Yohánɛs 11

Yésus ag pahyɛ Lásalo

1Ŋ̀kɔɔ́kɔn wa nɛ́ Lásalo, a ŋgí tɔɔ á Betánia ŋkɔŋ á Mālía la mɔɔ́nyāŋ á mindígá Maatá. 2Nyɔ́ŋ Malía nɛ́ á ɔ́ghɛ́ɛ Nyɔ́ŋ-Ɛsáŋɛ́ ŋ̀gɔ́gɔ á libíndɛ, ɔ tɔ̄h ki nyɛ́ mikoo la voŋ vɛ́ɛ́ ví m̀mú. Á mbálɛ, mɔɔ́nyāŋ Lásalo a ŋgí kɔn. 3Elōgnyāŋ yé ɓóndīgá yú óm mut li laga lí Yésus nɛ́: «Ɛtáŋɛ, mut ɔ ŋgɔ diŋ ag kɔn.»

4Ɛnɛ́ a ámblé náŋ ɔ lagá nɛ́: «Víŋ ɔkɔn ví ŋga ól ɓé nyɛ́, la vɔ́ nɛ́ lipém lí Ɔlolómɛ̄ lí ŋga ɛ́nyéne; li kele la vɔ́ nɛ́ bí ŋga kɛ́ li tíi lí Mɔɔ́n Ɔlolómɛ̄ lipém.» 5La mbálɛ, Yésus a ŋgí diŋɛ Maatá, Malía la Lásalo. 6Tɔ náŋ kaa a ŋgí yí nɛ́ Lásalo ag kɔn, ɔ lōɛ́ sīg-pɛ alɔ́ áɓáa váŋ ápah a ɓɛ́ɛ́. 7Ámbúh náŋ, ɔ lagá ɓayége ɓɛ́ɛ́ nɛ́: «Bi timkágán á Yúdēa.» 8Ɓayége ɓɛ́ɛ́ bú lágá nyɛ́ nɛ́: «Lábi kɛ́ɛté ɓé nɛ ɓɔɔ́n bí Élōg-Yúda bí ŋgí somo wa lí ól la ŋgɔg, ndí ɔg somo sīg-pɛ li timan wóŋ é?» 9Yésus ɔ pélē ɓɔ́ nɛ́: «Ɓaá, nzámuh ɛh byɛ́ɛ́ ɓé jóom lí ŋgɛ́ŋ la ɛ́ɓáa é? Kíyáɓɛ́nɛ mut ag wɛɛ la nzámuh, a ŋgá ɓomtan ɓé ányúū nɛ́ ag ɛ́n mipúú mi nyú ŋkɔŋ-á-sí 10Ndí, kíyáɓɛ́nɛ mut ag wɛɛ la díɓe, ag ɓomtan ányúū nɛ́ mípūū mí sē ɓé.» 11Ɛnɛ́ Yésus a pɔ́t bíŋ biɓaŋgá ɔ kōndyé nɛ́: «Liwándá jáhá Lásalo lí lɛ́ lí lál, ndí ma kɛ́ mi vɛ́ɛ́ɓɛ́ nyɛ́.» 12Váŋ hɔ́ nɛ́ ɓayége ɓɛ́ɛ́ ɓá lagá nyɛ nɛ́: «Ɛtáŋɛ, kíyáɓɛ́nɛ á lɛ ja á ɔ́lɔ̄ ag kɛ li suŋɓɛ.» 13Ákaa ɛ́sɛ Yésus a ŋgí kwɛlene nyɛmb nyí Lásalo, ndí ɓayége bí ŋgí ɔ́ŋɔ nɛ́ a ŋgí pɔ́t ányúū yɛmɛ́ ɔlɔ́. 14Váŋ nɛ́ Yésus a lēglénéé hɔ́ ɓɔ́ nɛ́: «Lásalo a wú pɔ́n! 15Mag kɔnlene ɓɛ́nɛ mivag, kasig míh mɓɛ́ ɓé má wóŋ, ányúū náŋ miníg kɛ li yéɓé la ma, sɔ́án bi kɛ́nɛ́g ápah a lɛ.» 16Váŋ nɛ́ Tómas nyɔ́ a byɛ́ɛ̄ ŋgól nɛ́ m̀byáh a lága ɓáŋá ɓayége nɛ́: «Ɓɛ́hɛ ki bi kɛnɛ́g bi wú elɔŋ la Ɛtáŋɛ wahá.»

