Mateo 13

Kishimpi kya wakushilenga nkunwa

(Mako 4:1-9; Luka 8:4-8)

1Mu jonkaja juba Yesu pa kulupuka mu nzubo, wakekajile kubwipi na kizhiba. 2#Lu 5:1-3Kabiji kwamupwijile mabumba akatampe, kepo ayile mu bwato, waikajile monka, ne mabumba onse kasa aimana ku kitulu. 3Ne aye wibambijile mambo avula mu bishimpi amba, “Talai! Njimi walupukile na kukusa nkunwa; 4kabiji pa kukusa, nkunwa imo yaponejile mu jishinda, ne bang'onyi baiya beija. 5Kabiji ikwabo yaponejile pa bibangabwe, pabula kuzhika mushiji. Ne kumena yamenene pabula mushiji wazhika. 6Bino pa kusaama juba yasokelwe, na mambo a kubula kwikizha mizhazhi yaumine. 7Ne ikwabo yaponejile mu miba, kabiji miba pa kukoma yatatankenye nkunwa. 8Pakuba ikwabo yaponejile mu mushiji wawama, ne kusema yasemene, imo yasemene kitota, imo yasemene makumi atanu na jimo, ikwabo yasemene makumi asatu. 9Awa uji na matwi a kumvwa, omvwe.”

Mambo a kwamba mu bishimpi

(Mako 4:10-12; Luka 8:9-10)

10Kabiji baana babwanga baishile na kumwipuzha amba, “Lelo mambo ka o mwibambila bantu mu bishimpi?”

11Kumvwa aye amba, “Kya kuyuka byafyamika bya bufumu bwa mwiulu kyapanwa kwi anweba, bino kechi kwi abo ne. 12#Mat 25:29; Mako 4:25; Lu 8:18; 19:26Mambo kwi aye uji naabyo, ukapewa ne bikwabo, kabiji ukekala na byavula, kabiji awa wabulabyo, bakamwangata ne bicheche byo aji naabyo. 13Kyo kyo nebambila mu bishimpi, mambo nangwa balaba, kechi bamona ne, kabiji byo bateleka kechi bomvwa ne, nangwa kukwatakanya ne.” 14#Isa 6:9,10Kabiji kinembelo kibafikila byaawile Isaya na Mupashi amba,

“Kumvwa mukomvwa, ne kukwatakanya nangwa pacheche ne,

kabiji kumona mukamona, ne kumwesha nangwa pacheche ne.

15Ke pakuba michima ya bano bantu yaluwankana,

ne matwi abo ashinka, ne

meso abo beazhinzhibika.

Kuchiina amba, bakamwesha na meso abo,

ne kumvwa bakomvwa na matwi abo, ne kukwatakanya baka kwatakanya mu michima yabo,

ne kwaluluka,

ne amiwa na kebabuka.”

16 # Lu 10:23,24 “Kabiji meso enu atokwa byo abena kumona, ne matwi enu, byo abena kumvwa. 17Mambo kine nemwambila namba, bangauzhi bavula ne baoloka basakile kwibimona byo mubena kumona anweba, ne kwibimona ne, ne kumvwa byo mubena kumvwa, bino kechi bebyumvwine ne.”

Kulumbulula kwa kishimpi kya wakushilenga nkunwa

(Mako 4:13-20; Luka 8:11-15)

18“Pano umvwai kishimpi kya njimi. 19Umvwe muntu waumvwa mambo a bufumu, ne kwiakwatakanya ne, ponkapo awa mubi waiya, ne kumusompolao akushiwa mu muchima wanji, uno ye yewa wakushiwa nkunwa ya mu jishinda. 20Ne aba bakushiwa nkunwa ya pa bibangabwe, bo boba bomvwa mambo, ponkapo beatambula ne kwiasekelela, 21nanchi kechi baji na mizhazhi mwi abo ne, bakoselamo pacheche, kabiji pakumweka bya malwa nangwa bya kupatwa na mambo a ano mambo, ponkapo betuntula. 22Ne awa wakushiwa nkunwa ya mu miba, ye yewa umvwa mambo, kabiji bya kutabataba bya pano pantanda, ne bujimbijimbi bwa bunonshi, bipaya aa mambo, ne kupanga bipangwa ne. 23Kabiji aba bakushiwa nkunwa ya mu mushiji wawama, bo boba bomvwa mambo, ne kwiakwatakanya, bo bapanga bipangwa kine, umo upanga kitota, mukwabo naye upanga makumi atanu na jimo, mukwabo upanga makumi asatu.”

Kishimpi kya bincha mu kajo

24Kabiji wibatayile ne kishimpi kikwabo amba, “Bufumu bwa mwiulu bwapashang'ana pamo nobe muntu wakushile nkunwa yawama mu bujimi bwanji. 25Kabiji bantu byo balaajile, mulwanyi wanji waishile, wakushilemo bincha mu kajo, kabiji wafumineko. 26Kabiji lubula byo lwakomene ne kusema, kabiji ne bincha nabyo byamwekele. 27Kepo baishile bakalume ba mwina nzubo amba mwane, kechi mwakushile nkunwa yawama mu bujimi bwenu nenyi? Pakuba bino bincha byafuma pi? 28Aye wibakumbwile amba, mulwanyi ye wauba bibye, kumvwa bakalume amba, mwasaka tuye tukebisekulemo nyi? 29Kumvwa aye amba ine, kuchiina amba, pa kusekulamo bincha, mwakayokwela kumo na kajo. 30Aki bilekai byonse bikomene pamo poso pa kimye kya kunowa. Po po nkambila ba kunowa namba, patanshi mwibibungizhe pamo bincha, mwibikase bikuta mwibisoke, pakuba kajo mwikalonge mu butala bwami.”

