Mark 3

Zonna ge ndu ge tok looɗeya ne

1Guwa̰, Zeso gwan waɗ ge zok kee kaɗeya ge Yahuɗ ma way zì yà, ndu a̰me ge tok looɗeya wa ya ge sok mbe go. 2Nda ge kaa sok mbe go ma ka ndilla go, ne mà zon ndu mbe ge dwam sabaɗ go de? Kaɗɗa ne mà zon ne ya dwam sabaɗ go ɗe, ago maa wa wan ne ge fare. 3Zeso jan ndu ge tok looɗeya go: Ɗege digi mo mḛḛ ya ge sok mbe no go, ge nda tuwal zì go. 4Gwan ele nda ge kaa sok mbe go ma go: Eeya ge Moyiz ne ma ho̰ vin̰a go, àa ke ndu kwaɗa koo àa ke ne sone ge dwam sabaɗ go de? Àa mo̰o̰ ndu on̰om koo àa n̰a ne suuya de? Ɗaŋɗe, ndu a̰me gwan ge ne fare janna ge ne fare mbe pagal to. 5Ge sok mbe go, ne laa mbo ya hoɗɗa, caɗ num ol bel ge dul wa twagreya ge num way pe. Ne laa mbo ya vḛḛneya, jan ndu mbe go: Mwaɗe mo tok se yà. Ne sḛ mwaɗe na tok se yà, ne tok mbo ya seɗ zonna. 6Farisi ma waɗ ge zok kee kaɗeya ge Yahuɗ ma way zì ya zum, àa ge Heroɗ Antipas nda ma seɗ ta avun cab, ndwa seɗ fare ge ban Zeso gezi.

Talla ge nda ge temeya ge wol pɔgwa zi ma way

Mat 10.1-15; Luk 6.12-19; Tkt 1.13

7Zeso mbo ge mangaɗam ga̰a̰l wa yà ɓanna ge na nda ge ame hateya ma. Nda ɓase nɔnɔg ka kàre ne pe. Nda mbe ma mbo ge Galile ya, 8ge Jude ya, ge Jerusalem ya, ge Idume ya, ge mangaɗam Urdun wa lee gene ya, ge suwal van ge no ge Tir mage Sido̰ ziya ge ma ya me. Ɓase ge nɔnɔg mbe ma ka mbo ya ge ne ta, ge za̰a̰ya ge àa ka za̰a̰ kaŋ keeya ge ne ne ma pe. 9Jan na nda ge ame hateya ma go: Ḛ ee faa van ge jiyale ɗu ge mbi pe, ne kaa ge ɓase ma terse mbi zì to. 10Ajo̰o̰ na ka zon nda gḛḛ, num peɗ ge ka kee tuguɗi ma ka harge ta ndwa go maa see vin̰a ge taɗ ne. 11Nda ge kaa ge on̰om ge sone ge maa zì ma, sok ge àa ka kuwa ne go, àa ka deɗ ge ne ndwa se, àa ka oyya go: Mo Dok Van ne. 12Ɗaŋɗe, mḛḛre num ol kekeŋ go, ne kaa ge num jin̰a fare ge na ne mbe zum to.

13Guwa̰, ndee mbo njal pagal digi yà, tol nda ge na laa ɓyare num ma, àa mbo ya ge ne ta me. 14Twaɗ nda wol pɔgwa zi ge num buwal zì, hon num dḭḭl go, nda ge temeya ma, ndwa go num gaa kàɗɗa dagre ge na, 15na wa ka teme num mbo oy Fare ge Kwaɗa. Hon num pool ge yan on̰om ge sone ma gezi me. 16Num ge wol pɔgwa zi mbe ma dḭḭl ma no: Simo̰ ge àa chiya ne dḭḭl Piyer, 17Jak mage na na̰ van Yohana, àa Zebede van ma ne, ge àa chiya num dḭḭl go: Mam ban̰n̰a van ma ge ne wa grek no go Bowanerges. 18Gwan tal Andre, Filib, Bartelemi, Mata, Tomas, Jak ge Alfe van, Tade, Simo̰ ge iyal kyarga ge na suwal pe. 19Yudas Iskariyoɗ, ne ge yiya Zeso gezi me.

