Mark 4

Fare sḭḭ ge ndu ge dol swa ne

Mat 13.1-23; Luk 8.1-15

1Zeso gwan ee tene hate nda iya ge mangaɗam ga̰a̰l ge Galile ne wa go. Nda kwate ya ɓase nɔnɔg ge ne ta, ɓase ge num way ee ne ndee ge faa yà, ɓase mbe ma gaa tabe mḛḛya ge wa kal digi. 2Ndiri num hateya ge fare sḭḭ ma zì, ka jan num ge na hateya ma zì go: 3Ḛ za̰a̰ gale, ge dwam a̰me go ɗu, ba ge gaa kaŋ a̰me ɗu zuɗ mbo dol swa. 4Sok ge ka cigi swa go, swa ndwa a̰me ma deɗ ge vin̰a kin̰a ma go, njoole ma mbo ya coɗ num gezi. 5A̰me ma deɗ ge sok her go, sok ge suwa no go gḛḛ to, àa tyal digi avun cab, ge dape, àa be seɗ suwa ge maa tòo ma wa mbo se yà ɗugul to. 6Ɗaŋɗe, sok ge gyala dee ge num pagal, àa looɗe, àa fin̰a gezi me, ge dape, num tòo ma kaa digi dɔfwal. 7A̰me ge ɗogle ma me ɗe, àa deɗ ge kore ma buwal zì, kore ma don digi, àa kage num se, àa be gwan seɗ vin̰a ge tol ndwa to. 8Ge cùb ma deɗ ge suwa ge kwaɗa go, àa don digi, àa mbal van, àa gasage se, àa kan maa pagal zum, àa zon ndwa. Swa pagal a̰me ma tol ndwa hoɗege guwa, gegene ma gḛḛ nde, gegene ma gḛḛ-gḛḛ. 9Guwa̰, jan go: Kaɗɗa ndu ge tɔgwa ge za̰a̰ fare mbe ma, ne za̰a̰ num kwaɗa. 10Guwa̰ kaal nde, sok ge gaa hini go, ne nda ge ame hateya ge wol pɔgwa zi ma ɓanna ge nda ge ka mboya dagre ge ne ma mbo ya ge ne ta zì, àa ele ne fare ge fare sḭḭ mbe ma pagal. 11Jan num go: Dok hon ḛ kuwaya ge wan fare ɗimil ge muluk ge na ne pe ya go, ɗaŋɗe, deɗ ge nda ge ɗogle ma tɔgwa zì peɗ ge fare sḭḭ ma go, 12ndwa go:

«Àa ndil sok go maa kuwa kaŋ mbe kwaɗa,

Ɗaŋɗe, àa mbyaɗ kuwa ne to.

Àa ɓyare go maa za̰a̰ fare mbe pe kwaɗa,

Ɗaŋɗe, àa mbyaɗ wan ne pe to.

Daa no go àa za̰a̰ fare mbe za̰a̰,

Àa daa mà seŋe ta ya ge Dok ta,

Dok daa mà pore num, num sone ma gezi.» #Eza 6.9-10.

13Jan num go iya: Kaɗɗa go ḛ wan fare sḭḭ mbe no pe to, ḛ mà mbo wan fare sḭḭ gegene mbe ma pe peɗ gyana de? 14Ba ge gaa kaŋ ge cigi swa, cigi fare ge Dok ne. 15Suwa ge vin̰a kin̰a go ge, ge kaŋ rusu dee ge ne go, ngay diir ge nda ge za̰a̰ fare ge Dok ne ma way. Sok ge àa kaɗ za̰a̰ ne go, avun cab, Saytan mbo ya pal fare ge àa za̰a̰ ne mbe ge num dul wa zì gezi. 16A mbe go ca, suwa her pagal ge kaŋ rusu dee ne go, a diir ge nda ge za̰a̰ fare ge Dok ne ma way, àa ame ne avun cab ge laa saal, 17ɗaŋɗe, àa n̰a ne vin̰a ge kee tèmel ge maa zì to, àa nda ge mḛḛ no go cɔcwab ma ne. Sok ge iigiya mage njon̰n̰a ma deɗ-ɗa ge fare ge Dok ne pe, àa seɗ ko challa ge sok mbe go avun cab. 18Suwa ge kore do̰o̰ ge ne pagal, ge kaŋ rusu dee ge num buwal zì ma, a diir ge nda ge za̰a̰ fare ge Dok ne ma way, 19ɗaŋɗe, àa kaɗ ge dwaɗɗa ma, àa ka yan kaŋ seɗɗa ge dunin̰a ne ma pe, ene ge kaŋ ge ɗogle ne ma waɗ ge num zì, àa njii fare ge Dok ne ge no ge num dul wa zì digi, àa daa gwan mbo mboya ge jwab to. 20Suwa ge kwaɗa, ge kaŋ rusu dee ge ne go, ngay diir ge nda ge za̰a̰ fare ge Dok ne ma way, àa ame ne ge maa zì, àa tol ndwa ma gḛḛ me: Swa pagal ɗu tol ndwa tapool ɗu, gegene ma warmenengal, ge ɗogle ma kis.