17Ɛnɛ́ Yésus a pám wóŋ, ɔ kɔ́p nɛ alɔ́ ánáa nyú lɛn káán Lásalo a jéɓɛ. 18Kasig Betánia ya ɓáglán ja la Yelúsalɛm jam-kaa kílométa ɛ́ŋháa, 19ŋgandag ɓɔ́ɔ̄n bí Élōg-Yúda bí Yúdēa yú sɔ́ li letɛ lí Mālía la Maatá nyúū ányúū nyɛmb mɔɔ́nyāŋ waɓá á páam. 20Ɛnɛ́ Maatá a ámblé nɛ Yésus a lɛ lí sɔ́, ɔ kɛ́ li ɓoman la nyɛ́. Malía nyɛ́ ɔ yéglé a tɔ́ɔ̄ á ndáá. 21Váŋ nɛ́ Maatá a lága Yésus nɛ́: «Ɛtáŋɛ, kí ɓɔŋ nɛ́ ɔ ɓɛ́ vá, kí mɔɔ́lyāŋ āh wú ɓé. 22Ndí, tɔ nyí vɔ́ŋɔ́ɔ mag yí nɛ́, tɔ yéé ɔ ŋgɔ ɓāt Ɔlolómɛ̄ ag kɛ wa yɔ́ lí tíi.» 23Yésus ɔ pélē nyɛ́ nɛ́: «Mɔɔ́nyɔ̄ŋ ag kɛ li pahye.» 24Maatá ɔ tímānɛ̄ nyɛ nɛ́: «Mag yí nɛ́ ag kɛ li pahye á ɔlɔ́ vá tiile, eceg ɓot bísɛ ɓá wú bí ŋga kɛ́ li pahye.» 25Yésus aá la nyɛ́ nɛ́: «Mi lɛ lipahye la eniŋ, nyɔ́ la nyɔ́ a ŋga yéɓé la ma, tɔ a wú ag kɛ li niŋ; 26tɔ nzáá ki a lɛ á éniŋ ndí a yéɓé la ma, m̀ɓá-mɓá a ŋga kɛ ɓé li wú. Ɓaá, ɔg yéɓé náŋ é?» 27Maatá ɔ pélē nyɛ́ nɛ́: «Ɔɔ Ɛtáŋɛ, mag yéɓe nɛ́ ɔ lɛ Nyɔ́-a-Pɔ́hlɛ, Mɔɔ́n Ɔlolómɛ̄ nyɔ́ a sɔ́ á ŋkɔŋ-á-sí» 28Múŋ á bíŋ biɓaŋgá, Maatá ɔ kɛ́ li yáŋa lí mɔ́ɔ̄nyāŋ á mindígá Mālía, ɔ sɔ̄glánɛ̄ nyɛ́ nɛ́: «Ŋ̀yéglɛ a sɔ́, ag yáŋa wa.» 29Ɛnɛ́ Mālía a ámblé náŋ, á ékūyá-kúyá, ɔ tɛ́lɛ́ ɔ kɛ́ li ɓoman la Yésus. 30Ndí, Yésus a ɓɛ́ɛ́ ŋgí lí níŋgi á ŋkɔŋ; a ɓɛ́ɛ́ á ŋgí tɛ́ɛ́ á voóm Maatá a kɔ́pléné nyɛ́. 31Eceg ɓɔɔ́n bí Élōg-Yúda bí Yúdēa ɓá bí ɓɛ́ɛ́ váŋ á ndáá elɔŋ la Malía á lí letɛ lí nyɛ́ nyuú ɓá ɛ́n nyɛ́ ag digɓan lí pám, bú ōŋ nyɛ la miɔ́ŋɔ nɛ́ ag kɛ li lee á sɔŋ. 32Ɛnɛ́ Malía a pám ápah Yésus a lɛ, ɔ ɛ́n nyɛ́, ɔ kúēlé nyɛ́ á sí mikoo, aá la nyɛ́ nɛ: «Ɛtáŋɛ, kí ɓɔŋ nɛ́ ɔ ɓɛ́ vá, ki mɔɔ́lyāŋ ah wú ɓé.» 33Ɛnɛ́ Yésus a ɛ́n Mālía la elɔŋ yɛ́ɛ́ yé ɓɔ́ɔ̄n bí Élōg-Yúda bí Yúdēa bíg lee, náŋ ɔ síiɓán nyɛ́ ŋgandag. 34Váŋ nɛ́ a ɓāt ɓɔ́ nɛ́: «Á véé maná jē nyɛ é?» Bú pélē nyɛ́ nɛ́: «Ɛtáŋɛ, sɔ́ ɛ́n!» 35La Yésus ɔ lée. 36Ɓɔɔ́n bí Élōg-Yúda bí Yúdēa bú lagá nɛ́: «Léɓyán sig kaa a ŋgí diŋɛ nyɛ́!» 37Jogo lí ɓot á elɔŋ yáɓá lú lagá nɛ́: «Nyɛ́ mut a ɓɔ̄ŋ nɛ mut-a-ndím a ɛ́nán, nɛ́ láá ah la ɓé pɛ li céŋɛ nɛ́ Lásalo ah wúág ɓé é?» 38Náŋ ɔ síiɓán sīg-pɛ Yésus la nyɛ́ ɔ kɛ́ á sɔŋ, nyí bí ɓogóó á ŋgɔg la ɓɔ́ bú lēg miníŋglé mɛ́ɛ́ la ŋgɔg etám. 39Ɔ lága nɛ: «Ɓógtánɛ nyíŋ ŋgɔg» Maatá, mɔɔ́nyāŋ á elóŋ-mut ɔ lagá Yésus nɛ́: «Ɛtáŋɛ ag nyɛɛ li num lí áɓē, alɔ́ ánáa nyú lɛn káán ɓá jé nyɛ.» 40Yésus ɔ lága nyɛ nɛ́: «Ɓaá, máh laga ɓé wa nɛ́ kíyáɓɛ́nɛ ɔ byɛ́ɛ ŋyéɓé ɔg kɛ li ɛ́n lí lípēm lí Ɔ́lolómɛ̄ é?» 41La ɓɔ́ bú ɓógtɛ́ hɔ́ ŋgɔg; Yésus ɔ ɓétɛ́ miíh á lóō ɔ lága nɛ: «Etāa, mag tíi wa mitamlan ányúū nɛ́ wa ámblé ma. 42Mag yí la mbálɛ nɛ́ ɔg ámble ma eceg sig. Ndí, ányúū jé limut la díí ma, mag pɔ́t nɛ́ ndí bí yéɓé nɛ́ wa nɛ́ wa óm ma.» 43Ɛnɛ́ a manɛ́ lí laga náŋ, ɔ pɔ́t á loó-loó nɛ́: «Á Lásalo, pám!» 44Váŋ nɛ́ Lásalo a pám mɔ la mikoo ŋkágag la bándáas la asú m̀vúlkége la mbɔ́ŋ. Yésus ɔ lagá ɓɔ nɛ́: «Kúhlán nyɛ́, miní mwahɛ́ nyɛ́ á kɛ́nɛ́g.»

