Fuɗɗoode 4
4
No Kayiinu wardi Haabiila
1Aadama wondi e deekum Hawwaa de hooƴi reedu, rimi Kayiinu. Hawwaa wi'i:
— Mi heɓii ɓiɗɗo gorko e baawɗe Joomiraaɗo.#4:1 Innde Kayiinu e ibraninkoore ina nanndi e «heɓude».
2Caggal ɗuum o rimi Haabiila minyoo Kayiinu. Haabiila laatii duroowo dammuuli, Kayiinu du laatii demoowo.
3Nyannde gomma, Kayiinu ittani Joomiraaɗo sadaka ley ko remi ɗuum. 4Haabiila du suɓii ɓurɗi fayde hakkunde artiiɗi rimeede ley dammuuli muuɗum. Joomiraaɗo jaɓɓii Haabiila e sadaka muuɗum. 5Ammaa o jaɓɓaaki Kayiinu e sadaka muuɗum. Kayiinu ɓerni sanne, ɓalinii. 6Joomiraaɗo wi'i Kayiinu:
— Ko waɗi de ɓernuɗaa? Ko ɗume de aɗa ɓalinii? 7Yalla si a waɗii ko wooɗi, a jaabantaake naa? Ammaa si a waɗaay ko wooɗi fu, hakke na woni e dammbugal maaɗa ina doomi ma, ina filoo nanngude ma. De aan kaa, tinnoɗaa njaaloɗaa ɗum.
8Kayiinu haaldi e minyum Haabiila, de ɓe njaadi ley ngesa. Wakkati ɓe ngonnoo ley ngesa ndeen, Kayiinu hippii minyum Haabiila oon, wari ɗum. 9Joomiraaɗo wi'i Kayiinu:
— Toy minya Haabiila woni?
Kayiinu jaabii, wi'i:
— Mi anndaa! Yalla wo miin woni doomoowo minyam oon naa?
10Laamɗo wi'i:
— Ɗume ngaɗuɗaa? Ƴiiƴam minya oon na wullitoo gilla e leydi faa na hewta kam. 11Joonin a huɗaama, a riiwaama dow leydi njarndi ƴiiƴam minya ndiin. 12Nde ndemoyɗaa ndi du, a heɓataa nafaa e mayri. A laatoto jiilotooɗo mo heɓataa ɗo wona dow mayri.
13Kayiinu wi'i Joomiraaɗo:
— Njobdi hakke am ndiin teddii, mi waawataa ndi. 14Inan a riiwii kam e leydi ndii hannden, mi suuɗoto, mi dilla yeeso maa. Mi waancoto ley adunaaru. Keɓuɗo kam du fuu waran kam.
15Joomiraaɗo wi'i:
— Wanaa noon. Neɗɗo fuu barɗo Kayiinu, joomum yomnitete nde jeɗɗi.
Joomiraaɗo waɗi maande dow Kayiinu faa kawruɗo e muuɗum fuu taa wara ɗum. 16Caggal ɗuum, Kayiinu dilli yeeso Joomiraaɗo, jooɗowii leydi Not#4:16 Maanaa Not wo «yiilaade». lettugal Eden.
Haala ƴuwdi Kayiinu
17Kayiinu wondi e deekum, de oon hooƴi reedu, rimi Henok. Kayiinu nyiɓi huɓeere de inndiri huɓeere ndeen innde ɓiyum Henok. 18Henok rimi Irad. Irad rimi Mehuya'el. Mehuya'el rimi Metusa'el. Metusa'el rimi Lamek. 19Lamek ɓaŋi rewɓe ɗiɗo. Gooto ina wi'ee Aada, ɗiɗaɓo oon ina wi'ee Sila. 20Aada rimi Jabal, oon woni baaba jooɗiiɓe ley hukumuuji, maruɓe daabaaji. 21Minyiiko ina wi'ee Yuubal. Oon woni baaba fiyooɓe kolli e cereeli fuu. 22Sila du rimi Tubal-Kayiinu. Oon laatii baylo tafoowo kujje ceeɓuɗe gaɗiraaɗe njamndi mboɗeeri e ɓaleeri fuu. Minyoo Tubal-Kayiinu debbo ina wi'ee Na'ama. 23Lamek noddi rewɓe muuɗum, wi'i:
Aada e Sila, kettindanee kam,
onon rewɓe Lamek, nanee ko kaalammi ɗuum faa wooɗa.
Mi warii neɗɗo gomma saabe nawnii kam,
mi warii jokolle saabe fiyii kam.
24Si barɗo Kayiinu fuu yomnitete nde jeɗɗi,
ndelle ko Lamek ɗuum yomnitete kile capanɗe jeɗɗi e jeɗɗi.
25Aadama wondi e deekum katin. Oon rimi ɓiɗɗo gorko, inndiri ɗum Siita. O wi'i:
— Laamɗo hokkii kam ɓiɗɗo goɗɗo loomtuɗo Haabiila mo Kayiinu wari oon.
26Siita du heɓi ɓiɗɗo gorko, inndiri mo Enos. Ndeen yimɓe puɗɗi du'oraade innde Joomiraaɗo.
Pilihan Saat Ini:
Fuɗɗoode 4: FBF
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© SIM International 2012, 2022