Mata 2
2
Medek ta ndah masəna ma da yaŋ menjewzle hay ka ta wuzaɗ Yesu
1Yesu sə, e hey dapa berne te Betəlehem dapa vavara te Zudey dapa masa Herawt aŋga bay. Mawala masa ndah masəna ma da yaŋ menjewzle hay ece dek jaka bəlam kad pe berne te Zeruzelem. 2Ac ka nəkaw, gege: «Bay te Zuwef hay masa e heyek təlam nesey sə, aŋga fəla? Andə ka wala bat tata e təhek jaka bəlam, andə de dek ka ta hahəmiya.» 3Masa bay Herawt a cəna labara ana nesey sə, ka bəzlawan rav mabay va ndah de Zeruzelem fakwanay ara aŋga ana. 4Herawt ke zelekec mazlakava hay ta ndaakwas hay va ndah mesesərekecen ma majawa kad ndana hay, e nəkefec slam masa Kəristi e te hey dapa. 5Aca gwaɗa, gege: «E te hey dapa berne te Betəlehem dapa vavara te Zudey, afa nda mehwedek ma ka vindaw da yaŋ ana zleezle, gege: 6“Kaa Betəlehem, vavara ta Zuda, ke wuje deveŋ wunam hay mazlakava ta vavara ta Zuda sə, aabay, afa bay masa e te pefec ndey ndah taaɗaw Isreyel sə, e te təhek dapa.”» 7Ara nesey, Herawt ke zelec ndah masəna ma da yaŋ menjewzle hay sə, ava makar, ke nəkefec pas masa bat ana e təhekey. 8Ke zlərdec kad Betəlehem, gege: «Madaɗay, ma ta nək ma da yaŋ wat ana eve leŋgesl eve leŋgesl. Daha akwar ka ta ŋgata avəda sə, akwa ra vehekey ŋguzdawa, ye re dey ka ta hahəmiya may.» 9Ava dəɓa ta macəna ma ta bay ana nesey, ec ke deceŋ. Bat masa e təhek jaka bəlam sə, e dey fəma teceŋ kasl pa slam masa wat gwendez aŋga dapa sə, deŋ! E zlec a yaŋ ana. 10Masa aca wala bat sə, ece wesl macəkuma bay. 11Mesehw tec a way ana, aca ŋgatafa wat gwendez va mamaŋ Maaray, ece kekəredey, aca hahəm wat ana. Ava dəɓa ana, aca pəla bakatar tec hay, aca vana jene hay taambəla ara: Gənaɓ, təbekw hay va menjev mezel mir#2.11 mir Mir sə, təbekw te wudez masa ece ŋgə ava aŋga ara menjevey. 12Ava dəɓa ana, Zlav e kətec dapa meshweney, ece re veh jaka vara bay Herawt sabay, aca kəs cəv mekele te meveh kad pa vavara teceŋ.
Mahway te Zezef va Maaray kad Misəra
13Ava dəɓa ta madaɓa teceŋ, mawala maskəla ta Bay Mazlakava a ŋguzdan vaw kad Zezef dapa meshweney, a gwaɗa, gege: «Zleftek, kəs wat va mamaŋ, hwaɓa kad pa vavara ta Misəra. Njah dərŋga kasl pa pas masa ya ta gwaɗakaa, afa Herawt a ta yah wat ana ke te kəɗey.» 14Zezef pərtakaɗ! E zleftek, a kəs wat va mamaŋ ta vaɗ, mahway ke te reɓey pa vavara ta Misəra ta vaɗ ana ŋgesey. 15Aŋga manjaha dərŋga dekw fa maməc ta Herawt, afa a da ŋgata ara masa Bay Mazlakava te gweɗ jaka pa ma ta nda mehwedek ma zleezle, gege: «Ye ke zelek wat aɗaw da dakata da Misəra.»
Mebezlə te wudeh mawula hay de Betəlehem
16Masa Herawt a wala ndah masəna ma da yaŋ bat ac ka fəca avəda sə, rav ka haca mabay, ka zlar ndana hay ke te bezlec wudeh mawulah fakwan masa ece hey təlam kasl fa mavay ecew de Betəlehem va dapa wunam hay masa zef eve Betəlehem ana. Pas ana ŋgesey, e cecel ava pas masa ndah masəna ma da yaŋ bat ana ta gwaɗa da yaŋ bat ana masa ac ta wala. 17Ara nesey, ke ŋgə ara masa Zeremi nda mehwedek ma ke gweɗ zleezle, gege:
18«Lalaw e cənek da Rama,
makuɗa va vara mazlakava.
Resel ta kwaɗ wudiya hay,
a wal matək rav bay,
afa ac ɓasabay.»
Mevehek da Misəra va manjah de Nezeret
19Ava dəɓa ta maməc ta Herawt sə, maskəla ta Bay Mazlakava ka ŋguzdan vaw kad Zezef dapa meshweney da Misəra. 20Ka gwaɗa, gege: «Zleftek, kəs wat va mamaŋ, vahaɗ eve eceŋ kad pa vavara te Isreyel, afa ndah mayaha wat ke te kəɗey sə, ec ke məceceŋ.» 21Zezef pərtakaɗ! E zleftek, a kəs wat va mamaŋ, e veh pa vavara te Isreyel. 22Amaa a cəna Arkilaws aŋga bay da yaŋ vavara te Zudey pa slam ta Herawt papaŋ sə, zidaw ka kəɗa te meveh kad arŋga. Zlav ka gwaɗa dapa meshweney. Ara nesey, a daɓa kad pa vavara te Gelile. 23Ke dey, ka njah dapa berne ɓa, mezel Nezeret, afa a da ŋgata ara masa ndah mehwedek ma ta Zlav te gweɗ zleezle, gege: «Ac ta zaliya, nda Nezeret ana.»
Pilihan Saat Ini:
Mata 2: CUVnt
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2022 CABTAL
