San Mateo 6

Jesús ruleꞌe bi dica unri atti edá leri uteri ttu bixa len ca benni bittu te gueni

1’Gualudo cuidadu, bittu unle nu anca tsee aní lo benni sunruba qui iláquinna dequi lebiꞌi ancale benni runi nu anca tsee. Gansi anía runle nna tsa läga ute Tata guele do iyyabaaha nu tsee ralhale dhíle gue nu runle.

2’Larcala nna gansi chi betele ttu bixa len ca benni bittu te gueni, bittu tsequile udále tisa lo ca neda-na lhe lheꞌe ca yoꞌo atta rudheti ca benni Israel ca tisa gue Tata Do Iyyabaaha lhe attiba runi ca nu ni lo ni tisaba runcana dequi runcana nu anca tsee. Lacana runcana aná qui inne tsee benni guecani, ttiaca neti ria nna unnuharba anca nu tsee ralhacana dhicana. 3Ttiaca lu nna atti utelu ttu bixa len ca benni bittu te gueni, bittu aquinlu quixxiꞌenlu ni benni do tseeru lenluha. 4Sigába bete nu uteluha. Tata guele do iyyabaaha nna de rilánie nu run gatsiluha nna gutebe nu tsee ralhalu dhílu.

Jesús ruleꞌe gaxasná inne ca benni len Tata Do Iyyabaaha

(Lc. 11:2-4)

5’Lebiꞌi nna gansi chi rinnele len Tata Do Iyyabaaha, bittu unle atti runi ca nu ni lo ni tisaba runcana rinnecana len Ben-na. Lacana nna atti rinnecana len Tata Do Iyyabaaha, tsitsiba nu runcana riseꞌe ranicana lheꞌe ca yoꞌo atta rudhetiri ca tisa gue Ben-na lhe ca xitsi neda-na lhe qui iláni benni nu runcana. Neti ria le nna unnuhaba anca nu tsee ralhacana dhicana. 6Ttiaca lu nna atti innelu len Tata do Iyyabaaha, betaꞌala lheꞌe yoꞌo gueluha nna bottotte-na, atti unne belisa Tata gueri do iyyabaaha Benni tturbe due len lu lheꞌe yoꞌoha. Benniha nna de rilánie nu run gatsiluha nna gutebe nu tsee ralhalu dhílu.

7’Atti innele len Tata Do Iyyabaaha, bittu sattibelhaba eyequi dacabale odettile tisa nu chi unneleha, unle attiba run ca benni bittu ancabiaquinna Tata Do Iyyabaaha. Cumu lacana racaquinna dequi de rinnexxattacana nna iyienin Benniha guecani. 8Bittu unle atti run ca unná, cumu Tata guele do iyyabaaha nna atti deobali innábale len Ben-na, chila yue bixa reasinle. 9Lebiꞌi nna aní innále atti innele len Tata Do Iyyabaaha:

Tata guetu do iyyabaa,

ribequi xentu cuinalu cumu anca cuinalu Dios.

10Utá innabialu riꞌitu.

Beni qui nu runtu yies lo yu-ni acana nu raca lelu aca,

attiba raca iyyabaaha.

11Bete nu reasintu gotu ttu ttu sá.

12Uxí elha xen lasi gue nu lä anca tsee runtu lolu,

cumu anáguaba riꞌitu ridítu elha xen lasi gue ca nu runi nu lä anca tsee len riꞌitu.

13Bittu ugüelhalu ixúyietu untu nu lä anca tsee.

Bodilá riꞌitu lo ná nu xxegüiha.

[Cumu cuinalu nna satíaba ancalu Benni rinnabia lhe

Benni ra xxeni leni lhe Benni ralha cue xeni le ttu dia lii lhe. Amén.]

14’Cumu gansi lebiꞌi ridíle elha xen lasi gue nu rudhaca benni le, anáguaba Tata gueri do iyyabaaha, guadíguabe elha xen lasi guele. 15Ttiaca gansi lebiꞌi bittuba ridíle elha xen lasi gue nu rudhaca benni le, bittuguaba dhi Tata gueri do iyyabaaha elha xen lasi gue ca tulha guele.

