လူႉၵႃႇ 24
24
ၸဝ်ႈယေႇသူႉလုၵ်ႉၵႃႈတၢင်းတၢႆၶိုၼ်းလိပ်း
(တူၺ်း၊ မၢတ်ႈ 28:1-10။ မႃႇ 16:1-8။ ယူဝ်း 20:1-10)
1ဝၼ်းဢၼ်ပဵၼ်ဝၼ်းပထမႃႉ ၼႂ်းၸဵတ်းဝၼ်း၊ မိူဝ်ႈၶိင်ႇႁူဝ်မိူင်းသႂ်ၼၼ်ႉ၊ ၶဝ်ၼၼ်ႉဢိၵ်ႇတင်းမႄႈယိင်းတၢင်ႇၵေႃႉတင်းလၢႆ ပႃးဢဝ်တင်းၼၢမ်ႇသႃႇဢၼ်ၶဝ်မႄးႁႅၼ်းဝႆႉၼၼ်ႉၵႂႃႇၸူးၵႃႈတီႈသၢင်းၶႅင်းမၼ်းၸဝ်ႈဢေႃႈ။- 2ၶဝ်ၼၼ်ႉထူပ်းႁၼ်မၢၵ်ႇႁိၼ်ၼၼ်ႉ ၵိင်ႈဢွၵ်ႇသေၵႃႈတီႈၶုမ်သၢင်းၶႅင်းၼၼ်ႉမီးဝႆႉယူႇလႄႈ၊- 3မိူဝ်ႈဢၼ်ၶဝ်ၶဝ်ႈၵႂႃႇၵႃႈၼႂ်းၸိုင်၊ ၶဝ်ဢမ်ႇထူပ်းဢမ်ႇႁၼ်တူဝ်တၢႆၸဝ်ႈယေႇသူႉၼၼ်ႉ။- 4ၼႂ်းမိူဝ်ႈဢၼ်ၶဝ်မီးတၢင်းဢၼ်ၵႂင်ၸႂ်ယုင်ႈၸႂ် ၵွပ်ႈပိူဝ်ႈလွင်ႈတီႈႁဵင်းၼၼ်ႉယူႇၼၼ်ႉၸိုင်၊ ၵူၼ်းသွင်ၵေႃႉဢၼ်ၼုင်ႈၶူဝ်းၼုင်ႈဢၼ်ႁိူဝ်ႈႁိူင်းၼၼ်ႉ ပေႃႇမႃးၸုၵ်းယူႇၵႃႈတီႈႁိမ်းၶဝ်ဢေႃႈ။- 5ၼႂ်းမိူဝ်ႈဢၼ်ၶဝ်ၼၼ်ႉမီးၸႂ်ဢၼ်ၵူဝ်ဢၼ်ႁႄလႄႈ ၵူမ်ႈဢဝ်ၼႃႈငူပ်ႉၸပ်းလိၼ်ယူႇၼၼ်ႉၸိုင်၊ သွင်ၶႃၼၼ်ႉၵေႃႈလၢတ်ႈလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူၼႆႉႁႃၵေႃႉဢၼ်ဢသၢၵ်ႈလိပ်း ၵႃႈၼႂ်းၶဝ်ၸိူဝ်းဢၼ်တၢႆယဝ်ႉၼၼ်ႉၼင်ႇႁိုဝ်။- 6မၼ်းၸဝ်ႈဢမ်ႇမီးၵႃႈတီႈၼႆႈ။ မၼ်းၸဝ်ႈလုၵ်ႉၶိုၼ်းယဝ်ႉ။ ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်မၼ်းၸဝ်ႈလၢတ်ႈတီႈသူ ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉမီးယူႇၼႂ်းမိူင်းၵႃႇလီႉလႄးပုၼ်ႉလႄႈဝႃႈ၊- 7လုၵ်ႈၵူၼ်းတၵ်းလႆႈၶၢမ်ႇတၢင်းဢၼ်ဢၢပ်ႈၼႂ်းမိုဝ်းၵူၼ်းႁၢႆႉတင်းလၢႆ ဢိၵ်ႇတင်းတၢင်းဢၼ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈဢေႃႈ။ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ မၼ်းတၵ်းလုၵ်ႉၶိုၼ်းဢေႃႈ၊ ဝႃႈၼင်ႇၼႆၼၼ်ႉလူးၵွၼ်ႇတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 8ၶဝ်ၼၼ်ႉ ၶုၵ်းၸႂ်လႆႈၶႆႈၸႂ်ထူပ်းၵႂၢမ်းမၼ်းၸဝ်ႈလႄႈ၊- 9လုၵ်ႉသေၵႃႈတီႈသၢင်းၶႅင်းမၼ်းၸဝ်ႈသေယဝ်ႉ၊ လႅၼ်ႈၵႂႃႇလႄႈမွၵ်ႇလၢတ်ႈလွင်ႈတၢင်းၼၼ်ႉ ၵူႈၸိူဝ်ႉၵူႈပိူင်တီႈသိပ်းဢဵတ်းပႃးဢိၵ်ႇတင်းၶဝ်ၸိူဝ်းဢၼ်ၵိုတ်းယူႇတင်းသဵင်ႈတင်းလူင်ၼၼ်ႉဢေႃႈ။
10ၶဝ်ၸိူဝ်းဢၼ်မွၵ်ႇလၢတ်ႈလွင်ႈတၢင်းၸိူဝ်းၼၼ်ႉတီႈတမၢၼ်ႇၸဝ်ႈတင်းလၢႆၼၼ်ႉၸမ်ႉ၊ ပဵၼ်မႃႇရီႉမႃႇၵတလႃႉ၊ ယူဝ်းႁၢၼ်ႇၼႃႉ၊ မႃႇရီႉ ဢၼ်ပဵၼ်မႄႈယႃႇၵုပ်ႈ ဢိၵ်ႇတင်းမႄႈယိင်းတၢင်ႇၵေႃႉတင်းလၢႆ ဢၼ်ပႃးလူၺ်ႈၵၼ်တင်းၶဝ်ဢေႃႈ။- 11တမၢၼ်ႇၸဝ်ႈၸိူဝ်းၼၼ်ႉ ယဵဝ်ၵႂၢမ်းၶဝ်ၼၼ်ႉပဵၼ်ၵႂၢမ်းဢၼ်လၢႆလၢႆလွၵ်ႇလွၵ်ႇလႄႈဢမ်ႇယုမ်ႇၶဝ်။- 12ၼႂ်းဝႃႈၼၼ်သေၵေႃႈ ပေႇတရူႉ လုၵ်ႉလႄႈ လႅၼ်ႈၵႂႃႇၸူးၵႃႈတီႈသၢင်းၶႅင်းမၼ်းၸဝ်ႈဢေႃႈ။ မိူဝ်ႈဢၼ်ႁွတ်ႈထိုင်ၼၼ်ႉၸိုင်၊ မၼ်းၵူမ်ႈတူၺ်းလႄႈႁၼ်ၽႃႈပိၵ်ႈၵိုတ်းၵျၢၼ်ႇဝႆႉၵူၺ်းသေယဝ်ႉ၊ ဢၢမ်းလွင်ႈတီႈႁဵင်းၼၼ်ႉလႄႈ ၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းသေဢေႃႈ။
လွင်ႈၶၢဝ်းတၢင်းၵႂႃႇၸူးဝၢၼ်ႈဢေးမွၵ်ႉ
(တူၺ်း၊ မႃႇ 16:12-13)