Kishimpi kya kajipeke ka mastate

(Mako 4:30-34; Luka 13:18-21)

31Yesu wibeelele ne kishimpi kikwabo amba, “Bufumu bwa mwiulu bwapashang'ana pamo nobe kajipeke ka masitate, ko atolele muntu, ne kwikabyala mu bujimi bwanji. 32Kine ako kakila nkunwa yonse ikwabo mu kukepa; kabiji pa kukoma, kakila byonse bya mu bujimi, kaaluka ke kichi, ne bang'onyi ba mwiulu ke beye na kulengela binsa pa misampi yakyo.”

Kishimpi kya mbizho

33Wibatayile ne kishimpi kikwabo amba, “Bufumu bwa mwiulu buji nobe mbizho, yashikwile mwanamukazhi, ne kwiifya mu bunga bwa bipimo bisatu, poso bwatutumuka bonse.”

Mambo a kwingijisha bishimpi

34Abino byonse Yesu wibyambile mu bishimpi ku mabumba, kabiji kwakubula kishimpi kechi wa ambilenga naabo ne. 35#Sala 78:2Amba kifike akya kya ambile ngauzhi amba,

“Nkasama na kwamba bishimpi,

nkebyamba byafyamika kufuma ku ntendekelo ya pano pantanda.”

Kulumbulula kwa kishimpi kya bincha mu bujimi

36Ponkapo washiile mabumba, watwelele ne mu nzubo, ne baana banji babwanga baishile mo aji amba, “Betulumbulwileko kishimpi kya bincha bya mu bujimi.”

37Ne aye Yesu wibakumbwile amba, “Awa ukusa nkunwa yawama ye Mwana Muntu, 38kabiji abwa bujimi po pano pantanda, kabiji aya nkunwa yawama, bo baana bamu bufumu, kabiji abya bincha bo baana bakwa aye mubi, 39ne awa mulwanyi wibikushile ye Diabola, kabiji mwaka wa kunowa jo juba jikapelaako, ne ba kunowa bo bamalaika. 40Byonka byo bebibungizha bincha ne kwibisoka mu mujilo, byo bikekala ne mu juba jikapelaako. 41Mwana Muntu ukatuma bamalaika banji, bakebipwizha pamo bintu byonse bya mu bufumu bwanji bya kwituntulako, ne bonse boba byatama, 42ne kwibataya mu kisha kya mujilo, mo mukekala kujila ne kwisuma ku meno. 43Pakuba baoloka bakasaama pamo nobe juba mu bufumu bwa Shabo, uji na matwi a kumvwa omvwe!”

Kishimpi kya, kya buneme kyafyamika

44“Bufumu bwa mwiulu bwapashang'ana pamo na kintu kyakila buneme kyafyamika mu bujimi, kyoataine muntu ne kwikifya, kabiji monka mu kusekela kwanji kaye na kupotesha byonse byo aji naabyo, amba apotelemo bobwa bujimi.”

Kishimpi kya mangalite

45“Kabiji bufumu bwa mwiulu bwapashang'ana pamo na muntu mupoteshi, uya na kusaka bamangalite bawamisha, 46kabiji pa kutaana mangalite umo ufwa mutengo wabaya, wakapotesha byonse byo aji naabyo, ne kumupota.

Kishimpi kya bukonde

47“Kabiji bufumu bwa mwiulu bwapashang'ana pamo na bukonde, bo bata mu mema, bwakwata misango yonse. 48Bo bakokela kungye pa kuyuula, ne kwikala ke basalemo byawama, ne kwibituula mu bitumbe, pakuba byatama bebitaya. 49Byo kikobiwa ne mu juba jikapelaako, bamalaika bakeya kusalululamo batama mu baoloka, 50batama bakatayiwa mu kisha kya mujilo, mo mukekala kujila ne kwisuma ku meno.”

Mambo a bipya ne byakala

51Yesu wibepwizhe amba “Mwibyumvwisha abino byonse nyi?”

Kumvwa abo amba, “Ee.”

52Kabiji aye wibambijile amba, “Byonkabyo banembeshi bonse bo baalula ke baana babwanga mu bufumu bwa mwiulu kyapashang'ana nobe mwina nzubo, usolola bya mu nsabo yanji, bipya ne bya kala.”

Yesu byo bamulengulwile ku Nazala

(Mako 6:1-6; Luka 4:16-30)

53Ponkapo Yesu, byo apwishishe kwibambila mu bishimpi, wafumineko. 54Kabiji wayile ku muzhi wanji ne kufunjisha mu shinagoga wabo, kyakuuba bakuminye bingi ne kwipuzha amba, “Lelo uno muntu ano maana wiafumya pi? Ne ino mingilo ya bulume wiifumya pi? 55Kabiji uno kechi ye mwana sendwe wa mbao nenyi? Nanchi Inanji kechi bamuteela amba Maliya nenyi? Ne balongo banji kechi ba Yakoba ne Yosefwa, ne Shimona, ne Yudasa nenyi? 56Ne banyenga yanji bonse kechi tuji naabo monka muno nenyi? Kabiji aye uno abye byonse wibifumya pi?”

57 # Yoa 4:44 Kabiji betuntwile na mambo a aye. Kepo Yesu ebambijile amba, “Ngauzhi kechi wabulwa buneme ne, poso monka mu kyalo kyanji mwine, ne mu nzubo yanji.” 58Kabiji kechi waubileko mingilo ya bulume yavula ne, mambo a milengulwila yabo.

Pilihan Saat Ini:

Mateo 13: KNTP

Sorotan

Berbagi

Salin