Jesús ruleꞌe gaxasná dica unri atti utte ubina lheꞌeri

16’Lebiꞌi nna gansi chi rutte ubina lheꞌele, bittu unle qui tsanni lo nu runle, attiba run ca nu ni lo ni tisaba runcana dequi ancacana nu runi nu anca tsee. Lacana nna runcana aná qui ttedaani benni dequi rutte ubina lheꞌecani. Neti ria le nna unnuhaba anca nu tsee ralhacana dhicana. 17Ttiaca lebiꞌi nna gansi chi rutte ubina lheꞌele, gualquí lole lhe te xearu olhí iquile lhe 18qui bittu ttedaani ca benni lebiꞌi nna rutte ubina lheꞌele, sinuqui suntteba Tata guele do iyyabaaha Benni tturbe due len lebiꞌi yue gue nu runle. Benniha nna de rilánie nu run gatsileha nna gutebe nu tsee ralhale dhíle.

Jesús ruleꞌe gaxasná unri qui gatta elha tsee gueri iyyabaaha

(Lc. 12:33-34)

19’Bittu uttupaxxattale elha tsee guele yies lo yu-ni, cumu ni nna ruꞌubabacana lhe riꞌiyabacana cheni lhe ritaꞌaba ubana rilánan cana lhe. 20Nu unlale nna gualcua tsee elha tsee guele iyyabaaha atta bittu tsuꞌubacana, atta bittuguaba iꞌiya chenicana lhe bittuguaba aca gaꞌa ubana lhanan cana lhe. 21Cumu atta tua tsee elha tsee gueleha nna gue níaguaba rulaba lele.

22’Ca iyya lolha ancacana xiani rudani gue itúba cuerpu guelu. Gansi ca iyya lolha ancacana tsee, lania nna itúba cuerpu guelha duna lheꞌe xieni. 23Ttiaca gansi ca iyya lolha bittu anca tseecana, lania nna itúba cuerpu guelha duna lheꞌe chulha. Gansi nu dica aca xieni guelha nna chulhala ancana, titialiga chulha anca lhiꞌu lheꞌe lastoolu.

24’Läganu benni te aca gueni unna sina gue chupa ca nu banquinna na, cumu ttu nua aquinna gueni, attu nua nna utía di leni, o si udona tisa gue ttu nua, attu nua nna cuꞌu niꞌani. Larcala nna läga aca ixuule lo sina gue Tata Do Iyyabaaha nianna udogualele gattaxxatta guele.

Jesús ruleꞌe bittu ichacha iquiri gue nu reasinri

(Lc. 12:22-31)

25’Larcala nna rpea le: Bittu ichacha iquile gue nu gole lhe gue nu iꞌiyale lhe qui aca banle, niguaba gue nu ucule lhe. ¿Läba ganna dacarla elha naban guele atti nu role, aníaguaba cuerpu guele dacarla na attichula nu rucule? 26Gualgüia gue ca binni requi lo bea-na. Ca unná nna läga riguꞌucana xua, bittuguaba rolapacana lhe bittuguaba rigúa tsee guecani lhe. Läquiga de nua nna Tata gueri Benni do iyyabaaha gua rutebe nu ro ca unná. ¡Adílaba lebiꞌi dacarlale atti ca binni-na! 27¿Núle de ichachaba iquile nna unle isárule attu ura iqui de nu chi anca aca banle yies lo yu-ni?

28’Lebiꞌi nna ¿biacala richacha iquile gue nu ucule? Gualgüia gaxasná rixen ca iyya daa lheꞌe ca yu-na. Ca unná nna läga runcana sina, lä runguacana lari lhe. 29Ttiaca neti ria le, niba Salomón nu uca nu rinnabiaha, masquiba chi uttaxxatta gueni, tsa bittu udána ucu xo ruleꞌe tsee gueni qui uleꞌena atti ruleꞌe ca iyya-na. 30Gansi análi tsee runi Tata Do Iyyabaaha ruleꞌe ca iyya daa ca lo yu-na, ca nu nasá ralicana, uxxedilaba nna chi tsiacana lo gui, ¡läba ganna adírlaba tsee uni Ben-na len lebiꞌi, ca benni bittu chi ria tsee leni! 31Larcala nna bittu ichacha iquile gue bixa gole, niguaba gue bixa iꞌiyale lhe niguaba gue bixa ucule lhe. 32Cumu gue iyába unní richacha iqui ca benni bittu ancabiani Tata Do Iyyabaaha, ttiaca lebiꞌi nna gua doba Tata guele benni do iyyabaaha, lee nna guayuxeabe bixa reasinle. 33Lebiꞌi nna primero gualudo lele gualuni nu run ca benni rinnabia Tata Do Iyyabaaha. Benniha nna gutebe iyába nu reasinle. 34Larcala nna bittu ichacha iquile gue uxxeha, cumu uxxeha nna guacaba ichacha iquile gue nua. Ttuttu sába te nu ichacha iqui benni gueni.

Pilihan Saat Ini:

San Mateo 6: zaq

Sorotan

Berbagi

Salin