13လိူဝ်သေၼၼ်ႉ၊ ၼႂ်းဝၼ်းၼၼ်ႉ၊တပႄးၸဝ်ႈသွင်ၵေႃႉ ၵႂႃႇၵႃႈတီႈဝၢၼ်ႈဢၼ်လႆႈၸိုဝ်ႈဢေးမွၵ်ႉ ဢၼ်ယၢၼ်ၵၼ်တင်းဝဵင်းယေႇရူႉသလႅမ်ႇ သီႇလၵ်းၼၼ်ႉယူႇသေလႄႈ၊- 14ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်လူၺ်ႈလွင်ႈတၢင်းဢၼ်ပဵၼ်မႃးယဝ်ႉတင်းသဵင်ႈတင်းလူင်ၼၼ်ႉယူႇဢေႃႈ။- 15ၼႂ်းမိူဝ်ႈဢၼ်ၶဝ်ယင်းတိုၵ်ႉတွင်ႈထၢမ်လၢတ်ႈၸႃၵၼ်ယူႇၼၼ်ႉၸိုင်၊ ယေႇသူႉသုတ်ႉၸမ်လႄႈၵႂႃႇလူၺ်ႈၵၼ်တင်းၶဝ်ဢေႃႈ။- 16မီးတၢင်းဢၼ် ဢမ်တႃၶဝ်ၼၼ်ႉဝႆႉယူႇလႄႈၶဝ်ဢမ်ႇႁူႉလွင်ႈဢၼ်ပဵၼ်မၼ်းၸဝ်ႈ။
17မၼ်းၸဝ်ႈၵေႃႈထၢမ်လႄႈဝႃႈ၊ ၵႂၢမ်းဢၼ်သူမီးတၢင်းဢၼ်ၼႃႈလူႉတႃမႃႇပႆတၢင်းၵႂႃႇယူႇသေလႄႈ ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်ယူႇၼႆႉၸမ်ႉ၊ ပဵၼ်ၵႂၢမ်းလွင်ႈၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 18ၼႂ်းသွင်ၶႃၼၼ်ႉၵေႃႉၼိုင်ႈ ဢၼ်လႆႈၸိုဝ်ႈ ၵလေႃးၽႃႉၼၼ်ႉၵေႃႈလၢတ်ႈလႄႈဝႃႈ၊ မႂ်းပဵၼ်ၶႅၵ်ႇၼႂ်းဝဵင်းယေႇရူႉသလႅမ်ႇၵူၺ်းလႄႈ ဢမ်ႇႁူႉလွင်ႈတၢင်းၸိူဝ်းဢၼ်ပဵၼ်မႃးၼႂ်းဝဵင်းၼၼ်ႉၶိင်ႇတေႃႈလဵဝ်ၼႆႉၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 19မၼ်းၸဝ်ႈၵေႃႈထၢမ်လႄႈဝႃႈ၊ ပဵၼ်လွင်ႈတၢင်းၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ သွင်ၶႃၼၼ်ႉၵေႃႈလၢတ်ႈလႄႈဝႃႈ၊ ပဵၼ်လွင်ႈယေႇသူႉၵူၼ်းဝဵင်းၼႃႇၸရႅတ်ႈဢေႃႈ။ မၼ်းၼၼ်ႉပဵၼ်ပရေႃးၽႅတ်ႈ ဢၼ်ပျေႉၸုမ်ႇတင်းၵႂၢမ်းဢၼ်မီးႁႅင်းတၼ်းၶူဝ်း ဢိၵ်ႇတင်းမိုဝ်းဢၼ်မီးႁႅင်းတၼ်းၶူဝ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈ ဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ။- 20ၵေႃႉၼၼ်ႉၸိုင် ယိတ်ႈပရေႃးႁဵၵ်ႈလူင်ဢိၵ်ႇတင်းၶုၼ်ႁဝ်းတင်းလၢႆ ဢဝ်ဢၢပ်ႈႁႂ်ႈလႆႈၶၢမ်ႇတၢင်းတၢႆလႄႈဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈယဝ်ႉ။- 21ၵူၺ်းၵႃႈ မိူဝ်ႈဢွၼ်ၼႆႉၼၼ်ႉႁဝ်းလႆႈဢွၼ်ၵၼ်မုင်ႈထႃႈမွင်းထႃႈလွင်ႈဢၼ်ၵေႃႉၼၼ်ႉ ပဵၼ်ၵေႃႉဢၼ်တၵ်းလႆႈထုတ်ႇဢဝ်မဵဝ်းၵူၼ်းဢီႉသရေႇလႃႉမႃးယဝ်ႉ။ လိူဝ်သေၼၼ်ႉဢမ်ႇၵႃး လွင်ႈတၢင်းၼႆႉပဵၼ်မႃးလႄႈတေႃႈလဵဝ်ၼႆႉလႆႈသၢမ်ဝၼ်းယဝ်ႉ။- 22မႄႈယိင်းဢၼ်ပဵၼ်ၵေႃႉပဵၼ်သေႈၵၼ်တင်းႁဝ်းၼၼ်ႉၵမ်ႈၽွင်ႈၵေႃႈ ၵႂႃႇၸူးၵႃႈတီႈသၢင်းၶႅင်းမၼ်းၸဝ်ႈပုၼ်ႉၸဝ်ႉၸဝ်ႉလႄႈ၊- 23မိူဝ်ႈဢၼ်ဢမ်ႇထူပ်းဢမ်ႇႁၼ်တူဝ်တၢႆမၼ်းၸဝ်ႈၼၼ်ႉၸိုင်၊ ၶိုၼ်းမႃးမွၵ်ႇလၢတ်ႈလွင်ႈဢၼ်ၶဝ်လႆႈႁၼ်ရူႇပႃႇရူင်ႇ ဢၼ်တမၢၼ်ႇၵၢင်ႁၢဝ်တင်းလၢႆပေႃႇမႃးလႄႈဝႃႈ၊ မၼ်းၸဝ်ႈဢသၢၵ်ႈလိပ်းယူႇဢေႃႈ၊ ဝႃႈၼင်ႇၼႆၼၼ်ႉလႄႈ ႁဝ်းမီးတၢင်းဢၼ်ၵႂင်ၸႂ်ယုင်ႈၸႂ်ယူႇဢေႃႈ။- 24မိူဝ်ႈၼၼ်ႉ ၵူၼ်းၼႂ်းႁဝ်းၼႆႉၵမ်ႈၽွင်ႈ ၵႂႃႇၸူးၵႃႈတီႈသၢင်းၶႅင်းမၼ်းၸဝ်ႈပုၼ်ႉလႄႈ၊ ပိၵ်ႉသမ်ႉထူပ်းႁၼ်ၸိူဝ်ႉၼင်ႇဢၼ်မႄႈယိင်းၸိူဝ်းၼၼ်ႉမွၵ်ႇလၢတ်ႈၼၼ်ႉသေၵေႃႈ ဢမ်ႇလႆႈထူပ်းႁၼ်မၼ်းၸဝ်ႈ၊ ဝႃႈၼင်ႇၼႆဢေႃႈ။
25မၼ်းၸဝ်ႈၵေႃႈလၢတ်ႈတီႈသွင်ၶႃၼၼ်ႉလႄႈဝႃႈ၊ သူၸိူဝ်းဢၼ်ႁူဝ်ၸႂ်ၼိုၵ်းၼႃလႄႈဢမ်ႇမီးၺၢၼ်ႇ ဢၼ်တၢၼ်ႇပေႃးယုမ်ႇၵႂၢမ်းဢၼ်ပရေႃးၽႅတ်ႈတင်းလၢႆႁေႃးလၢတ်ႈဝႆႉၼၼ်ႉၼႆႉဢိူၺ်း၊- 26ၸဝ်ႈၶရိၸ်ႈ၊တၵ်းလႆႈၶၢမ်ႇလွင်ႈတၢင်းၸိူဝ်ႉၼင်ႇၼၼ်သေလႄႈ ၶဝ်ႈၸၢမ်ႇၸႃးမုၼ်ၸေးၸိမ်ႇမၼ်းၸဝ်ႈဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။- 27မိူဝ်ႈၼၼ်ႉ မၼ်းၸဝ်ႈဢဝ်ၸႃႉၸဵမ်ၵျၢမ်းလိၵ်ႈမူဝ်းသေႇ ဢိၵ်ႇတင်းၵျၢမ်းလိၵ်ႈပရေႃးၽႅတ်ႈတင်းလၢႆၽုၺ်ႇဢွၵ်ႇၼႄပျႃးဢထိၵ်ႈပႄႇၵျၢမ်းလိၵ်ႈ ဢၼ်လၢတ်ႈလူၺ်ႈလွင်ႈမၼ်းၸဝ်ႈၵႃႈမီးတင်းသဵင်ႈတင်းလူင်ၼၼ်ႉဢေႃႈ။
28ၵမ်းၼၼ်ႉ ၶဝ်ႁွတ်ႈထိုင်ၵႃႈတီႈဢၼ်ၸမ်ႁိမ်းဝၢၼ်ႈဢၼ်ၶဝ်တၵ်းၵႂႃႇၼၼ်ႉလႄႈ မၼ်းၸဝ်ႈႁဵတ်းၸိူဝ်ႉၼင်ႇႁၢင်ႈတၵ်းပူၼ်ႉဝၢၼ်ႈၼၼ်ႉၵႂႃႇသေဢေႃႈ။- 29သွင်ၶႃၼၼ်ႉၵေႃႈၸူဝ်းဢဝ်မၼ်းၸဝ်ႈၼႃႇလူင်လၢင်လႄႈဝႃႈ၊ ၶဝ်ႈယူႇလူၺ်ႈၵၼ်တင်းႁဝ်းၶႃႈသေၵမ်းၶႃႈ။ ပဵၼ်ၶိင်ႇႁူဝ်ၶမ်ႈၶႃႈယဝ်ႉ။ ၵၢင်ဝၼ်းၵေႃႈတူၵ်းၶႃႈယဝ်ႉ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ မၼ်းၸဝ်ႈၶဝ်ႈႁႂ်ႈလႆႈယူႇလူၺ်ႈၵၼ်တင်းသွင်ၶႃၼၼ်ႉဢေႃႈ။
30ၼႂ်းမိူဝ်ႈဢၼ်မၼ်းၸဝ်ႈဢိင်ၵႃႈတီႈႁိမ်းၶူင်ႇတီႈၵိၼ် လူၺ်ႈၵၼ်တင်းသွင်ၶႃၼၼ်ႉယူႇၼၼ်ႉၸိုင်၊ မၼ်းၸဝ်ႈဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇ၊ ဝိတ်းၶဝ်ႈမုၼ်းလႄႈပၼ်တီႈသွင်ၶႃၼၼ်ႉဢေႃႈ။- 31သွင်ၶႃၼၼ်ႉမၢၵ်ႇတႃၽုၺ်ႇလႅင်းလႄႈ လႆႈႁူႉလွင်ႈဢၼ်ပဵၼ်မၼ်းၸဝ်ႈဢေႃႈ။ မိူဝ်ႈၼၼ်ႉ မၼ်းၸဝ်ႈလပ်ႉႁၢႆၵႂႃႇသေဢေႃႈ။- 32သွင်ၶႃၼၼ်ႉၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊ ၼႂ်းမိူဝ်ႈဢၼ်မၼ်းၸဝ်ႈႁေႃးလၢတ်ႈပၼ်တီႈႁႃးလႄႈၽုၺ်ႇဢွၵ်ႇၼႄပျႃး ဢထိၵ်ႈပႄႇၵျၢမ်းလိၵ်ႈတီႈႁႃးၵႃႈၼႂ်းၵၢင်တၢင်းၼၼ်ႉၸိုင်၊ ႁူဝ်ၸႂ်ႁႃးဢူၼ်ႈဢွၼ်မႃးဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။
