Shitatiko 5
5
Bazukulya Andama
(1 Byambo 1:1-4)
1 #
Shit 1:27-28. Ou niwo muhoko wa bazukulya Andama mu lino libuka. Nyambi oho alengele bantu, wabalengele mu shifwekesha shendi. 2#Mat 19:4; Mako 10:6. Wabalengele mulume na mukazi, wabafuywele pe wabatumbile ngayi, “Bantu.” 3Andama oho ekalile myaka 130 wabelekele mwana wa mulume ou wamufwekele, pe wamutumbile ngayi, Sheta. 4Kunyima yanebye Andama wayoyele myaka 800, pe wabelekele kami bana bamina babalume na bambuyama, 5Andama wafwile hinga ekala na myaka 930.
6Sheta oho ekalile na myaka 105, wabelekele mwana wa mulume lizina lyendi Enoshi, 7Sheta wayoyele myaka yamina kami 807. Pe wabelekele bana bamina babalume na ba bambuyama. 8Sheta wafwile hinga ekala na myaka 912.
9Enoshi oho ekalile na myaka 90, wabelekele mwana wa mulume lizina lyendi Kenani, 10wekalile na myaka 815, pe wabelekele bana bamina babalume na bambuyama. 11Enoshi wafwile hinga ekala na myaka 905.
12Kenani oho ekalile na myaka 70 wabelekele mwana wa mulume lizina lyendi Mahalalelu. 13Kenani niho kami ekalile myaka 840, pe wabelekele bana bamina babalume na bambuyama. 14Kenani wafwile hinga ekala na myaka 910.
15Mahalalelu oho ekalile na myaka 65, wabelekele mwana lizina lyendi Yalendi, 16niho kami ekalile myaka 830 pe wabelekele bana bamina babalume na bambuyama. 17Mahalalelu wafwile hinga ekala na myaka 895.
18Yalendi oho ekalile na myaka 162, wabelekele mwana wa mulume lizina lyendi Inoki, 19Yalendi niho kami ekalile myaka 800, pe wabelekele bana bamina babalume na bambuyama. 20Wafwile hinga ekala na myaka 962.
21Oho Inoki ekalile na myaka 65, wabelekele mwana wa mulume lizina lyendi Metushela. 22Inoki tata Metushela wayoyele na kulilumikila na Nyambi mu myaka 300, pe wabelekele bana bamina babalume na bambuyama. 23Inoki wayoyele myaka 365. 24#Bah 11:5; Yun 14. Mu kuyoya kwendi nimwako wengile muka kulilumikila na Nyambi, pe bantu kaliha bamumonene kami ndaba Nyambi wamushimbile.
25Oho Metushela ekalile myaka 187, wabelekele mwana wa mulume lizina lyendi Lameki. 26Metushela wekalile na myaka 782, wabelekele bana bamina babalume na bambuyama. 27Metushela wafwile hinga ekala na myaka 969.
28Oho Lameki ekalile na myaka 182, wabelekele mwana wa mulume, 29wambile ngayi, “Mwana ou ukatuhehulako ku milimo yetu nimwayo yayikalu ku limvu elye bene akutwile Nyambi ya Ngula.” Pe wamutumbile ngayi Nowa.#5:29 Nowa Lizina elye mu shihebelu likutontolola ngayi, “Kuhehula.” 30Lameki wekalile myaka 595, pe wabelekele bana bamina babalume na bambuyama. 31Lameki wafwile hinga ekala na myaka 777.
32Oho Nowa ekalile na myaka 500, wabelekele bana bahatu babalume, Shemu na Hamu na Yafweti.
Pilihan Saat Ini:
Shitatiko 5: LLK
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Libuka Lya Kuyela © Bible Society of Zambia, 2020.