Jon 17
17
Yeso chaʼara Nwiye abú mbə məŋə-anó ma foro abú inyo ma
1Amaʼazənə Yeso si ghayn unó mbəŋ, yə́ ney azobo ighayn kwi, “Uŋu Mbaʼ amaʼ si koʼ. Wumini ungwə Ŋwə̂ boʼo ŋwə̂ nibi iwumini ayə. 2Ngwə si naʼ ikay abú uŋwən kwi u tumə ba jum ungɨŋ isəg boʼo u naʼa itəni nu cha imi noʼo imey abú ba mbənə ngwə naʼa abú uŋwən. 3Itəni nu cha imi noʼo mey amə kwi ba kyay ayə, ngwə mə aba feyn yugə nu ngwə mə Nwiye asiʼ. Itəni nu cha imi noʼo mey amə nibə ikyay Yeso Kristo ŋunə ngwə tomo. 4Mə si wumini ayə igun isəg anji zənə asi mara afaʼa zənə ngwə naʼa iniŋ. 5Uŋu Mbaʼ, akinine wumini aŋu asin zənə ngwə mə akuŋ. Wumini aŋu anji zənə ngwə mə́ wumini ki ngwə sə tana isəg.”
6“Mə si aghəy kwi ba mbənə ngwə chi ungɨŋ isəg naʼ iniŋ u kyay ayə. Amə umbə ba anigə ngwə si naʼ uŋwən iniŋ. Úŋwən si aghəy anó zənə ngwə ghayn abú úŋwən. 7Akinine mbə si kyay kwi amə ngwə naʼa ughəy jum iniŋ. 8Mə si ghayn ukən ŋunə ngwə ghayn iniŋ kwi aghayn abú úŋwən. Mbə si zəw nibi kyay akə asiʼ kwi amə ngwə tomo aŋu. Mbə́ si nibi beni kwi amə ngwə tomo aŋu.”
9“Mə chaʼara ayə da úŋwən, cha adi chaʼara aŋu da isəg. Ayə chaʼara Nwiye da ba mbənə ngwə naʼa iniŋ damugə amə umbə ba. 10Ba jum mbənə umə iniŋ amə umbigə, ba jum mbənə umə umbigə amə nibə umbəŋ. Ba si chigə anjim uma iwumini aŋu. 11Akinine ayə ŋu sayn úŋwən izaʼa inigə. Asɨmə umbə bugə ungɨŋ isəg. Uŋu Mbaʼ nu Uzayn mara, nəmə úŋwən akə ikay zənə imə akə ungwə ukum, ungwə ukum ŋunə ngwə naʼa iniŋ. Nəmə úŋwən da umə akə anó feyn, numugə amə akə anó feyn nə ngwə. 12#Jon 13.18Amaʼazənə mə́ mə nə úŋwən, mə́ mə nəmə úŋwən kwi ka aghəy moʼ aghəy ma abú úŋwən. Mə́ mə aghəy nigə akə ikay zənə imə akə ngwə ukum, nu amə ukum ŋunə ngwə naʼa iniŋ. Mə́ mə nəmə nigə anigə cha wa moʼ akaʼa úŋwən nimə ma chigə akə uŋunə yə mi nim. Yə nim boʼo anó zənə uŋwaʼanayn ungɨŋ aŋwaʼanayn Nwiye duw akə asiʼ.”
13“Akinine ayə zaʼa inigə. Mə ghayn unó mbəŋ amaʼazənə amə ungɨŋ isəg boʼo iwuʼi sugi ungɨŋ fiŋ uma anji zənə isugi ungɨŋ inyi fiŋ. 14Mə si ghayn inji inayn abú úŋwən. Isəg yə bana úŋwən damugə cha úŋwən mə uma ba ungɨŋ isəg anji zənə cha amə nibə aŋu wa ungɨŋ isəg. 15Cha amə ghayn aŋu kwi ngwə chi úŋwən ungɨŋ isəg. Ayə ghayn amə kwi, ngwə kən úŋwən abú Wa Iboŋ. 16Cha úŋwən mə ba ungɨŋ isəg aba anji zənə cha amə aŋu wa ungɨŋ isəg. 17Ghəy u naʼa inyo ma inigə anjim mugə u kyay asiʼ. Wa ŋunə u kyay injə inayn amə kwi yə si kyay asiʼ. 18Anji zənə ngwə tom aŋu ungɨŋ isəg, amə nigə a nibi tom úŋwən ungɨŋ isəg. 19Mə si naʼa inyi inyo inigə da úŋwən boʼo u nibi naʼa inyo ma inigə anjim inayn zənə amə inayn asiʼ.”
20“Cha amə chaʼara aŋu ayə aba da úŋwən, ayə nibə chaʼara abú ba mbənə u beni aŋu anjim inayn zənə mbə məŋə-anó ghayn abú úŋwən. 21Ayə chaʼara ayə kwi úŋwən uma jum mə akə anó feyn. Uŋu Mbaʼ, ayə chaʼara kwi úŋwən mə akə anó feyn nə umba, aba akə nji zənə ngwə mə akə anó feyn nə umugə, ayə nibə akə anó feyn nə úŋwən. Amə́ nigə boʼo isəg jum mi beni kwi amə ngwə tomo aŋu. 22Mə si nibi wumini úŋwən anji zənə ngwə mə wumine aŋu, boʼo umi mə akə anó feyn numugə umugə nə ngwe mba mə akə anó feyn. 23Ayə akə anó feyn nə úŋwən, ngwə yə nibə akə anó feyn nə umugə. Aboʼo úŋwən uma jum mi mə akə anó feyn. Mba bə aghəy nigə, isəg yi kyay kwi amə ngwə tomo aŋu foro kwi ngwə wuʼe úŋwən anji zənə ngwə wuʼe aŋu.”
24“Uŋu Mbaʼ, ayə kaba kwi úŋwən mbənə ngwə naʼa iniŋ mə nə umugə asin zənə amə awu, boʼo u zən umugə ngwə wumine aŋu damugə ngwə́ wuʼi aŋu ki sə tana isəg. 25Mbaʼ ŋunə umə aghəy unó mbənə ukoʼoro, cha isəg di kyay ma ayə, asɨmə mə kyay ayə. Ba mbənə ngwə naʼa iniŋ kyay kwi amə ngwə tomo aŋu. 26Mə aghəy kwi úŋwən kyay ayə. Ayi ŋu imbey imə aghəy kwi u tana kyay ayə boʼo iwuʼ zənə imə inigə da aŋu, imi mə abú úŋwən da ami amə nə úŋwən.”
Pilihan Saat Ini:
Jon 17: NGI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023 CABTAL