33သွင်ၶႃၼၼ်ႉလုၵ်ႉၵမ်းလဵဝ်လႄႈ ၶိုၼ်းမိူဝ်းၵႂႃႇၵႃႈတီႈဝဵင်းယေႇရူႉသလႅမ်ႇသေယဝ်ႉ၊ လႆႈထူပ်းႁၼ်သိပ်းဢဵတ်းပႃး ဢိၵ်ႇတင်းၵေႃႉသေႈၶဝ်ၼၼ်ႉၸူႉၵၼ်တုမ်ၵၼ်မီးဝႆႉယူႇလႄႈ၊- 34လၢတ်ႈၵၼ်ယူႇလႄႈဝႃႈ၊ ၸဝ်ႈၽြႃးလုၵ်ႉၶိုၼ်းဢမၢၼ်ႇၶၼ်ပဵၼ်ယဝ်ႉ။ မၼ်းၸဝ်ႈၼႄပျႃးတူဝ်မၼ်းၸဝ်ႈတီႈ သီႉမုၼ်ႇယဝ်ႉ၊ မိူဝ်ႈဢၼ်ယင်းတိုၵ်ႉဝႃႈၸိူဝ်ႉၼင်ႇၼႆယူႇၼၼ်ႉၸိုင်၊- 35သွင်ၶႃၵေႃႈမွၵ်ႇလၢတ်ႈလွင်ႈဢၼ်ပဵၼ်မႃးၵႃႈၼႂ်းၵၢင်တၢင်းဢိၵ်ႇတင်းလွင်ႈဢၼ်ၶဝ်လႆႈႁူႉပဵၼ်မၼ်းၸဝ်ႈ ၼႂ်းမိူဝ်ႈဢၼ်ဝိတ်းၶဝ်ႈမုၼ်းၼၼ်ႉဢေႃႈ။
ၸဝ်ႈယေႇသူႉၼႄပျႃးတူဝ်တီႈတပႄးၸဝ်ႈ
(တူၺ်း၊ မၢတ်ႈ 28:16-20။ မႃႇ 16:14-18။ ယူဝ်း 20:19-23။ တ 1:6-8)
36ၼႂ်းမိူဝ်ႈဢၼ်ၶဝ်ၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်ၸိူဝ်ႉၼင်ႇၼၼ်ယူႇၼၼ်ႉၸိုင်၊ မၼ်းၸဝ်ႈၸုၵ်းယူႇၵႃႈၼႂ်းၶိုင်ႈၵၢင်ၶဝ်သေလႄႈလၢတ်ႈလႄႈဝႃႈ၊ ႁႂ်ႈတၢင်းၼိမ်ပဵၼ်တီႈသူသေၵမ်းလူၺ်ႈ၊ ဝႃႈၼင်ႇၼႆဢေႃႈ။- 37ၶဝ်ၼၼ်ႉတူၵ်းၸႂ်လႄႈႁွတ်ႈထိုင်တၢင်းဢၼ်ၵူဝ်ဢၼ်ႁႄသေလႄႈ ထၢင်ႇဝႃႈလႆႈႁၼ်ၽဵတ်ႇဢေႃႈ။- 38မၼ်းၸဝ်ႈၵေႃႈလၢတ်ႈလႄႈဝႃႈ၊ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈ မီးတၢင်းဢၼ်သၼ်ႇၶွၼ်းဝႆၼင်ႇႁိုဝ်။ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈ တၢင်းဢၼ်ၶႆႈၸႂ်ဝူၼ်ႉၸႂ်ၵူႈၸိူဝ်ႉၵူႈပိူင်ဢွၵ်ႇမႃးၵႃႈၼႂ်းႁူဝ်ၸႂ်သူၼင်ႇႁိုဝ်။- 39တူၺ်းမိုဝ်းၵဝ်တင်းတိၼ်ၵဝ်လူးၵွၼ်ႇတႃႉ။ ပဵၼ်တူဝ်ၵဝ်ဢေႃႈ။ ယိပ်းၵမ်တူၺ်းၵဝ်လူးၵွၼ်ႇတႃႉ။ ၽဵတ်ႇဢမ်ႇပျေႉၸုမ်ႇတင်းလုပ်ႇတင်းၼိူဝ်ႉ မိူၼ်ၸိူဝ်ႉၼင်ႇဢၼ်သူႁၼ်ၵဝ်ပျေႉၸုမ်ႇၼႆႉ၊ ဝႃႈၼင်ႇၼႆသေလႄႈ၊- 40ၼႄပျႃးမိုဝ်းၸဝ်ႈ တင်းတိၼ်ၸဝ်ႈတီႈၶဝ်ၼၼ်ႉဢေႃႈ။- 41ၼႂ်းမိူဝ်ႈဢၼ်ၶဝ်ဢမ်ႇယုမ်ႇလႆႈ ၵွပ်ႈပိူဝ်ႈဢၼ်မီးတၢင်းဢၼ်သိူဝ်းပျေႃႇၼၼ်ႉလႄႈဢၢမ်းၼႃႇယူႇၼၼ်ႉၸိုင်၊ မၼ်းၸဝ်ႈၵေႃႈထၢမ်လႄႈဝႃႈ၊ တီႈသူမီးတၢင်းၵိၼ်သေၸိူဝ်ႉသေပိူင်ႁိုဝ်။ ဝႃႈၼင်ႇၼႆသေယဝ်ႉ၊- 42ၶဝ်ၼၼ်ႉပၼ်ပႃပိင်ႈပွတ်းၼိုင်ႈ ဢိၵ်ႇတင်းႁင်းၽိုင်ႈတီႈမၼ်းၸဝ်ႈဢေႃႈ။- 43မၼ်းၸဝ်ႈဢဝ်လႄႈၵိၼ်ၵႃႈတီႈၽၢႆႇၼႃႈၶဝ်ဢေႃႈ။
44မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈၸမ်ႉ၊ ၵႂၢမ်းဢၼ်ၵဝ်ႁေႃးလၢတ်ႈတီႈသူ ၼႂ်းၶိင်ႇမိူဝ်ႈဢၼ်ၵဝ်ယင်းတိုၵ်ႉမီးယူႇလူၺ်ႈၵၼ်တင်းသူၼၼ်ႉလႄႈဝႃႈ၊ ၵႃႈဢၼ်တႅမ်ႈဝႆႉလူၺ်ႈလွင်ႈၵဝ်ၵႃႈၼႂ်းၵျၢမ်းလိၵ်ႈပိင်းၺၢပ်ႈတီႉမူဝ်းသေႇ၊ ၵႃႈၼႂ်းၵျၢမ်းလိၵ်ႈပရေႃးၽႅတ်ႈတင်းလၢႆ၊ ၵႃႈၼႂ်းၵျၢမ်းလိၵ်ႈသႃႇလၢမ်ႇၼၼ်ႉတင်းသဵင်ႈတင်းလူင်တၵ်းလႆႈပျေႉၸုမ်ႇဢေႃႈ၊ ဝႃႈၼင်ႇၼႆၼၼ်ႉပဵၼ်တီႈႁဵင်းၼႆႉဢေႃႈ၊ ဝႃႈၼင်ႇၼႆဢေႃႈ။- 45မိူဝ်ႈၼၼ်ႉ မၼ်းၸဝ်ႈ ၽုၺ်ႇႁူဝ်ၸႂ်ၶဝ်ႁႂ်ႈၶဝ်လႆႈႁူႉၵျၢမ်းလိၵ်ႈသေယဝ်ႉ၊- 46လၢတ်ႈလႄႈဝႃႈ၊ ၵျၢမ်းလိၵ်ႈမႃးၸိူဝ်ႉၼင်ႇၼႆဢေႃႈ။ ၸဝ်ႈၶရိၸ်ႈတၵ်းလႆႈၶၢမ်ႇတၢင်းတၢႆလႄႈ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ တၵ်းလႆႈလုၵ်ႉသေၵႃႈတီႈတၢင်းတၢႆၼၼ်ႉဢေႃႈ။- 47ဢိင်ပိုင်ႈၼႃႇမႃႉၸိုဝ်ႈသဵင်မၼ်းၸဝ်ႈသေလႄႈတၵ်းလႆႈႁေႃးလၢတ်ႈတြႃးတၢင်းဢၼ်ၶုၵ်းၸႂ်လႆႈမႆႈၸႂ် ဢိၵ်ႇတင်းတြႃးတၢင်းဢၼ်ပွႆႇလွတ်ႈဢပႅတ်ႈၼၼ်ႉ ၵႃႈတီႈၸႃႉၸဵမ်ဝဵင်းယေႇရူႉသလႅမ်ႇ ဢိၵ်ႇတင်းၵူၼ်းမဵဝ်းၵႃႈမီးတင်းသဵင်ႈတင်းလူင်ဢေႃႈ။- 48သူၵေႃႈပဵၼ်သၢၵ်ႈသေႇလွင်ႈတီႈႁဵင်းၸိူဝ်းၼႆႉဢေႃႈ။- 49ၵႃႈၼင်ႇဢၼ်ၵတီႉပေႃႈၵဝ်မီးၼၼ်ႉ ၵဝ်တၵ်းႁဵတ်းတီႈသူလူးၵွၼ်ႇဢေႃႈ။ ပိူဝ်ႈၼႆလႄႈ ၸူဝ်ႈဢၼ်သူဢမ်ႇပႆႇၶၢမ်ႇဢဝ်တၼ်းၶူဝ်းၵႃႈတီႈၵၢင်ႁၢဝ်ၼၼ်ႉၸိုင်၊ သူယူႇၵႃႈၼႂ်းဝဵင်းၼႆႉလူးၵွၼ်ႇတႃႉ၊ ဝႃႈၼင်ႇၼႆဢေႃႈ။
ၸဝ်ႈယေႇသူႉၶၢမ်ႇတၢင်းဢၼ်ဢဝ်ၶိုၼ်ႈၵၢင်ႁၢဝ်ၵႂႃႇ
(တူၺ်း၊ မႃႇ 16:19-20။ တ 1:9-11)
50လိုၼ်းၼၼ်ႉ မၼ်းၸဝ်ႈဢဝ်ၶဝ်ဢွၵ်ႇသေၵႃႈၼႂ်းဝဵင်းၵႂႃႇထိုင်ႁွတ်ႈဝၢၼ်ႈပေႇထၼီႉယဝ်ႉၸင်ႇ ယုၵ်ႉမိုဝ်းမၼ်းၸဝ်ႈလႄႈပၼ်တၢင်းလီတီႈၶဝ်ဢေႃႈ။- 51ၼႂ်းမိူဝ်ႈဢၼ်မၼ်းၸဝ်ႈပၼ်တၢင်းလီယူႇၼၼ်ႉၸိုင်၊ မၼ်းၸဝ်ႈၽၢတ်ႇယၢၼ်ၵၼ်တင်းၶဝ်လႄႈ ၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉသေဢေႃႈ။- 52ၶဝ်ၼၼ်ႉၶုပ်ႉမူပ်ႇၵူဝ်းၵႂၢႆႇမၼ်းၸဝ်ႈသေယဝ်ႉ၊ မီးၸႂ်ဢၼ်သိူဝ်းပျေႃႇၼႃႇလူင်လၢင်လႄႈ ၶိုၼ်းမိူဝ်းၵႃႈတီႈဝဵင်းယေႇရူႉသလႅမ်ႇသေဢေႃႈ။- 53ၶဝ်ၼၼ်ႉဢဝ်ၵျေးၸူးၸဝ်ႈတၢင်ႇလႄႈ ယွင်ႈယေႃးၽြႃးပဵၼ်ၸဝ်ႈယူႇသေလႄႈ မီးယူႇၵႃႈၼႂ်းပိၵ်ႈမၢၼ်ႇၸဝ်ႈယူႇတႃႇသေႇဢေႃႈ။
ၶရိၸ်ႈဝၢင်ႇၸဝ်ႈလူႉၵႃႇယဝ်ႉယဝ်ႉဢေႃႈ။
Pilihan Saat Ini:
လူႉၵႃႇ 24: CBMS
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Copyright © 2021 by OMF International, Shan Baptist Churches Fellowship