Sal On̰om ge Harcal

Mat 12.22-37; Luk 11.14-23

20Ge guwa̰ go, Zeso mage na nda ge temeya ma gwan-na ge zok diŋ, ɓase ma gwan-na twageya didib iya, ge go àa seɗ vin̰a ge zam a̰me ge maa wa zì to. 21Sok ge ne sele ma za̰a̰ fare mbe go, àa mbo ya wan ne, ago àa ka janna go: Ne pagal kee ne kee. 22Nda ge hate eeya ge Moyiz ne ge mbo ge Jerusalem ya ma kaa ge sok mbe go, àa ka janna go: Zeso ge Belzebul ge na zì. A ge ga̰a̰l ge on̰om ge sone ma way ta, yan on̰om ge sone ma no. 23Zeso tol num ya, ɗege jan num fare ma ge sḭḭ go: Saytan ge pool ge yan na kon Saytan de? 24Kaɗɗa nda ge kee muluk no ge suwal ge ɗu go ma ho̰o̰l ge ta, muluk ge num way mbe ge pool mḛḛya to. 25Kaɗɗa nda ge zok ge ɗu diŋ-ge ma ho̰o̰l ge ta, zok ge num way mbe ge pool mḛḛya to. 26Kaɗɗa Saytan nda ma ho̰o̰l ge ta ta buwal zì, ne pool va se vaa me. Ne vin̰a ge mḛḛya to, aa aa ge ne pe.

27Ḛ kuwa kuwa waɗme go ndu a̰me ge ɗogle ge vin̰a ge waɗ-ɗa ge zok ge ndu ge pool ne diŋ, pal ne a̰me to. Zḛḛ ge go ne paa ne kaŋ kwaɗa ma, ɓyare go ne vuwa ndu mbe ge pool se vwal ɓiya, wa ɗege seɗ vin̰a ge pal ne kaŋ ma guwa̰ go. 28Fareba mbi jan ḛ ne no: Àa mbo pore sone ge nda duwana ma mbo kee num ya ma peɗ ɓanna ge fare janna ge sone kakatag ge mbo waɗ-ɗa ge num wa zì ma ge Dok pagal. 29Ɗaŋɗe, ndu ge diige ge mbo jan fare sone kakatag ya ge On̰om ge Harcal pagal, mbo seɗ poreya to baɗ. Ago, kee sone ge be seɗ poreya ge ɗiŋ ge din. 30Ge dape, àa ka janna go: A ge on̰om ge sone ge na zì.

Zeso na̰ mage ne na̰ van ge fareba ma

Mat 12.46-50; Luk 8.19-21

31Sok mbe go, Zeso na̰ mage ne na̰ van ma yan-na, àa mḛḛ ge zok wa zum, àa teme ndu mbo tol ne ya. 32Ɓase ge vê ne se ma jan ne go: Mo na̰ ɓanna ge mo na̰ van ge soɗob mage gwale ma ɓyare mo go zum. 33Gwan ge num janna go, mbi jan ḛ ne no: A huɗi ma ne, mbi na̰ mage mbi na̰ van ma de? 34Guwa̰ go, dol na ndwa ge ɓase ge vê na se ma pagal, jan go: Mbi na̰ mage mbi na̰ van ma ne no. 35Ndu ge diige ge kee laa ɓyareya ge Dok ne, ne sḛ mbi na̰ van ge son ne, kaɗ mbi na̰ van ge gwale mage mbi na̰ me.

Pilihan Saat Ini:

Mark 3: kiaGRB

Sorotan

Berbagi

Salin