Milimo 3
3
Muntu wakupenga ukunyongomanishiwa
1Ha mutena umina Pita na Yowano bayile ku Litala lya Nyambi ku shikati sha wulikumi na mutanu shikati sha kulombela. 2Pe kuyo ku shipana sha Litala lya Nyambi shiya shatumbiwile ngayi Shipana Shashiwahe, kwekalile muntu umo wahemuwile hinga apenga. Ha mutena na mutena bamutwalilenga ku shipana, ngayi anyepe bya kumuyavwa ku baya bengininenga mu Litala lya Nyambi. 3Oho amonene Pita na Yowano hibengina mu Litala lya Nyambi, wanyepele bya kumuyavwa. 4Pita na Yowano bamuconcomekele, pe Pita wambile ngayi, “Tutilamine!” 5Uya muntu wabatilaminine, wahanganikile ngayi ukatambula shuma kukwabo. 6Niho Pita ambile kukwendi ngayi, “Mali a shiliva na ngolinde nifwawo, ngoboni nikukupana eshe nili nasho, mu lizina lya Yeshu Kilishitu waku Nazaleta, yimana wende!” 7Wamukwatile na liboko lya shilyo, pe wamwimikile. Hohobene mawulu na zingongo zendi byashumine. 8Wakilukilile muyilu, wemanine, niho atatikile kwenda. Wenginine nabo mu Litala lya Nyambi henda na kukilozoka na kuyemeza Nyambi. 9Oho bantu nimwabo bamumonene henda kami hayemeza Nyambi, 10bamulimukile ngayi niye uya muntu wekalilenga na kunyepa bya kumuyavwa ku shipana shatumbiwile ngayi Shipana Shashiwahe, bakomokele na kutampwa haneshe shatendiwile kukwendi.
Mazu a Pita mu Litala lya Nyambi
11Oho uya muntu azengaminine kuli Pita na Yowano, bantu nimwabo bakomokele, pe betukilile kukwabo mu mazezelo atumbiwile ngayi Mazezelo a Sholomoni. 12Oho Pita amonene nahiyo wambile ku bantu ngayi, “Bantu ba Ishalela kati munakomoko nahiti hanebye? Kati shumangani mu kutuconcomekela, ngo ngayi tunatende ku nou muntu ngayi ende na ngovu zetu, hinge na kuyela kwetu? 13Nyambi wa Abulahama na Ishaki na Yakobo, ou Nyambi wa batatizetu, niye unapana wuwahe kuli Mukamulimo wendi Yeshu. Mwamupanine ku bakandayano kami mwamukanine ku meho a Pilato, hinge oho Pilato ashingile kumushobola.#Kut 3:15. 14#Mat 27:15-23; Mako 15:6-14; Luka 23:13-23; Yowa 19:12-15. Ngoboni mwakanine wa Kuyela na kwoloka, pe mwanyepele Pilato ngayi amishobwele likombe. 15Mwazihile mukakutwaminina ku wumi, ngoboni Nyambi wamushangwile ku bafu. Etu tuli bapaki banebye. 16Zinengi ngovu za lizina lyendi, eze zinashumishi ou muntu wengile wakupenga. Ou mu ku mona, kami mwamulimuku nanyongomanishiwi na kukulupila mu lizina lyendi. Kunengi kukulupila muli Yeshu kuya kunamunyongomanishi, ngonehe mu kumumona nimwenu.
17“Haya, bawushinda nalimuku ngayi enu na batulela twenu mwatendele mu wulube. 18Nyambi wambile mwaka muli bamiluwe nimwabo ngayi, Kilishitu wendi ukamona malwa. Pe washitendele sha kupwisha ngonehe. 19Nohobene tengulukenu, pe muboke kuli Nyambi ayatile wubi wenu, mwanga bikati bya kukatuluka bize kufuma kuli Mwene, 20ngayi mwanga atume Kilishitu niye Yeshu ou amihatilile mwaka. 21Nafwanini kwikala muyilu kutwala ku shikati osho Nyambi akawahisha byuma nimwabyo biya ambile mwaka muli bamiluwe bendi ba kuyela. 22#Nday 18:15-18. Ndaba Moshesha wambile ngayi, ‘Nyambi ya Ngula, Nyambi yenu ukamitumina muluwe ngonehe antumine, ukenga umo wa bawushindawenu. Munafwanini kwombatala nimwabyo ebye akamba kukwenu. 23#Nday 18:19. Muntu nimwendi ukabula kwombatala biya akamba uya muluwe, ukafumishiwa ku bantu ba Nyambi, pe ukanongeshiwa.’ 24Miluwe nimwabo aba bambile ku balika kuli Shamwele na baya bamulundaminine nimwabo balubulwile ebye binatendiwi ha matena ano. 25#Shit 22:18. Bikulupisho bya Nyambi muli bamiluwe binengi byenu, kami muli na shitapilo mu kulimama okwe Nyambi atendele na bankakazenu. Ngonehe ambile kuli Abulahama ngayi, ‘Ku mbuto yobe mikoka nimwayo ya hano hanci bakawana mfuywezi.’ 26Nohobene Nyambi wahatile Mukamulimo wendi, ha kutatika wamutumine kukwenu, ngayi amifuywele ha kuletesha muntu na muntu ngayi atenguluke afume ku zinzila zendi zazibi.”
Pilihan Saat Ini:
Milimo 3: LLK
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Libuka Lya Kuyela © Bible Society of Zambia, 2020.