Fare sḭḭ ge lampe ne

Luk 8.16-18

21Zeso gwan jan num go iya: Ndu ge pool dun lampe digi, kubi ne ge sòo zì koo ee ne ge saŋal pe zì de? To, ee ne ge kaŋ ee lampe pe pagal. 22Ago, kaŋ ge way no ge sego ma peɗ mbo dyan zum ge kɔn̰al go. Kaŋ ge kee ge ɗimil zì ma, nda mbo kuwa num benna kɔn̰al. 23Kaɗɗa ndu ge tɔgwa ge za̰a̰ fare mbe ma, ne za̰a̰ num kwaɗa. 24Gwan jan num go iya ɔwale: Ḛ duwa kwaɗa ge fare ge ḛ za̰a̰ ne pagal. Àa mbo kee ḛ kaŋ ge ḛ kee nda gegene ma ne me, àa mbo gwan kee ḛ waɗeya nde. 25Ago ndu ge no go ge a̰me, àa mbo gwan hon ne ge kon pagal iya, ɗaŋɗe, ndu ge no be a̰me koo ne ne ge fyalag ge no ne tok go puy, àa mbo ame ne, ne gezi.

Fare sḭḭ ge kaŋ rusu ge don hini ne

Mat 13.31, 32; Luk 13.18, 19

26Zeso gwan jan num go iya: Muluk ge Dok ne mbo kaɗ dinna ge ndu cigi kaŋ rusu ge gaaso zì go. 27Koo ne fii dwam koo ne kaa ge na ndwa, ɗaal mage gyala, kaŋ rusu tyal digi, ka donna be ge ne sḛ kuwaya. 28Suwa sḛ ge na pagal tyal kaŋ rusu ya digi tyal: Zḛḛ wal, gale kaɗ zam, guwa̰, ɔwabe na pe kal digi, kan na pagal zum, seŋe guɗigi, gaa zon ndwa kun̰ug. 29Sok ge swa ndwa zon go, gaa ne salla ge ngwaɗiŋ. Ago, a sok kan siyal mbiya ne.

Fare sḭḭ ge sugu mutard ndwa ne

30Zeso gwan jan num go iya: Nè mà mbo ngay muluk ge Dok ne dinna ge ma̰ kaŋ go iya de? Koo a ge ma̰ fare sḭḭ ta ɗoo, nè wa mbo ngay ne de? 31A dinna ge sugu ge nda tol ne mutard ndwa go. Sok ge àa zare ne ge suwa zì, ne sḛ kaŋ rusu ge hoɗege jiyale ne ge kaŋ rusu gegene ma pe go peɗ. 32Ɗaŋɗe, sok ge àa zare ne se go, tyal digi, don ga̰a̰l waɗe sugu ge àa dol num no ge gaaso zì ge zamma pe ma waɗe peɗ. Dol na tok ma zum fiyal ge go njoole ge pḭḭ digi ma peɗ mbo ya ee maa vum ma ge ne soŋon̰ tok digi. 33Ka hate num fare sḭḭ mbe ma go, num dee ya kuwa num pe kwaɗa. 34Ka hate num fare ma peɗ ge fare sḭḭ. Sok ge ne sḛ gaa hini ge na nda ge ame hateya ma, wan num fare sḭḭ mbe ma pe zum peɗ.

Sa̰a̰m labreya ge Zeso tele ne mḛḛya

Mat 8.18-27; Luk 8.22-25

35Ge gyala tok gasamal ge dwam mbe ne go, Zeso jan na nda ge ame hateya ma go: Ḛ ha nè mangaɗam ga̰a̰l wa lee gene yà. 36Sok ge n̰a ɓase ma, ne nda ge ame hateya ma gwan ge ne ya, ge faa ge ne kaa daa wal ge ne go. Faa ga̰a̰l ge ɗogle ma wa ya yabeya ge ne ziya waɗme. 37Àa ɗege ya haaya, sa̰a̰m ge ga̰a̰l ɗege labreya, sḭ̀ḭl ka poɗ faa, ka ndàa mam ya ge ne go, gaa guwa ge ɗimiya. 38Zeso sḛ ka fii dwam ge faa pe ya, ɓya na pagal ge kaŋ ɓya pagal. Ne nda ge ame hateya ma kore ne digi, àa jan ne go: Ba ge hateya, mo fii go gyana de? Mo kuwa go nè mbo swày no to de? 39Ne sḛ kore, mḛḛ digi, ngwabe sa̰a̰m, jan mangaɗam ga̰a̰l ge Galile ne go: Zane, mḛḛ go ga! Sa̰a̰m mbo ya mḛḛya cub, sḭ̀ḭl iyal se halas. 40Guwa̰, jan num go: Ge dape, ḛ wa ka chiya voo gḛḛ go de? Ḛ zane gale go be hoɗ fareba ge ḛ zì de? 41Ge sok mbe go, voo ge ɓaŋlaŋ wan num, àa ka jan ta ge ta buwal zì go: Ne sḛ huɗi ne ge go koo sa̰a̰m mage mangaɗam ga̰a̰l ma wa ka za̰a̰ ne wa go de?

Pilihan Saat Ini:

Mark 4: kiaGRB

Sorotan

Berbagi

Salin