Luke 14
14
Jesus Sa Obi a Ɔahohon Yarba
1Ahomgyeda bi, Jesus kɔr Farisiifo panyin bi ne fie kedzidzii, na nkorɔfo tsetsɛɛw no. 2Na hwɛ, nyimpa bi wɔ n’enyim hɔ a ɔyar ahohon. 3Na Jesus bisaa mbrakyerɛfo nye Farisiifo no dɛ, Ana ɔfa mbra mu dɛ wɔsa yarba ahomgyeda anaadɛ wɔnnsa? 4Na wɔyɛɛ komm. Na ɔfaa no saa no yarba, na ɔmaa ɔkɔree. 5#Mat 12.11 Na obisaa hɔn dɛ, Hom mu woana, na n’asoasopɔnkɔ anaa ne nantwi kɔtɔ bura mu ahomgyeda a, ɔnnkɔtwe no ntsɛmara? 6Na woenntum emmbua no yinom ho bi bio.
Ahobrɛadze na Adɔyɛ
7Na ohun dɛ hɔn a wɔfrɛɛ hɔn edzidzi no hwehwɛ mpanyin tsenabea no, obuu bɛ kaa kyerɛɛ hɔn dɛ, 8#Mbɛ 25.6, 7 Sɛ obi to nsa frɛ wo ayefor ase a, mma nnkɛtsena mpanyin tsenabea; bi a ɔafrɛ obi a ɔyɛ onyimnyamfo sen wo, 9na nyia ɔfrɛɛ hom no ba a, ɔbɛse wo dɛ, Ma oyi kwan, na edze enyito bɛhyɛ ase akɛfa tsenabea a ɔnnkrɔn. 10Ntsi sɛ wɔfrɛ wo a, kɔ kɛtsena bea a ɔnnkrɔn, ama nyia ɔtoo nsa ɔfrɛɛ wo no ba a, ɔaase wo dɛ, Me gyafo, bra kan, bɛtsena ha; nna ibenya enyidzi wɔ hɔn a wɔnye wo tse edzidzii no enyim. 11#Mat 23.12; Luk 18.14 Osiandɛ obiara a ɔbɛma noho do no, wɔbɛbrɛ no adze; na obiara a ɔbɛbrɛ noho adze no, wɔbɛma no do.
12 Nna ɔsee nyia ɔfrɛɛ hɔn no so dɛ, Sɛ eto pon ewia anaa anadwe a, mma mmfrɛ w’anyɛnkofo, anaa wo nuanom, anaa w’ebusuafo, anaadɛ wo sɔnmufo ahonyafo: bɛyɛ na hɔn so ɔaafrɛ wo bi, ma enya akatua. 13Na sɛ eto pon a, frɛ ehiafo, nye epirafo, nye mpakye, nye enyifurafo: 14na ibenya nhyira, osiandɛ wonnyi dza wɔdze botua wo kaw; na atseneneefo wunyan no mu nna wobotua wo kaw.
Aponto Kɛse no ho Bɛ
(Matthew 22.1-10)
15Na hɔn a wɔnye no tse edzidzii no mu baako tsee dɛm no, ɔsee no dɛ, Nhyira aka nyia obedzidzi wɔ Nyankopɔn ahenman no mu. 16Na Jesus see no dɛ, Nyimpa bi too pon kɛse, na ɔfrɛɛ nyimpa pii; 17na edzidziber durii no, ɔsomaa n’akowaa dɛ ɔnkɛse hɔn a wɔfrɛɛ hɔn no dɛ, Hom mbra, na ndzɛmba nyina ayɛ krado. 18Na hɔn nyina nam adwen kor do hyɛɛ ase yiyii ano. Nyia odzi kan no see dɛ, Matɔ asaase bi, na ohia dɛ mokɔhwɛ: meserɛ wo, ma me kwan. 19Na ɔbaako so see dɛ, Matɔ anantwi mpamho enum, na morokɔsɔ hɔn ahwɛ: meserɛ wo ma me kwan. 20Na ɔbaako so see dɛ, Mawar yer na dɛm ntsi murunntum mmba. 21Na akowaa no bae bɛkaa yinom kyerɛɛ no wura. Nna ofiwura no no bo fuwii na ɔsee n’akowaa no dɛ, Yɛ ntsɛm si kurow mu abɔntsen nye nsaaba mu, na kɛfa ehiafo nye epirafo nye enyifurafo nye mpakye bra ha. 22Na akowaa no see dɛ, Mo wura, mayɛ dɛ mbrɛ ehyɛe no, naaso ɔkwan da ho wɔ hɔ. 23Na owura no kaa kyerɛɛ n’akowaa no dɛ, Pue kɔ akwantsen nye ban mu, na kɛhyɛ hɔn ma wɔmbra, ma me dan nyɛ ma. 24Na mese hom dɛ, nkorɔfo no a wɔfrɛɛ hɔn no mu biara ronnsɔ m’edziban nnhwɛ.
Mbrɛ Wosi Yɛ Kraest Suanyi
(Matthew 10.37, 38)
25Na nyimpadodow pii nye no kɔree: na ɔdaan noho kaa kyerɛɛ hɔn dɛ, 26#Mat 10.37 Sɛ obiara ba mo hɔ, na oennkyir n’egya, nye ne na, nye ne yer, nye ne mba, nye no nuanom, nye ne nkyerɛbaa, nye nankasa no ho so a, orunntum nnyɛ mo suanyi. 27#Mat 10.38; 16.24; Mar 8.34; Luk 9.23 Na obiara a ɔnnsoa ne mbeamudua na onndzi m’ekyir no, onnkotum ayɛ mo suanyi. 28Na hom mu woana, na ɔpɛ dɛ ɔtow abantsentsen, na onndzi kan nntsena ase, na ommbu ho nkontaa, dɛ ɔwɔ dza ɔdze botum ewie anaa? 29Bɛyɛ na oenya ato fapem no, sɛ oenntum ennwie a, hɔn a wohu nyina bɛhyɛ ase esi no atwetwe dɛ, 30Nyimpa yi hyɛɛ ase dɛ orisi, naaso oenntum ennwie. 31Anaaso ɔhen bɛn na ɔrokɔ dɛ ɔnye ɔhen obi rokɔko a, onndzi kan nntsena ase na ɔmmfa apam dɛ obotum dze ɔpedu ekehyia nyia ɔdze ɔpeduonu reba no do no anaa? 32Annyɛ dɛm a, ɔbaako no da ho wɔ ekyirekyir no, otu abɔfo ma wɔkɛserɛ nsiesie. 33Dɛmara so na hom mu biara a ɔnnkɔpow dza ɔwɔ nyina no, runntum nnyɛ mo suanyi.
Nkyen Tabrabaa
(Matthew 5.13; Mark 9.50)
34 Nkyen dze, oye; naaso sɛ nkyen no ayew ne dɛw a, wɔdze ebɛnadze bɛma ayɛ nkyen bio? 35Ɔmmfata asaase anaa suminado, na wɔtow gu. Nyia ɔwɔ aso a ɔdze tsie no, ma ontsie.
Pilihan Saat Ini:
Luke 14: MFANBRPC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Mfantse Bible © Bible Society of Ghana, 2011.
