MATIYUT 2
2
It aap oonegen wundi wage minggim alome nen wogogwaarak wone
1Aap Keroret endagembogut wonage kagak, Yetut o Yureya tini Mbe'lekem aret nda'nagagerak me, aap wone mbininggwa oonegen alome nen o Yerutalem wogo nogogwaarik, 2”Aap Yakuri inowe endagembogut nda'nagaarak nogo eebe ngge o? Oonegen alome nen at elaaluguragan wunggerak ninigen kogo nogoorik, ayuk wurogo alut eeruwok nduk wogo o.”
3Yorogo mbareegwa, aap endagembogut Keroret nogo, aruk konembunuk, agabiti nen aganak nugege mbareegi, it aakumi o Yerutalem menggaarak abok aret inom inaganak wareegerak. 4Wake mbareegi, at Keroret nogo nen it aap Yakuri Ala unde inoweewi inom, it Ala wone liiru mbanak unde inom, kuwak eeppiige nagagirik, ”At Ala nen leenogo mippereegerak Mesias nogo, o nggeeme nda'narigin liiru mbanak kogo monggotak o?” yinuk, 5-6kin wogiige mbareegi, it nen at yogo logonet, ”At aap Ala wone yo'nirage menggerak nabi nogo nen,
Kit aap Mbe'lekem aap Yekura iname monggotak yi wae.
Kit kinawi Mbe'lekem nen aap wone unde an napuri aakumi
Iterali mendek inarum logokit nduk,
ambi nggigik togon mi'narigin me.
It aap Yekura inawi tini iyo'nggok wonogwe inenggela'me
o tini ambi Mbe'lekem ti mbuuluk me, meek kinombariyak lek o,
yinuk, liiru mbaneegerak ndak-ndak, at Keritut nogo o Yureya tini Mbe'lekem time aret nda'narigin mbako o,” yinuk, yoreegwaarak.
7Yogo mbareegwa, at Keroret nogo nen it aap wone mbininggwa mbabok aret wiiragagerak wogo mbareegwa, ”Mandenom laaluguragan tena'me agaarak kogotak? Liirogon yo'ninip o,” yinuk, kin wogiige nagagirik, 8o Mbe'lekem nappiige logonet, ”Kit elege nogo kinigen pik-pak kwaari nanip o. Ndi, eebe kwaakkologo logomonggotik kenok, an kunduk, ayuk wurogo alut eeri naakit nduk, yo'niri wa'nu o.”
9Yorage mbareegi, inaruk konembunuk, tu paga nogo logonet, ”Ie! Laaluguragan oonegen wundi wage minggim alome time kogoorak nogo, nage yi kaanip o,” yinuk, yogwi iigak, aa'nduk nage nagagirik, elege ndarak nogo wonage me irimbaga taati aret puk ari nagagerak. 10Ndi, it nen laaluguragan nogo inigen kogo nogogwaarik, iniki ale'nggen nggwok mbarit nogogwaarak. 11Nogo nogogwaarik, oome unggunuk, elege nogo agalo Mariya imbirak iigo nogogwaarik, ineebe tebe yinuk, elege nogo ayuk wureegwaarak. Ayuk wuko nogogwaarik, inamendek obeelom lombok mbuti emas inom, yibinggami inom, eyo mut amburu inom, kilirogo wogoreegwaarak.
12Wogo'nuk, nogo yugwi me, at Ala nen, ”Aap Keroret wonage me tu kiniyok paga nagup o,” inabi paga kurumbi yorage mbareegi, it nen tu alik paga iname nogogwaarak.
Kole mbaganit o Metit nogogwaarak wone
13Iname nogwe iigak, ne ambi paga Yutup abi kage logonet, Ala ayonggo mbogut paga nege menggerak melaikat ambi nen at owagam kin ari wage nagagirik, yoge logonet, ”At Keroret nen elege yi wariyak nduk kwaake me, mi'na'nuk, elege yi agalo imbirak wogoret o Metit time kole nanip o. Namonggotak time wonogwe me, an awo yokkira waga'lek neenok, taati aret logomunggup o,” yinuk, abi paga yoge kagagerak.
14Abi paga yoge mbareegi, at Yutup nogo oonikiya aret mi'na'nuk, elege nogo agalo imbirak wogoret o Metit nage nagagirik, 15at Keroret nogo awo kangga'lek kenok, time aret puk wonogogwaarak.
Ti eereegwaarak nogo ti, ninogoba endagembogut nen yoge kagak, aap Ala wone yorage nagagerak nabi ambi nen yorage logonet, ”Naput o Metit time nen woraawak nduk, wiireegirak o,” yinuk, yoragagerak nogo, a'me lik yuwak nduk, eereegwaarak.
Wologwe mbuulogwe inoorit nogogwaarak wone
16At Keroret nogo nen, ”It aap wone mbininggwa nogo nambokan laganggaarak iigi o,” yinuk, anini wu agan nage logonet, it aap wone mbininggwa nen, ”Laaluguragan o ti eyom paga aret kogoorak o,” yinuk, liirogon yoreegwaarak me, at awuri nen o Mbe'lekem enaaganambokan nogome wologwe mbuulogwe ndarak iigak, 2 tahun aago inom, eeka'lek inom, tigitogon inoorit nawak nduk, nappiyareegerak.
17Ti eereegerak nogo ti, at Ala wone yorage nagagerak nabi ambi Yeremiya nogo nen ari logonet,
18”O Arama time inoone yogwe ninaruk konenggoorak ti,
leenggu maakwi, inoone nggwok paga ai-au yogwe,
eekwi ti, at kwe Arakin aagalogwe ineebe lek agaarak me,
Le mbannaburak mondok neebi o, mbake logonet,
inale ari ti aret o,”
yinuk, wone yereegerak nogo, o ti eyom aret a'me lik yereegerak.
O Metit nen iniyok paga wogogwaarak wone
19Ti'nuk, aap Yutup nogo awo o Metit time wonage me, at Keroret nogo kangge mbareegi, ne ambi abi paga kage logonet, Ala ayonggo mbogut paga nappiige menggerak melaikat ambi nen at owagam kin ari wage nagagirik, yoge logonet, 20”It aap elege wariyak nduk, kwaarit nagaarak nogo muk kambit nagaarak me, kat mi'na'nuk elege nogo agalo imbirak wogoret aap Iterali iname nak o.” 21Abi paga yoge mbareegi, mi'na'nuk, elege nogo agalo imbirak wogoret aap iterali iname wagagerak.
22Ndi, ”At Arikilut ogoba Keroret obaane'me o Yureya aap endagembogut wonage o,” yinuk, yogwe nogo at Yutup aruk konengge nagagirik, time noorak agabiti mbake me, Ala nen, ”O Yureya time nagun o,” abi paga kurumbi yoge mbareegi, o Nggalileya time aret nagagerak. 23Nage nagagirik, o tini endage Nataret aret puk ari nagagerak. Ti nagagerak nogo ti, it Ala wone yorogo nogogwaarak nabi-nabi nen, ”At aap Nataret mendek aret yogo logogun o,” yinuk, yereegwaarak nogo, a'me lik yuwak nduk, time aret puk ari nagagerak.
Pilihan Saat Ini:
MATIYUT 2: WNO
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