Dimb lí Yésus

(Mat 26.1-5; Mlk 14.1-2; Lúk 22.1-2)

45Ŋgandag á élɔŋ yé ɓɔ́ɔ̄n bí Élōg-Yúda bí Yúdēa ɓá bí sɔ́ɔ́ lí pɔ́tɛ lí Mālía, ɛnɛ́ bí ɛ́nɛ́ɛ́ yé Yésus a ɓɔ̄ŋ, bú yéɓé la nyɛ́. 46Ndí ɓatám bú kɛ lí kɔ́p lí ɓot bí Élōg-Falísái á lí máŋlɛ lí ɓɔ́ yé Yésus a ɓɔ̄ŋ. 47Ɓakanʼyɛ ɓatíi-nsúlé la ɓot bí Falísái bú kɔ̄tán á ɔ́ku-vicɛ́ŋ-ví-bíkāāhɛ́nɛ́, la ɓɔ́ bú lagá nɛ: «Yéé ɓa nyɛ́ɛ li ɓɔŋ é? Nyɔ́ mut ag ɓɔŋ ŋgandag binanaŋga bí mam. 48Kíyáɓɛ́nɛ ɓa mwáhɛ́ nɛ́ a kóndyé lí kɛla náŋ la ɔ́sū, ɓot bísɛ bíg kɛ li yéɓé la nyɛ́. Elōg-Lóma ɛ́g kɛ́ li sɔ́ a lí kúlú lí Liɓógá jáhá Lipúán la li cɛ́hɛ lí lilóm jáhá.» 49Wa á elɔŋ yáɓá nɛ́ Kaífa, nyɔ́ a mɓɛ́ ŋ̀kanʼyɛ ǹcɛ́ŋ a ɓatíi-nsúlé múŋ á nyúŋ m̀bú ɔ lagá ɓɔ nɛ́: «Miní ŋgá sɔ́ŋtánɛ ɓé tɔ jam! 50Ɓaá, miní ŋgá ɛ́n ɓé nɛ́ náŋ a lɛ nsɛ́ŋ wáná nɛ́, mut wa nɛ́ a wú ányúū lilóm, li loo nɛ́ lilóm lísɛ líg cɛ́ é?» 51Ndí Kaífa a ŋgí pɔ́t ɓé bíŋ biɓaŋgá la nyɛ́-mɛ̄n; kasig a ɓɛ́ɛ́ ŋ̀kanʼyɛ ǹcɛ́ŋ a ɓatíi-nsúlé múŋ á nyúŋ m̀bú nɛ a pɔ́tɔ́ɔ́ náŋ á ɔ́sū ví eceg, nɛ́ ɛ́g somlɛ nɛ́ Yésus a wú ányúū lilóm lí Élōg-Yúda. 52Ah ányúū jɔ́-ntámɛ́ ɓé já, ndí á lí komanɛ lí ɓɔ́ɔ̄n bí Ɔlolómɛ̄ ɓá cámān pɛ́ɛ́ ɛsɛ̄ nɛ́ bí ɓɛ́ mut wa. 53Múŋ á víŋ ɔlɔ́ hɔ́ nɛ́ bí súghɛ́ɛ nɛ́ bíg ólhánɛ Yésus. 54Ndí á ɛ́yɛ̄ɛ̄ épah, Yésus nyɛ́ ɔ mwáhɛ́ lí ɓét ag suh á miíh mí ɓákanʼyɛ bí Élōg-Yúda. Váŋ nɛ́ a kɛ á epah ékombo yé ɛ́ lɛ́ ɓɛɓɛ la eyáŋ, á ŋkɔŋ á ŋga yáŋlɛ nɛ́ Efláim, ɔ tɔ́ɔ́ wóŋ la ɓayége ɓɛ́ɛ́.

55Á yéŋ eceg, ŋgand Páska nyí Elōg-Yúda ɛ ɓɛ́ɛ́ ɓɛɓɛ. Á nlááhɛ a nyíŋ ŋgand, ŋgandag ɓɔ́ɔ̄n bí Élōg-Yúda bí lɛ́ á míkɔŋ bú ɓét á Yélūsalɛm nɛ́ bí so miɓé máɓá. 56Bí ŋgí somo Yésus múŋ á ndáá-ēcɛ́ŋ-Ɔlolómɛ̄ ápah bi ɓɛ́ɛ́, bí ŋgí laglan nɛ́: «Miníg ɔ́ŋɔ láá é? M̀ɓá a ŋgá kɛ ɓé li sɔ́ á ŋgand.» 57Ɓakanʼyɛ ɓatíi-nsúlé la Elōg-Falísái bú tí ndag nɛ́, nyɔ́ la nyɔ́ a ŋga yí voóm Yésus a lɛ, a lagá á li ɓɔŋ nɛ́ bí byee nyɛ́.

Pilihan Saat Ini:

Yohánɛs 11: NTB

Sorotan

Berbagi

Salin