Luke 21
21
Ɔbaa Kunafo no no Ntoboa
(Mark 12.41-44)
1Na ɔmaa n’enyi do hun ahonyafo a wɔrotow hɔn ayɛyɛdze gu sikakorabea no mu. 2Na ohun kunafo hianyi bi so a ɔbɔtoow mpɛsewamba ebien guu mu. 3Na ɔsee dɛ, Nokwar mese hom dɛ okunafo hianyi yi dze pii ebogu mu akyɛn hɔn nyina. 4Na yinom nyina dza wɔwɔ ma abor hɔn do na wɔdze bi ebogu ayɛyɛdze no mu, na oyi dze, ofi ne hia mu dze n’asetsena a ɔwɔ nyina ebogu mu.
Jesus Ka Asɔrfi no ne Nsɛɛe ho Asɛm
(Matthew 24.1, 2; Mark 13.1, 2)
5Na binom reka asɔrfi no ho asɛm, mbrɛ woesi dze abo fɛɛfɛw nye adzekyɛdze ahyehyɛ mu no, ɔsee dɛ, 6Ndzɛmba yi a hom hu yi, nda bɛba a wonnkegya ɔbo kor a ɔda kor do wɔ mu a wonnkodwuruw egu famu.
Nsɛnkyerɛdze nye Ahohiahia
(Matthew 24.3-14; Mark 13.3-13)
7Na wobisaa no dɛ, Kyerɛkyerɛnyi, dabɛn na yinom bɛyɛ hɔ, na yinom rebɛba mu a, n’asɛnkyerɛdze nye dɛn? 8Na ɔsee dɛ, Hom nhwɛ yie amma wɔaanndaadaa hom: na dodowara bɛba wɔ me dzin mu dɛ, Emi nye no, na, Aber no abɛn: mma hom nndzi hɔn ekyir. 9Na sɛ hom tse ɔko nye basabasayɛ nka a, mma ɔnnyɛ hom hu; na otwar dɛ yinom dzi kan ba, naaso ewiei no dze, nna onndurii.
10 Nna ɔsee hɔn dɛ, Ɔman bɔsoɛr ɔman do, na ahenman asoɛr ahenman do, 11na asaasewosow kɛse bɛba, na ɔkɔm nye ɔyardɔm bɛba mbeambea, na dza ɔyɛ hu nye nsɛnkyerɛdze akɛse befi sor aba.
12 Na dza odzi yinom nyina kan nye dɛ wɔdze nsa bosuo hom mu, na wɔahaw hom, dze eyi hom akɔ nhyiamudan mu nye efiadze, na wɔdze hom aba ahemfo nye ambradofo enyim wɔ me dzin ntsi. 13Iyi bɛma hom enya kwan edzi mo ho dase. 14#Luk 12.11, 12 Dɛm ntsi hom mfa nto hom tsirmu mu dɛ hom nnkedzi kan adwendwen dza hom dze beyi hom ano ho: 15osiandɛ emi na mebɛma hom ano nye nyansa a hom atamfo nyina runntum nngyina enyim, eso worunntua ano. 16Na awofo, nye nuanom, nye ebusuafo, nye anyɛnkofo beyi hom ama, na wɔama woeeku hom mu binom, 17na nyimpa nyina bɛtan hom wɔ me dzin ntsi. 18Naaso hom tsinhwi kor mpo nnkɛyew. 19Hom abotar mu na hom bɛgye hom akra.
Jesus Hyɛ Jerusalɛm ne Nsɛɛe ho Nkɔm
(Matthew 24.15-21; Mark 13.14-19)
20 Na sɛ hom hu Jerusalɛm dɛ dɔm etwa ho ehyia a, nna hom nhu dɛ ne nsɛɛe abɛn. 21Ɔno na hɔn a wɔwɔ Judea nguan nkɔ nkokwaa do, na wɔmma hɔn a wɔwɔ mu no mfi mu nkɔ, na mma hɔn a wɔwɔ haban mu no nnkɔ mu. 22#Hos 9.7 Na iyi nye awerdzi nda, ma dza wɔakyerɛw nyina aaba mu. 23Na hɔn a wɔafa yafun, nye hɔn a wɔma enumfo wɔ nda no mu ndue! Osiandɛ atseetsee kɛse bɛba asaase no do, na ebufuw bɛba ɔman no mu. 24Na wɔbɔtotɔ nkrantsee anomu, na wɔafa hɔn ndɔmmum akɔ aman nyina do, na amanamamfo betsiatsia Jerusalɛm do ekodu dɛ amanaman aber no bɔso.
Nyimpa Ba no ne Mbae
(Matthew 24.29-31; Mark 13.24-27)
25 #
Isa 13.10; Eze 32.7; Joel 2.31; Nyi 6.12, 13 Na nsɛnkyerɛdze bɛba ewia nye bosoom nye nworaba mu, na asaase do amanaman ho bɛhyehye hɔn kɛse, ɔnam po gyigyeegye nye asorɛkye a oruhur ntsi; 26nyimpa bɔtɔ akɔtɔmborɔnsa wɔ hu nye ndzɛmba a hɔn enyi tua dɛ ɔreba wiadze do ntsi, na ɔsor etum bɔwosow. 27Ɔno na wobohu nyimpa Ba no dɛ ɔreba wɔ nsuwusiw do, wɔ ahoɔdzen nye enyimnyam kɛse mu. 28Na sɛ ndzɛmba yi hyɛ ase reba a, ɔno na hom nhwɛ sor, na hom mma hom tsir do, osiandɛ hom ber a wɔdze bɔpon hom no edu.
Adɔmbadua no ho Esuadze
(Matthew 24.32-35; Mark 13.28-31)
29Na obuu hɔn bɛ dɛ, Hom nhwɛ adɔmbadua nye ndua nyina: 30sɛ wɔfefɛw na hom hwɛ a, nna homankasa hom nyim dɛ ɔhyewber abɛn. 31Dɛmara na hom so, sɛ hom hu dɛ iyinom rokɔ do a, hom nhu dɛ Nyankopɔn ahendzi no abɛn. 32Nokwar mese hom dɛ, Mbasantsen yi runntwa mu nnkɔ gyedɛ ne nyina ayɛ hɔ ansaana. 33Ɔsor nye asaase botwa mu akɔ; naaso me nsɛm dze, wonnkotwa mu akɔ.
Hom Nweɔn
34 Na hom nhwɛ homho yie, mma etumfursɛm nye asabow nye ɔbra yi ho dadwen aannhyɛ hom akoma do, mma nda no eemmbefir hom awora dɛ mbrɛ efir huan awerɛfir mu: 35na da no bɛba hɔn a wɔtse asaase do no nyina do. 36Mbom hom nweɔn daa, na hom nsɔr ama hom eenya tum dɛ hom dze befi ndzɛmba yi a ɔbɛba yi nyina nsa, na hom etum egyina nyimpa Ba no enyim.
37 #
Luk 19.47
Na adzekyee biara nna ɔrekyerɛkyerɛ wɔ asɔrfi mu, na anadwe biara nna oepue akɛtsena bepɔw a wɔfrɛ no Ngo Bepɔw do. 38Na nkorɔfo no nyina baa ne nkyɛn anapaatu wɔ asɔrfi mu, dɛ woribetsie no.
Pilihan Saat Ini:
Luke 21: MFANBRP
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Mfantse Bible © Bible Society of Ghana, 2011.
