koboro ukab nu uchomo igun ugayi uma. 15Anigə yə num uniʼ itana igwayn awu ni fuw injəʼ wu nə ipoŋ wu ungɨŋ isama imbəŋ Nwiye. Yə gha ugayi ba mbənə mbə́ mə́ koboro ukab anigə isaʼa ukab wu. 16Yə ghayn abú ba mbənə mbə́ mə́ fənə ubuŋ kwi, “Mbən num ubuŋ mbəŋ idu akəŋ. Mbən beŋe na uŋu mbaʼ akə na iyuŋ!” 17Mbə məŋə-anó ma kono kwi ayə ungɨŋ aŋwaʼanayn Nwiye kwi, “Inji zənə azi atəw akə injə na, uŋu Nwiye, ayi aghəy kwi ba zwere aŋu.”
18Amaʼazənə yə aghəy nigə, ba kyayn ungɨŋ abey ba Jû biri abú uŋwən kwi, “Ayere anó zənə ngwə mi ighəy itey ina kwi ngwə yə nə ikay ighəy anó zəŋ amə ingiya?”
19 #
Mat 26.61; 27.40; Mak 14.58; 15.29 Yeso ywiri abú úŋwən kwi, “Mbən saʼa imbəŋ Nwiye zəŋ, ayi num unəy uta igha chim.”
20Ba kyayn ungɨŋ abey ba Jû biri abú uŋwən kwi, “Mba num atuʼ ighumi kugə cho ifəw imara imbəŋ Nwiye zəŋ, anigə ngwə mi num unəy uta ichim?”
21Asɨmə, imbəŋ Nwiye zənə Yeso mə ghayn amə nyə̂ inyo ma. 22Amaʼazənə Nwiye zəmə uŋwən, mbə məŋə-anó ma gha kono kwi yə ghayn anó zəŋ anigə mbə́ beni anó zənə amə ungɨŋ aŋwaʼanayn Nwiye nibi beni inayn zənə Yeso nibi ghayn.
23Amaʼazənə Yeso mə́ Yerusanem, akə amaʼazənə mbə́ mə́ jəgə Ufere izaʼara chigə igun, ba nanaʼ beni uŋwən damugə mbə́ zən uyere unó mbənə yə́ mə́ ighəy. 24Asɨmə cha Yeso zi ma fiŋ igun uma damugə yə́ kyay úŋwən uma jum. 25Amə́ cha aton abú wa moʼ igha ghayn anó da úŋwən abú Yeso damugə uŋwən si kyay unó mbənə umə ungɨŋ fiŋ uma.
Pilihan Saat Ini:
Jon 2: NGI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023 CABTAL
