Génesis 13
13
Abrã cʉ̃hʉ soro, Lote cʉ̃hʉ soro ji dʉcaa tiha
1Abrã Egipto yahpapʉ jimariro to namono mehne wijaa, jipihtia ti ya mehne Canaã yahpapʉ jiri yahpa Néguebepʉ coha tjuaa wahaha tjoa. Ã yoa to bahʉro macʉno Lote cʉ̃hʉ tina mehne wahaha. 2Abrã sehe pache pʉro jiha. Tiro payʉ uru cjoari, ã jichʉ plata si paa cjoari, wapa tia cjoarire cjʉaa tiha. Tuhsʉ, payʉ nuina wahiquina cʉ̃hʉre cjʉaa tiha. 3Ã yoa tiro Néguebepʉ sʉ, waha namoha tjoa. Soero ji wahcãa, te Betel wama tiri macare sʉ, yʉhdʉ wahcã, Ai wama tiri maca cahai wahma to ji mʉhtamariropʉta pari turi sʉha. 4Tói sʉro, tó panopʉ tãa mehne to dahre mʉori tuhu cjiroi Yawere ño payoa tiha.
5Ã yoa to bahʉro macʉno Lote cʉ̃hʉ, pache pʉrota jiha. Tiro cʉ̃hʉ payʉ ovejaa, cabraa, wachʉa cjʉaa tiha. Ã yoa masa, to sʉho jiina cʉ̃hʉre payʉ cjʉaa tiha. 6Wiho mejeta ti jiri yahpa sehe tinare ne mʉ sʉeraha. Wahiquina ti nuina sehe payʉ waro jia tiha. Ã jiro wahiquina ti chʉboa ne mʉ sʉera tiha. 7Ã mʉ sʉerachʉ ñʉa, Abrã nuinare ñʉ wihbo cohtaina, to bahʉro macʉno Lote nuinare ñʉ wihbo cohtaina ti basi cahma tuhti mʉjaa tiha. Ã yoa tí pjapʉre tí yahpare cananeo masa, ã jichʉ fereseo masa cʉ̃hʉ jisinia tiha. 8Ã jiro cʉ̃ nʉmʉ Abrã sehe Lotere õ sehe niha:
—Mari basi jina nija mari. Mari basi waro jipanahta, mari ã ñano jia tichʉ, noaerara. 9Ahri yahpa pjiri yahpa jinocana. Ã jicʉ noano mehne mʉhʉ cʉ̃hʉ soro jii wahaga. Nohoi mʉ ji coari dʉhterore ñʉ, tói jii wahaga. Yʉhʉ sehe mʉ bese dʉhari dʉhteroi jii wahaihtja —niha Abrã Lotere.
10To ã nichʉ tʉhoro, Lote sehe ñʉ siterocaha. Ã ñʉ siterocaro, Jordão ma dʉhtʉ cahai cʉ̃ dʉhtero, noari dʉhterore ñʉ bocaha. Pʉ Soá wama tiri macapʉ tí dʉhtero jipihtiro noari wapa ji batoha. Panopʉ Yawe Adãore to cũmari dʉhtero yoaro sehe, tuhsʉ, Egipto yahpa yoaro sehe noano mári tiri dʉhtero jia tiha tí dʉhtero. (Tó sehe jia timaha, Yawe Sodoma, Gomorra wama tia macarire to jʉ̃ cohãhto panore) 11Tí dʉhtero noari dʉhtero to jichʉ ñʉno, Lote sehe tí dʉhteropʉ jiro wahaha. Tí dʉhtero sʉ̃ mʉja taro caha sehe tjuaha. Tó sehe yoa, tina soro ji dʉcaa tiha jʉna. 12To pʉcahmino Abrã sehe Canaã yahpapʉ tjuaha. Lote sehe Jordão ma dʉhtʉ cahai jiri yahpapʉ jiro wahaha. Tí yahpapʉre macari jia tiha. Ã jiro Lote sehe Sodoma cahacãpʉ sʉ, tói jia tiha. 13Sodoma macaina sehe ñaina waro jia tiha. Yawe to ñʉchʉ, bʉjʉa buhiri tiina jia tiha tina.
14Ã yoa Lote to wahari baharo, Yawe Abrãre õ sehe ni yahuha:
—Mʉ jirore sʉ̃ mʉja taro sehere, sʉ̃ sãano sehere, pari taño sehe cʉ̃hʉre noano ñʉ siterocaga. 15Jipihtiro mʉ ñʉ siterocaro puro mʉhʉre waihtja. Mʉ ya yahpa, ã jichʉ mʉhʉre ji turiahtina ya yahpa jirucurohca. 16Ã yoa mʉ panamana, mʉhʉre ji turiahtinare payʉ wahachʉ yoaihtja, dihta pohca yoaro sehe. Dihta pohcare masa ti quihõa bihoeraro seheta mʉhʉre ji turiahtina cʉ̃hʉ payʉ jiahca. 17Ahri yahpare mʉhʉre waihtja. Ã jicʉ mipʉre ñʉ tinii wahaga to yoaro puro, to saro purore —ni yahuha Yawe Abrãre.
18Ã yoa Abrã tói jimariro to jiri wʉhʉ, wahiquina cahsari wʉhʉre wawe na, wahaa wahaha tjoa. Waha, Maré wama tiriro ya nʉcʉcã, encina yucʉri jiri nʉcʉcãpʉ sʉ, tói jia tiha. Tí nʉcʉcã sehe Hebrõ wama tiri maca cahai jia tiha. Tói jiro, tãa mehne dahre mʉori tuhu yoa, Yawere ño payoa tiha.
Pilihan Saat Ini:
Génesis 13: GVC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO