Shitatiko 18
18
Shikulupisho sha mwana wa mulume kuli Abulahama
1Nyambi ya Ngula waliholwele kuli Abulahama ku mitondo ya kutulila ya Oka yaku Mamele. Abulahama aha ekalile ku shipana sha ntanda yendi ha shikati sha mwaana shikuma, 2#Bah 13:2. oho ayimbwile meho wendi wamonene balume bahatu hinga bemana nahiyo. Oho abamonene wetukilileko na kubashimbawila. Pe wafunkamine hanci na kulamba. 3Wambile ngayi, “Hekulyami, ndi una wahilili na nami, pe hinga mupitilila munzi wami, ndaba nili hano kumitendela milimo. 4Lehenu taha nilete mema muyowele ku mawulu wenu, mutweshe kukatala mu nceto ya mutondo. 5Nikamiletela byakulya ngayi mwanga bimipane ngovu ha mukala wenu. Munezi ha munzi wami lehenu nimitekeshe.”
Baya balume bahatu bambile ngayi, “Shashiwahe, tenda ngonehe unamba.”
6Nohobene Abulahama wanyankupilile mu ntanda pe wambile kuli Shala ngayi, “Nyankupisha, shimba zimpamba zihatu za muhunga wobe wa loto wawuwahe, wuvubewo mankende.” 7Abulahama niho etukilile ku litanga wakahatileko namani uya wengile wa muboto na kushuwa, pe wamupanine ku mukamulimo ou wanyankupishile ku muziha na kumuteleka. 8Niho atolele lukaki na mahwe, hamo na nyama, pe wabitulile kumbili yabo. Oho balilenga wemanine hahepi nabo mu nceto ya mutondo. 9Niho bamwipwile ngayi, “Mukazobe Shala ulikuti?” Pe wakumbwile ngayi, “Uli mu ntanda.” 10#Lom 9:9. Umo wanaba bayeni wambile ngayi, “Mwaka ou ukwiza ku shikati shinobene. Shala mukazobe ukabeleka mwana wa mulume.” Shala wekalile ku shipana sha ntanda ha muyuvwilila.
Shala wekalile kunyima yendi ha muyuvwilila. 11Abulahama na Shala bengile batukulukazi shikuma, kami Shala oho wafumakale ku nciza ya munzi. 12#1Pita 3:6. Pe Shala wahepele mu mutima wendi na kwamba ngayi, “Ami nka na kulumpala kale, kami mukokwami wengakale kakulukazi, kati ami nafwanini kwikala kami na likwilu ndi?” 13Nyambi ya Ngula wambile kuli Abulahama ngayi, “Kati shumangani Shala anahepe na kwamba ngayi, ‘Mwa shikuma ami nikutwesha kubeleka mwana oho na kulumpala kale ndi? 14#Luka 1:37. Kati kuli shuma sha kwangananga kuli Nyambi ya Ngula ndi? Mwaka ou ukwiza ku shikati shinobene, nikaboka kukwobe, pe mukazobe Shala ukabeleka mwana wa mulume.’” 15Ndaba Shala wekalile na bowa, waliyawilile na kwamba ngayi, “Kaliha ninahepe.”
Ngoboni Nyambi ya Ngula wambile ngayi, “Byo, nisho unatende, unahepe.”
Abulahama ukulambilila lukena lwa Shondoma
16Niho balume bahatu bayile ku mwanya oku batweshele kutilamina Shondoma, kami Abulahama wayile nabo mu kubashindikiza. 17Nyambi ya Ngula walyambashanine ngayi, “Kukalimbila Abulahama shuma eshe nikushinga kutenda nifwako 18Bazukulyendi ukenga mushobo wawunene wa ngovu, pe mumwendi nikafuywela matunga nimwao. 19Namuhata ngayi mwanga ambilenga bana bendi na ba lupashi lwendi ba kumbili ngayi bombatale ndayano zami mukutenda bya kulunga na kupwisha. Nohobene nikamutendela nimwabyo biya namukulupishile.”
20Niho Nyambi ya Ngula ambile ngayi, “Kuli shihepwa shashinene ku Shondoma na Ngomola, ndaba wubi wabo unengi wawunene shikuma. 21Nafwanina ku shulukila hanci mu ku mona ndi eshe shihepwa nayuvwu shinengi sha kupwisha.”
22Niho balume babili bakatukile bayile ku Shondoma, ngoboni Nyambi ya Ngula washalile na Abulahama. 23Abulahama wahenyenene kuli Nyambi ya Ngula na kumwipula ngayi, “Kati mwa shikuma obe ukuya na kulobesha bakulunga na bakuluwa ndi? 24Ku mona ndi ku bali bantu 50 bakulunga mu munzi, kati ukalobesha munzi nimwawo ndi? Kati kukawutetelela ngayi mwanga ukapulwishe 50 wufwako ndi? 25Mwa shikuma kukalobesha bantu bakulunga hamo nanaba bakuluwa wufwako. Shiya shinengi shashikalu, kutwesha kutenda noho wufwako. Ndi ukutenda noho pe bakulunga baka shushuliwila hamo na bakuluwa. Shinengi shashikalu, mukakuyata wa hano hanci nimwaho watendanga na kupwisha.”
26Nyambi ya Ngula wambile ngayi, “Ndi nikuwana bantu bakulunga 50 mu Shondoma, nikatetelela munzi nimwawo ndaba ya naba 50.”
27Abulahama wambile kami ngayi, “Hekulu nyatile ha kukanca kwami shiya nikwonzela kwamba nobe, obe Mwene. Ami nili muntu tuhu, kami ku fwanina kwamba shuma shimo nifwako. 28Ngoboni hekulu ndi kukawaniwa bantu 45 bakulunga hakati ka bantu 50? Kati ukalobesha bantu nimwabo ndaba ya bantu mutanu babulukuho ndi? Nyambi ya Ngula wambile ngayi kukalobesha uya munzi nifwako ndi nika wanamo bantu bali 45 bakulunga.”
29Abulahama wambile kami kuli Nyambi ya Ngula ngayi, “Haya ndi ukawana bantu bali 40 bakubula milandu shikekala nahiti? Nifwako kuka balobesha ndaba ya naba bantu 40.”
30Abulahama niho ambile ngayi, “Hekulu hinga upilama nafwanina kwamba kami, haya ndi kuli tuhu bantu 30? Nifwako kuka balobesha ndaba ya naba bantu 30.”
31Abulahama wambile ngayi, “Hekulu nyatilenu ha kukanca kwami shiya nikwonzela kwamba kukwobe. Haya ndi bantu 20 nibo bakawaniwaho tuhu? Nifwako kuka wulobesha ndaba ya naba bantu 20.”
32Abulahama wambile ngayi, “Hekulu, hinga upilama nishili kwamba shikati shimo taha nahiti ndi bantu 10 nibo ba ku waniwaho?” Nifwako kuka wulobesha ndaba ya naba bantu 10. 33Nyambi ya Ngula wayile oho amanishile kwambola na Abulahama naniye wabokele ku munzi wendi.
Pilihan Saat Ini:
Shitatiko 18: LLK
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Libuka Lya Kuyela © Bible Society of Zambia, 2020.