TEALIAN 2
2
1Maka lapamo lapa pasitakayo sasaibino kodunia tukon antoko. 2#Ibr. 4:4, 10 #Tob. 20:11 Doi oloyo kopituno ko Mian Bisa lapamo alapayo dona limangoo, maka yana balasanaango. 3Maka yana balakaatiomo dooloyo kopitunodoo tukon yana tealikene oloyo motangalaas, sabab doi oloyodoo ko Mian Bisa balasanaang salataa yana alapayo kona limang. 4Doiyamo kosalitano nadunia nia tukon antoko napinasitakaan.
Asi Eden
Salataa ko Temeneno Mian Bisa tealikene kotimbu tukon buta tukon sasaibino koantoko, 5akiyon nadaano kolibuang mosopii tukon akiyon nadaano kotatanaman doi dunia, sabab Mian Bisa akiyon nalubatene koudan tukon akiyon nadaano komian molimange butadoo. 6Bai kopaisu tambuuno liba luwedoi bilit tukon mbetokiiyo kobuta bunggono.
7 #
1Kor. 15:45
Doibundu ko Temeneno Mian Bisa mangala soisik kobuta yana kubaiyo teali meeng kobangkapi, maka supaikene koansaang momebee tuboan doi soongano buango lalomo; maka dobanggapidoo tubomo.
8Banggadudul ko Temeneno Mian Bisa kubaiyo koasi doi Eden, taalikon doi tolopot, tukon yana abese idoo dobanggapidoo molapamo yana kubaiyo. 9#Ink. 2:7, 22:2, 14 Ko Temeneno Mian Bisa tealikene sasaibino kokaliangano kokayung motambongan, mosaokene kosao-saono momonondok. Doi asidoo tanga-tangano tubomo kokayung momebee tuboan, tukon kayung momebee motoiyan kaliangano momonondok tukon mokulokis.
10Meeng kopaisu batango lomba luwedoi Eden mbetokiiyo doasidoo; tukon doi Eden tonggulungo dopaisudoo batango tongoboso teali sangkap kopangano. 11Komeengo kosambuno Pison; dopaisudoo lomba boilingiyo ko Hawila butano. 12Idoo talaat komosoni tulen tukon koidan langge-langge mobabangi mosusa kolaatano, tukon batu-batu motontilang. 13Paisunobatango koluano kosambuno Gihon; kopaisuno lomba boilingiyo ko Kus butano. 14Paisunobatango kotoluno kosambuno Tigris tukon lomba doi Asyur taalikon tolopot. Paisunobatango kosanggapo kosambuno Efrat.
15Doibundu ko Temeneno Mian Bisa abese dobanggapidoo doi Asi Eden sulano nalimange tukon pialayo doasidoo. 16Ko Mian Bisa bantile doi bangkapidoo, “Ikoo moola makaan doi sasaibino kokayung saono doi asi nia, 17alaasene doi kayung momebee mongotoiyan kaliangano momonondok tukon molokis. Kosaono aki namoola ikoo kaane; kalu ikoo kaane; ikoo mate doi oloyodoo koidan.”
18Maka ko Temeneno Mian Bisa bantile, “Aki namonondok kobangkapi natubo susuungo. Yaku naikon tealikene kotulano mopokokonoi sulano natomboniiyo.” 19Maka yana mangala buta soisik tukon kubaiyo sasaibino kokaliangano koiyayon doi lipu tukon iyayon doi dapang. Sasaibino Mian Bisa kanggiyo doi bangkapidoo sulano nakitayo sambu oila naikon komo bineekon doi iyayon-iyayonoo. Doiyamo kona luwean koiyayon doi lipu tukon iyayon doi dapang namalaatan sambu suwe-suwele. 20Bunomo doiya dobanggapidoo beena sambu doi sasaibino koiyayon doi lipu tukon doi dapang. Bai akiyo komeeng doi iyayonooila momoola teali tulano mopokokonoi sulano natomboniiyo.
21Maka ko Temeneno Mian Bisa kubaiyo dobanggapidoo moolo tomboosokon, tukon daano yana momoolo, ko Temeneno Mian Bisa liate komeeng kolisukoda bukuno luwedoi bangkapidoo butongo, maka tutupe kopakolo tukon sailo. 22Luwedoi lisukodoo ko Mian Bisa kubaiyo komeeng koboine, maka yana babayo doi bangkapidoo. 23Maka dobanggapidoo bantilo,
“Niamo yana, mian mopokakana tukon yaku –
bukuno luwedoi bukunggu, tukon sailo luwedoi sailonggu.
Kusombuikene yana boine, sabab yana inala luwedoi mamalane.”
24 #
Mat. 19:5; Mrk. 10:7-8; 1Kor. 6:16; Ef. 5:31 Doiyamo kosababpo komala-malane otinggale kotamano tukon tinano, tukon pomeenggon kona boloki, maka luailadoo teali meeng.
25Mala-malane tukon boinedoo talalau, bai yanila akiyon natoiyo komaa.
Pilihan Saat Ini:
TEALIAN 2: LAIBGZ
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk